ဢိင်ၼိူဝ်ၸဝ်ႈၼႃႈတီႈပလိၵ်ႈထႆး ၶဝ်ႈၵူတ်ႇထတ်းလၢၼ်ႉမိပ်ႇၼူတ်ႈ တီႈမိူင်းၵွၵ်ႇ ၸိုင်ႈထႆး တီႉၺွပ်းလႆႈပႃး ၵူၼ်းမိူင်းႁူမ်ႈတုမ် ဢႃယုတႅမ်ႇလိူဝ်18ပီဝႆႉၼၼ်ႉသေ ၸၢႆးပိူင်းၸဝ်ႈၼႃႈ တီႈၾၢႆႇမၢႆမီႈ ႁႅင်းၵၢၼ်ယၢၼ်မိူင်းၾၢင်ႉထိုင်ပီႈၼွင်ႉၵူၼ်းမိူင်းတႆးၵူႈၵေႃႉ။

ၼႂ်းမိူင်းၸိုင်ႈထႆးၼႆႉ မီးပၵ်းပိူင်တွၼ်ႈတႃႇႁႅင်းၵၢၼ်ယူႇ ႁႄႉႁၢမ်ႈဢမ်ႇႁႂ်ႈလုၵ်ႈဢွၼ်ႇဢႃယု18 လူင်းတႂ်ႈ ႁဵတ်းၵၢၼ် လွင်ႈႁဵတ်းၵၢၼ်ၵၢင်ၶမ်ႈ(ၶၢႆတူဝ်) ၼၼ်ႉၵေႃႈ ၼႂ်းပၵ်းပိူင်တႅမ်ႈဝႆႉၸႅင်ႈလႅင်းဝႃႈ ၽိတ်းပၵ်းပိူင်မၢႆမီႈ ၵွပ်ႈၼၼ်လႄႈ ပေႃးၸဝ်ႈၼႃႈတီႈ ထူပ်းႁၼ်ၸိုင် မီးတၢင်းၽိတ်း ၸွမ်းၼင်ႇ ပၵ်းပိူင်မၢႆမီႈ။


ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈႁႅင်းၵၢၼ်ယၢၼ်မိူင်း HRDF လၢတ်ႈဝႃႈ - “ပီႈၼွင်ႉမိူင်းႁူမ်ႈတုမ် ၵူႈၵေႃႉ ပေႃးဝႃႈတေမႃးႁဵတ်းၵၢၼ် ၼႂ်းမိူင်းထႆးၸိုင် ႁႂ်ႈလဵပ်ႈႁဵၼ်းတူၺ်းဝႃႈ ၵၢၼ်ဢၼ်လႂ်ဢၼ် ႁဝ်းႁဵတ်းလႆႈ ၵၢၼ်ဢၼ်လႂ် ဢၼ်ႁဝ်းဢမ်ႇႁဵတ်းလႆႈ ပေႃးႁူႉယဝ်ႉၵေႃႈ လိူၵ်ႈႁဵတ်းၵၢၼ်ဢၼ်ႁဝ်း ႁဵတ်းလႆႈၼၼ်ႉတေတိူဝ်းလီ ပေႃးႁဝ်းႁဵတ်းထုၵ်ႇမႅၼ်ႈ ၸွမ်းၼင်ႇပၵ်းပိူင်ဝၢၼ်ႈမိူင်းပိူၼ်ႈၸိုင် ပိူၼ်ႈၵေႃႈဢမ်ႇ ၸၢင်ႈမႃးဢဝ်တၢင်း ၽိတ်းသင်တီႈႁဝ်း ”ဝႃႈၼႆ။


မိူဝ်ႈဝၼ်းတီႈ 07/02/2017 ၼၼ်ႉၸဝ်ႈၼႃႈတီႈ ပလိၵ်ႈ၊သိုၵ်း ႁူမ်ႈၵၼ်လၢႆၾၢႆႇ ဢဵၼ်ႁႅင်း 50 ပၢႆ ၵႂႃႇၵူတ်ႇထတ်း တီႈသႅင်ႇ(လၢၼ်ႉ) ထႃႊရထိပ်ႊ ဢဵၼ်ႊတိူဝ်ႊထဵၼ်ႊမဵၼ်ႊ ဢၼ်မီးယူႇတီႈ ပႃႊၶျႃႊ ဢုထိတ်ႊ 19 ၶဵတ်ႇႁူၺ်ႈၶႂၢင် မိူင်းၵွၵ်ႇ ၸိုင်ႈထႆး။


သိုဝ်ႇၶၢဝ်ႇထႆး MGR ပိုၼ်ၽၢဝ်ႇဝႃႈ - မိူဝ်ႈၽွင်းၸဝ်ႈၼႃႈတီႈ ႁွတ်ႈထိုင်ၵႂႃႇၼၼ်ႉ ထူပ်းႁၼ်ၼၢင်း ယိင်း32ၵေႃႉ ပႂ်ႉႁပ်ႉတွၼ်ႈၶႅၵ်ႇယူႇ ။ ၼႂ်း32ၵေႃႉ ထႆး 13ၵေႃႉ၊ ၵူၼ်းမိူင်းႁူမ်ႈတုမ်16ၵေႃႉလႄႈ လၢဝ်း1 ၵေႃႉ ၊ၸၢဝ်းၶိူဝ်းၼႂ်းမိူင်းထႆး ဢၼ်ယူႇသၢပ်ႇသၼ်လွႆ (ပိုၼ်ႉတီႈသုင်)2ၵေႃႉ ၼႂ်းၼၼ်ႉ ပႃးဢွၼ်ႇယိင်း ဢႃယု18လူင်း တႂ်ႈ1ၵေႃႉ ပဵၼ်ၵူၼ်းမိူင်းႁူမ်ႈတုမ် - ဝႃႈၼႆ။
     

ၸွမ်ႁၢၼ်ပလိၵ်ႈ သုရၶျဵတ်ႊ လၢတ်ႈဝႃႈ- “ၸိူဝ်းပိုတ်ႇလၢၼ်ႉ ၵႃႉၶၢႆလႄႈသင်ၼႃႈၵၢၼ်သင်ၵေႃႈယဝ်ႉ တေဢမ်ႇလႆႈၸၢင်ႈ ၵူၼ်းႁဵတ်းၵၢၼ် ၸိူဝ်းဢႃယု18 ပီလူင်းတႂ်ႈ သင်ဝႃႈ ၸၢင်ႈၵူၼ်း ၸိူဝ်းဢမ်ႇမီးဝႂ် ဢႃယုဢမ်ႇထိုင်ၼႆၸိုင် တေမီးတူတ်ႈတၢမ်ႇ ၸွမ်းၼင်ႇမၢႆမီႈမိူင်းထႆးမီးၼၼ်ႉ”- ဝႃႈၼႆ။


ၾၢႆႇၵႅတ်ႇၵင်ႈ ပၼ်ႁႃၵူၼ်းၵႃႉၵူၼ်းတႄႉဝႃႈ - လွင်ႈလၵ်ႉလွမ်လွၵ်ႇဝွၼ်းဢဝ်ၼၢင်းယိင်းၸိူဝ်းယူႇ လႅၼ်လိၼ်ၶၢႆၶဝ်ႈမိူင်းထႆးမီးယူႇၵူႈဝၼ်း၊ လူင်ပွင်ၸိုင်ႈထႆးၵေႃႈ ၶတ်းၸႂ်သၢၼ်မိုဝ်းၵႄႈလိတ်ႈယူႇ - ဝႃႈၼႆ။