လူင်ပွင်ၸိုင်ႈပိုၼ်ၽၢဝ်ႇ လိူၼ်ႈၶၢႆႉဝၼ်း ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်၊ ဢၼ်တေၸတ်းႁဵတ်းၽွင်း ႁၢင်လိူၼ်ၾႅပ်ႊၿိဝ်ႊရီႊၼႆႉ ၵႂႃႇလိူၼ်ၼႃႈသေတႃႉ ပိူဝ်ႈတႃႇႁၢင်ႈႁႅၼ်းဢုပ်ႇၵုမ်လွင်ႈၵၢၼ်မိူင်းၼၼ်ႉ ၸုမ်းတူင်ႉၼိုင်တူင်ႇဝူင်းၵူၼ်းၶဝ် တေၸတ်းႁဵတ်းပၢင်ၵုမ်လူင် CSOs Forum တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ။

ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ဢၼ်ဝႃႈတေၸတ်းၽွင်းႁၢင်လိူၼ်ၾႅပ်ႊၿိဝ်ႊရီႊၼႆႉ ယူႇတီႈလူင်ပွင်ၸိုင်ႈ ပိုၼ်ၽၢဝ်ႇဝႃႈ လိူၼ်ႈၶၢႆႉၵႂႃႇထႅင်ႈတၢင်းၼႃႈ 2 ဝူင်ႈ ဝႃႈၼႆသေတႃႉၵေႃႈ ပေႃးထိုင်မႃးဝၼ်းတီႈ 21/02/2017 ၼႆႉ ၸုမ်းတူင်ႉၼိုင်တူင်ႇဝူင်းၵူၼ်းၶဝ် တေၸတ်းႁဵတ်းပၢင်ၵုမ်လူင် ၸုမ်းတူင်ႇဝူင်းၵူၼ်း CSOs Forum ၊ ပိူဝ်ႈတႃႇႁၢင်ႈႁႅၼ်း ဢုပ်ႇၵုမ်ၵၼ်လွင်ႈၵၢၼ်မိူင်းယူႇ။ ယွၼ်ႉပိူဝ်ႈဝႃႈမိူဝ်ႈဢွၼ်ၼႃႈၼႆႉ ပၢင်ၵုမ်လူင်ၵၢၼ်မိူင်း ၸၼ်ႉၸိူဝ်ႉၸၢတ်ႈၶျၢင်းၼၼ်ႉ တၢင်းလူင်ပွင်ၸိုင်ႈၶဝ် လႆႈသင်ႇၵိုတ်းဝႆႉၵမ်းၼိုင်ႈသေတႃႉၵေႃႈ ၽိူဝ်ႇထိုင်လိူၼ်ၼႆႉမႃးၵေႃႈ ၶိုၼ်းပၼ်ဢၼုၺၢတ်ႈ ၸတ်းႁဵတ်းယဝ်ႉ။ ၵွပ်ႈၼၼ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ၼႆႉ လႆႈလိူၼ်ၶၢႆႉဝၼ်းၶၢဝ်းယၢမ်း ၸတ်းႁဵတ်းၵႂႃႇၼႂ်းလိူၼ်တေမႃး- ၸဝ်ႈသိုၵ်းလူင် ၶုၼ်ႇဢူၵ်ႉၵႃႇ ၽူႈၶဝ်ႈၸုမ်း UPDJC လၢတ်ႈတီႈ RFA ၶဝ်လႆႈဢွၵ်ႇၶၢဝ်ႇဝႆႉၼင်ႇၼႆ ။


ပၢင်ၵုမ်ႁၢင်ႈႁႅၼ်း ၸုမ်းတူင်ႇဝူင်းၵူၼ်း တႃႇတေဢုပ်ႇၵုမ်ၵၼ် ၸၼ်ႉၸိုင်ႈမိူင်းၼႆႉ တေၸတ်းႁဵတ်း တင်ႈတႄႇဝၼ်းတီႈ 21-23/02/2017 ၶၢဝ်းတၢင်း 3 ဝၼ်း တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ဝၢႆးသေၼၼ်ႉ တေၸတ်းႁဵတ်းပၢင်ၵုမ် ၸုမ်းတူင်ႉၼိုင်တူင်ႇဝူင်းၵူၼ်း CSOs Forum ပတ်းပိုၼ်ႉၸိုင်ႈမိူင်း ဝၼ်းတီႈ 24-25/02/2017 တီႈၼေႇပျီႇတေႃႇ ။


ၵဵဝ်ႇၵပ်းပၢင်ၵုမ်ဢၼ်တေၸတ်းတီႈၼေႇပျီႇတေႃႇၼၼ်ႉ ဢူးမိၼ်းဢွင်ႇထူး ၶွမ်ႊမတီႊငဝ်ႈငုၼ်းၸုမ်း တူင်ႇဝူင်းၵူၼ်း CSOs Forum ဢၼ်တေဢုပ်ႇၵုမ်ၵၼ် ၵဵဝ်ႇၵပ်းပတ်းပိုၼ်ႉၸိုင်ႈမိူင်းၼၼ်ႉ လၢတ်ႈဝႃႈ- ပၢင်ၵုမ်ၼႆႉ တေဢမ်ႇဢုပ်ႇၵုမ်ၵၼ်ၵႂႃႇ ၸွမ်းႁူဝ်ၶေႃႈလႂ်ႁူဝ်ၶေႃႈၼၼ်ႉ ၸိူင်ႉၼင်ႇႁဵတ်းတီႈၸႄႈမိူင်း၊ တေလႆႈဢုပ်ႇၵုမ်ၵၼ်ၵႂႃႇ ၸွမ်းၼင်ႇ UPDJC ၶဝ်တမ်းဝၢင်းဝႆႉပၼ်ၼၼ်ႉၵူၺ်း။ ဢၼ်ၶဝ်တမ်းဝၢင်းဝႆႉပၼ်ၼၼ်ႉ ႁူဝ်ၶေႃႈမၼ်းမီးပၢႆးမၢၵ်ႈမီး၊ တူင်ႇဝူင်းၵူၼ်း၊ ၼႃႈလိၼ်လႄႈ သိင်ႇဝႅတ်ႉလွမ်ႉ ပႃႈတႂ်ႈႁူဝ်ၶေႃႈ 3 ဢၼ်ၼႆႉၵူၺ်း ။


ၵွပ်ႈတေလႆႈဢုပ်ႇၵုမ်ၵၼ်ၵႂႃႇ ၸွမ်းၼင်ႇႁူဝ်ၶေႃႈၶဝ်တမ်းဝၢင်းဝႆႉပၼ်ၵူၺ်းလႄႈ ပၢင်ၵုမ်ဢၼ်တေမႃးၼႆႉ ယိူင်းဢၢၼ်းတႃႇႁႂ်ႈလႆႈလွင်ႈၽွမ်ႉႁူမ်ႈၵၼ်၊ ၼႂ်းၵႄႈတူင်ႇဝူင်းၵူၼ်း ၸုမ်းၼိုင်ႈလႄႈၸုမ်းၼိုင်ႈ၊ ၸႄႈမိူင်းၼိုင်ႈလႄႈၸႄႈမိူင်းၼိုင်ႈ၊ တႃႇလႆႈလွင်ႈငမ်းယဵၼ် ၸိူဝ်းၼႆႉ။ ၵွပ်ႈဝႃႈလွင်ႈၸိူဝ်းၼႆႉ မၼ်းပဵၼ်ဢၼ်လမ်ႇလွင်ႈတွၼ်ႈတႃႇၸုမ်းတူင်ႇဝူင်းၵူၼ်းတႄႉတႄႉ။ ၵွပ်ႈၼၼ်လႄႈ တၵ်းတေလႆႈႁၢင်ႈႁႅၼ်းၵႂႃႇ ႁႂ်ႈမၼ်းၶႅမ်ႉၶႅမ်ႉ၊ ႁႂ်ႈမၼ်းလီလီ-ဝႃႈၼႆ ။


ဢူးမိၼ်းဢွင်ႇထူး လၢတ်ႈထႅင်ႈဝႃႈ- ပၢင်ၵုမ်ဢၼ်တေၸတ်းႁဵတ်းၼႆႉ တူဝ်တႅၼ်းတွၼ်ႈတႃႇ ၸုမ်းတူင်ႉၼိုင် တူင်ႇဝူင်းၵူၼ်း CSO ႁင်းၶေႃၶေႃ ဢမ်ႇမီး။ ၵွပ်ႈၼၼ် ၼင်ႇႁိုဝ်တေလႆႈၶေႃႈလႆႈၸႂ်၊ ၶေႃႈၶၢၼ်ပၢၵ်ႇၵူၼ်းမိူင်း ၸိုၼ်ႈၸၢင်ႇ၊ ၼင်ႇႁိုဝ်တေပႃးၵၢင်ၸႂ်ၸုမ်း CSOs ၶဝ် ဢၼ်ၶႂ်ႈပဵၼ်ၶႂ်ႈႁဵတ်းသၢင်ႈၸိူဝ်းၼၼ်ႉ တေလႆႈဢုပ်ႇဢူဝ်းၵၼ်ၵႂႃႇ- ဝႃႈၼႆ ။


ယူႇတီႈၸုမ်းတူင်ႉၼိုင်တူင်ႇဝူင်းၵူၼ်း CSO သေ လႆႈယွၼ်းဝႆႉ ၽူႈတၢင်တူဝ်တႃႇ CSO ၸဵမ်မိူဝ်ႈပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ပွၵ်ႈၵမ်းဢွၼ်တၢင်း၊ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉ ယင်းပႆႇမီးပႆႇလႆႈ။ တေလႆႈၶဝ်ႈပႃး ၸွမ်းၼင်ႇၼႂ်းလိၵ်ႈၵိၼ်ၵႅၼ်ႇ ၵၢၼ်ၵိုတ်းယိုဝ်းတူဝ်ႈမိူင်း NCA တႂ်ႈႁူဝ်ၶေႃႈဢၼ်မီးဝႆႉဝႃႈ ၽူႈထုၵ်ႇလီၶဝ်ႈပႃးၼၼ်ႉၵူၺ်း ။


ယူႇတီႈပတ်းပိုၼ်ႉမိူင်းတႆးသေ ဢၼ်တေလႆႈၶဝ်ႈၵႂႃႇဢုပ်ႇၵုမ်ၼႆႉ ပဵၼ်ပႃႈတႂ်ႈႁူဝ်ၶေႃႈ ၽူႈထုၵ်ႇလီၶဝ်ႈပႃး။ တူဝ်တႅၼ်းၸုမ်းတူင်ႉၼိုင်တူင်ႇဝူင်းၵူၼ်း တေလႆႈၶဝ်ႈပႃး 49 ၵေႃႉ၊ တူဝ်တႅၼ်းၸုမ်းၼၢင်းယိင်း 24 ၵေႃႉ ။


ၵူဝ်ႇဝိၼ်းထေႇၵွင်းမျၢတ်ႉ ၽူႈၶဝ်ႈၶွမ်ႊမတီႊ CSOs Forum ၸိုင်ႈတႆးပွတ်းၸၢၼ်း လၢတ်ႈဝႃႈ- တီႈပၢင်ၵုမ် ဢၼ်တေမႃးၼႆႉ မိူၼ်ၼင်ႇႁူဝ်ၶေႃႈၶူဝ်းၶွင်ၾိင်ႈတိုၼ်းသၽႃႇဝၼႆႉ ဢၼ်ၸုမ်း CSO ၶဝ်လႆႈယိပ်းၼႆႉ ဢမ်ႇပၼ်ဢဝ်ၶဝ်ႈဢုပ်ႇၵုမ်ၵမ်းသိုဝ်ႈ။ ၵွပ်ႈၼၼ် တေလႆႈႁၼ်ဝႃႈၶဝ်ႁႄႉႁၢမ်ႈဝႆႉ CSO ၼမ်၊ ဢမ်ႇပၼ်လွင်ႈ ထၢင်ႇႁၢင်ႈလွတ်ႈလႅဝ်း ၼႂ်းၵၢၼ်လၢတ်ႈၸႃ။ ၵွပ်ႈၼၼ်လႄႈ ဢၼ်ၸုမ်း CSO ၶဝ်ဢုပ်ႇၵုမ်ၵၼ်သေ တေတၢင်ႇလၢတ်ႈထိုင် တီႈၼေႇပျီႇတေႃႇၵမ်းၼႆႉ ၶေႃႈတၢင်ႇလၢတ်ႈၸုမ်း CSO တေၽႅဝ်ၵႂႃႇတၢင်းလႂ်၊ UPDJC သမ်ႉတေဢဝ်ၵႂႃႇတၢင်ႇလၢတ်ႈပၼ်ၸိူင်ႉႁိုဝ်ၸိူဝ်းၼႆႉ ၶေႃႈမုလ်းတႄႉတႄႉမၼ်း ဢမ်ႇပႆႇလႆႈႁူႉ- ဝႃႈၼႆ ။


ၸုမ်း CSOs Forum ၼႆႉဢိင်ၼိူဝ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ၼႄႉၼမ်းသေ ၵေႃႇတင်ႈမႃးၽွင်း ႁၢင်လိူၼ်မေႊ 2016 ၊ ပိူဝ်ႈတႃႇႁႂ်ႈမီးၸုမ်းတၢင်တူဝ် CSO သေ ၶဝ်ႈဢုပ်ႇဢူဝ်းၼႂ်းၵၢၼ်မိူင်းလႆႈ။ လိူဝ်သေၼၼ်ႉ လႆႈပၼ်ပုၼ်ႈၽွင်းဢူးၼၢႆႇငၢၼ်ႇလိၼ်း ဢၼ်ပဵၼ်ၽွင်းလူင်ၾၢႆႇတူင်ႇဝူင်းၵူၼ်း ၽူႈၶဝ်ႈၸုမ်းလူင်ပွင်ၸိုင်ႈ တိူင်းတႃႈၵုင်ႈဢွၼ်ႁူဝ်။ ၸုမ်း CSO ၼႆႉ ပတ်းပိုၼ်ႉၸိုင်ႈမိူင်း မီးၸုမ်းဢွၼ်ႇၸုမ်းဢိတ်းတင်းမူတ်းမွၵ်ႈ 1,200 ပၢႆၸုမ်း။ ၼႂ်းၼၼ်ႉ မႃးၸႅၵ်ႇႁဵတ်းၸုမ်းၼႅင်ႈသၢၼ် 24 ၸုမ်း၊ ပိူဝ်ႈတႃႇၶဝ်ႈႁူမ်ႈပၢင်ၵုမ်ၵၢၼ်မိူင်းၼႆႉ လႆႈႁဵတ်းပၢင်ၵုမ်မႃး 20 ပွၵ်ႈပၢႆယဝ်ႉ ။