သင်ၶၸဝ်ႈ ၸႄႈဝဵင်းၵဵင်းတုင် ၶဝ်ႈတႅမ်ႈတွပ်ႇ/ၶူၼ်ႉၶႆႈလိၵ်ႈ တီႈဝတ်ႉထမ်မူဝ်းတယ (ဝိႁၢရ် ၵျွင်းမိူင်း ၼၢႆး) တင်းမူတ်း ၶဝ်ႈတွပ်ႇ/ၶူၼ်ႉၶႆႈ 742 တူၼ်။

ဝၼ်းတီႈ 26/02/-04/03/2017 ယၢမ်းၵၢင်ဝၼ်း 12:00-15:00 မူင်း သင်ၶၸဝ်ႈၸိုင်ႈတႆး ပွတ်းဢွၵ်ႇၶူင်း ၶဝ်ႈတႅမ်ႈတွပ်ႇ/ၶူၼ်ႉၶႆႈလိၵ်ႈ ပွၵ်ႈၵမ်း 60 တီႈဝတ်ႉဝိႁၢရ်လူင် ထမ်မူဝ်းတယ ၸႄႈဝဵင်းၵဵင်းတုင်။


ၸဝ်ႈၶူးၵုလိသ ၵေႃပွင်ၵၢၼ် ၾၢႆႇထတ်းထွင်ၼမ်ႉၵတ်ႉလုၵ်ႈႁဵၼ်းသင်ၶ လၢတ်ႈဝႃႈ “  ပၢင်တႅမ်ႈတွပ်ႇလိၵ်ႈၼႆႉ ၸဝ်ႈႁဝ်း ၶဝ် လႆႈၸတ်းႁဵတ်းပဵၼ်သွင်တွၼ်ႈ၊ တွၼ်ႈတႅမ်ႈတွပ်ႇသမ်ႉ တႄႇဢဝ် ဝၼ်းတီႈ 26/02/-02/03/ 2017 ပဵၼ်ပွၵ်ႈၵမ်း (60)။ တွၼ်ႈတီႈသွင်ၵၢၼ် ၶူၼ်ႉၶႆႈသမ်ႉ ဝၼ်းတီႈ 03/03/2017 (တွပ်ႇသူပ်း) ပဵၼ်ပွၵ်ႈၵမ်း (37)။ ဝၼ်းတီႈ 04/02/2017 သမ်ႉ ဢွၵ်ႇသဵၼ်ႈသၢႆမၢႆၸိုဝ်ႈ ၽူႈဢွင်ႇလႄႈ တွၼ်ႈသူး ၸဵမ်ၸိူဝ်းၼႆႉ” ဝႃႈၼႆ။


သင်ၶၸဝ်ႈၸိုင်ႈတႆး ပွတ်းဢွၵ်ႇၶူင်း ဢၼ်ၶဝ်ႈတွပ်ႇလိၵ်ႈ/ ၶူၼ်ႉၶႆႈ တင်းမူတ်းမီး 742 တူၼ်၊ ၸိူဝ်းတႅမ်ႈတွပ်ႇ 470 တူၼ်၊ တွပ်ႇသူပ်း(ၶူၼ်ႉၶႆႈ) 272 တူၼ် ဝႃႈၼႆ။


ပၢင်ပွႆးတႅမ်ႈတွပ်ႇလိၵ်ႈ ပီၼႆႉ မိူၼ်ၼင်ႇ ၸၼ်ႉသုတ်ႉတၢၼ်ႇ၊ ၸၼ်ႉဝိၼၺ်း၊ ၸၼ်ႉမူလ၊ ၸၼ်ႉသၢင်ႇ ဢွၼ်ႇလႄႈ ၸၼ်ႉငဝ်ႈ ၸဵမ်ၸိူဝ်းၼႆႉ။  ၸၼ်ႉၶူၼ်ႉၶႆႈ(တွပ်ႇသူပ်း)သမ်ႉ ၸၼ်ႉသုတ်ႉတၢၼ်ႇ ၶူၼ်ႉၶႆႈ(တွပ်ႇသူပ်း)၊ ၸၼ်ႉဝိၼၺ်း၊ ၸၼ်ႉ မူလ၊ ၸၼ်ႉသၢင်ႇဢွၼ်ႇလႄႈ ၸၼ်ႉငဝ်ႈ ၸဵမ်ၸိူဝ်းၼႆႉ။


လႅင်ႇၶၢဝ်ႇ လႅတ်ႇၼုမ်ႇမင်းရၢႆး