ၸုမ်းၵူၼ်းၼုမ်ႇတႆး ၸႄႈဝဵင်းတၢင်ႉယၢၼ်း ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်ၽိူမ်ႉၼမ်ႉၵတ်ႉ ၵူၼ်းၼုမ်ႇလႄႈ ႁူပ်ႉထူပ်း လႅၵ်ႈလၢႆႈပိုၼ်ႉႁူႉပၢႆးႁၼ်ၵၼ်။

ဝၼ်းတီႈ 20-22/02/2017 ယၢမ်းၵၢင်ၼႂ်ထိုင် တၢမ်းၶၢမ်ႈ ၸုမ်းၵူၼ်းၼုမ်ႇတႆး ၸႄႈဝဵင်း တၢင်ႉယၢၼ်း တင်း ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ၸိုင်ႈတႆး ႁူမ်ႈၵၼ်သေ ၸတ်းႁဵတ်း ပၢင်ၽိူမ်ႉၼမ်ႉၵတ်ႉၵူၼ်းၼုမ်ႇလႄႈ ႁူပ်ႉထူပ်း လႅၵ်ႈလၢႆႈ ပၢႆးႁူႉသၽႃႇဝၾိင်ႈတိုၼ်း တီႈဢိူင်ႇ မိူင်းၵၢဝ်လူင် ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ။ မီးၵူၼ်း ၼုမ်ႇၶဝ်ႈႁူမ်ႈ ႁိမ်း 100 ။


ၸၢႆးပႃႉ ၽူႈၶဝ်ႈၶွမ်ႊမတီႊပွင်ပဵၼ် ပၢင်ဢုပ်ႇဢူဝ်းလႅၵ်ႈလၢႆႈ ၽိူမ်ႉၼမ်ႉၵတ်ႉ ၵူၼ်းၼုမ်ႇတႆး လၢတ်ႈဝႃႈ “ လွင်ႈဢၼ်လႆႈၸတ်းႁဵတ်းၼႆႉ ယိူင်းတႃႇႁႂ်ႈၵူၼ်းၼုမ်ႇႁဝ်း မီးၼမ်ႉၵတ်ႉ ၶိုၼ်ႈ မႃးထႅင်ႈ၊ ၼႂ်းပၢင်ဢုပ်ႇဢူဝ်းလႅၵ်ႈလၢႆႈ တင်းသွင်ဝၼ်းၼႆႉ လႆႈသပ်းလႅင်းၼႄပၼ် လွင်ႈတီႈလိၼ်၊ ၶူဝ်းတိုၼ်းသၽႃႇဝ ၾိင်ႈတိုၼ်း။ ယဝ်ႉၵေႃႈ ၶိုၼ်းမႄးသိုပ်ႇမိုတ်ႈၼႄ ပိုၼ်းလင် ၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး၊ ယူႇတီႈၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃးသမ်ႉ သပ်းလႅင်းၼႄၶိုၼ်း လွင်ႈႁဵတ်း သၢင်ႈ တူင်ႉၼိုင်မႃးသင်လၢႆလၢႆ။ ၾိုၵ်းသွၼ်ပၼ်ပႃး ၵဵဝ်ႇၵပ်းၵၢၼ်မေႃတိၼ်မေႃမိုဝ်း ၸဵမ်ၸိူဝ်းၼႆႉ” ဝႃႈၼႆ။


ပၢင်ဢုပ်ႇဢူဝ်းၽိူမ်ႉၼမ်ႉၵတ်ႉၵူၼ်းၼုမ်ႇလႄႈ လႅၵ်ႈလၢႆႈပၢႆးႁူႉ သၽႃႇဝၾိင်ႈတိုၼ်းပဵၼ်ၼႆႉ ယူႇတီႈၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ဢဝ်ပုၼ်ႈၽွၼ်းသေ ပူင်သွၼ်/သပ်းလႅင်းၵႂႃႇ။ ယူႇတီႈၸုမ်းၵူၼ်းၼုမ်ႇတႆး တၢင်ႉယၢၼ်းတင်း ၽူႈယႂ်ႇၵူၼ်းလူင် ၼႂ်းဢိူင်ႇမိူင်းၵၢဝ်ႇလူင် ႁပ်ႉပုၼ်ႈ ၽွၼ်း ၸတ်းတီႈယူႇတၼ်းသဝ်း၊ လွင်ႈၵိၼ်ယႅမ်ႉလႄႈ ၵပ်းသိုပ်ႇၵူၼ်းၼုမ်ႇ တႃႇမႃးၶဝ်ႈႁူမ်ႈ လဵပ်ႈႁဵၼ်း။ ၼွၵ်ႈလိူဝ်ၼၼ်ႉ ၵူၼ်းၼုမ်ႇတႆး တီႈၸမ်ၵႆလႄႈ ၽူႈမီးၼမ်ႉ ၸႂ်ၸေႇတၼႃႇ ၸဵမ်ၸိူဝ်းၼႆႉ ၵမ်ႉၸွႆႈ ငိုၼ်းတွင်းတႃႇတေပဵၼ်မႃး ပၢင်ဢုပ်ဢူဝ်း ၽိူမ်ႉၼမ်ႉၵတ်ႉၵူၼ်းၼုမ်ႇ။ ဝၼ်းတီႈ 22 ယၢမ်းၵၢင်ၶမ်ႈ  မီးၽူႈႁွင်ႉ ၵႂၢမ်းတႆးၸိုဝ်ႈ သဵင်ယႂ်ႇလၢႆလၢႆၵေႃႉ မႃးၶဝ်ႈႁူမ်ႈ လဝ်ႇမူၼ်ႈတူၼ်ႈၸႂ် ပၼ်ႁႅင်းၵူၼ်းၼုမ်ႇၵႂႃႇ ဝႃႈၼႆ။


တႃႇၶၢဝ်းတၢင်းသွင်ဝၼ်း ဢၼ်ဢွၼ်ႁူဝ်ဢုပ်ႇဢူဝ်းလႅၵ်ႈလၢႆႈပိုၼ်ႉႁူႉပၢႆးႁၼ်တႄႉ ၸၢႆးထမ်ႈဢၢႆး၊ ၼၢင်းၶမ်းယူင်ႇ၊ ၸၢႆးၼုမ်ႇ၊ ၼၢင်းသႅင်ဢေး၊ ၼၢင်းသႅင်ႁွမ်၊ ၸၢႆးၾူၼ်မိူင်းလႄႈ ဢိၵ်ႇထႅင်ႈ လၢႆလၢႆ ၵေႃႉ သၢၼ်မိုဝ်းၵၼ် တူင်ႉၼိုင် ဝႃႈၼႆ။