ၵူၼ်းမိူင်းၸႄႈဝဵင်းသီႇပေႃႉ 2 ၵေႃႉ ပေႃႈလုၵ်ႈ ၵႂႃႇႁႃဝူဝ်း/ႁႃပႄႉ ယဵပ်ႇၺႃးမၢၵ်ႇတႅၵ်ႇ မၢတ်ႇ ၸဵပ်းၵေႃႉၼိုင်ႈ တၢႆထင်တီႈၵေႃႉၼိုင်ႈ ။

ဝၼ်းတီႈ 05/02/2017 ယၢမ်းႁူဝ်ၶမ်ႈ 17:00 မူင်း လုင်းၸၢႆးသၢင်ႇပူႇ ဢႃယု 51 ပီ တင်း လုၵ်ႈၸၢႆး ၸၢႆးဢွင်ႇ ဢႃယု 31 ပီ ပဵၼ်ၵူၼ်းဝၢၼ်ႈၵုၼ်ႁွတ်ႈ၊ ဢိူင်ႇၵုၼ်ႁွတ်ႈ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ။ ၶႃသွင်ၵေႃႉပေႃႈလုၵ်ႈၵႂႃႇႁႃ ဝူဝ်း/ႁႃပႄႉ ၶွင်ၶႃ။ မိူဝ်ႈၽွင်းၼၼ်ႉ ၵေႃႉပဵၼ်လုၵ်ႈၸၢႆး ၸၢႆးဢွင်ႇ ယဵပ်ႇၺႃးမၢၵ်ႇတႅၵ်ႇသေ လူႉတၢႆ တီႈၼၼ်ႈၵမ်းလဵဝ်။ တူဝ်လုင်းၸၢႆးသၢင်ႇပူႇတႄႉ လႆႈမၢတ်ႇၸဵပ်းႁၢဝ်ႈႁႅင်းသေ ထုၵ်ႇ သူင်ႇယူတ်းယႃတူဝ်တီႈ ႁူင်းယႃ သီႇပေႃႉ ။


လုင်းၸၢႆးသၢင်ႇပူႇ လၢတ်ႈဝႃႈ “ ၵေႃႉယဵပ်ႇၺႃးတႄႉ ပဵၼ်လုၵ်ႈၸၢႆးၶႃႈႁဝ်း၊ မၼ်းၸၢႆးတၼ်းလႆႈ လၢတ်ႈၵႂၢမ်းဝႃႈ ဢဝ်ၶႃႈလႄႈပေႃႈ၊ တၼ်းလၢတ်ႈသွင်ၵမ်းသေ ယူႇဢမ်ႇႁိုင်သင် လႆႈလူႉသဵင်ႈတၢႆတီႈ ၼၼ်ႈၵမ်းလဵဝ်။ ၵူၺ်းၵႃႈ တီႈတူဝ်ၶႃႈႁဝ်း ဢၼ်တိူဝ်ႉၺႃးၸၢၵ်ႇမၢၵ်ႇ တီႈၶႃၾၢႆႇၶႂႃ၊ မိုဝ်းၾၢႆႇၶႂႃ လႄႈ ၵွင်းလင် မၢတ်ႇၸဵပ်းႁၢဝ်ႈႁႅင်း” ဝႃႈၼႆ ။


တေႃႈလဵဝ် လုင်းၸၢႆးသၢင်ႇပူႇ လႆႈလုမ်းလႃးယူတ်းယႃတူဝ်ဝႆႉတီႈ ႁူင်းယႃ ၵူၼ်းမိူင်း ၸႄႈဝဵင်း သီႇပေႃႉ။ မၢၵ်ႇဢၼ်တႅၵ်ႇၼၼ်ႉ ပဵၼ်ၸုမ်းလႂ်၊ မူႇလႂ် ႁၢင်ႈၵၢင်ဝႆႉ ဢမ်ႇလႆႈႁူႉ ။


တၢင်းပွတ်းတွၼ်ႈၸႄႈဝဵင်းသီႇပေႃႉၼၼ်ႉ ၸုမ်းတပ်ႉသိုၵ်း ဢၼ်တူင်ႉၼိုင်ၵႂႃႇမႃးမီး  တပ်ႉသိုၵ်း လူင်ပွင်ၸိုင်ႈမၢၼ်ႈ၊ တပ်ႉသိုၵ်းတဢၢင်း TNLA၊ တပ်ႉသိုၵ်းၶွင်ႇသီႇဢဝ်ၶိုၼ်းၸိုင်ႈတႆး RCSS/ SSA လႄႈ တပ်ႉသိုၵ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA  ၸဵမ်ၸိူဝ်းၼႆႉဝႃႈၼႆ ။