ၵူၼ်းၼုမ်ႇသႅၼ်းႁုၼ်ႈ ႁႅင်းၵၢၼ်ယၢၼ်မိူင်း ပီႈၼွင်ႉတႆးႁဵတ်းၵၢၼ်ၼႂ်းၵဵင်းမႆႇ  လူႉသဵင်ႈတၢႆၵႂႃႇ ယွၼ်ႉၵႅင်ႊ ၸုမ်းၵူၼ်းမိူင်းထႆး ႁေႃႈလူတ်ႉၵႃးၽႃႇတမ်ၺႃး ၼိူဝ်သဵၼ်ႈတၢင်း ၽွင်းၶိုၼ်းလိုၵ်းၸၢႆႉ၊ ဝၢတ်ႇၸဵပ်းၸွမ်း တူဝ်ႁၢဝ်ႈႁႅင်း သူင်ႇၶဝ်ႈယူတ်းယႃဢမ်ႇလႆႈ လူႉသဵင်ႈတၢႆၵႂႃႇတီႈႁူင်းယႃသူၼ်ၻွၵ်ႇ မိူင်းၵဵင်းမႆႇ ၸိုင်ႈထႆး။

ဝၼ်းတီႈ 27/02/2017 တဵင်ႈၶိုၼ်းၸၢႆႉ (ပွတ်းၼႂ်ၸဝ်ႉ) မွၵ်ႈဝူင်ႈၵၢင် 2-3 မူင်းၼၼ်ႉ ၵူၼ်းၼုမ်ႇတႆးၸိုဝ်ႈၸၢႆးမိူင်း ပရႃႇသိတ်ႇ (ၸၢႆးဢဵမ်း) ဢႃယု 18 ပီ၊ ထုၵ်ႇၵႅင်ႊၸုမ်းၵူၼ်းထႆး ႁေႃႈလူတ်ႉၵဵင်ၽႃႇသႂ်ႇ ၼိူဝ်သဵၼ်ႈတၢင်း ႁိမ်းႁႃႈယႅၵ်ႈသၼ်တိထမ်း ဢိူင်ႇၸၢင်ႉၽိူၵ်ႇ မိူင်းၵဵင်းမႆႇ မိူင်းထႆး။ မၼ်းၸၢႆးလႆႈတိူဝ်ႉဝၢတ်ႇၸဵပ်းႁၢဝ်ႈႁႅင်းသေ လႆႈလူႉသဵင်ႈၸႂ်ၵႂႃႇတီႈႁူင်းယႃသူၼ်ၻွၵ်ႇ ဝဵင်းၵဵင်းမႆႇ ယၢမ်းပွတ်းၼႂ်မိူင်းပႆႇလႅင်း- ၼႆယဝ်ႉ။


ၶၢပ်ႈတူဝ်ၸၢႆးမိူင်းၼႆႉ ယၢမ်းလဵဝ်ပီႈၼွင်ႉၸိူဝ်ႉၶိူဝ်း လႆႈဢဝ်မႃးဝႆႉတီႈဝတ်ႉပႃႇတၼ်း ဢိူင်ႇပႃႇတၼ်း မိူင်းၵဵင်းမႆႇသေ ႁႅၼ်းတၢၼ်းႁဵတ်းတၢင်းလီပၼ် ၸွမ်းၾိင်ႈထုင်းပုတ်ႉထသႃသၼႃ။ တေပူၼ်ႉၶၢပ်ႈတူဝ်- ႁွပ်ႇႁူဝ်ၶဝ်ႈႁဵဝ်ႈ ဝၼ်းၽတ်းတီႈ 02/03/2017 ၊ တီႈပႃႇႁဵဝ်ႈပႃႇတၼ်း- ၼႆယဝ်ႉ။


ၵဵဝ်ႇၵပ်းလွင်ႈၸၢႆးမိူင်း (ဢဵမ်း) လႆႈလူႉသဵင်ႈၵႂႃႇၼႆႉ ဢွၼ်ၼႃႈၼၼ်ႉ ဢၼ်ပဵၼ်ဢူၺ်းၵေႃႉမၼ်းမီးလိူင်ႈ/ ၽိတ်းမေႃးၵၼ်ဝႆႉတင်းၵႅင်ႊၸုမ်းၵူၼ်းထႆး၊ ဢူၺ်းၵေႃႉမၼ်းသမ်ႉတိတ်းတေႃႇတၢင်းၾူၼ်ႊ (မိုဝ်းထိုဝ်) ႁွင်ႉမၼ်းမႃးၸွႆႈၶႄ၊ မၼ်းၸၢႆးၵေႃႈမႃးသေ မႃးၸုၵ်းဝႆႉတီႈၼိူဝ်ၵၢင်တၢင်း၊ ၸုမ်းၵႅင်ႊၵူၼ်းထႆးၶဝ်ၵေႃႈ ႁေႃႈလူတ်ႉၵဵင်ၽႃႇတမ်သႂ်ႇတၢင်းလင်မၼ်း တီႈႁိမ်းႁႃႈယႅၵ်ႈသၼ်တိထမ်းၼၼ်ႉ။ မၼ်းၸၢႆးတိူဝ်ႉၸဵပ်း လိူဝ်ႁႅင်းသေ ထုၵ်ႇသူင်ႇၵႂႃႇယူတ်းယႃတီႈႁူင်းယႃသူၼ်ၻွၵ်ႇ- ၼႆယဝ်ႉ။


"မိူဝ်ႈႁူႉၶၢဝ်ႇလွင်ႈၼႆႉသေ ၵႂႃႇတူၺ်းမၼ်းတီႈႁူင်းယႃသူၼ်ၻွၵ်ႇ မိူဝ်ႈၶၢဝ်းယၢမ်းၵၢင်ၼႂ်ၸဝ်ႉ 4 မူင်းၼၼ်ႉ မၼ်းၸၢႆးပေႃးသဵင်ႈၵႂႃႇယဝ်ႉ။ ၶဝ်တေႁေႃႈလူတ်ႉၽႃႇတၢင်းလင်မၼ်း၊ ၸွမ်တူဝ်ၸွမ်းၶိင်း တၢင်ၵွင်းလင်မၼ်းၼၼ်ႉ ပဵၼ်ႁွႆးလွၵ်ႈႁွႆးလၢၼ်ႉ ၸမ်ႉမၢၼ်ႉၵမ်ႇၵႂႃႇလၢႆလၢႆတီႈ"- ၵေႃႉပဵၼ်ပေႃႈသိုပ်ႇမၼ်း လုင်းၸၢႆးလိူၼ် လၢတ်ႈ။


"ဢူၺ်းၵေႃႉၸၢႆးမိူင်း (ၵေႃႉလူႉတၢႆ) ဢၼ်ႁွင်ႉမၼ်းၸၢႆးၵႂႃႇၸွႆႈၶႄ လိူင်ႈၽိတ်းမေႃးၵၼ်ၼႆႉ ႁၢၼ်ႉတေႃႇမိူဝ်ႈလဵဝ် ပဵၼ်ၽႂ်ယင်းပႆႇႁူႉ၊ တီႈပၢင်ၸႃပၼမၼ်းၸၢႆး တီႈဝတ်ႉပႃႇတၼ်းၼႆႉၵေႃႈ ပႆႇႁၼ်ၶဝ်ႈမႃး။ မိူဝ်ႈလဵဝ် ပဵၼ်ၽႂ်ၼႆၵေႃႈတိုၵ်ႉတွင်ႈထၢမ်ၵၼ်ယူႇ၊ လႆႈငိၼ်းထႅင်ႈဝႃႈ ၵႅင်ႊၸုမ်းၵူၼ်းထႆး ဢၼ်ႁဵတ်းၽိတ်းၼၼ်ႉ ပီႈၼွင်ႉၾၢႆႇၶဝ်ၵၢႆႇၵႂၢမ်းမႃးဝႃႈ တင်းပီႈၼွင်ႉၸိူဝ်ႉၶိူဝ်းၵေႃႉလူႉတၢႆၼႆႉ ႁႂ်ႈၵႂႃႇဢုပ်ႇၵၼ်တီႈႁူင်းပလိၵ်ႈထႆး၊ ၵူၺ်းၵႃႈ လွင်ႈၼႆႉတိုၵ်ႉတိတ်းတၢမ်ယူႇ"- ၽူႈတူင်ႉၼိုင်တူင်ႇဝူင်းၵူၼ်း ၸၢႆးလိူၼ်ၶမ်း လၢတ်ႈ။


ၸၢႆးမိူင်းၼႆႉ ပေႃႈၸိုဝ်ႈလုင်းၸၢႆးတႅတ်ႉ (ပေႃႈတႄႉ)၊ မႄႈၸိုဝ်ႈၼၢင်းၵဵင်ၶမ်း ပဵၼ်ၵူၼ်းဝၢၼ်ႈသူၼ်ဢွႆႈ ၸႄႈဝဵင်းသီႇပေႃႉ မိူင်းတႆးပွတ်းႁွင်ႇ။ ၵိူတ်ႇမိူဝ်ႈဝၼ်းတီႈ 14/04/1998 ၊ ဢႃယု 18 ယၢင်ႈၶဝ်ႈ 19 ပီ၊ ၶဝ်ႈမႃးၼႂ်းမိူင်းထႆးလႆႈမွၵ်ႈ 6-7 ပီ၊ ၵွၼ်ႇၼႃႈလူႉတၢႆၵႂႃႇၼႆႉ ႁဵတ်းၵၢၼ်ဝႆႉယူႇတီႈႁိမ်းသီႇယႅၵ်ႈၶူင်ႇသိင် ၵၢၼ်လၢၼ်ႉပႃႊၵေႊ။ မႃးတႄႇၼႃႈႁိူၼ်းၵိုၵ်းၵူၼ်းပွတ်းၵဵင်းႁၢႆး မိူင်းထႆးလႆႈ 2 ပီ၊ ပႆႇမီးလုၵ်ႈလၢင်းႁူမ်ႈၵၼ်-ၼႆယဝ်ႉ။