ပေႃႈမႄႈပီႈၼွင်ႉ ၵူၼ်းမိူင်း ၸႄႈဝဵင်းမူႇၸေႊ ဢွၼ်ၵၼ်ပိုတ်ႇၽၵ်းတူမႂ်ႇၶဝ်ႈဝဵင်းမူႇၸေႊ ၼႂ်းဝၼ်း မိူင်းႁူမ်ႈတုမ် မီးၽူႈယႂ်ႇၵူၼ်းလူင်လႄႈ ပီႈၼွင်ႉၵူၼ်းမိူင်းၶဝ်ႈႁူမ်ႈတင်ၼမ်လၢႆ ။

ဝၼ်းတီႈ 12/02/2017 ယၢမ်းၵၢင်ၼႂ် ၵေႃလိၵ်ႈလၢႆးလႄႈၾိင်ႈငႄႈတႆး၊ ပေႃႈမႄႈပီႈၼွင်ႉၵူၼ်း မိူင်းၼႂ်း ပိုၼ်ႉတီႈ ႁူမ်ႈၵၼ်ၸတ်းပၢင်ၵႅဝ်ႈပိုတ်ႇၽၵ်းတူၶဝ်ႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၼႂ်းဝၼ်းမိူင်း ႁူမ်ႈတုမ်။ ပၢင်ပိုတ်ႇၽၵ်းတူၶဝ်ႈဝဵင်းၼၼ်ႉ ၽူႈၵွၼ်းၸႄႈတွၼ်ႈမူႇၸေႊ ဢူးၵျေႃႇၵျေႃႇထုၼ်း၊ ၽူႈတႅၼ်း သၽႃး ၸႄႈမိူင်း ၸၢႆးၵျေႃႇတဵင်း၊ ၸဝ်ႈၼႃႈတီႈၵူႈႁွင်ႈၵၢၼ် ၸုမ်းၾိင်ႈငႄႈတၢင်ႇၸၢဝ်းၶိူဝ်း ဢိၵ်ႇပႃး ၵူၼ်းမိူင်း ၶဝ်ႈႁူမ်ႈ ဝႃႈၼႆ ။


ၸၢႆးဢွင်ႇ ၽူႈၶဝ်ႈႁူမ်ႈပၢင်ပိုတ်ႇၽၵ်းတူၶဝ်ႈဝဵင်း လၢတ်ႈဝႃႈ “ ပဵၼ်လွင်ႈလီၶႃႈ၊ ဝၢၼ်ႈမိူင်းႁဝ်းလႆႈ ႁၼ်လိၵ်ႈတႆးၸိူင်ႉၼႆ။ လိၵ်ႈမၢၼ်ႈၵေႃႈတႅမ်ႈပႃးယူႇလႄႈ ပဵၼ်လွင်ႈလီဢေႃႈ”  ဝႃႈၼႆ ။


ပၢႆႉၶဝ်ႈၽၵ်းတူၸႄႈဝဵင်းမူႇၸေႊၼႆႉ တႅမ်ႈလိၵ်ႈဝႆႉ တင်းသွင်ယၢင်ႇ ၾၢႆႇၼိုင်ႈ တႅမ်ႈဝႆႉ လိၵ်ႈတႆး၊ ထႅင်ႈၾၢႆႇၼိုင်ႈသမ်ႉ တႅမ်ႈဝႆႉ လိၵ်ႈမၢၼ်ႈ တီႈပၢႆႉၼၼ်ႉ တႅမ်ႈဝႆႉဝႃႈ ဝဵင်းမူႇၸေႊ ဝႃႈၼႆ ။


ၽၵ်းတူၶဝ်ႈဝဵင်းၼႆႉ ပီႈၼွင်ႉၵူၼ်းမိူင်းမူႇၸေႊ၊ ၸဝ်ႈၶွင်ႁူင်းၵၢၼ်လူင်၊ ၽူႈၵွၼ်းၸႄႈတွၼ်ႈ၊ တပ်ႉသိုၵ်းၵူၼ်းမိူင်းၶဝ် ႁူမ်ႈၵၼ်ၸွႆႈထႅမ်သေ တႄႇႁဵတ်းသၢင်ႈမႃး မိူဝ်ႈဝၼ်းတီႈ 07/11/2016 တင်းမူတ်းသဵင်ႈငိုၼ်းၵႂႃႇ မွၵ်ႈ 300 သႅၼ်ပျႃးပၢႆ ဝႃႈၼႆ ။