ၸုမ်းၵေႃတႆးဢွၼ်ႁူဝ် ၸတ်းႁဵတ်းပၢင်ဢုပ်ႇၵုမ် တႃႇႁၢင်ႈႁႅၼ်းလၵ်းသုတ်ႇၵၢၼ်ႁဵၼ်း ၼႂ်းၸၼ်ႉၸွမ်တႆး ၽူႈမီးပိုၼ်ႉႁူႉပၢႆးႁၼ် ၶဝ်ႈႁူမ်ႈဢုပ်ႇၵုမ်တင်းၼမ်။

ဝၼ်းတီႈ22/02/2017 ၸုမ်းၵေႃတႆး Kaw Dai Organization ၸတ်းႁဵတ်းပၢင်ႁူပ်ႉထူပ်း ဢုပ်ႇၵုမ်ၵၼ် တႃႇႁၢင်ႈႁႅၼ်းလၵ်းသုတ်ႇၵၢၼ်ႁဵၼ်း ၸၼ်ႉၸွမ် တႆး မီး Dr.ၸၢႆးသၢင်ႇဢၢႆႈ၊ Dr.ၸၢႆးၼေႃႇၶိူဝ်း၊ Dr.ၸၢႆးၶမ်းမိူင်း၊ လုင်းၸၢႆးဢေးမွင်ႇ၊ ၶူးပူင်သွၼ်လူင်ၸၢႆးၾႃႈ၊ ၸၢႆးၽူင်းၶွင်ႇ ၶူးသွၼ်ၼႂ်းၵေႃတႆး ဢိၵ်ႇၽူႈသူၼ်ၸႂ် ၶဝ်ႈႁူမ်ႈၸမ် 20ၵေႃႉ။ ပၢင်ဢုပ်ႇဢူဝ်း ၸတ်းႁဵတ်းတီႈ ႁူင်းႁဵၼ်းၵေႃတႆး ၵႃလီႉ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။


ယိူင်းဢၢၼ်းဢၼ်ၸတ်းႁဵတ်းပၢင်ဢုပ်ႇၵုမ်ၼႆႉ ပေႃးပိုတ်ႇၸၼ်ႉၸွမ်တႆးမႃးယဝ်ႉ တေပူင်သွၼ်ပၼ်သင် ? ၸိူင်ႉႁိုဝ်? ႁႂ်ႈပေႃးၸၢင်ႈႁၢင်ႈႁႅၼ်းဝႆႉၼႆလႄႈ ၸင်ႇမွၵ်ႇၽူႈႁူႉႁၼ်မႃးသေ ယွၼ်းတၢင်းႁၼ်ထိုင်လႄႈ ၵၢၼ် ဝၢင်းၽႅၼ် ။ လႆႈႁူႉဝႆႉဝႃႈ ဢွၼ်တၢင်းသုတ်း တေပူင်သွၼ်ၵႂႃႇ4 ပၢႆး 1.ပၢႆးပိုၼ်း၊ 2.ပၢႆးတူင်ႇဝူင်းၵူၼ်း၊ ပၢႆး Com puter /IT လႄႈတင်းပၢႆးဢိင်းၵလဵတ်ႈ - ဝႃႈၼႆ။


ၸၢႆးလႅင်းၶမ်း ၽူႈၶဝ်ႈၸုမ်းၵေႃတႆး လၢတ်ႈဝႃႈ-“ၸၼ်ႉၸွမ်ဢၼ်တေပိုတ်ႇတီႈၵႃလီႉၼႆႉ မီးယိူင်းဢၢၼ်းဝႃႈ ၶႂ်ႈပိုတ်ႇႁၢင်ပီ 2017 ၼႆႉ ၵူၺ်းၵႃႈတႃႇတေပဵၼ်မႃးၵေႃႈဢမ်ႇငၢႆႈ ၼင်ႇႁိုဝ်တေပဵၼ်မႃးၼၼ်ႉၵေႃႈ လူဝ်ႇတၢင်း ႁူမ်ႈမိုဝ်းတီႈ ပီႈၼွင်ႉႁဝ်းတင်းၼမ်ယူႇ၊ လိၵ်ႈလၢႆးပၢႆးပၺ်ၺႃၼႆႉ မၼ်းလမ်ႇလွင်ႈတွၼ်ႈတႃႇ ၸိူဝ်ႉၸၢတ်ႈတႄႉ တႄႉ ၶႂ်ႈႁႂ်ႈပီႈၼွင်ႉႁဝ်းၶႃႈ ပေႃႈမႄႈလုၵ်ႈႁဵၼ်းၵူႈၵေႃႉ ဢွၼ်ၵၼ်ပၼ်ႁႅင်း လုၵ်ႈလၢၼ်ႁဵၼ်းဢဝ် ပၢႆးပၺ်ၺႃၼမ်ၼမ် သေၵမ်း ” ဝႃႈၼႆ။


ၸၢႆးၽူင်းၶွင်ႇ ၵေႃႈယၢမ်ႈလၢတ်ႈဝႃႈ – “ၶႂ်ႈႁႂ်ႈပီႈၼွင်ႉႁဝ်းၶႃႈ ဢွၼ်ၵၼ်သႂ်ႇၸႂ်လႄႈပၼ်ႁႅင်းပၢႆးပၺ်ၺႃ ၼမ် ၼမ် ယွၼ်ႉဝႃႈ ၵၢပ်ႈပၢၼ်မိူဝ်ႈလဵဝ်ၼႆႉ ပိူၼ်ႈဢဝ်တၢင်းႁူႉတၢင်းႁၼ်ၶေႉၶဵင်ႇၵၼ်ယဝ်ႉ ၼင်ႇႁိုဝ်ႁဝ်းပေႃး တေ ၶိုတ်းၸၼ်ႉလုမ်ႈၾႃႉ ပဵင်းပိူၼ်ႈၼၼ်ႉ ႁႂ်ႈဢွၼ်ၵၼ်လဵပ်ႈႁဵၼ်းဢဝ်တၢင်းႁူႉၵၼ်ၼမ်ၼမ် သေၵမ်း-ဝႃႈၼႆ ။


မိူဝ်ႈဝၼ်းတီႈ 11-12/12/2016 ၸုမ်းၵေႃတႆး ဢွၼ်ႁူဝ်ၸတ်းႁဵတ်းပၢင်ဢုပ်ႇဢူဝ်း တီႈ ႁူင်းႁႅမ်း သၵၢႆးဝိဝ်ႊ (Sky View) ၸႄႈဝဵင်းလႃႈသဵဝ်ႈသေ ၶပ်းၶိုင်ႁၢင်ႈႁႅၼ်း တႃႇၵေႃႇတင်ႈၸၼ်ႉၸွမ်တႆး ။ တီႈပၢင်ၵုမ်ၼၼ်ႉ မီးၽူႈလူင်ႉလႅၼ်ႇမိူၼ်ၼင်ႇ ၸဝ်ႈၶူးသုၶမ်း၊ Dr.ၸၢႆးၼေႃႇၶိူဝ်း၊ ၶူးပူင်သွၼ်လူင်ၸၢႆးၾႃႈ ၊Dr.ၸၢႆးဢူး ၊Dr.ၸၢႆးသၢင်ႇဢၢႆႈ ဢိၵ်ႇသင်ၶၸဝ်ႈ ၽူႈယႂ်ႇၵူၼ်းလူင် လႄႈၸုမ်းတူင်ႇဝူင်းၵူၼ်းၵမ်ႈၽွင်ႈ ၶဝ်ႈႁူမ်ႈမွၵ်ႈ 40 ၵေႃႉ ။


ၸၼ်ႉၸွမ်တႆးၼႆႉ မိူဝ်ႈၵွၼ်ႇဢမ်ႇတွၼ်ႉယၢမ်ႈမီးမႃး ဢၼ်ႁၢင်ႈႁႅၼ်းတေၵေႃႇသၢင်ႈ ပွၵ်ႈၵမ်းၼႆႉတေလႆႈဝႃႈ ပဵၼ်ၸၼ်ႉၸွမ်တႆးလင်ႁႅၵ်ႈ ၼႂ်းၵၢၼ်ႁဵၼ်းၵၢၼ်သွၼ်လေႃးၵီႇ။  ၸၼ်ႉၸွမ်ပုတ်ႉထတႄႉ ၸဝ်ႈၶူးလူင် Dr. ၶမ်းမၢႆ ထမ်မသႃမိပဵၼ်ၵဝ်ႉၵၼ်းသေ ပူၵ်းတင်ႈဝႆႉ တီႈဝဵင်းတူၼ်ႈ တီး မိူဝ်ႈႁူဝ်ပီ 2016 ။