ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း လၢတ်ႈဝႃႈမိူဝ်ႈလဵဝ် သၢင်ႈၾၢႆပိူဝ်ႈတႃႇႁဵတ်းဢွၵ်ႇႁႅင်းၾႆးၾႃႉ မိူင်းတႆးယင်းပႆႇလႆႈ၊ ၵွပ်ႈတုမ်ႉတိူဝ်ႉၵူၼ်းမိူင်း။ ၾၢႆႇၼိုင်ႈ လွင်ႈၵၢၼ်မိူင်းၵေႃႈ ယင်းဢုပ်ႇဢူဝ်းပႆႇလႆႈၶေႃႈလႆႈၸႂ်တူၵ်းလူင်းၵၼ်။

"ဢၼ်ၶဝ်လၢတ်ႈမႃးလွင်ႈၵၢၼ်မၢၵ်ႈမီး၊ လွင်ႈၵၢၼ်ပူၵ်းပွင် မိူၼ်ၸိူင်ႉၼင်ႇၾၢႆလူင်၊ ပေႃးသၢင်ႈၾၢႆ တေတုမ်ႉတိူဝ်ႉ ၵူၼ်းမိူင်း၊ လွင်ႈၼႆႉႁဝ်းဢမ်ႇႁၼ်လီၸွမ်း။ မႄႈၼမ်ႉဢၼ်လႆလတ်းၽၢၼ်ႇၼႂ်းမိူင်းတႆးၼႆႉ ထုၵ်ႇလီဢဝ်မႃးၸႂ်ႉ ႁႂ်ႈပဵၼ်ၼမ်ႉတွၼ်းၽွၼ်းလီ တႃႇၵူၼ်းမိူင်းတႆးၵေႃႈၸႂ်ႈယူႇ၊ ၵူၺ်းၵႃႈပေႃးဝႃႈမၼ်းတုမ်ႉတိူဝ်ႉၵူၼ်းမိူင်းၸိုင် ႁဝ်းၵေႃႈဢမ်ႇယွမ်းႁပ်ႉလႆႈ၊ ၵဝ်ၶႃႈဝႃႈ ၵူၼ်းမိူင်းၵေႃႈဢမ်ႇယွမ်းႁပ်ႉလႆႈ"-ဝႃႈၼႆ။


ၽူႈသိုဝ်ႇၶၢဝ်ႇၶဝ်သိုပ်ႇထၢမ်ဝႃႈ ၾၢႆလူင်ဢၼ်တိုၵ်ႉႁၢင်ႈႁႅၼ်းသၢင်ႈယူႇၼႆႉ ၵႃႈပူၼ်ႉမႃး ၸွင်ႇမီးလွင်ႈၼႄၵၢင်ၸႂ်သၢၼ်ၶတ်း တေႃႇလူင်ပွင်ၸိုင်ႈမၢၼ်ႈၶႃႈႁႃႉၼႆၼၼ်ႉ မၼ်းၸဝ်ႈတွပ်ႇဝႃႈ လွင်ႈၼႆႉ မီးၵၢၼ်ၼႄၵၢင်ၸႂ်သၢၼ်ၶတ်းမႃးတႃႇသေႇ။


ၼႂ်းမိူင်းႁိမ်းႁွမ်းၼႆႉ ငိုၼ်းဢၼ်မႃးလူင်းတိုၼ်းၼႆႉ လုၵ်ႉမႃးမိူင်းၶႄႇ။ ႁဝ်းလႆႈႁၼ်ဝႃႈ မိူၼ်ၼင်ႇမိူင်းလၢဝ်းၵေႃႈ ၶဝ်ၶဝ်ႈမႃးလူင်းတိုၼ်းယူႇတိၵ်းတိၵ်း။ မိူဝ်ႈၽွင်းမိူင်းမၢၼ်ႈတိုၵ်ႉယူႇၼႂ်းငဝ်းလၢႆးလႅၵ်ႈလၢႆႈၶၢႆႉပုတ်ႈယူႇ မိူၼ်မိူဝ်ႈလဵဝ်ၼႆႉ  ၶႄႇၶဝ်ႈမႃးၵူၺ်းဢမ်ႇၵႃး မိူၼ်ၼင်ႇမိူင်းထႆးၵေႃႈ EGAT ၵေႃႈၶဝ်ႈမႃးၸိူဝ်းၼႆႉ ၸွင်ႇမီးလွင်ႈမႆႈၸႂ်ၶႃႈႁႃႉ-ၼႆၼၼ်ႉ ၸဝ်ႈယွတ်ႈသိုၵ်းတွပ်ႇၶိုၼ်းဝႃႈ လီမႆႈၸႂ်ယူႇ။ ၵူၺ်းၵႃႈ မိူဝ်ႈလဵဝ်ၼႆႉ မၼ်းမီးၶၢဝ်ႇၵူၺ်း၊ ယင်းပႆႇမီးၽႂ်မႃးႁဵတ်းတႄႉတႄႉဝႃႈဝႃႈ။ လွင်ႈမႃးလဵပ်ႈႁဵၼ်းၵူတ်ႇထတ်း (Survey) ၼႆႉမီးယူႇ၊ ၵူၺ်းၵႃႈ ပေႃးဝႃႈမႃးႁဵတ်းတႄႉတႄႉ၊ ပေႃးဝႃႈႁဝ်းဢုပ်ႇဢူဝ်းၵၼ်လွင်ႈၵၢၼ်မိူင်း ယင်းပႆႇတူၵ်းလူင်းၵၼ်လႆႈၼႆႉ မၼ်းႁဵတ်းဢမ်ႇလႆႈ-ဝႃႈၼႆ။


ပၢင်သပ်းၸႅင်ႈၶၢဝ်ႇ ဢၼ်ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းၸဝ်ႈယွတ်ႈသိုၵ်း တွပ်ႇလၢတ်ႈပၼ်ၶေႃႈထၢမ် ၽူႈသိုဝ်ႇၶၢဝ်ႇၼွၵ်ႈမိူင်းၶဝ်ၼႆႉ ၸတ်းႁဵတ်းၽွင်းဝၢႆးဝၼ်း မိူဝ်ႈဝၼ်းတီႈ 07/02/2017 တီႈၼိူဝ်လွႆတႆးလႅင်း၊ ဢၼ်ပဵၼ်ဝၼ်းၸတ်းပၢင်ၶုၵ်းထူပ်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 70 ပီၼၼ်ႉ။


ဢၼ်ၸဝ်ႈယွတ်ႈသိုၵ်း လႆႈတွပ်ႇလၢတ်ႈၵႂႃႇလွင်ႈၶူင်းၵၢၼ်သၢင်ႈၾၢႆၼႆႉ ဢိင်ၼိူဝ်ၽူႈသိုဝ်ႇၶၢဝ်ႇၼွၵ်ႈမိူင်းၶဝ် တွင်ႈထၢမ်ဝႃႈ- ပေႃးလၢတ်ႈလွင်ႈပေႃႇလသီႇဢမ်ႇတႅၵ်ႇလႅင်းၼႆႉ ပိူင်ၼိုင်ႈ ဢၼ်ၼၢင်းဢွင်ႇသၢၼ်းၸုၵျီႇ ၵႆႉၵႆႉတူၵ်ႇလၢတ်ႈၼၼ်ႉ လွင်ႈပူၵ်းပွင်ၾၢႆၼမ်ႉ ပိူဝ်ႈတႃႇႁဵတ်းဢွၵ်ႇႁႅင်းၾႆးၾႃႉၵမ်ႈၽွင်ႈ ဢၼ်မီးယူႇၼႂ်းမိူင်းတႆးလႄႈ ၶူင်းၵၢၼ်ၵမ်ႈၽွင်ႈဢၼ်မီးယူႇၼႂ်းတၢင်ႇၸႄႈမိူင်း၊ ၸဝ်ႈႁဝ်းႁၼ်ထိုင်ဝႃႈ လွင်ႈပေႃႇလသီႇဢၼ်ၼႆႉပဵၼ်ၸိူင်ႉႁိုဝ်။ လွင်ႈၵုမ်းၵမ်ပႂ်ႉပႃးၶူဝ်းႁႄႈၶူဝ်းတိုၼ်းၸိူဝ်းၼႆႉ ၸုမ်းၸၢဝ်းၶိူဝ်း ထုၵ်ႇလီမီးပေႃႇလသီႇၸိူင်ႉႁိုဝ်ၽွင်ႈ- ၼႆယဝ်ႉ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်သႅပ်ႊထႅမ်ႊၿိူဝ်ႊပူၼ်ႉမႃး။ ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ၵမ်းထူၼ်ႈသွင် ဢၼ်တေၸတ်းႁဵတ်းၽွင်းႁၢင်လိူၼ်ၾႅပ်ႊၿိဝ်ႊရီႊ 2017 ၼႆႉၵေႃႈ မီးလွင်ႈႁၢင်ႈႁႅၼ်းဝႆႉ တႃႇတေၵႂႃႇၶဝ်ႈႁူမ်ႈယူႇ။