ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၸတ်းႁဵတ်းပၢင်ႁၢင်ႈႁႅၼ်း ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး ၼႂ်းၵဵင်းမႆႇ၊ ႁူပ်ႉထူပ်းသပ်းလႅင်း တွင်ႈထၢမ်ၵၢင်ၸႂ် ပီႈၼွင်ႉႁႅင်းၵၢၼ်တႆး ၸိူဝ်းႁဵတ်းၵၢၼ်ၼႂ်းမိူင်းထႆး။

ဝၼ်းတီႈ 25/02/2017 ယၢမ်းၵၢင်ၼႂ် 09:00-17:00 မူင်း ႁူဝ်ၶမ်ႈယူႇတီႈၵေႃပွင်ၵၢၼ် ၽွမ်ႉႁူမ်ႈ ၸိုင်ႈတႆး (CSSU) ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်ႁၢင်ႈႁႅၼ်း ဢုပ်ႇၵုမ်ၵၢၼ်မိူင်း ၸၼ်ႉ ၸိူဝ်ႉၸၢတ်ႈ(ၸၢဝ်းၶိူဝ်းတႆး) တီႈဝတ်ႉၻွၼ်းၸၼ်၊ ဢိူင်ႇတႃႈသႃလႃး ၸႄႈဝဵင်းၵဵင်းမႆႇ ၸိုင်ႈထႆး မီးပီႈၼွင်ႉႁႅင်းၵၢၼ်တႆး ၶဝ်ႈႁူမ်ႈ 200 ပၢႆ။ ဝၼ်းတီႈ 19/02/2017 ႁူပ်ႉတီႈဝဵင်းရယွင်း၊ ဝၼ်းတီႈ 18/02/2017 ႁူပ်ႉပီႈၼွင်ႉတႆး ႁွတ်ႈမိူင်းၵွၵ်ႇ၊ ၵွၼ်ႇပႆႇၵႂႃႇမိူင်းၵွၵ်ႇၼၼ်ႉသမ်ႉ ဝၼ်းတီႈ 15-16/02/2017 ႁူပ်ႉတႆး တီႈၵဵင်းမႆႇ ၵမ်းၼိုင်ႈ။ တင်းမူတ်းလႆႈႁူပ်ႉတႆး မီး 582 ၵေႃႉ ဝႃႈၼႆ။


ၸဝ်ႈပိုၼ်ၶမ်း ၾၢႆႇတိတ်းတေႃႇသူၼ်းတုမ် မွၵ်ႇလၢတ်ႈၶေႃႈၵႂၢမ်း ပိုတ်ႇပၢင် တီႈပၢင်ႁူပ်ႉထူပ်းဝတ်ႉၻွၼ်းၸၼ်ၼၼ်ႉဝႃႈ“ CSSU ၼႆႉ ပွင်ႇဝႃႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး၊ ၼႂ်းၸုမ်း CSSU ၼႆႉ လုၵ်ႈၸုမ်းတင်းမူတ်းမီး 10 ၸုမ်း။ ႁူမ်ႈတင်းၸုမ်း ၸၢဝ်းၶိူဝ်းတႆး၊ ၸုမ်းၵူၼ်းၼုမ်ႇတႆး ၸႃႉၵႂႃႇၸဵမ်ၸိူဝ်းၼႆႉ။ ဢၼ်ၸုမ်းႁဝ်းၶႃႈ လႆႈမႃးႁူပ်ႉထူပ်းပီႈၼွင်ႉတႆး ဝၼ်းမိူဝ်ႈၼႆႉ ႁဝ်းၶႃႈတေမႃးသပ်းလႅင်းလၢတ်ႈၼႄ လွင်ႈငမ်းယဵၼ် ဢၼ်ပဵၼ်ယူႇယၢမ်းလဵဝ်၊ လွင်ႈၵၢၼ်ငၢၼ်း CSSU ႁွတ်ႈထိုင်လႂ်ယဝ်ႉ၊ ၶၵ်ႉၵၢၼ်ငမ်းယဵၼ်လႄႈ လွင်ႈၵၢၼ်ဢုပ်ႇဢူဝ်းၸၼ်ႉၸိူဝ်ႉၸၢတ်ႈသမ်ႉ ထိုင်လႂ်ယဝ်ႉ ၸဵမ်ၸိူဝ်းၼႆႉ။ ၼွၵ်ႈလိူဝ်ၼၼ်ႉ ငဝ်းလၢႆးၵၢၼ်မိူင်း ယၢမ်းလဵဝ် ထုၵ်ႇလီၵႂႃႇၸွမ်းၸိူင်ႉႁိုဝ် ဢၼ်ဝႃႈၼၼ်ႉ ဝၼ်းမိူဝ်ႈၼႆႉ ႁဝ်းၶႃႈ ၼႂ်းၸုမ်း CSSU ၸင်ႇလႆႈမႃးထွမ်ႇ ဢဝ်ၵၢင်ၸႂ်ၵူၼ်းမိူင်း ဢၼ်ၶႂ်ႈလႆႈၶႂ်ႈပဵၼ်” ဝႃႈၼႆ။


ပၢင်ႁူပ်ႉထူပ်းတွင်ႈထၢမ်သဵင်ၵၢင်ၸႂ်ၵူၼ်းမိူင်း တီႈဝတ်ႉၻွၼ်းၸၼ်ၼႆႉ မီးၽူႈယႂ်ႇၵူၼ်းလူင် မႃးၶိုၼ်ႈႁွတ်ႈမွၵ်ႇလၢတ်ႈၶေႃႈၵႂၢမ်း မိူၼ်ၼင်ႇ ၸဝ်ႈၶိုၼ်းသႂ်၊ ၸဝ်ႈပိုၼ်ၶမ်း၊ ၸဝ်ႈပွင်ၶိူဝ်း၊ ၸဝ်ႈၸၢႆးငိုၼ်းလႄႈ ၸဝ်းသိုၵ်းၸၢႆးသိူဝ် ၸဵမ်ၸိူဝ်းၼႆႉ ။ သပ်းလႅင်းယိူင်းဢၢၼ်း ပၢင်ႁူပ်ႉထူပ်းလႄႈ CSSU၊ ၶၵ်ႉၵၢၼ်ငမ်းယဵၼ်လႄႈငဝ်းလၢႆးၵၢၼ်မိူင်းယၢမ်းလဵဝ်၊ လွင်ႈၾႅတ်ႊၻရႄႊ ၸဵမ်ၸိူဝ်းၼႆႉ ၼွၵ်ႈလိူဝ်ၼၼ်ႉ သပ်းလႅင်းတၢင်ႇလၢတ်ႈၼႄ ၵၢၼ်မိူင်း၊ ၵၢၼ်ပၢႆးမၢၵ်ႈမီး၊ ၵၢၼ်တူင်ႇဝူင်းၵူၼ်း၊ တီႈလိၼ်လႄႈ ၾိင်ႈတိုၼ်းသၽႃႇဝ၊ ၵၢၼ်ႁူမ်ႇလူမ်ႈ၊ ဢၼ်ပီႈၼွင်ႉၵူၼ်းမိူင်း ၶႂ်ႈလႆႈၶႂ်ႈပဵၼ်လႄႈ ထွမ်ႇသဵင်ၵၢင်ၸႂ်သေ တေဢဝ်ၵႂႃႇတၢင်ႇလၢတ်ႈၼႂ်းပၢင်ၵုမ် ၸၼ်ႉၸိူဝ်ႉၸၢတ်ႈတႆးသေ ပေႃးၵႂႃႇဢုပ်ႇတီႈပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ႁႂ်ႈပေႃးပဵၼ်ပၢၵ်ႇလဵဝ် သဵင်လဵဝ်ၵၼ်ဝႃႈၼႆ။


ပၢင်ဢုပ်ႇၵုမ် CSSU ဝၢႆးၸတ်းပၢင်ဢုပ်ႇၵုမ်ၾိုၵ်ႉၽွၼ်း Workshop တီႈတူၼ်ႈတီး မိူဝ်ႈႁၢင်လိူၼ် January ယဝ်ႉၼႆႉ ၸႅၵ်ႇတူဝ်တႅၼ်း ပဵၼ် 15 ၸုမ်းသေ လူင်းပိုၼ်ႉတီႈႁူပ်ႉထူပ်း ပေႃႈမႄႈ ၵူၼ်း မိူင်း ၼႂ်းမိူင်းတႆး တင်းမူတ်း 44 ၸႄႈဝဵင်း  ၼွၵ်ႈမိူင်းတႆးသမ်ႉ မိူၼ်ၼင်ႇ ၼႂ်းမိူင်းၶၢင်၊ တိူင်းၸႄႈၵႅင်း၊ တိူင်းတႃႈလိူဝ်ႇ၊ မိူင်းယၢင်းလႅင်(ၵယႃး) တီႈတွၼ်ႈလိၼ် ဢၼ်ပီႈၼွင်ႉ တႆးယူႇသဝ်းၼမ်၊ ၼၼ်ႉၵေႃႈ လူင်းႁူပ်ႉထူပ်းထၢမ်ၵၢင်ၸႂ်။ ၶၢဝ်းတၢင်း မိူင်းထႆးတႄႉ တႄႇ 14-26/02/2017 လႄႈ တူဝ်တႅၼ်း CSSU ၵေႃႈ ပွၵ်ႈၶိုၼ်း မိူင်းတႆး မိူဝ်ႈပူၼ်ႉမႃး ဝၼ်းဢႃးတိတ်ႉ 26/02/2017 ၼႆယဝ်ႉ။