ၶူဝ်ၼမ်ႉတူႈ-ႁူဝ်ဝဵင်းသႅၼ်ဝီ ဢၼ်ၺႃးၸုမ်းသိုၵ်းဢူၺ်းလီပွတ်းႁွင်ႇ ပွႆႇမၢၵ်ႇယႃႉၵွႆၼၼ်ႉ ၶိုၼ်းမႄးၵုမ်းၵၢႆႇယဝ်ႉတူဝ်ႈလီငၢမ်းလႄႈ ပီႈၼွင်ႉၵူၼ်းမိူင်း၊ ၽူႈမီးပုၼ်ႈ ၽွၼ်းၼႂ်းလူင် ပွင်ၸိုင်ႈမၢၼ်ႈ ဝဵင်းသႅၼ်ဝီ တႄႇပိုတ်ႇၸႂ်ႉၶိုၼ်း မိူၼ်ၵဝ်ႇ ၼႂ်းဝၼ်းမိူဝ်ႈၼႆႉ ။

Photo:ၸၢႆးဢွမ်လႅင်းဝၼ်း

ဝၼ်းတီႈ 01/02/2017 ယၢမ်းၵၢင်ၼႂ် 09:00 မူင်း ပီႈၼွင်ႉၵူၼ်းမိူင်း၊ ၽူႈၵွၼ်းၸႄႈဝဵင်းသႅၼ်ဝီ၊ ၾၢႆႇႁွင်ႈၵၢၼ်လူင်ပွင်ၸိုင်ႈမၢၼ်ႈၵူႈႁွင်ႈၵၢၼ်လႄႈ ၸဝ်ႈၼႃႈတီႈပလိၵ်ႈ ၾၢႆႇၵေႃႇသၢင်ႈ ၼႂ်းၸႄႈ ဝဵင်းသႅၼ်ဝီ ႁူမ်ႈၵၼ် ပိုတ်ႇၶူဝ်ၼမ်ႉတူႈ ၼိူဝ်သဵၼ်ႈတၢင်းၶဝ်ႈဝဵင်းသႅၼ်ဝီ ၸိုင်ႈတႆး ပွတ်းႁွင်ႇ။ ပိုတ်ႇၸႂ်ႉၶိုၼ်းမိူၼ်ပၵ်းၵဝ်ႇ ၼင်ႇႁိုဝ် ၵူၼ်းမိူင်းတေၵႂႃႇမႃးငၢႆႈ ဝႃႈၼႆ ။


ၸၢႆးဢွမ်လႅင်းဝၼ်း ၽူႈၶဝ်ႈၶွမ်ႊမတီႊ ၾၢႆႇလိူမ်ႈလႆႇ ၸႄႈဝဵင်းသႅၼ်ဝီ လၢတ်ႈဝႃႈ “ ယူႇတီႈၸဝ်ႈ ၼႃႈတီႈၾၢႆႇၵေႃႇသၢင်ႈၶဝ် ၶိုၼ်းမႄးၵုမ်းလုမ်းလႃး ၼိူဝ်ၶူဝ်ၼၼ်ႉ ယဝ်ႉတူဝ်ႈလီငၢမ်းယဝ်ႉ။ ၵူၼ်းမိူင်းၵႂႃႇမႃး ပႆလႆႈၶိုၼ်းမိူၼ်ၵဝ်ႇ။ ဝၢႆးမၢၵ်ႇတႅၵ်ႇတီႈၶူဝ်ယဝ်ႉၼၼ်ႉ လူတ်ႉၵႃးၵႂႃႇမႃး ယၢပ်ႇ ယွၼ်ႉသဵၼ်ႈတၢင်းတႆႇၼိူဝ်ၶူဝ်မၼ်းၵႅပ်ႈ လႆႈတႆႇသဵၼ်ႈလဵဝ်ၵူၺ်း ယွၼ်ႉဝႃႈ ၸဝ်ႈၼႃႈ တီႈၾၢႆႇၵေႃႇ သၢင်ႈၶဝ် တိုၵ်ႉမႄးၵုမ်းယူႇ။ တေႃႈလဵဝ်တႄႉ ၵႂႃႇမႃးငၢႆႈမိူၼ်ၵဝ်ႇယဝ်ႉ” ဝႃႈၼႆ ။


ၵဵဝ်ႇၵပ်းလွင်ႈၼႆႉ မိူဝ်ႈပူၼ်ႉမႃး ဝၼ်တီႈ 20/11/2016 ယၢမ်းၵၢင်ၼႂ် မွၵ်ႈ10:30  မူင်းၼၼ်ႉ သိုၵ်းလွႆ TNLA ဢၼ်ယူႇၼႂ်းၸုမ်းသိုၵ်းဢူၺ်းလီပွတ်းႁွင်ႇ ဢဝ်မၢၵ်ႇႁွႆႈတိတ်း လူတ်ႉၵႃးသေ ပွႆႇမၢၵ်ႇသႂ်ႇၶူဝ် ၼမ်ႉတူႈ ႁူဝ်ဝဵင်းသႅၼ်ဝီ။ လူတ်ႉၵေႃႈၵွႆ ၶူဝ်ၵေႃႈ ၵွႆၵႂႃႇၽွင်ႈ။ သဵၼ်ႈတၢင်းလူင် လႃႈသဵဝ်ႈ – မူႇၸေႊၵေႃႈ ၵိုတ်းၵႂႃႇ ၸူဝ်ႈၶၢဝ်း ။ ၼႂ်းၼၼ်ႉ ၵူၼ်းမိူင်းလႆႈမၢတ်ႇၸဵပ်း ၸွမ်း 3 ၵေႃႉ ဝႃႈၼႆ ။


ၼႂ်းၸႄႈဝဵင်းသႅၼ်ဝီၼႆႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း ၸၵၶ 16 ၊ တပ်ႉပလိၵ်ႈ ။ ၸုမ်းယိပ်းၵွင်ႈၵၢင်ႇတႄႉ မီးၸုမ်းသိုၵ်းၵဝ်ႈၵၢင်ႉ၊ ၸုမ်းလွႆ တဢၢင်း TNLA ၊ တႆး SSPP/SSA သေဢမ်ႇၵႃး သိုၵ်းလွႆတႆးလႅင်း RCSS/ SSA ၵေႃႈထိုင်ၽွင်ႈ ။ လိူဝ်ၼၼ်ႉ သိုၵ်းရၶႅင်ႇ AA ဢၼ်မႃး ၸွမ်းသိုၵ်းၶၢင် KIA ၵေႃႈမီး ။