သိုၵ်းလူင်ပွင်ၸိုင်ႈမၢၼ်ႈ တပ်ႉမ 99 ထၢင်ႇထိူမ်ၵူၼ်းဝၢၼ်ႈ 2 ၵေႃႉ တီႉၺွပ်းၵုမ်းၶင်တူဝ် ႁိုင် 20 ဝၼ်းပၢႆ ထိုင်ယၢမ်းလဵဝ် ပႆႇပွႆႇဢွၵ်ႇ၊ ယင်းတိုၵ်ႉမီးဝႆႉယူႇၼႂ်းတပ်ႉပိဝ်ႇႁႃႇၵူတ်ႉၶၢႆ ဝဵင်းၵူတ်ႉၶၢႆ ၸိုင်ႈ တႆးပွတ်းႁွင်ႇ။

ဝၼ်းတီႈ 03/02/2017 ၸၢႆးဢွင်ႇပႃႉ ဢႃယု 32 ပီ တင်း ၸၢႆးၶၢင်ႉ ဢႃယု 22 ပီ ပဵၼ်ၵူၼ်း ဝၢၼ်ႈ တၢၵ်ႇၾႃႉ ဢိူင်ႇၵဵင်းမူၼ်း၊ ၸႄႈဝဵင်းၵူတ်ႉၶၢႆ ၺႃးသၢႆသိုၵ်းမၢၼ်ႈ တပ်ႉမ 99 ထၢင်ႇထိူမ်သေ ၵူတ်ႇထတ်းၸႅတ်ႈထၢမ် တီႉၺွပ်းတူဝ်ၶႃ သွင်ၵေႃႉ တီႈၼိူဝ်သဵၼ်ႈတၢင်းၾၢႆႇတူၵ်းၵူတ်ႉၶၢႆ ယၢၼ်ၵႆ မွၵ်ႈ 20 လၵ်း ၼႂ်းၵႄႈ ၵူတ်ႉၶၢႆတင်း ဝၢၼ်ႈၵႃလႅင်။


ၸၢႆးၸိင်ႇလူႇ ၽူႈတႅၼ်းသၽႃးၸႄႈမိူင်း သႅၼ်ဝီ ၶဵတ်ႇလိူၵ်ႈတင်ႈမၢႆ(2) လၢတ်ႈဝႃႈ “ ၶႃႈႁဝ်း လႆႈႁပ်ႉႁူႉၶၢဝ်ႇ ပီႈၼွင်ႉၵူၼ်းဝၢၼ်ႈတၢၵ်ႇၾႃႉ သွင်ၵေႃႉ ထုၵ်ႇတီႉၺွပ်းဝႆႉသေ ယူႇတီႈၶႃႈႁဝ်း လႆႈတွင်ႈထၢမ်ၵႂႃႇတီႈ ၽွင်းလူင်ၾၢႆႇလႅၼ်လိၼ်၊ လုမ်းတိူင်းသိုၵ်း ရမၶ လႃႈသဵဝ်ႈ။ ယူႇတီႈၽူႈၵွၼ်း တပ်ႉပိဝ်ႇႁႃႇ ၵူတ်ႉၶၢႆ လၢတ်ႈဝႃႈ ၶဝ် 2 ၵေႃႉၼႆႉ ပဵၼ်ၵူၼ်းဢၼ်ထၢင်ႇထိူမ်သေ ၸင်ႇလႆႈတီႉ ၺွပ်းၵုမ်းၶင်တူဝ်ဝႆႉ ဝႃႈၼႆ။ ယဝ်ႉၵေႃႈ ၸၢႆးဢွင်ႇပႃႉၼႆႉ မိူၼ်ၵပ်းၵၢႆႇ တိတ်းတေႃႇ ၵၼ်တင်း တပ်ႉသိုၵ်းပႃႇတီႇမႂ်ႇ သုင်ၸိုင်ႈ တႆး/တပ်ႉသိုၵ်း ၸိုင်ႈတႆး SSPP/SSA သင်ဝႃႈၵူတ်ႇ ထတ်းသေ ဢမ်ႇၵဵဝ်ႇၵပ်းၸွမ်းတပ်ႉသိုၵ်းတႆး SSPP/SSA ၸိုင် ၶဝ်ဝႃႈ တေပွႆႇပၼ်ဝႆးဝႆးယူႇ ႁဝ်းၶႃႈၵေႃႈ ၸွႆႈၶပ်းၶိုင် ႁႂ်ႈၶဝ်ၸဵဝ်းလႆႈဢွၵ်ႇမႃးယူႇၶႃႈ” ဝႃႈၼႆ။


ၸၢႆးဢွင်ႇပႃႉတင်း ၸၢႆးၶၢင်ႉ ၶႃသွင်ၵေႃႉၼႆႉ ၵႂႃႇသူင်ႇၵႂၢႆး ၼႂ်းဝဵင်းၵူတ်ႉၶၢႆသေ ပွၵ်ႈမႃးထိုင် ႁိမ်း ဝၢၼ်ႈၵႃလႅင်၊ ထေႃႈလႃႈၵျီႈ ၶႃသမ်ႉၵွႆလႄႈ လႆႈယိုမ်လူတ်ႉၶိူင်ႈ ၵူၼ်းႁူႉၸၵ်း တီႈဝၢၼ်ႈၵႃလႅင် သေ ၵႂႃႇသိုဝ်ႉၶိူင်ႈၸၢၵ်ႈတီႈဝဵင်းၵူတ်ႉၶၢႆ။ ၽွင်းပွၵ်ႈမႃး ႁူပ်ႉၺႃး သိုၵ်းမၢၼ်ႈတပ်ႉမ 99 လႄႈ တီႉၺွပ်း ၶဝ်သွင်ၵေႃႉၵုမ်းၶင်ဝႆႉ- ၼႆယဝ်ႉ။


ၵဵဝ်ႇၵပ်းလွင်ႈၼႆႉ ထိုင်မႃး ဝၼ်းတီႈ 17/02/2017 ပေႃႈမႄႈပီႈၼွင်ႉၶႃသွင်ၵေႃႉ ယွၼ်းၵႂႃႇ ႁူပ်ႉ ထူပ်းၵေႃႈ ပိဝ်ႇႁႃႇၵူတ်ႉၶၢႆပၼ်ႁူပ်ႉယူႇ။ ဝႃႈတေပွႆႇပၼ်သေတႃႉ ႁၢၼ်ႉတေႃႇမိူဝ်ႈၼႆႉ ယင်းပႆႇ လႆႈ ဢွၵ်ႇမႃး - ဝႃႈၼႆ။


ၼႂ်းၸႄႈဝဵင်းၵူတ်ႉၶၢႆၼႆႉ သိုၵ်းမၢၼ်ႈတပ်ႉမ 99၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တူင်ႉၼိုင်ၵႂႃႇမႃး တၢင်းပွတ်းတွၼ်ႈၼၼ်ႉၼမ် ၵူၼ်းမိူင်း ၸိူဝ်းယူႇၼႂ်းပိုၼ်ႉတီႈ ၵႆႉၺႃးၸီႉၼႄး၊ ထၢင်ႇထိူမ်သေ တီႉၺွပ်း ၵူတ်ႇထတ်း ထဵတ်ႈထၢမ် ပေႃႉထုပ်ႉ ဝႃႈၼႆ။