ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး သူင်ႇတူဝ်တႅၼ်း 300 ပၢႆ လူင်းပိုၼ်ႉတီႈႁူပ်ႉထူပ်းၵူၼ်းမိူင်း တႃႇ 45 ၸႄႈဝဵင်း၊ ပိူဝ်ႈတႃႇပွင်သၢင်ႈႁၢင်ႈႁႅၼ်း ပၢင်ၵုမ်လူင်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး၊ ပိူဝ်ႈတႃႇယင်ႇၵၢင်ၸႂ်ၵူၼ်းမိူင်း ၶႂ်ႈလႆႈၶႂ်ႈပဵၼ် ။

ဝၼ်းတီႈ 02/02/2017 မိူဝ်ႈၼႆႉ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) သူင်ႇတူဝ်တႅၼ်းတင်းမူတ်း 300 ပၢႆ၊ လူင်းပိုၼ်ႉတီႈႁူပ်ႉထူပ်းၵူၼ်းဝၢၼ်ႈၵူၼ်းမိူင်း ၼႂ်းၸိုင်ႈတႆးယဝ်ႉတူဝ်ႈၵႂႃႇ ဝဵင်းမၼ်း 30 ပၢႆယဝ်ႉ၊ လႆႈႁူပ်ႉထူပ်းၵူၼ်းမိူင်းၼပ်ႉႁူဝ်မိုၼ်ႇ။ လိူဝ်ၼၼ်ႉၵေႃႈ ၼႂ်းဝၼ်းမိူဝ်ႈၼႆႉ တိုၵ်ႉႁူပ်ႉၵူၼ်းမိူင်း ၸိူဝ်းပဵၼ်ၸၢဝ်းၶိူဝ်းတႆး ဢၼ်ယူႇၼႂ်းမိူင်းၶၢင်၊ ၶွၼ်ႈတုမ်ၵၼ်သေႁူပ်ႉတီႈဝဵင်းမိူင်းယၢင်း၊ ၶိူဝ်းတႆးဢၼ်ယူႇၼႂ်း တိူင်းၸႄႈၵႅင်း သမ်ႉၶွၼ်ႈတုမ်ၵၼ်သေႁူပ်ႉတီႈ ၸႄႈဝဵင်းႁူမ်ႈမၢၵ်ႇလၢင်း၊ မိူဝ်ႈလဵဝ်ၼႆႉၵေႃႈ တိုၵ်ႉႁူပ်ႉထူပ်းဢုပ်ႇဢူဝ်းၵၼ်ယူႇၼႆ- ၽူႈၼမ်းၸုမ်းၽႄ ဢၼ်လူင်းပိုၼ်ႉတီႈပွတ်းတွၼ်ႈၼၼ်ႉလၢတ်ႈ ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (SNLD) ၵေႃႈၸႂ်ႈ၊ ဢၼ်ပဵၼ်ပႃးၸုမ်းၽူႈၼမ်းၼႂ်း CSSU ၸၢႆးလဵၵ်ႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- မူႇၸုမ်းၸိူဝ်းၼႆႉ တေလူင်းပိုၼ်ႉတီႈႁူပ်ႉထူပ်း ပီႈၼွင်ႉၸိူဝ်ႉၶိူဝ်းတႆးသေ ဢုပ်ႇၵုမ်လွင်ႈၵၢၼ်မိူင်း၊ လွင်ႈႁူမ်ႇလူမ်ႈ၊ ပၢႆးပိူင်ၵူၼ်း၊ ပၢႆးမၢၵ်ႈမီး၊ ပိူင်ၸႂ်ႉတိုဝ်းတီႈလိၼ်၊ လွင်ႈၼမ်ႉလိၼ်ႁိၼ်ၽႃ ၶူဝ်းႁႄႈၶူဝ်းတိုၼ်း ၸိူဝ်းၼႆႉ။ ပေႃးဝႃႈႁူပ်ႉထူပ်း ၵူၼ်းမိူင်းယဝ်ႉ ဢၼ်ႁၢင်ႈႁႅၼ်းဝႆႉတႄႉ မွၵ်ႈၵၢင်လိူၼ်ၾႅပ်ႊၿိဝ်ႊရီႊၼႆႉ တေၶႂ်ႈၸတ်းႁဵတ်းပၢင်ၵုမ်လူင်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး၊ တေဢဝ်ၶေႃႈလႆႈၸႂ်သေ ဝၢႆးၼၼ်ႉၵေႃႈတေဢဝ်ဢုပ်ႇၼႂ်း ပၢင်ၵုမ်လူင်ၵၢၼ်မိူင်း ၸၼ်ႉၸိုင်ႈတႆး၊ ပၢင်ၵုမ်လူင်ၵၢၼ်မိူင်း ၸၼ်ႉမိူင်းႁူမ်ႈတုမ် ဢၼ်ဝႃႈပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းတီႈ 2 ၼၼ်ႉ- ဝႃႈၼႆ ။


ၵဵဝ်ႇၵပ်းလွင်ႈၵၢၼ်ႁၢင်ႈႁႅၼ်း တႃႇတေပွင်ပဵၼ်ပၢင်ၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး၊ ပႃးၸဵမ်ပိူဝ်ႈတႃႇလူင်း ႁူပ်ႉထူပ်းၵူၼ်းမိူင်းၼႆႉ ႁဝ်းၶႃႈႁဵတ်းၵႂႃႇၸွမ်းၶၵ်ႉတွၼ်ႈ ၽႅၼ်ၵၢၼ်လူင်ပွင်ၸိုင်ႈ ႁဵတ်းမႃးပဵၼ်တၢင်းၵၢၼ် ၼၼ်ႉၵူၺ်း။ ၵူၺ်းၵႃႈ ၼႂ်းပိုၼ်ႉတီႈၼႆႉ ၽူႈၸွပ်ႇၶၢဝ်ႇၾၢႆႇတပ်ႉပလိၵ်ႈ တပ်ႉသိုၵ်းၸိူဝ်းၼႆႉ မႃးတူၺ်းမႃးၸွပ်ႇၶၢဝ်ႇလႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ဢမ်ႇလႆႈလၢတ်ႈထၢင်ႇႁၢင်ႈလွတ်ႈလႅဝ်း။ ၵူၺ်းၵႃႈ လွင်ႈၼႆႉမၼ်းပဵၼ်ဢၼ်ၸိုဝ်ႈၸႂ်ႈလႄႈ ဢမ်ႇထုၵ်ႇလီၵူဝ်ႁႄ- လုင်းၸၢႆးလူင် ၽူႈဢၼ်လူင်းႁူပ်ႉထူပ်းၵူၼ်းမိူင်း ၼႂ်းပိုၼ်ႉတီႈ ၸိုင်ႈတႆးပွတ်းၸၢၼ်းလၢတ်ႈ ။


သိုပ်ႇလၢတ်ႈဝႃႈ- ၵူၼ်းမိူင်းတႆးႁဝ်းၶႃႈၼႆႉ လႆႈထုၵ်ႇပိၵ်ႉႁူဢိုတ်းတႃမႃးပီယၢဝ်းၶၢဝ်းႁိုင်။ ယွၼ်ႉပိူဝ်ႈၼၼ် ဢၼ်ၽူႈၸွပ်ႇၶၢဝ်ႇၶဝ်မႃးဢဝ်ၶၢဝ်ႇ၊ မႃးပႂ်ႉတူၺ်းၸိူဝ်းၼႆႉ ႁဵတ်းႁႂ်ႈၶဝ်ဢမ်ႇမီးလွင်ႈလႅဝ်းထၢင်ႇႁၢင်ႈ။ ယွၼ်ႉပိူဝ်ႈလွင်ႈၼႆႉသေ ဢမ်ႇၵိုင်ႇလီပဵၼ်တီႈၶွင်ႉၶမ်၊ ဢမ်ႇၵိုင်ႇလီၵူဝ်ႁႄ၊ ဢၼ်ႁဝ်းၶႃႈထုၵ်ႇလၢတ်ႈၸႃၼၼ်ႉ ႁဝ်းၶႃႈလၢတ်ႈၵႂႃႇလွတ်ႈလွတ်ႈလႅဝ်းလႅဝ်း၊ ႁဝ်းၶႃႈတိုၵ်းသူၼ်းၸိူင်ႉၼႆ ႁဵတ်းၸွမ်းၼင်ႇပိူင်ဢၼ်ပဵၼ်တႄႉမီးတႄႉတူၺ်း- ဝႃႈၼႆ ။


လိူဝ်သေၼၼ်ႉ တႃႇလူင်းႁူပ်ႉထူပ်းၵူၼ်းမိူင်းတႆး တီႈၵဵင်းမႆႇ မိူင်းထႆးၼၼ်ႉၵေႃႈ တိုၵ်ႉႁၢင်ႈႁႅၼ်းယူႇ၊ ၵူၺ်းၵႃႈ ဝၼ်းမၼ်းတႄႉပႆႇႁူႉတႅတ်ႈတေႃး- ၽူႈဢၼ်တူၵ်းပုၼ်ႈၽွၼ်း တၢင်းၵဵင်းမႆႇ ၵေႃႉၼိုင်ႈလၢတ်ႈ ။


ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼႆႉ မီးလုၵ်ႈၸုမ်းဢၼ်ၶဝ်ႈပႃးဝႆႉ မိူၼ်ၼင်ႇၸုမ်းယိပ်းၵွင်ႈၵၢင်ႇတႆး ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၊ ၸုမ်းပႃႇတီႇၵၢၼ်မိူင်းတႆး ပႃႇတီႇႁူဝ်သိူဝ် (SNLD) ၊ တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇမႂ်ႇသုင်တီႇမူဝ်ႇၶရေႇၸီႇမိူင်းတႆးပွတ်းဢွၵ်ႇ ႁိုဝ် ပႃႇတီႇၵွင်ၸႆး (ESSDDP) ၸုမ်း SNNP ၸိူဝ်းၼႆႉ၊ ပႃးၸဵမ်ၸုမ်းတူင်ႇဝူင်းၵူၼ်း၊ ၸုမ်းၵူၼ်းၼုမ်ႇ ၶဝ်ႈႁူမ်ႈဝႆႉလၢႆမူႇလၢႆၸုမ်း ။