ၸိုင်ႈတႆးပွတ်းႁွင်ႇ ၸႄႈဝဵင်းမူႇၸေႊၼၼ်ႉ ၸၢဝ်းမၢၼ်ႈပွတ်းတႂ်ႈ မႃးၶၢတ်ႈယူႇ ႁဵတ်းၶဝ်ႈ ယႃၵု (ထမၼႄး) သေဢဝ် ၾႆးမႆႈ တင်းႁိူၼ်း။ လၢမ်းမႆႈပႃးထႅင်ႈသုမ်ႉ တၢင်းၶၢႆ 5 သုမ်ႉ ဝႃႈၼႆ ။

ဝၼ်းတီႈ 10/02/2017 ယၢမ်းဝၢႆးဝၼ်း 15:00 မူင်းၼၼ်ႉ ႁိူၼ်းၼၢင်းၶမ်းလူႇ ပွၵ်ႉၵွင်းၼွင် ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ။ ပၼ်ၵူၼ်းမိူင်းမၢၼ်ႈ မႃးၶၢတ်ႈ ယူႇသဝ်းဝႆႉၼၼ်ႉ ႁဵတ်းၶဝ်ႈ ယႃၵု(ထမၼႄး) ၼႂ်းလိူၼ်သၢမ်မူၼ်းၼႆသေ ဢဝ်ၾႆး မႆႈႁိူၼ်းတင်းလင် ၶူဝ်းၶွင်ၸဝ်ႈႁိူၼ်း ဢမ်ႇ တၼ်းလႆႈသင်။ ၵူၺ်းၵႃႈ ၵူၼ်းၶၢတ်ႈယူႇသဝ်းႁိူၼ်းၼၼ်ႉ လၵ်ႉဢွၵ်ႇပၢႆႈ ဝႃႈၼႆ ။


ၸၢႆးဢွင်ႇ ၵူၼ်းၼုမ်ႇမူႇၸေႊလၢတ်ႈဝႃႈ “ ၸဝ်ႈႁိူၼ်းၼၢင်းၶမ်းလူႇတႄႉ ဢမ်ႇယူႇႁိူၼ်းဢွၵ်ႇ တၢင်းၵႂႃႇတႃႈၵုင်ႈ လုၵ်ႈယိင်းသၢဝ်ၸဝ်ႈႁိူၼ်းသမ်ႉ ပဵၼ်မေႃသွၼ်သေ လႆႈၵႂႃႇတူၵ်းပုၼ်ႈ ၽွၼ်း တၢင်း ဢိူင်ႇ19 ဝၢၼ်ႈ တၢင်းထုင်ႉၾၢႆႇႁွင်ႇၼမ်ႉမၢဝ်း ၼိုင်ႈဝူင်ႈၸင်ႇတေပွၵ်ႈ ၶိုၼ်းမႃးႁိူၼ်း ၼိုင်ႈပွၵ်ႈ (ဝၼ်းသဝ် တင်း ဝၼ်းဢႃးတိတ်ႉ)၊ ပေႃးပဵၼ်ဝၼ်းၸၼ် ထိုင်ဝၼ်းသုၵ်း သမ်ႉ ၵႂႃႇႁဵတ်းၵၢၼ်ၶိုၼ်း ဝႃႈၼႆ ။


မိူဝ်ႈၽွင်းၾႆးမႆႈၼၼ်ႉ မီးၵူၼ်းၶၢတ်ႈယူႇၵူၺ်းလႄႈ ၶူဝ်းၶွင်ၸဝ်ႈႁိူၼ်းတႄႉ ဢမ်ႇတၼ်း လႆႈသင် ၾႆးမႆႈပႃးၵႂႃႇမူတ်း။ ၵူၺ်းၵႃႈ ၶူဝ်းၶွင်ဢၼ်ၵႃႈၶၼ်ယႂ်ႇႁႅင်းဢမ်ႇမီးလႄႈ လွင်ႈလူႉသုမ်း ၵေႃႈဢမ်ႇ ပေႃးၼမ်ၼင်ႇၵဝ်ႇ ဝႃႈၼႆ ။


ၾႆးၼႆႉ မႆႈႁိူၼ်းၼၢင်းၶမ်းလူႇယဝ်ႉသေ လၢမ်းမႆႈပႃးထႅင်ႈ သုမ်ႉၶွင်လုၵ်ႈမေးသိုၵ်းမၢၼ်ႈၶၢႆတၢင်းၶၢႆ 5 သုမ်ႉ ဝႃႈၼႆ ။


ၵူၼ်းၼႂ်းပွၵ်ႉတႄႉ လၢတ်ႈဝႃႈ “ ယွၼ်ႉၵူၼ်းၶၢတ်ႈႁိူၼ်းလႄႈ ၾႆးလႆႈမႆႈ၊ ၵွပ်ႈၼၼ် ပေႃးတေၶၢတ်ႈ ႁိူၼ်းႁဝ်းပၼ် ပိူၼ်ႈၼႆၸိုင် ထုၵ်ႇလီလႆႈၾၢင်ႉပႃးလွင်ႈၸိူင်ႉၼႆ ဝႃႈၼႆ ။


ၶၢဝ်းႁႅင်ႈၶၢဝ်းႁွင်ၼႆႉ ၾႆးၵႆႉမႆႈ မႆႈယွၼ်ႉ ၾႆးတဵၼ်း ၶဵင်ႇၽြႃးလႂ်၊ မိူဝ်ႈႁုင်မိုဝ်ႉလႂ်၊ ယွၼ်ႉသၢႆၾႆး ၾႃႉသျွၵ်ႉလႂ်  ၸိူဝ်းၼႆႉလႄႈ ထုၵ်ႇလႆႈၸွႆႈၵၼ်တူၺ်းလူၵႅတ်ႇၵင်ႈထႃႈဢွၼ်တၢင်းၼႆ လုင်းယီႈသႅင် ဝဵင်းမူႇၸေႊလၢတ်ႈ ။