ၼႂ်းဝၼ်းလိူၼ်သၢမ်မူၼ်းၼႆႉ ၸဝ်ႈသိၼ်ထမ်းဝုၼ်းၸုမ်ႉတင်း ၻွၵ်ႊတိူဝ်ႊၶမ်းမၢႆ ထမ်မသႃမိ ဢွၼ်ႁူဝ်သင်ၶၸဝ်ႈလႄႈ ပီႈၼွင်ႉသတ်ႉထႃး တီႈၸမ်ၵႆ တၢင်ႇထီးထၢတ်ႈ(ၵွင်းမူး) ဢွင်ႇမင်ၵလႃ ၵမ်ႇၽႃႇၵတ်းယဵၼ် ထမ်မသႃမိ ၸုမ်ႉမိူင်း ႁိုဝ် (ၵွင်းမူးၼၢင်းၵိၼ်ပူ) တီႈဝဵင်းပၢင်လူင် မီးပီႈၼွင်ႉ တၵ်ႉၵႃႇသတ်ႉထႃး ၶဝ်ႈႁူမ်ႈ တင်းၼမ်လၢႆ ။

ဝၼ်းတီႈ 11/02/2017 ယၢမ်းၵၢင်ၼႂ် 09:00 မူင်း ပၢင်ပွႆးတၢင်ႇထီးထၢတ်ႈ ဢွင်ႇမင်ၵလႃ ၵမ်ႇၽႃႇ ၵတ်းယဵၼ် ထမ်မသႃမိ ၸုမ်ႉမိူင်းၼႆႉ ၸတ်းႁဵတ်းတီႈၵွင်းမူးၼၢင်းၵိၼ်ပူႁိုဝ် ၵွင်းမူးၵူင် ဢၼ်မီး ၸဵင်ႇႁွင်ႇဝၼ်းတူၵ်း ဝဵင်းပၢင်လူင် ၸႄႈတွၼ်ႈလွႆလႅမ် ၸိုင်းတႆး ပွတ်းၸၢၼ်း။


ၸဝ်ႈၼၼ်ႇတိယ ၽူႈမၢႆၵူႈလွင်ႈလွင်ႈ ၵွင်းမူးၼၢင်းၵိၼ်ပူ လၢတ်ႈဝႃႈ “ မိူဝ်ႈၸဝ်ႈပေႃႈသိၼ် ထမ်းဝုၼ်းၸုမ်ႉ ၶဝ်ႈထမ်ႈသၢမ်ပီပၢႆ သၢမ်လိူၼ်ပၢႆ 3 ဝၼ်းပၢႆ 3 မိၼိတ်ႉၼၼ်ႉ၊ ၶူးဝႃးပေႃႈႁဝ်း လႆႈၼင်ႇၽႃႇဝၼႃႇသေလႄႈ ဢဝ်ၵွင်းမူးၵဝ်ႇၼႆႉ ၶဝ်ႈၼိမိတ်ႈသေၵေႃႈ သင်ႇမႃးတီႈၸဝ်ႈ သြႃႇၺၢၼ်ႇ ၼေႃးၶဝ်ဝႃႈ တၢင်းႁွင်ႇဝဵင်းပၢင်လူင်ၼႆႉ မီးၵွင်းမူးၵဝ်ႇၵႄႇသူႇၼိုင်ႈ ပေႃးဝႃႈ မီးၼႆၵေႃႈ ႁဝ်းတေမိူဝ်း မႄးၵုမ်းလုမ်းလႃးၼႆသေလႄႈ ၸဝ်ႈသြႃႇၺၢၼ်ႇၼေႃးၸင်ႇဢွၼ်ၵၼ်မႃးတူၺ်း ဝႃႈ ပဵၼ်ၵွင်းမူး သူႇၼႆႉယဝ်ႉ ဝႃႈၼႆသေ ၸင်ႇလႆႈၶွတ်ႇၽွတ်ႈ ၶွမ်ႊမတီႊၽူႈပွင်ၵၢၼ်ၶိုၼ်ႈမႃး” ဝႃႈၼႆ။


လိူဝ်ၼၼ်ႉ  မိူဝ်ႈဝၼ်းၵိူတ်ႇၸဝ်ႈၶူးလူင်ၻွၵ်ႊတိူဝ်ႊထမ်မသႃမိ ပီၵွၼ်းၶမ်း တီႈဝဵင်းလၢႆးၶႃႈၼၼ်ႉ ၶူးဝႃးပေႃႈသိၼ်ထမ်းဝုၼ်းၸုမ်ႉလႄႈ ၸဝ်ႈၶူးလူင် ၸင်ႇဢွၼ်ၵၼ်မႃးတီႈၵွင်းမူးၼႆႉသေ ၸဝ်ႈၶူး ဝႃးဝုၼ်းၸုမ်ႉလၢတ်ႈဝႃႈ ႁႂ်ႈပဵၼ်တီႈမၢႆတွင်း ပီၵွၼ်းၶမ်း ၸဝ်ႈၶူးၻွၵ်ႊတိူဝ်ႊၶမ်းမၢႆ ထမ်မသႃမိ သမ်ႉသႂ်ႇၸိုဝ်ႈၵွင်းမူးဝႃႈ ဢွင်ႇမင်ၵလႃ ၵမ်ႇၽႃႇၵတ်းယဵၼ် ထမ်မသႃမိ ၸုမ်ႉမိူင်း၊ ထႅင်ႈၾၢႆႇ ၼိုင်ႈၵေႃႈ ႁၢင်ႈၵွင်းမူးၼႆႉ ယူႇတီႈၸဝ်ႈပေႃႈသိၼ်ထမ်းဝုၼ်းၸုမ်ႉ ၵေႃႉၸၼ်တႅမ်ႈ မႃးပၼ် ၵမ်းလဵဝ်” ဝႃႈၼႆ။
ၵွင်းမူး ဢွင်ႇမင်ၵလႃ ၵမ်ႇၽႃႇ ၵတ်းယဵၼ် ထမ်ႇမသႃမိ ၸုမ်ႉမိူင်းၼႆႉ ၸဝ်ႈပေႃႈသိၼ်ထမ်းဝုၼ်ႉ ဢွၼ်ႁူဝ်ၵေႃႇတင်ႈမႃး မိူဝ်ႈပီ 2015 ၼႂ်းလိူၼ်ဢေႃႊၵတ်ႊသ်သေ ယဝ်ႉတူဝ်ႈၵႂႃႇ မိူဝ်ႈပီ 2017 ၼႂ်းလိူၼ် ၾႅပ်ႊၿိဝ်ႊရီႊၼႆႉ ဝႃႈၼႆ။


ပၢင်ပွႆးတၢင်ႇထီးၵွင်းမူးၼႆႉ မီးပီႈၼွင်ႉတၵ်ႉၵႃႇသတ်းထႃး တီၸမ်တီႈၵႆ မိူၼ်ၼင်ႇ မိူင်းတႆးပွတ်းဢွၵ်ႇ၊ ပွတ်းၸၢၼ်းလႄႈ ပွတ်းႁွင်ႇ မႃၶဝ်ႈႁူမ်ႈ ၼပ်ႉႁူဝ်မိုၼ်ႇ ဝႃႈၼႆ။