ၶၢဝ်းတၢင်းၼေႇပျီႇတေႃႇ ႁူပ်ႉဢုပ်ႇ ဢွင်ႇသၢၼ်းၸုၵျီႇ လႄႈ ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇ မိူၼ်လႆႈႁူပ်ႉဢုပ်ႇ လူင်ပွင်ၸိုင်ႈသွင်ၸုမ်း။ ၾၢႆႇၼိုင်ႈၵေႃႈ ၶႂ်ႈယွၼ်းတိုၵ်းသူၼ်းၵူၼ်းမိူင်းတႆး ႁႂ်ႈဢွၼ်ၵၼ်ပၼ်ႁႅင်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ။ လွင်ႈၼႆႉ ၽူႈၵွၼ်းလုမ်း PI ၸဝ်ႈၶိုၼ်းသႂ်၊ ဢၼ်ႁဵတ်းၵၢၼ်ၵမ်ႉထႅမ် လွင်ႈငမ်းယဵၼ် ၼႂ်းမိူင်း  တွပ်ႇလၢတ်ႈ ဢၼ်ၸုမ်းၶၢဝ်ႇၽူႈတွႆႇႁွၵ်ႈတွင်ႈထၢမ်ဝႆႉၼင်ႇၼႆ ။

ထၢမ်-ၵဵဝ်ႇၵပ်းလွင်ႈၶၢဝ်းတၢင်း ဢၼ်လႆႈၵႂႃႇတီႈၼေႇပျီႇတေႃႇ လႆႈႁူပ်ႉထူပ်းဢုပ်ႇဢူဝ်းၸိူဝ်းၼႆႉ ၶႂ်ႈထတ်းသၢင် ႁၼ်ထိုင်ၸိူင်ႉႁိုဝ်ၽွင်ႈၶႃႈ?။


တွပ်ႇ-ယူႇတီႈႁဝ်းတႄႉ ဢမ်ႇၸၢင်ႈထတ်းသၢင်သင်။ ၵူၺ်းၵႃႈ ယူႇတီႈၵူၼ်းလူင်ႁဝ်း ၸိူဝ်းဢၼ်ယၢမ်ႈၵႂႃႇႁူပ်ႉထူပ်း ဢုပ်ႇဢူဝ်းၶဝ်ၼႆႉတႄႉ မီးလွင်ႈထတ်းသၢင်ၵၼ်ဝႃႈ- 1.ၼၢင်းဢွင်ႇသၢၼ်းၸုၵျီႇလႄႈ ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇၼႆႉ သွင်ၾၢႆႇၼႆႉ ၾၢႆႇၼိုင်ႈၵေႃႈၶဝ်ႁူမ်ႈမိုဝ်းၵၼ်ယူႇ၊ ၵူၺ်းၵႃႈ ထႅင်ႈၾၢႆႇၼိုင်ႈၵေႃႈ ၶဝ်သမ်ႉၶတ်းၵၼ်ယူႇ၊ ပၼ်တၢင်းႁၼ်ထိုင်ၸိူင်ႉၼႆ။ 2.ထႅင်ႈၵေႃႉၼိုင်ႈသမ်ႉဝႃႈ ဢၼ်ႁဝ်းမႃးဢုပ်ႇမိူဝ်ႈလဵဝ်ၼႆႉ ႁဝ်းယိၼ်းပဵၼ်ၼႂ်းၸႂ်ဝႃႈ မိူၼ်ၵၼ်တင်းႁဝ်းလႆႈမႃးဢုပ်ႇ လူင်ပွင်ၸိုင်ႈသွင်ၸုမ်း။ တၢင်းၼၢင်းဢွင်ႇသၢၼ်းၸုၵျီႇ ပဵၼ်လူင်ပွင်ၸိုင်ႈၸုမ်းၼိုင်ႈ၊ တၢင်းမိၼ်းဢွင်ႇလၢႆႇပဵၼ်လူင်ပွင်ၸိုင်ႈၸုမ်းၼိုင်ႈ မိူၼ်ၸိူင်ႉၼႆဝႆႉ၊ ၶဝ်ဝႃႈၸိူင်ႉၼၼ်။


ထၢမ်-လိုၼ်းသုတ်း ၶႂ်ႈၾၢၵ်ႇၵႂၢမ်းထိုင်ပီႈၼွင်ႉၵူၼ်းမိူင်းတႆးႁဝ်း ၸိူင်ႉႁိုဝ်ၽွင်ႈၶႃႈ?။


တွပ်ႇ-ႁဵတ်းၵၢၼ်သိုၵ်းဢၼ်ဝႃႈၼႆႉ မၼ်းဢမ်ႇယၢပ်ႇ၊ ပေႃးၵေႃႉၼိုင်ႈလုၵ်ႉၽိတ်းၵေႃႈ မၼ်းပဵၼ်သိုၵ်း ၵမ်းလဵဝ်ယဝ်ႉ။ ၵူၺ်းၵႃႈ ဢၼ်ႁဝ်းတေႁဵတ်းလွင်ႈငမ်းယဵၼ်ၼႆႉ မၼ်းယၢပ်ႇတႄႉတႄႉ၊ ၾၢႆႇလဵဝ်ႁဵတ်းဢမ်ႇလႆႈ၊ မၼ်းလူဝ်ႇႁဵတ်းသွင်ၾၢႆႇသၢမ်ၾၢႆႇလၢႆၾၢႆႇမႃးႁူမ်ႈၵၼ်ႁဵတ်း။ ယွၼ်ႉပိူဝ်ႈၼၼ်လႄႈ ၶႂ်ႈႁႂ်ႈၵူၼ်းမိူင်းႁဝ်းၶႃႈ ၶတ်းၸႂ်ပွင်ႇၸႂ်လွင်ႈၼႆႉသေ ပၼ်ႁႅင်းႁဝ်းၶႃႈ တီႈဢၼ်ႁဵတ်းလွင်ႈငမ်းယဵၼ်။ ၾၢႆႇၼိုင်ႈၵေႃႈ ၵူၼ်းမိူင်းႁဝ်းၵေႃႈ ပၼ်ႁႅင်းဢီးႁႂ်ႈၸုမ်းၸိူဝ်းဢၼ်ဢုပ်ႇဢူဝ်းၵၼ်ယူႇၼႆႉ ယႃႇပေႁႂ်ႈၶဝ်လႆႈမႃးၵမ်ၵွင်ႈၶိုၼ်းသေ မႃးတိုၵ်းၵၼ်ယိုဝ်းၵၼ်ထႅင်ႈ၊ ၵူၼ်းမိူင်းႁဝ်းၵေႃႈႁႂ်ႈၸွႆႈပၼ်ႁႄႉပၼ်၊ ၶႂ်ႈတိုၵ်းသူၼ်းၸိူင်ႉၼင်ႇၼႆ။


ၵမ်းလိုၼ်းသုတ်းၼႆႉ ၶႂ်ႈတိုၵ်းသူၼ်းဝႃႈ ပေႃးဝႃႈလိူၼ်ၼႃႈမႃး တေမီးပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်၊ ယူႇတီႈၵူၼ်းမိူင်းတႆးႁဝ်းၶႃႈ မီးတၢင်းႁၼ်ထိုင်ၸိူင်ႉႁိုဝ် ၶႂ်ႈလႆႈၶႂ်ႈပဵၼ်ၸိူင်ႉႁိုဝ်ဢၼ်ဝႃႈၼၼ်ႉ ယူႇတီႈၽူႈတၢင်တူဝ်တႆးၸိူဝ်းၼႆႉ ၶဝ်တေမိူဝ်းတၢင်ႇလၢတ်ႈယဝ်ႉ။ ပေႃးၼႂ်းဝူင်ႈၼႃႈၸိူဝ်းၼႆႉ ၶဝ်ၵေႃႈတေလူင်းတွင်ႈထၢမ်ၵၢၼ်ၸႂ်ၵူၼ်းမိူင်းယဝ်ႉ၊ ၼႂ်းမိူင်းတႆးၼႆႉ ၶဝ်တေလူင်း 8 တီႈ၊ မိူင်းတႆးပွတ်းႁွင်ႇ 3 တီႈ၊ မိူင်းတႆးပွတ်းၸၢၼ်း 3 တီႈ၊ မိူင်းတႆးပွတ်းဢွၵ်ႇ 2 တီႈ၊ ၼွၵ်ႈသေၼၼ်ႉ ၼွၵ်ႈမိူင်းတႆး 5 တီႈ ဝႃႈၸိူင်ႉၼင်ႇၼႆ။ ၵွပ်ႈၼႆ ၵူၼ်းမိူင်းႁဝ်းၶႃႈမီးတၢင်းၶႂ်ႈလႆႈၶႂ်ႈပဵၼ်ၸိူင်ႉႁိုဝ်၊ ပဵၼ်ယူႇမီးယူႇၸိူင်ႉႁိုဝ်ၼႆၵေႃႈ ႁႂ်ႈလႆႈပိုတ်ႇဢူၵ်းပိုတ်ႇၸႂ်သေ လၢတ်ႈၼႄပၼ်ၶဝ်၊ တိုၵ်းသူၼ်းပၼ်ၶဝ်၊ ႁႂ်ႈၶဝ်ပေႃးႁတ်းႁတ်းႁၢၼ်ႁၢၼ်သေ ၵႂႃႇတၢင်ႇလႆႈၼႂ်းပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင်သေၵမ်း၊ ၶႂ်ႈတိုၵ်းသူၼ်းၼင်ႇၼႆ။


ထၢမ်-ၼင်ႇႁိုဝ်ၵူၼ်းမိူင်းႁဝ်းၶႃႈ ပေႃးပႃးၸႂ်ၶႂ်ႈၶဝ်ႈပႃး ၵမ်ႉထႅမ်ပၼ်ႁႅင်း ၶၵ်ႉၵၢၼ်လွင်ႈငမ်းယဵၼ်ၼႆႉ ႁၼ်ထိုင်ဝႃႈၵူၼ်းမိူင်းႁဝ်းၶႃႈ ထုၵ်ႇလီႁဵတ်းၸိူင်ႉႁိုဝ်၊ ၶႂ်ႈပၼ်တၢင်းႁၼ်ထိုင်ၸိူင်ႉႁိုဝ်ၽွင်ႈၶႃႈ?။


တွပ်ႇ-မိူဝ်ႈလဵဝ်ၼႆႉ ၵူၼ်းမိူင်းႁဝ်းၸၢင်ႈၶဝ်ႈပႃးလႆႈၵမ်းသိုဝ်ႈ မီး 3 လၢႆး။ 1.ၶဝ်ႈႁူမ်ႈပႃးၼႂ်းပႃႇတီႇၵၢၼ်မိူင်းၶဝ်သေ တုၵ်းယွၼ်းလၢတ်ႈ။ 2.ၶဝ်ႈပႃးၼႂ်းၸုမ်းတူင်ႇဝူင်းၵူၼ်းၶဝ်သေ လၢတ်ႈ။ 3.သုၼ်ႇတူဝ်သေၶဝ်ႈပႃး။ မိူၼ်ၼင်ႇမိူဝ်ႈလဵဝ်ၼႆႉ ၸိူဝ်းဢၼ်ၶဝ်ႈၼႂ်းပႃႇတီႇလႂ်၊ ၸိူဝ်းဢၼ်ၶဝ်ႈၼႂ်းတူင်ႇဝူင်းၵူၼ်းလႂ်၊ သုၼ်ႇတူဝ်လႂ် ႁႂ်ႈပေႃးၶဝ်ႈပႃးလႆႈၼႆႉ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး လႆႈတၢင်ႇဝႆႉယဝ်ႉ၊ ၵွပ်ႈၼၼ်လႄႈ ဢွၼ်ၵၼ်ပၼ်ႁႅင်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ဢၼ်ဢွၼ်ႁူဝ်သေ တေလူင်းၵႂႃႇသူၼ်းတုမ်ၵူၼ်းမိူင်းၼၼ်ႉသေၵမ်း၊ ၶႂ်ႈတိုၵ်းသူၼ်းၸိူင်ႉၼင်ႇၼႆ။