ႁူဝ်ပဝ်ႈလူင် RCSS/SSA ၸွမ်သိုၵ်းယွတ်ႈသိုၵ်း လၢတ်ႈတီႈပၢင်သပ်းၸႅင်ႈၶၢဝ်ႇ တေႃႇၽူႈသိုဝ်ႇၶၢဝ်ႇၼွၵ်ႈမိူင်းၶဝ် တီႈငဝ်ႈၸိုင်ႈလွႆတႆးလႅင်း ဝႃႈ RCSS ၼႆႉ ၸုၵ်းၼိူဝ်ၶႅင်ႈၶႃတူဝ်ၵဝ်ႇၵူၺ်း။ မီးလွင်ႈတိတ်းတေႃႇၵၼ်တင်း မိူင်းၶႄႇယူႇ ၵွပ်ႈပဵၼ်မိူင်းႁိမ်းႁွမ်းၵၼ်၊ ၵူၺ်းၵႃႈ ဢမ်ႇယူႇတႂ်ႈဢေႃးၸႃႇမိူင်းလႂ် ။


မိူဝ်ႈဝၼ်းထီႉ 07/02/2016 မီးပၢင်ပွႆးၶုၵ်းထူပ်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 70 ပီတဵမ် တီႈငဝ်ႈၸိုင်ႈ လွႆတႆးလႅင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)။ ပွတ်းၼႂ် မီးၵၢၼ်တူင်ႉၼိုင် ၼႄၾၢင်ႁၢင်ႈသိုၵ်း၊ မီးၽူႈယႂ်ႇၵူၼ်းလူင်ၼႂ်းမိူင်းၼွၵ်ႈမိူင်း မိူၼ်ၼင်ႇၸဝ်ႈၼႃႈတီႈလုမ်းၽွင်းတၢင်ၼွၵ်ႈမိူင်း လၢႆလၢႆမိူင်း ဢၼ်ပၵ်းလုမ်းတီႈဝဵင်းလူင်တႃႈၵုင်ႈ၊ ၽူႈသိုဝ်ႇၶၢဝ်ႇၼွၵ်ႈမိူင်း၊ ၽူႈယႂ်ႇၵူၼ်းလူင်ၼႂ်းပႃႇတီႇ ၼႂ်းတပ်ႉသိုၵ်း၊ ပေႃႈမႄႈၵူၼ်းမိူင်း ၵေႃႉသိုၵ်းၵေႃႉႁၢၼ်ၸိူဝ်းၼႆႉ ၶဝ်ႈႁူမ်ႈၼပ်ႉႁူဝ်မိုၼ်ႇ။ ၵူၺ်းၵႃႈ ထိုင်ဝၢႆးဝၼ်းမႃး မီးပၢင်သပ်းလႅင်းၸႅင်ႈၶၢဝ်ႇ ဢၼ်ၸွမ်သိုၵ်း ၸဝ်ႈယွတ်ႈသိုၵ်း တွပ်ႇလၢတ်ႈပၼ်ၶေႃႈထၢမ်ၽူႈသိုဝ်ႇၶၢဝ်ႇၶဝ် ၵဵဝ်ႇၵပ်းငဝ်းလၢႆးလၢႆၸိူဝ်ႉလၢႆလွင်ႈ ။


ဢိင်ၼိူဝ်ၽူႈသိုဝ်ႇၶၢဝ်ႇၼွၵ်ႈမိူင်းၶဝ်တွင်ႈထၢမ်သေ  ၸွမ်သိုၵ်းယွတ်ႈသိုၵ်း တွပ်ႇလၢတ်ႈဝႃႈ- RCSS ၼႆႉ မီးလွင်ႈတိတ်းတေႃႇၵၼ်တင်းၸဝ်ႈၼႃႈတီႈမိူင်းၶႄႇယူႇ၊ ၵွပ်ႈဝႃႈလႅၼ်လိၼ်မိူင်းႁဝ်းတိတ်းၸပ်းၵၼ်၊ ၵူၼ်းမိူင်းႁဝ်းၵေႃႈၶဝ်ႈဢွၵ်ႇၵႂႃႇမႃးႁႃၵၼ်ယူႇတႃႇသေႇ၊ ၶူဝ်းၵုၼ်ႇသိၼ်ၵႃႉဢၼ်မႃးမီးယူႇၼႂ်းမိူင်းမၢၼ်ႈၼႆႉ 80% လုၵ်ႉမိူင်းၶႄႇမႃး။ ၵွပ်ႈပိူဝ်ႈမိူင်းၶႄႇတင်းမိူင်းတႆးတိတ်းၵၼ်၊ ႁဝ်းသမ်ႉယၢမ်ႈယူႇၸွမ်းၵၼ်မႃးၼႂ်းပိုၼ်းလႄႈ ႁဝ်းၵေႃႈႁႂ်ႈပိုင်ႈဢိင်ၶဝ်၊ ၶဝ်ၵေႃႈႁႂ်ႈၸွႆႈလိူဝ်ႁဝ်း၊ ႁဝ်းၼႆႉပဵၼ်မိူင်းပီႈမိူင်းၼွင်ႉၵၼ် ။


မိူဝ်ႈဢၼ်ၽူႈသိုဝ်ႇၶၢဝ်ႇၼွၵ်ႈမိူင်းၶဝ် တွင်ႈထၢမ်ထႅင်ႈဝႃႈ ၸွင်ႇၶႄႇၶဝ်သမ်ႉမီးဢေႃးၸႃႇၼိူဝ်ႁဝ်း တွၼ်ႈတႃႇတေဢုပ်ႇဢူဝ်းၸွမ်းမၢၼ်ႈၶႃႈႁႃႉၼႆၼၼ်ႉ မၼ်းၸဝ်ႈတွပ်ႇဝႃႈ လွင်ႈၼႆႉၶဝ်ၵေႃႈဢမ်ႇမႃးယုင်ႈၸွမ်း ၼႂ်းၵၢၼ်မိူင်းႁဝ်း၊ RCSS ၼႆႉ ၽႂ်ဢမ်ႇမႃးမီးဢေႃးၸႃႇၼိူဝ်ႁဝ်းသေမိူင်း၊ ႁဝ်းၸုၵ်းၼိူဝ်ၶႅင်ႈၶႃႁဝ်းတင်း ပၢႆးဝူၼ်ႉၶွင်ႁဝ်းၵူၺ်း၊ လွင်ႈဢုပ်ႇဢူဝ်းၵၼ်တင်းမၢၼ်ႈၵႃႈပူၼ်ႉမႃးၼၼ်ႉ ႁဝ်းဢမ်ႇၸႂ်တူၵ်း၊ ၵႂႃႇပၢၼ်ၵၢင်မိူၼ်ၸၢင်ႉပႆတၢင်းၵူၺ်း၊ ၸၢင်ႉပႆတၢင်းၼႆႉ တၢင်းၼႃႈမၼ်းမီးသင်ၵေႃႈ မၼ်းတေပၢၵ်ႈၵႂႃႇတိၵ်းတိၵ်းၵူၺ်း၊ ႁႂ်ႈမၼ်းဢဝ်ႁႅင်းမၼ်းသေပႆၵႂႃႇလွႆးလွႆး- ဝႃႈၼႆ ။


ပၢင်သပ်းလႅင်းၸႅင်ႈၶၢဝ်ႇပွၵ်ႈၼႆႉ မီးၽူႈသိုဝ်ႇၶၢဝ်ႇၼွၵ်ႈမိူင်းလၢႆမိူင်း ဢိၵ်ႇၽူႈသိုဝ်ႇၶၢဝ်ႇၼႂ်းမိူင်းထႆး၊ ၸုမ်းၶၢဝ်ႇဢိရႃႇဝၻီႇ၊ မိၸ်ႉၸိမ၊ ၸုမ်းၶၢဝ်ႇတႆးၸိူဝ်းၼႆႉၶဝ်ႈႁူမ်ႈလၢႆမူႇၸုမ်း၊ တင်းမူတ်းဢမ်ႇယွမ်းမွၵ်ႈ 20 ၸုမ်း ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်သႅပ်ႊထႅမ်ႊၿိူဝ်ႊပူၼ်ႉမႃး။ ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ၵမ်းထူၼ်ႈသွင် ဢၼ်တေၸတ်းႁဵတ်းၽွင်းႁၢင်လိူၼ်ၾႅပ်ႊၿိဝ်ႊရီႊ 2017 ၼႆႉၵေႃႈ မီးလွင်ႈႁၢင်ႈႁႅၼ်းဝႆႉတႃႇတေၵႂႃႇၶဝ်ႈႁူမ်ႈယူႇ ။