ၸုမ်းဢၼ်ၸွႆႈလိူဝ်ႁႅင်းၵၢၼ်ယၢၼ်မိူင်းလၢႆလၢႆၸုမ်းလႄႈ ႁႅင်းၵၢၼ်မွၵ်ႈ 100 ၵေႃႉပၢႆ ႁူမ်ႈၵၼ် ဢုပ်ႇဢူဝ်းလွင်ႈၸတ်းၵၢၼ်ႁႅင်းၵၢၼ်ယၢၼ်မိူင်း ၵဵဝ်ႇၵပ်းလွင်ႈဝတ်းဝႂ်၊ ၵၢၼ်တေႃႇဝီႊသႃႊ တီႈဝဵင်းၵဵင်းမႆႇ ၸိုင်ႈထႆးပွတ်းႁွင်ႇ ။

မိူဝ်ႈဝၼ်းတီႈ 08/02/2017 ၸုမ်းၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း  (Human Rights and Development Foundation-HRDF) ႁူမ်ႈတင်း ၸုမ်းႁူမ်ႈတုမ်ႁႅင်းၵၢၼ်ယၢၼ်မိူင်း (Migrant Workers Federation-MWF) ႁူမ်ႈၵၼ်ၸတ်းႁဵတ်း ပၢင်သပ်းၸႅင်ႈ လွင်ႈဝတ်းဝႂ်၊ လွင်ႈၵၢၼ်တေႃႇ ဝတ်ႉ၊တေႃႇဝီႊသႃႊ(Visa)ၸိူဝ်းၼႆႉ မႃးႁူပ်ႉထူပ်းဢုပ်ႇဢူဝ်းႁႃတၢင်းဢွၵ်ႇလွင်ႈဝတ်းဝႂ် ၸတ်းႁဵတ်း တီႈ ႁူင်းလိုဝ်ႈသဝ်း ႁေႃႊၻီႊၻေႊ ၵႃႊၻဵၼ်ႊ ၵဵင်းမႆႇ။


ၼႂ်းပၢင်ဢုပ်ႇၵုမ်ၼၼ်ႉ မီးၸဝ်ႈၼႃႈတီႈႁွင်ႈၵၢၼ်ၾၢႆႇႁႅင်းၵၢၼ်ၸႄႈတွၼ်ႈၵဵင်းမႆႇ မိူၼ်ၼင်ႇ ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း၊ ၽွင်းတၢင်မိူင်းမၢၼ်ႈ၊ ၸဝ်ႈၼႃႈတီႈၾၢႆႇၵူတ်ႇထတ်းၵူၼ်းၶဝ်ႈမိူင်း၊ ၸဝ်ႈၼႃႈတီႈၾၢႆႇမၢႆမီႈ ၶဝ်ႈႁူမ်ႈဢုပ်ႇဢူဝ်းပႃးၼႆယဝ်ႉ။


လွင်ႈဢၼ်ဢုပ်ႇဢူဝ်းၵၼ်တႄႉ မိူၼ်ၼင်ႇ ၾၢႆႇၽွင်းတၢင်မိူင်းႁူမ်ႈတုမ် တေပိုတ်ႇပၼ်သုၼ် ထတ်းထွင်ၵူၼ်းၵိုၵ်းမိူင်း တေပိုတ်ႇႁဵတ်းတီႈလႂ် ၊ဝၼ်းလႂ်ဢၼ်ဝႃႈၼၼ်ႉ တေပိုၼ်ၽၢဝ်ႇထႅင်ႈ ၵမ်းၼိုင်ႈ ဝႃႈၼႆ။


ၾၢႆႇၸတ်းႁႃၵၢၼ်ငၢၼ်းတႄႉလၢတ်ႈဝႃႈ-တွၼ်ႈတႃႇႁႅင်းၵၢၼ်ၸိူဝ်းဝတ်းဝႂ်မူတ်းဢႃယု ဢမ်ႇၼၼ် တေမူတ်းၼၼ်ႉ ႁႂ်ႈၵႂႃႇတၢင်ႇယွၼ်းဝႂ် ႁပ်ႉႁွင်ႈတီႈႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ် ယဝ်ႉၵေႃႈ ၵႂႃႇယွၼ်းတေႃႇဝီႊသႃႊ တီႈႁွင်ႈၵၢၼ်ၾၢႆႇၵူတ်ႇထတ်းၵူၼ်း ၶဝ်ႈမိူင်း ယဝ်ႉၵေႃႈမႃးၶိုၼ်းတေႃႇဝႂ် ႁဵတ်းၵၢၼ်ၼႆယဝ်ႉ။


ၸိူဝ်းဢၼ် ဝီႊသႃႊ ဝႂ်ႁႅင်းၵၢၼ်တေမူတ်းၼၼ်ႉၵေႃႈ ႁႂ်ႈၵႂႃႇတၢင်ႇယွၼ်းလႆႈယဝ်ႉ၊ လိူဝ်ၼၼ်ႉသင် ဝႃႈႁႅင်းၵၢၼ်ယၢၼ်မိူင်းၵေႃႉလႂ်ၶႂ်ႈႁဵတ်း Passport ဢၼ်တႄႉမၼ်းၸိုင် ဢဝ်ဝႂ်ၵပ်းတူဝ် (မၢႆၾၢင်) ဝႂ်မုင်ႉႁေႃႁိူၼ်း (ဢဵင်ႇထွင်ႇသု)သေၵႂႃႇၵပ်းသိုပ်ႇတီႈလုမ်းၽွင်းတၢင်မၢၼ်ႈ တီႈမိူင်းၵွၵ်ႇ။ တွၼ်ႈတႃႇၵူၼ်းၸိူဝ်းဢၼ်မီးဝႂ်သီၶွင်ႇၼၼ်ႉၵူၺ်းတႄႉတေလႆႈ ၵႂႃႇတီႈ One Stop Services ဢမ်ႇၼၼ် ႁွင်ႈၵၢၼ်ၾၢႆႇ ထတ်းထွင်ၵူၼ်းၵိုၵ်းမိူင်းတီႈမႄႈသၢႆ။ တွၼ်ႈတႃႇၵူၼ်း ၸိူဝ်းဢၼ်ယိပ်း ဝႆႉဝႂ်သီၶွင်ႇၼၼ်ႉတႄႉ သင်ၸိူဝ်ႉဝႃႈၶႂ်ႈၵႂႃႇ ႁဵတ်းၶိုၼ်းဝႂ်ၶၢမ်ႈမိူင်း PassPortၵေႃႈလႆႈ သင်ႇဢမ်ႇၶႂ်ႈ ႁဵတ်းၶိုၼ်းသေ သိုပ်ႇယိပ်းဝႂ်သီၶွင်ႇၵႂႃႇၵေႃႈလႆႈဝႃႈၼႆ။


ၵဵဝ်ႇၵပ်းလွင်ႈၼႆႉ ၸၢႆးပိူင်း ၸဝ်ႈၼႃႈတီႈၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း (HRDF)လၢတ်ႈဝႃႈ - “တေႃႇထိုင်ဝၼ်းမိူဝ်ႈၼႆႉ ႁႅင်းၵၢၼ်ယၢၼ်မိူင်းဢၼ်ထုၵ်ႇၺႃးလွၵ်ႇမီးတင်းၼမ် ၵွပ်ႈပိူဝ်ႈၸိူင်ႉ ၼၼ်လႄႈ ပေႃးၶႂ်ႈထၢမ်လွင်ႈဝတ်းဝႂ်၊ ၶႂ်ႈႁူႉလွင်ႈဝတ်းၼႆၸိုင်ႁႂ်ႈ ၵပ်းသိုပ်ႇတွင်ႈထၢမ်ၵႂႃႇ တီႈၸဝ်ႈ ၼႃႈတီႈၽူႈမီးပုၼ်ႈၽွၼ်းၵမ်းသိုဝ်ႈ ၼင်ႇႁိုဝ်ႁဝ်းပေႃးတေဢမ်ႇထုၵ်ႇၺႃး လွၵ်ႇလႄႈႁူႉၶိုတ်း တၼ်းၼၼ်ႉ”-ဝႃႈၼႆ။


ႁႅင်းၵၢၼ်ယၢၼ်မိူင်းဢၼ်ႁဵတ်းၵၢၼ်ၼႂ်းမိူင်းထႆးၵမ်ႈၼမ် ပဵၼ်ၵူၼ်းမိူင်းမၢၼ်ႈ။ ယူႇတီႈၶေႃႈမုလ်း လူင်ပွင်ၸိုင်ႈမိူင်းထႆး မိူဝ်ႈလဵဝ်ၵူၼ်းႁႅင်းၵၢၼ်ယၢၼ်မိူင်း မိူင်းႁူမ်ႈတုမ်မီးမွၵ်ႈ 1 လၢၼ်ႉပၢႆ။ ၵူၺ်းၵႃႈလဵပ်ႈတေၼမ်လိူဝ်ၼႆႉ။