ၼၢင်းယိင်း15ၵေႃႉ ၺႃးလႅၼ်လႆႈၶၢႆတူဝ်- ၺႃးပလိၵ်ႈထႆးၵူတ်ႇထတ်း တီႉၺွပ်းလႄႈ ဢဝ်ၶဝ် သူင်ႇပၼ်တီႈၸဝ်ႈၼႃႈတီႈမၢၼ်ႈ ဝဵင်းတႃႈၶီႈလဵၵ်း ။

ဝၼ်းတီႈ01/02/2017 ၸဝ်ႈၼႃႈတီႈပလိၵ်ႈ၊ ၾၢႆႇၵူတ်ႇထတ်းၵူၼ်းၶဝ်ႈမိူင်း ဝဵင်းၵဵင်းႁၢႆး ဢဝ်တူဝ် ၼၢင်းယိင်းမိူင်းမၢၼ်ႈ 15 ၵေႃႉ သူင်ႇပၼ်ၸဝ်ႈၼႃႈတီႈမၢၼ်ႈ တီႈၶူဝ်ဢူၺ်းလီ ထႆး-တႆး တႃႈၶီႈလဵၵ်း - မႄႈသၢႆ ၸႄႈတွၼ်ႈၵဵင်းႁၢႆး ၸိုင်ႈထႆး ။


ၼၢင်းသႅင်မိူင်းလီ ၽူႈၼမ်းၼႂ်းသမႃးၶူမ်းပၢႆးပၺ်ၺႃလႄႈၾိင်ႈငႄႈတႆးလၢတ်ႈဝႃႈ - “ၼၢင်းယိင်းၼႂ်း မိူင်းတႆးၵူႈၵေႃႉ ပေႃးတေဢွၵ်ႇႁဵတ်းၵၢၼ်ၼွၵ်ႈမိူင်းၸိုင် တီႈဢေႇမၼ်းၼႆႉႁႂ်ႈယဝ်ႉၸၼ်ႉ10 ဢမ်ႇၼၼ်ၵေႃႈ ဢႃယု 18 ပီၶိုၼ်ႈၼိူဝ် ပေႃးမီးတၢင်းႁူႉ၊ ပေႉတူဝ်လီလီယဝ်ႉ ၸင်ႇဢွၵ်ႇႁႃႁဵတ်း ၵၢၼ်ၼွၵ်ႈမိူင်း ပေႃးႁဝ်းမီးတၢင်းႁူႉတဵမ်တူဝ် ဢႃယုႁဝ်းၵေႃႈယႂ်ႇယဝ်ႉၼႆတႄႉ ႁဝ်းၵေႃႈၸၢင်ႈ ႁဵတ်းၵၢၼ်လႆႈ ထုၵ်ႇမႅၼ်ႈၸွမ်းၼင်ႇမၢႆမီႈ ပိူၼ်ႈၵေႃႈဢမ်ႇၸၢင်ႈမႃးၵဝ်းလႅၼ်ႁဝ်း” ဝႃႈၼႆ ။


သိုဝ်ႇၶၢဝ်ႇထႆးရတ်ႉ ပိုၼ်ၽၢဝ်ႇဝႃႈ - ၼၢင်းယိင်းမိူင်းမၢၼ်ႈ 15ၵေႃႉၼႆႉ ၶဝ်ႈပႃးၼႂ်းၼၢင်းယိင်း 115 ၵေႃႉ ဢၼ်ထုၵ်ႇလွၵ်ႇမႃးႁဵတ်းၵၢၼ်တီႈႁွင်ႈမိပ်ႇၼူတ်ႈ တီႈၼႃႊတႃႊရီႊဢၢပ်ႇဢူပ်ႇၼူတ်ႊ မိူင်းၵွၵ်ႇ ၸိုင်ႈထႆး ။


မိူဝ်ႈဝၼ်းတီႈ 08/06/2016 ၸဝ်ႈၼႃႈတီႈၵႂႃႇၵူတ်ႇထတ်း ႁွင်ႈမိပ်ႇၼူတ်ႈတီႈၼၼ်ႈ ထူပ်းၺႃး ၼၢင်း ယိင်းၸိူဝ်းထုၵ်ႇလွၵ်ႇမႃးၶၢႆတူဝ်သေလႄႈ ၸင်ႇၸွႆႈထႅမ်ၼၢင်းယိင်း 15 ၵေႃႉ သူင်ႇတူဝ်ၵႂႃႇတီႈ ႁွင်ႈ ၵၢၼ်ၾၢႆႇတူၺ်းလွမ်လႄႈပူၵ်းပွင်  สถานคุ้มครองและพัฒนาอาชีพบ้านเกร็ดตระการ ႁႂ်ႈၸွႆႈတူၺ်းလွမ် ပူၵ်းပွင်ပၼ် လွင်ႈယူႇၵိၼ်၊ လွင်ႈပၢႆးၸႂ် ၾိုၵ်းသွၼ်ပၼ် လွင်ႈမေႃ တိၼ်မေႃမိုဝ်း ၸဵမ်ၸိူဝ်းၼႆႉသေ ၸင်ႇၶိုၼ်းသူင်ႇပွၵ်ႈမိူင်းလင် - ဝႃႈၼႆ ။


ၼၢင်းယိင်းဢၼ်ၺႃးလွၵ်ႇၸႂ်ႉၶၢႆတူဝ်ၼႆႉ ၵမ်ႈၽွင်ႈဝႃႈပႃးတႆး၊ ၼႂ်းၶၢဝ်ႇထႆးရတ်ႉတႄႉ ဢမ်ႇတႅမ်ႈ တႅၵ်ႇလႅင်းဝႃႈပဵၼ်ၶိူဝ်းသင် လိူဝ်သေဝႃႈပဵၼ်ၼၢင်းယိင်းမိူင်းမၢၼ်ႈ ။


ၾၢႆႇၵႅတ်ႇၵင်ႈ ပၼ်ႁႃၵူၼ်းၵႃႉၵူၼ်းတႄႉဝႃႈ - လွင်ႈလၵ်ႉလွမ်လွၵ်ႇဝွၼ်းဢဝ်ၼၢင်းယိင်းၸိူဝ်းယူႇ လႅၼ်လိၼ်ၶၢႆၶဝ်ႈမိူင်းထႆးမီးယူႇၵူႈဝၼ်း၊ လူင်ပွင်ၸိုင်ႈထႆးၵေႃႈ ၶတ်းၸႂ်သၢၼ်မိုဝ်းၵႄႈ လိတ်ႈယူႇ ဝႃႈၼႆ ။