RCSS/SSA ၸတ်းႁဵတ်းပၢင်သွၼ် ပၢႆးဢွၼ်ႁူဝ်လီ ၽူႈၵွၼ်းဝၢၼ်ႈ၊ ဢိူင်ႇ၊ ၽူႈမီးပုၼ်ႈၽွၼ်း ၼႂ်းတပ်ႉသိုၵ်း ၸိူဝ်းတူၵ်းပုၼ်ႈၽွၼ်း ၼႂ်းတူင်ႇဝဵင်းၵျွၵ်ႉမႄး ၶိုၼ်ႈႁဵၼ်းဢဝ် ၼပ်ႉႁူဝ်ပၢၵ်ႇ ။

Photo By- Shiridhamma Wieng Inn

ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၼႃႈတီႈမၢႆ 10 ၸတ်းႁဵတ်းပၢင်သွၼ် တႃႇပဵၼ်ၽူႈၼမ်းလီ ၊ ယေႃးဢဝ်တူၼ်ၶူးသီရိထမ်မ ဝိႁၢရ်ဝဵင်းဢိၼ်း ပွၼ်ႈထမ်းပၼ် ၵဵဝ်ႇ လူၺ်ႈလွင်ႈ ၵၢၼ်ပဵၼ်ၽူႈၼမ်းလီ ၽူႈဢွၼ်ႁူဝ်လီ ။


ပၢင်သွၼ်ၸတ်းႁဵတ်းတီႈ ဝၢၼ်ႈႁူးသူၼ် ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၼႂ်းဝၼ်းတီႈ 27-28/ 01/2017 မီးၽူႈယႂ်ႇၵူၼ်းလူင် ၵူၼ်းမိူင်း၊ ၵူၼ်းသိုၵ်း ဢိၵ်ႇၽူႈသူၼ်ၸႂ် ႁဵၼ်းဢဝ် 364 ၵေႃႉ ။


ၼႂ်းပၢင်ၼႆႉ ၸဝ်ႈတူၼ်ၶူးသီရိထမ်မ ဝိႁၢရ်ဝဵင်းဢိၼ်း ပွၼ်ႈထမ်းပၼ် လၢႆးပဵၼ်ၽူႈဢွၼ်ႁူဝ်လီ ယုၵ်ႉဢဝ် တူဝ်ယၢင်ႇ ၸဝ်ႈမုၼ်ယႂ်ႇၶုၼ်ႁေႃၶမ်းထႆး တူၼ်ႈတီႈ9၊ တူဝ်ယၢင်ႇၽူႈဢွၼ်ႁူဝ်လီ မိူင်းဢိၼ်ၻီႊယိူဝ်ႊ ၊ မိူင်းဢၾ်ၾရိၵႃႊၸၢၼ်းၸဵမ်ၸိူဝ်းၼႆႉ ပွၼ်ႈလၢတ်ႈပၼ် ႁႂ်ႈပေႃးၸၢင်ႈ သိုပ်ႇယၢင်ႈပႆၸွမ်း ။


ၸဝ်ႈၶူးသီရိထမ်မ လၢတ်ႈဝႃႈ- “ဝၢၼ်ႈမိူင်း တေၶိုၼ်ႈယႂ်ႇဢမ်ႇၶိုၼ်ႈယႂ်ႇ ၊ ၵူၼ်းမိူင်းတေပဵၼ် ၸိူင်ႉႁိုဝ်ၼႆၼၼ်ႉ မၼ်းယူႇတီႈၽူႈဢွၼ်ႁူဝ်သဵင်ႈသဵင်ႈ ပေႃးမီးၽူႈဢွၼ်ႁူဝ်လီၵေႃႈ  ၼႃႈဝၢၼ်ႈ တႃသူၼ်၊ ၵူၼ်းမိူင်းၵေႃႈတေၶိုၼ်ႈယႂ်ႇ ယူႇၵတ်းယဵၼ်  ၵွပ်ႈၼၼ်လႄႈ ၽူႈဢွၼ်ႁူဝ်လီၼႆႉ လမ်ႇလွင်ႈတႄႉတႄႉ”ဝႃႈၼႆ ။


မိူဝ်ႈဝၼ်းတီႈ 29-31/01/2017 ၼၼ်ႉၵေႃႈ သင်ၶၸဝ်ႈလႄႈ ပေႃႈမႄႈ ၵူၼ်းမိူင်း ႁူမ်ႈၵၼ်ၸတ်းႁဵတ်း ပၢင်ႁူပ်ႉထူပ်း ပေႃႈမႄႈၵူၼ်းမိူင်း တီႈဝၢၼ်ႈ မိူင်းငေႃႉ၊ ပုင်းလူင်၊ ႁူးသူၼ် ဝဵင်းၵျွၵ်ႉမႄး ပၼ်တၢင်းႁူႉလွင်ႈ ၵၢၼ်ၽွမ်ႉႁူမ်ႈ၊ လွင်ႈႁၵ်ႉၸိူဝ်ႉၶိူဝ်း ၊ လွင်ႈၽွၼ်းၸႃႉယႃႈမဝ်းၵမ် ၊ လွင်ႈၽူႈႁတ်းႁၢၼ် ၸိူဝ်းၼႆႉ။ ၶၢဝ်းတၢင်း3ဝၼ်းၼၼ်ႉ မီးၵူၼ်း ၶဝ်ႈႁူမ်ႈ1,900 ၵေႃႉပၢႆ ။