တပ်ႉသိုၵ်းၵူၼ်းမိူင်း သႅင်ၵႅဝ်ႉ ႁူပ်ႉထူပ်းပေႃႈမႄႈၵူၼ်းမိူင်း ၼႂ်းၸႄႈဝဵင်းၵုၼ်ႁဵင်၊ ၶႆႈၼႄပိုၼ်းတပ်ႉသိုၵ်းၸိုင်ႈတႆးလႄႈ ၼႃႈၵၢၼ်ပၢႆးမိူင်းဢၼ်တပ်ႉသိုၵ်းၵူၼ်းမိူင်းၸိုင်ႈတႆး လႆႈႁဵတ်း သၢင်ႈမႃး ထိုင်ယၢမ်းလဵဝ် ။

ဝၼ်းတီႈ 01/02/2017 ယၢမ်းဝၢႆးဝၼ်း 15:00-17:00 မူင်း တပ်ႉသိုၵ်းၵူၼ်းမိူင်းၸိုင်ႈတႆး သႅင်ၵႅဝ်ႉ ႁူပ်ႉထူပ်းပေႃႈမႄႈၵူၼ်းမိူင်း၊ လုၵ်ႈတပ်ႉ၊ ၵူၼ်းသိုၵ်းလႄႈ ၽူႈၵွၼ်းတပ်ႉ ဢွင်ႈတီႈၸတ်း ႁဵတ်းပၢင် ႁူပ်ႉထူပ်း တီႈတပ်ႉသိုၵ်းၵူၼ်းမိူင်းၸိုင်ႈတႆး တပ်ႉၸုမ်း 7 ငဝ်ႈငုၼ်းလွႆၽႃ ဝဵင်းၵႃလိ ၸႄႈဝဵင်း ၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။ မီးပေႃႈမႄႈပီႈၼွင်ႉၵူၼ်းမိူင်း ၶဝ်ႈႁူမ်ႈ 1000 ပၢႆ။ယူႇတီႈၽူႈယႂ်ႇၵူၼ်းလူင် ၼႂ်းတပ်ႉ သိုၵ်းၵူၼ်း မိူင်း သႅင်ၵႅဝ်ႉ မွၵ်ႇလၢတ်ႈၶေႃႈၵႂၢမ်း ။


ၸၢႆးႁၢၼ် ၵူၼ်းမိူင်းၸႄႈဝဵင်းၵုၼ်ႁဵင် လၢတ်ႈဝႃႈ “ မီးပီႈၼွင်ႉၵူၼ်းမိူင်း ၸႄႈဝဵင်းၵုၼ်ႁဵင်၊ ၵႃလိ မႃးၶဝ်ႈႁူမ်ႈတင်းၼမ်လၢႆ၊ ယၢမ်း ဝၢႆးဝၼ်း 3 မူင်း ထိုင် 5 မူင်း ၸတ်းပၢင်ၵႅဝ်ႈ၊ ၼွၵ်ႈလိူဝ်ၼၼ်ႉ ၵေႃႉသိုၵ်းၵေႃႉႁၢၼ်တပ်ႉသိုၵ်းၵူၼ်းမိူင်းလႄႈ ပေႃႈမႄႈပီႈၼွင်ႉၵူၼ်းမိူင်း ၵိၼ်ၶဝ်ႈႁူမ်ႈမူႇၵၼ်သေ ႁွင်ႉၽဵင်းၵႂၢမ်း ၶွတ်ႇယွတ်ႈပၢင်ႁူပ်ႉထူပ်းၵၼ်ၵႂႃႇ” ဝႃႈၼႆ ။


ပၢင်ႁူပ်ႉထူပ်းၵူၼ်းမိူင်းၼႆႉ ၸတ်းႁဵတ်းတီႈ ငဝ်ႈငုၼ်း တပ်ႉၸုမ်း 7 လွႆၽႃ ဝဵင်းၵႃလိ မီးၽူႈယႂ်ႇ ၵူၼ်းလူင် ၽူႈမီးၸၼ်ႉ ၼႂ်းငဝ်ႈငုၼ်းတပ်ႉသိုၵ်းၵူၼ်းမိူင်း သႅင်ၵႅဝ်ႉ မွၵ်ႇလၢတ်ႈ ၶေႃႈၵႂၢမ်း။ မိူၼ်ၼင်ႇ ႁူဝ်ပဝ်ႈ ၸဝ်ႈလွႆမၢဝ်း၊ ၸဝ်ႈၵွင်တႆး၊  ၸဝ်ႈလၢဝ်ၵွၼ်း ၽူႈပွင်ၵၢၼ်သိုၵ်းလႄႈ ၽူးၼမ်း ၼႂ်းၵူႈလွင်ႈလွင်ႈ ၸဝ်ႈၸၢႆးဢွၼ် ဢိၵ်ႇၽူႈမီးၸၼ်ႉလၢႆလၢႆၸဝ်ႈ ၶိုၼ်ႈႁွတ်ႈၸွမ်း ဝႃႈၼႆ ။


ႁူဝ်ပဝ်ႈ ၸဝ်ႈလွႆမၢဝ်း တင်းၸဝ်ႈၵၢႆႇၾႃႉၼႆႉ မိူဝ်ႈပီ 2009 ဢွၼ်ႁူဝ်ၼမ်းၼႃႈတပ်ႉသိုၵ်း ၸိုင်ႈတႆး ငဝ်ႈငုၼ်း သႅင်ၵႅဝ်ႉ၊ ၸဝ်ႈလႃႉမိၼ်ႉ တပ်ႉၸုမ်း 3၊ ၸဝ်ႈလၢဝ်ၵွၼ်း တပ်ႉၸုမ်း 7 တူၵ်းလူင်းတင်း သိုၵ်းလူင်ပွင်ၸိုင်ႈမၢၼ်ႈသေ လႅၵ်ႈႁဵတ်းတပ်ႉသိုၵ်းၵူၼ်းမိူင်း ၸိုင်ႈတႆး (ပျီႇတုၸိတ်ႉ) ၵႂႃႇ။ ၽူႈၵွၼ်းတပ်ႉၸုမ်း 1 ၸဝ်ႈပၢင်ႇၾႃႉတႄႉ ဢမ်ႇယွမ်းလႅၵ်ႈႁဵတ်းတပ်ႉသိုၵ်းၵူၼ်းမိူင်းသေ သိုပ်ႇဢွၼ်ဢဝ် ၵေႃႉသိုၵ်းၵေႃႉႁၢၼ် ႁၢပ်ႇပုတ်ႈၼႃႈၵၢၼ် ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA မႃးတေႃႇထိုင်ဝၼ်းမိူဝ်ႈၼႆႉ ။