ၶွမ်ႊမတီႊလူလွမ်ၵုမ်းတူၺ်း လွင်ႈၵိုတ်းတိုၵ်းၼႂ်းမိူင်းတႆး (JMC-S) ပႆႇပဵၼ်ႁူပ်ႉထူပ်းဢုပ်ႇဢူဝ်းၵၼ်၊ ပိုတ်ႇ Viper group ဝႆႉသေတႃႉၵေႃႈ ပႆႇမီးလွင်ႈတိတ်းတေႃႇၵၼ်တႃႇသေႇ (ပုင်ႇမၢၼ်ႇ)၊ ယွၼ်ႉၽႂ်ၵေႃႈၵၢၼ်ၼမ်ႁင်းၽႂ်မၼ်း လႆႈငူပ်ႉငီႉၶၢဝ်းယၢမ်းတႃႇႁူပ်ႉထူပ်းၵၼ် ။

ပိူဝ်ႈတႃႇပၵ်းတႃပႂ်ႉတူၺ်းလွင်ႈၵိုတ်းတိုၵ်းၼႂ်းမိူင်းတႆးၼၼ်ႉ ယူႇတီႈ ၶွမ်ႊမတီႊလူလွမ်ၵုမ်းတူၺ်းၵၢၼ်ၵိုတ်းတိုၵ်း (JMC) သေ လႆႈႁူမ်ႈၵၼ်ၶွတ်ႇၽွတ်ႈမႃးဝႆႉ ၶွမ်ႊမတီႊလူလွမ်ၵုမ်းတူၺ်းၵၢၼ်ၵိုတ်းတိုၵ်း ၸၼ်ႉၸႄႈမိူင်း (JMC-S) ။ ၼင်ႇႁိုဝ်ၼႂ်းဝူင်ႈၵၢင် သိုၵ်းမၢၼ်ႈတပ်ႉမတေႃႇလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ႁႂ်ႈလႆႈႁူပ်ႉထူပ်းၵၼ်လႄႈသင်၊ ႁႂ်ႈလႆႈမီးလွင်ႈတိတ်းတေႃႇၵၼ်လႄႈသင်ၸိူဝ်းၼႆႉ ႁဵတ်းဝႆႉ Viper group ။ ၵူၺ်းၵႃႈ ႁဵတ်းဝႆႉယဝ်ႉသေတႃႉၵေႃႈ ယင်းပႆႇႁဵတ်းလႆႈလွင်ႈတိတ်းတေႃႇၵၼ် ပိူဝ်ႈတႃႇဢုပ်ႇဢူဝ်းၵၼ်။ လိူဝ်သေဢမ်ႇလႆႈတိတ်းတေႃႇၵၼ်တၢင်း Viper group ယဝ်ႉ ပၢင်ႁူပ်ႉထူပ်းဢုပ်ႇဢူဝ်းၵၼ်တၢင်းၼွၵ်ႈ မိူၼ်ၼင်ႇၼိုင်ႈလိူၼ်ၼိုင်ႈပွၵ်ႈၸိူဝ်းၼႆႉၵေႃႈ ယင်းပႆႇမီးပႆႇႁဵတ်းလႆႈ- ၸဝ်ႈႁၢၼ်ၸၢႆးဢူး ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢၼ်ပဵၼ်ၽူႈၶၢၼ်ပၢၵ်ႇၸုမ်းၸၢဝ်းၶိူဝ်း EAO ဢၼ်ပႃးဝႆႉၼႂ်း JMC-S လၢတ်ႈ ။


ၸဝ်ႈႁၢၼ်ၸၢႆးဢူး လၢတ်ႈၼႄဝႃႈ- တူၵ်းလူင်းလႆႈၸႂ်ၵၼ်ဝႆႉဝႃႈ တေႁဵတ်းပၢင်ဢုပ်ႇဢူဝ်းၵၼ်ၵႂႃႇၵူႈလိူၼ်။ ၵူၺ်းၵႃႈပိူဝ်ႈတႃႇ JMC-S တူင်ႉၼိုင်ၵႂႃႇလႆႈ ႁဵတ်းၵၢၼ်ၵႂႃႇလႆႈၼႆႉ ယွၼ်ႉႁႅင်းငိုၼ်းတွင်းဢမ်ႇတဵမ်ထူၼ်ႈ ၵေႃႈပိူင်ၼိုင်ႈ။ ထႅင်ႈပိူင်ၼိုင်ႈ ၵူၼ်းၸိူဝ်းၶဝ်ႈပႃးၼႂ်း JMC-S ၼႆႉၵေႃႈ ၶဝ်သမ်ႉမီးၵၢၼ်ငၢၼ်းတၢင်ႇဢၼ် ၽႂ်မၼ်းယူႇလႄႈ လႆႈငူပ်ႉငီႉၶၢဝ်းယၢမ်းတႃႇမႃးႁူပ်ႉထူပ်းဢုပ်ႇၵုမ်ၵၼ်၊ ယွၼ်ႉၼၼ် တႃႇတေႁဵတ်းပၢင်ၵုမ်ၵူႈလိူၼ်ၼႆႉၵေႃႈ ပႆႇၸၢင်ႈႁဵတ်း- ဝႃႈၼႆ ။


"ႁဝ်းၶႃႈလႆႈႁဵတ်းဝႆႉ Viper group ၊ ၵူၺ်းၵႃႈ ႁဝ်းၶႃႈဢမ်ႇပဵၼ်တိတ်းတေႃႇၵၼ်၊ ပေႃးဝႃႈ JMC-S ႁဵတ်းၵၢၼ်ၵႂႃႇလႆႈသေ ႁဵတ်းၸွမ်းပိူင်ၵၢၼ်မၼ်းၼႆတႄႉ မၼ်းတေၵႂႃႇၵမ်ႉထႅမ်တီႈ ၶၵ်ႉၵၢၼ်လွင်ႈငမ်းယဵၼ်တႄႉတႄႉဝႃႈဝႃႈၼႆ ၶႃႈႁဝ်းယုမ်ႇယမ်ၼင်ႇၼႆ"- ၸဝ်ႈႁၢၼ်ၸၢႆးဢူးလၢတ်ႈ ။


တီႈတိူင်းတၼိၼ်းတႃႇယီႇတႄႉ ႁဵတ်းလႆႈပၢင်ၵုမ်ၵူႈလိူၼ်ယူႇ၊ ပေႃးဝႃႈမီးလွင်ႈလၢၵ်ႇလၢႆးမႃးၼႆ ဢွၼ်ၵၼ်လၢတ်ႈတေႃႇၵၼ်တီႈၼႂ်း Viper group ၵမ်းလဵဝ်- ၽူႈၵွၼ်းတိူင်းသိုၵ်းတၼိၼ်းတႃႇယီႇ ၸွမ်ႁၢၼ်လိၼ်းဢွင်ႇလၢတ်ႈ ။


ဝၢႆးသေႁဝ်းၶႃႈၶွတ်ႇၽွတ်ႈဝႆႉ JMC-S ယဝ်ႉၼႆႉ တီႈတိူင်းတၼိၼ်းတႃႇယီႇၼႆႉ ပၢင်တိုၵ်းၵေႃႈဢမ်ႇမီး၊ တီႈ Viper group ၼႆၵေႃႈႁဝ်းၶႃႈၵပ်းသိုပ်ႇတိတ်းတေႃႇၵၼ် (ပုင်ႇမၢၼ်ႇ) ၵႂႃႇယူႇတိၵ်းတိၵ်း။ မၢင်ပွၵ်ႈမၢင်လႂ်ယွၼ်ႉဝႃႈ သၼ်ယၢၼ်းၾူၼ်ႊဢမ်ႇလႆႈလႄႈ ဢမ်ႇတိတ်းတေႃႇၵၼ်လႆႈၵေႃႈမီးယူႇ။ တီႈတိူင်းတၼိၼ်းတႃႇယီႇၼႆႉ JMC-S ၼႆႉ ဢမ်ႇမီးလွင်ႈၶဵင်ႇတႃႉယႂ်ႇယႂ်ႇလူင်လူင်ၼင်ႇၵဝ်ႇ- ၸွမ်ႁၢၼ်လိၼ်းဢွင်ႇလၢတ်ႈ ။


ပေႃးၶွတ်ႇၽွတ်ႈဝႆႉ JMC-S ၼႆ ပေႃးဝႃႈသွင်ပႃႈသွင်ၾၢႆႇမီးမႃးပၼ်ႁႃၵၼ်မႃးၼႆ တီႈပၢင်ႁူပ်ႉထူပ်းဢုပ်ႇဢူဝ်း JMC ၼၼ်ႉ ဢွၼ်ၵၼ်တၢင်ႇလၢတ်ႈသေ ဢုပ်ႇၵုမ်ၵၼ်လႆႈ။ ပေႃးဝႃႈမီးပၼ်ႁႃလဵၵ်ႉၼွႆႉဢိတ်းဢွတ်းမႃးၼႆၵေႃႈ JMC ၸွႆႈၶဝ်ႈၵႄႈလိတ်ႈပၼ်လႆႈ။ ၵွပ်ႈၼၼ် ႁူမ်ႈၵၼ်ၶွတ်ႇၽွတ်ႈမႃး JMC-S ၼႆႉ မီးၽွၼ်းလီၸိူင်ႉၼႆ ။


တီႈမိူင်းတႆး လႆႈၶွတ်ႇၽွတ်ႈမႃး JMC-S မိူဝ်ႈလိူၼ်ၵျႅၼ်ႊၼိဝ်ႊရီႊ ဝၼ်းတီႈ 1 ပီ 2016 ။ ဝၢႆးသေၶွတ်ႇၽွတ်ႈမႃး JMC-S ယဝ်ႉ ၸုမ်းတပ်ႉသိုၵ်းလူင်ပွင်ၸိုင်ႈမၢၼ်ႈ တင်းတပ်ႉသိုၵ်းယိပ်းၵွင်ႈၵၢင်ႇၸၢဝ်းၶိူဝ်းၶဝ် လႆႈႁူပ်ႉထူပ်းၵၼ် တိုၵ်ႉမီးမႃး 4 ပွၵ်ႈ ။


ၼႃႈတီႈပုၼ်ႈၽွၼ်း JMC-S ၼႆႉ ပိူဝ်ႈတႃႇလူလွမ်ၵုမ်းတူၺ်း ငဝ်းလၢႆးၵၢၼ်ၵိုတ်းတိုၵ်းတူဝ်ႈမိူင်း ဢၼ်ပႃးဝႆႉ ၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်းတူဝ်ႈမိူင်း၊ ပိူင်တိုဝ်းၵမ်သိုၵ်း၊ လွင်ႈတပ်ႉပၢင်သဝ်း၊ လွင်ႈတိုဝ်းၵမ်ႁဵတ်းၸွမ်း မၢႆမီႈၵိုတ်းတိုၵ်း။ မိူၼ်ၼင်ႇလူလွမ်ၵုမ်းတူၺ်းဝႃႈ ၸွင်ႇႁဵတ်းၸွမ်းဢမ်ႇႁဵတ်းၸွမ်းၶေႃႈလႆႈၸႂ်ၵိုတ်းတိုၵ်း။ ထႅင်ႈပိူင်ၼိုင်ႈ ပေႃးဝႃႈမီးမႃးပၼ်ႁႃမႃးၼႆၵေႃႈ ဢွၼ်ၵၼ်ထတ်းသၢင်သေ ၸွႆႈၵႄႈလိတ်ႈပၼ် ။


မိူဝ်ႈလဵဝ် ဝၢႆးသေၶွတ်ႇၽွတ်ႈၶွမ်ႊမတီႊလူလွမ်ၵုမ်းတူၺ်းၵၢၼ်ၵိုတ်းတိုၵ်း ၸၼ်ႉမိူင်းႁူမ်ႈတုမ် (JMC-U) ယဝ်ႉ ၶွတ်ႇၽွတ်ႈထႅင်ႈ ၶွမ်ႊမတီႊလူလွမ်ၵုမ်းတူၺ်းၵၢၼ်ၵိုတ်းတိုၵ်း ၸၼ်ႉၸႄႈမိူင်း (JMC-S) ။ ဢၼ်လႆႈၶွတ်ႇၽွတ်ႈဝႆႉ တိုၵ်ႉမီး တိူင်းတၼိၼ်းတႃႇယီႇ၊ မိူင်းတႆး၊ မိူင်းယၢင်းၽိူၵ်ႇ၊ မိူင်းမွၼ်း၊ တိူင်းပႃႇၵိူဝ်ၸိူဝ်းၼႆႉ။ တီႈမိူင်းၶျၢင်းတႄႉ တိုၵ်းဢုပ်ႇဢူဝ်းၵၼ် ပိူဝ်ႈတႃႇၶွတ်ႇၽွတ်ႈယူႇ- ၼႆယဝ်ႉ ။