ၼႂ်းၸိုင်ႈတႆးပွတ်းႁွင်ႇ ၸႄႈဝဵင်းလႃႈသဵဝ်ႈ ၾၢႆႇဢွၵ်ႇဝဵင်းလႃႈသဵဝ်ႈၼၼ်ႉ ၵူၼ်းဝၢၼ်ႈသွင်ၵေႃႉပီႈၼွင်ႉ ၵႂႃႇတႅပ်းဢွႆႈသေယဵပ်ႇၺႃးမၢၵ်ႇ၊ ႁဵတ်းႁႂ်ႈၵေႃႉပဵၼ်ပီႈဢၢႆႈလႆႈလူႉတၢႆၵႂႃႇထင်တီႈ၊ ယွၼ်ႉပိူဝ်ႈဢွင်ႈတီႈၼၼ်ႉ မီးမၢၵ်ႇႁၢင်ႈၵၢင်ဝႆႉၼမ်သေ တႃႇတေၵႂႃႇၵူႈဢဝ်တူဝ်တၢႆၵေႃႈ ႁူပ်ႉထူပ်းတၢင်းယၢပ်ႇၽိုတ်ႇ ။

ပူၼ်ႉမႃးမိူဝ်ႈဝၼ်းတီႈ 11/02/2017 ၼၼ်ႉ ၼႂ်းဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ၊ ဢၼ်တိတ်းဢိူမ်ႈတင်းၾင်ႇၶူင်းဝႆႉၼၼ်ႉ မီးလုၵ်ႈၸၢႆးလုင်းပုမ်ႇတင်းပႃႈဢၢမ်၊ သွင်ၵေႃႉပီႈၼွင်ႉ၊ ၸိုဝ်ႈၸၢႆးယီႈႁေႃး ဢႃယု 22 ပီ တင်းၵေႃႉပဵၼ်ၼွင်ႉၸၢႆးမၼ်း ၵႂႃႇႁဵတ်းၵၢၼ် တႅပ်းဢွႆႈ တၢင်းဝၢၼ်ႈၵၢင်မိူင်း၊ ၵႂႃႇယဵပ်ႇၺႃးမၢၵ်ႇတႅၵ်ႇသေ ႁဵတ်းႁႂ်ႈၸၢႆးယီႈႁေႃး လႆႈလူႉတၢႆထင်တီႈၵႂႃႇ-ၼႆယဝ်ႉ ။


ၵဵဝ်ႇၵပ်းလွင်ႈၼႆႉ လုင်းၸၢႆး ၵူၼ်းပိုၼ်ႉတီႈလၢတ်ႈဝႃႈ- မၢၵ်ႇၼႆႉပဵၼ်ၽႂ်ႁၢင်ႈၵၢင်ဝႆႉႁဝ်းၶႃႈဢမ်ႇႁူႉ၊ ဢွင်ႈတီႈၼၼ်ႈ မၼ်းမီးတပ်ႉမၢၼ်ႈဢၼ်လုၵ်ႉတၢင်းၵုၼ်လူင်-ႁူဝ်ပၢင်ႇ မႃးပၵ်းသဝ်းတူင်ႉၼိုင်၊ မၢၵ်ႇဢၼ်ႁၢင်ႈၵၢင်ဝႆႉၼႆႉ လႆႈငိၼ်းဝႃႈမီးၼမ်တႄႉတႄႉ။ ၵွပ်ႈၼၼ် ပေႃးဝႃႈပီႈဢၢႆႈမၼ်းယဵပ်ႇၺႃးမၢၵ်ႇယဝ်ႉၼႆၵေႃႈ ၵေႃႉပဵၼ်ၼွင်ႉၸၢႆးမၼ်း တေၶဝ်ႈၵႂႃႇၸူးပီႈဢၢႆႈမၼ်း။ ၵူၺ်းၵႃႈ ပီႈဢၢႆႈမၼ်းဝႃႈယႃႇပေၶဝ်ႈမႃးၼႆသေ လူႉတၢႆၵႂႃႇ။ ၼွင်ႉၸၢႆးမၼ်းၵေႃႈ တူၵ်းၸႂ်သေလႅၼ်ႈပွၵ်ႈမိူဝ်းဝၢၼ်ႈ မိူဝ်းႁွင်ႉၵူၼ်းဝၢၼ်ႈမႃး တႃႇတေဢဝ်ၶၢပ်ႈတူဝ်ၼႆသေတႃႉ ၽႂ်ဢမ်ႇႁတ်းၶဝ်ႈၸမ် ယွၼ်ႉပိူဝ်ႈဝႃႈမီးမၢၵ်ႇၼမ်။ ၵွပ်ႈၼၼ်လႄႈ ယွၼ်းတၢင်းၸွႆႈထႅမ်ၾၢႆႇၽူႈတႅၼ်းသၽႃးၶဝ်၊ ၾၢႆႇၸဝ်ႈၼႃႈတီႈ သိုၵ်းမၢၼ်ႈဢၼ်မီးၼႂ်းပိုၼ်ႉတီႈၶဝ်သေ တေၶတ်းၸႂ်ၵႂႃႇဢဝ်တူဝ်တၢႆ- ဝႃႈၼႆ ။


ၵဵဝ်ႇၵပ်းလွင်ႈၸၢႆးယီႈႁေႃး ဢၼ်လူႉတၢႆၵႂႃႇၼႆႉသေ ၽွင်းမိူဝ်ႈလဵဝ် လႆႈဢွၼ်ၵၼ်ၵႂႃႇတၢင်ႇယိုၼ်ႈလိူင်ႈဝႆႉတီႈ တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်ယူႇၼႂ်းပိုၼ်ႉတီႈတီႈၼၼ်ႈ ပႃးၸဵမ်တပ်ႉပလိၵ်ႈၸိူဝ်းၼႆႉၵေႃႈ ၵႂႃႇယိုၼ်ႈလိူင်ႈဝႆႉယဝ်ႉ ။


ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ၼႂ်းပိုၼ်ႉတီႈႁဝ်းၶႃႈၼႆႉ ယွၼ်ႉပိူဝ်ႈပဵၼ်ပၢင်တိုၵ်းသိုၵ်းသိူဝ်သေ ႁဝ်းၶႃႈဢၼ်ပဵၼ်ၽူႈတႅၼ်းၵူၼ်းဝၢၼ်ႈၵူၼ်းမိူင်းၵေႃႈ ဢမ်ႇၸၢင်ႈပူၵ်းပွင်သင်ပၼ် ၵူၼ်းဝၢၼ်ႈၵူၼ်းမိူင်းတႄႉတႄႉဝႃႈဝႃႈ။ ၼႂ်းပိုၼ်ႉတီႈၵေႃႈၵုမ်ႇပဵၼ်ပၢင်တိုၵ်းသေ ၵုမ်ႇလႆႈမႆႈၸႂ်၊ ၵုမ်ႇႁႃတၢင်းၸွႆႈထႅမ်ၵူၼ်းထူပ်းၽေးသိုၵ်းသိူဝ်ၵူၺ်း။ ႁဝ်းၶႃႈၶႂ်ႈတိုၵ်းသူၼ်းထိုင်လူင်ပွင်ၸိုင်ႈ တႄႉၵေႃႈ ၶႂ်ႈႁႂ်ႈၸီႉသင်ႇပၼ် လွင်ႈဢၼ်ႁႅၼ်းသိုၵ်းလေႃႇတိုၵ်းၼႂ်းပိုၼ်ႉတီႈၸိူဝ်းၼႆႉ ၶႂ်ႈႁႂ်ႈၵိုတ်းပၼ်၊ ၶႂ်ႈႁႂ်ႈဢုပ်ႇဢူဝ်းၵႄႈလိတ်ႈပၼ်ႁႃ၊ ၶႃႈႁဝ်းတႄႉၶႂ်ႈတုၵ်းယွၼ်းၼင်ႇၼႆ- ဝႃႈၼႆ ။


ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ 8 ပူၼ်ႉမႃးၼႆႉၵေႃႈ ၵူၼ်းဝၢၼ်ႈၼွင်ၵေႃႇ ဢၢႆႈယီႈ ၸၢဝ်းၶိူဝ်းတဢၢင်း (လွႆ) ဢၼ်ပဵၼ်ၸဝ်ႈၶွင်ဝူဝ်းၵႂၢႆးၼၼ်ႉ ၵႂၢႆးမႄႈလုၵ်ႈဢွၼ်ႇသွင်တူဝ်မၼ်းၸၢႆး ၵႂႃႇယဵပ်ႇၺႃးမၢၵ်ႇသေ တူဝ်ၼိုင်ႈတၢႆၵႂႃႇ။ ထႅင်ႈတူဝ်ၼိုင်ႈတိူဝ်ႉဝၢတ်ႇၸဵပ်း ၶႃတၢင်းၼႃႈႁၵ်း- ၸၢႆးၼေႃႇ ၵူၼ်းဝၢၼ်ႈမိူင်းၵႅတ်ႈ လၢတ်ႈ ။


ၽူႈဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ- မၢၵ်ႇဢၼ်တႅၵ်ႇၼႆႉ တိုၼ်းပဵၼ်သိုၵ်းမၢၼ်ႈႁၢင်ႈၵၢင်ဝႆႉ ပိူဝ်ႈတႃႇႁူမ်ႇလူမ်ႈတပ်ႉၶဝ်၊ ယွၼ်ႉၼၼ် ၵူၼ်းဝၢၼ်ႈၵူၼ်းမိူင်းလႆႈယဵပ်ႇၺႃး။ ဢၼ်ႁၢင်ႈၵၢင်ဝႆႉၵေႃႈ တိုၵ်ႉမီးထႅင်ႈယူႇတင်းၼမ်၊ မီးထႅင်ႈလၢႆလုၵ်ႈၼႆ ၽႂ်ယင်းဢမ်ႇၸၢင်ႈဝႃႈ- ဝႃႈၼႆ ။


ၼႂ်းပွတ်းတွၼ်ႈၼႆႉ (ၾၢႆႇတူၵ်းၶူင်း) လိူဝ်သေသိုၵ်းမၢၼ်ႈ တပ်ႉၶမယ 312 တူင်ႉၼိုင်ယဝ်ႉ ယင်းမီးတပ်ႉပလိၵ်ႈ၊ ၸုမ်းပီႇတုၸိတ်ႉမၢၼ်ႈပၢင်ႇ၊ ၸုမ်းပီႇတုၸိတ်ႉၶၢင် KDA ၵွင်းၶႃးၸိူဝ်းၼႆႉတူင်ႉၼိုင်ဝႆႉ။ လိူဝ်သေၼၼ်ႉ ယင်းမီးထႅင်ႈ ဢၼ်ပဵၼ်ၸုမ်းဢူၺ်းလီပွတ်းႁွင်ႇ သၢမ်မူႇသၢမ်ၸုမ်း (TNLA, MNDAA, AA) ၵေႃႈတူင်ႉၼိုင်ဝႆႉ။ တပ်ႉသိုၵ်းၸိုင်ႈတႆး SSPP/SSA ၵေႃႈ လတ်းၽၢၼ်ႇၵႂႃႇမႃးတူင်ႉၼိုင်ဝႆႉ။ ထႅင်ႈၾၢႆႇၼိုင်ႈ တၢင်းပွတ်းဢွၵ်ႇၶူင်း ၼႃႈလိၼ်ၽွင်းငမ်းတူဝ်ၵဝ်ႇဝႃႉ မီးတပ်ႉသိုၵ်းဝႃႉ UWSA တူင်ႉၼိုင် ။