ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) တေၸတ်းပၢင်ႁၢင်ႈႁႅၼ်း တႃႇဢုပ်ႇၵုမ်ၵၢၼ်မိူင်း ၸၼ်ႉ ၸိူဝ်ႉၸၢတ်ႈတႆး ၼႂ်းၵဵင်းမႆႇ၊ ႁူပ်ႉထူပ်းသပ်းလႅင်း တွင်ႈထၢမ်ၵၢင်ၸႂ် ပီႈၼွင်ႉတႆး ၸိူဝ်းလုၵ်ႉ မိူင်းတႆး ၶဝ်ႈႁဵတ်းၵၢၼ်မိူင်းထႆး၊ ယိူင်းဢၢၼ်းပိူဝ်ႈတႃႇ ဢဝ်ၵႂႃႇတၢင်ႇလၢတ်ႈတီႈပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင်။

တေထိုင်ဝၼ်းတီႈ 25/02/2017 ယၢမ်းၵၢင်ၼႂ် 09:00-17:00 မူင်းႁူဝ်ၶမ်ႈ ယူႇတီႈၵေႃပွင် ၵၢၼ် ၽွမ်ႉႁူမ်ႈၸိုင်ႈတႆး (CSSU) ဢွၼ်ႁူဝ်ၼမ်းၼႃႈသေ တေၸတ်းပၢင်ႁၢင်ႈႁႅၼ်း တႃႇဢုပ်ႇ ၵုမ်ၵၢၼ် မိူင်း ၸၼ်ႉၸိူဝ်ႉၸၢတ်ႈ(ၸၢဝ်းၶိူဝ်းတႆး) တီႈဝတ်ႉၻွၼ်းၸၼ်၊ ဢိူင်ႇတႃႈသႃလႃး ၸႄႈ ဝဵင်းၵဵင်းမႆႇ ၸိုင်ႈထႆး။


ၸဝ်ႈႁၢၼ်သိူဝ် CSSU ၵေႃႉဢွၼ်ႁူဝ်ၼမ်းၼႃႈ ၶၢဝ်းတၢင်းၼႂ်းမိူင်းထႆး လၢတ်ႈဝႃႈ “ ၼႂ်းဝၼ်းတီႈ 25 (ဝၼ်းသဝ်) တေထိုင်မႃးၼႆႉ တေၸတ်းႁဵတ်းတီႈဝတ်ႉၻွၼ်းၸၼ် ယွၼ်ႉဝႃႈ မိူဝ်ႈၸတ်း ႁဵတ်း ၵႂႃႇ ၼႂ်းဝၼ်းတီႈ 15-16/02/2017 ၼၼ်ႉ ပီႈၼွင်ႉႁႅင်းၵၢၼ်တႆးႁဝ်း မၢင်ၸိူဝ်း/မၢင်ၵေႃႉ ဢမ်ႇ လႆႈ မႃးၶဝ်ႈႁူမ်ႈၵေႃႈမီးတင်းၼမ် ယွၼ်ႉၼၼ်လႄႈ ၸင်ႇလႆႈမႃးၸတ်းႁဵတ်းထႅင်ႈၵမ်းၼိုင်ႈ။ ယိူင်းဢၢၼ်းဝႆႉ ပီႈၼွင်ႉႁႅင်းၵၢၼ် ဢၼ်တေမႃးၶဝ်ႈႁူမ်ႈတႄႉ လႅပ်ႈတေၼမ် ၼပ်ႉဢၢၼ်ႇႁူဝ် ပၢၵ်ႇမၼ်းယူႇ” ဝႃႈၼႆ။


ယူႇတီႈၸုမ်းၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU လူင်းပိုၼ်ႉတီႈသေ ႁူပ်ႉထူပ်းပီႈၼွင်ႉတႆး ႁႅင်း ၵၢၼ်ယၢၼ်မိူင်း  သပ်းလႅင်းလၢတ်ႈၼႄ မိူၼ်ၼင်ႇ ၵၢၼ်မိူင်း၊ ၵၢၼ်ပၢႆးမၢၵ်ႈမီး၊ ၵၢၼ်တူင်ႇဝူင်းၵူၼ်း၊ တီႈလိၼ်တင်း ၾိင်ႈတိုၼ်းသၽႃႇဝ လႄႈ ၵၢၼ်ႁူမ်ႇလူမ်ႈ ၸဵမ်ၸိူဝ်းၼႆႉ ဝႃႈၼႆ။


ပူၼ်ႉမႃး မိူဝ်ႈဝၼ်းတီႈ 18-19/02/2017 သမ်ႉ လူင်းႁူပ်ႉထူပ်းပီႈၼွင်ႉတႆး ႁႅင်းၵၢၼ်ယၢၼ်မိူင်း တၢင်းပွတ်းၵုင်းထဵပ်ႈလႄႈ ရယွင်း။ ဝၼ်းတီႈ 15-16/02/2017 သမ်ႉ ႁူပ်ႉထူပ်းပီႈၼွင်ႉတႆး ၼႂ်းၵဵင်း မႆႇယဝ်ႉၵမ်းၼိုင်ႈ ဝႃႈၼႆ။


ပၢင်ဢုပ်ႇၵုမ် CSSU ပွၵ်ႈၵမ်းၼႆႉ ၸႅၵ်ႇပဵၼ် 15 ၸုမ်းသေ လူင်းပိုၼ်ႉတီႈႁူပ်ႉထူပ်း ပေႃႈမႄႈ ၵူၼ်း မိူင်း ၼႂ်းမိူင်းတႆး ၵူၺ်းဢမ်ႇၵႃး ၼွၵ်ႈမိူင်းတႆး မိူၼ်ၼင်ႇၼႂ်းမိူင်းၶၢင်၊ မိူင်းမၢၼ်ႈ၊ မိူင်းယၢင်း ၼႂ်းပိုၼ်ႉ တီႈတွၼ်ႈလိၼ် ဢၼ်မီးပီႈၼွင်ႉတႆးယူႇသဝ်းၼမ် လၢႆလၢႆတီႈၼၼ်ႉၵေႃႈ လူင်းႁူပ်ႉထူပ်းတွင်ႈ ထၢမ်ၵၢင်ၸႂ်။ ၶေႃႈလႆႈၸႂ် ဢၼ်လႆႈမႃးတီႈၵူၼ်းမိူင်းၼၼ်ႉ တေတႅမ်ႈမၢႆမႃးသေ တေဢဝ် ၶဝ်ႈဢုပ်ႇ ဢူဝ်း ၼႂ်းပၢင်ၵုမ်ၵၢၼ်မိူင်း ၸိူဝ်ႉၸၢတ်ႈတႆး၊ ဢၼ်လႆႈမႃးၽွၼ်းပၢင်ႈ ၶေႃႈလႆႈၸႂ်ၵဵဝ်ႇၵပ်း ၵၢၼ်မိူင်း ၼၼ်ႉ တေၼမ်းဢဝ်ၵႂႃႇဢုပ်ႇဢူဝ်း ၼႂ်းပၢင်ၵုမ်လူင်ၵၢၼ်မိူင်း ဢမ်ႇၼၼ် ပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ဢၼ်ၼၢင်းဢွင်ႇသၢၼ်းၸုၵျီႇ တေဢွၼ်ႁူဝ်ၸတ်းႁဵတ်း တၢင်းၼႃႈ။