ႁူဝ်ပဝ်ႈသမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ၵဵင်းမႆႇ၊ ၾၢင်ႉတိူၼ်ထိုင်ပီႈၼွင်ႉတႆးတင်းလၢႆဝႃႈ ၼႂ်းၸူဝ်ႈၸႃႈၼႆႉ ႁႂ်ႈပီႈၼွင်ႉတႆးၾၢင်ႉတိူၼ်ၵၼ်၊ ႁႂ်ႈၵိုတ်းလိုဝ်ႈဝႆႉ လွင်ႈဢွၵ်ႇၶၢဝ်းတၢင်းၵႂႃႇ ၼင်ႈတြႃး (ပတိပတ်ထမ်း)  တီႈဝတ်ႉၽရႃႉထမ်းမၵၢႆး၊ မႆႈၸႂ်ၸွမ်းၵူဝ်လႆႈတူၵ်းပဵၼ်ၶိူင်ႈမိုဝ်း ၵဵဝ်ႇၶွင်ႈၵၢၼ်မိူင်း။


"လွင်ႈၼႆႉ 1.မႆႈၸႂ်ၸွမ်းသင်ၶ (မုၼ်ၸဝ်ႈမုၼ်ၸၢင်း)တႆးႁဝ်း ၸိူဝ်းဢမ်ႇမီးဝႂ်သုတ်ႉထိ။ 2.မႆႈၸႂ်ၸွမ်းတၵ်ႉၵႃႇ သတ်ႉထႃးႁဝ်း ၸိူဝ်းၶဝ်ႈၵႂႃႇပတိပတ်ထမ်း (ၼင်ႈတြႃး)၊ ပေႃးၶဝ်ႈၵႂႃႇတၢင်းသႃသၼႃပုတ်ႉထၸဝ်ႈၸိူဝ်းၼႆႉတႄႉ တေဢမ်ႇပဵၼ်သင်၊ ၵူၺ်းၵႃႈ ႁဝ်းၵူဝ်ဝႃႈ ၵႂႃႇၵဵဝ်ႇၶွင်ႈၸွမ်းၵၢၼ်ဝၢၼ်ႈၵၢၼ်မိူင်း၊ ၵူဝ်တူၵ်းပဵၼ်ၶိူင်ႈမိုဝ်းသေ မီးလွင်ႈတုမ်ႉတိူဝ်ႉပႃးပီႈၼွင်ႉတႆးႁဝ်း"- ႁူဝ်ပဝ်ႈသမႃးၶူမ်းလႄႈပၢႆးပၺ်ၺႃ ၵဵင်းမႆႇ ဢႃးၸၢၼ်သူမ်ၸိတ်ႇ လၢတ်ႈ။


သင်ႇလၢတ်ႈထိုင် ပီႈၼွင်ႉတႆးပႃးဝႃႈ- ႁဝ်းတေၵႂႃႇပတိပတ်ထမ်း (ၼင်ႈတြႃး)ၼႆၵေႃႈ မၼ်းမီးလၢႆတီႈလၢႆတၢင်းယူႇ၊ ၵႂႃႇၼင်ႈတၢင်ႇတီႈၵေႃႈလႆႈ၊ ၼင်ႈတီႈႁိူၼ်းၵေႃႈလႆႈ၊ ဝတ်ႉဝႃးဢၼ်မီးပၢင်ၼင်ႈတြႃးၼၼ်ႉ တီႈလႂ်ၸမ်ၵေႃႈ ၵႂႃႇတီႈၼၼ်ႈၵေႃႈလႆႈ။ ပေႃးႁဝ်းၶဝ်ႈၵႂႃႇတီႈၼႆႈ တၢင်းၸဝ်ႈၼႃႈတီႈၶဝ်ၵေႃႈ ၸႂ်ႉမၢႆမီႈႁႅင်းဝႆႉဢိတ်းၼိုင်ႈ၊ ၵူဝ်ႁဝ်းၵႂႃႇၵဵဝ်ႇၶွင်ႈၵၢၼ်ဝၢၼ်ႈၵၢၼ်မိူင်း၊ ၵူဝ်လႆႈတုမ်ႉတိူဝ်ႉပႃးပီႈၼွင်ႉတႆးႁဝ်း၊ လွင်ႈၼႆႉ ပီႈၼွင်ႉတႆးႁဝ်းၵေႃႈၾၢင်ႉသတိၵၼ်ဢိတ်းၼိုင်ႈ- ဝႃႈၼႆ။


တင်ႈတႄႇၶၢဝ်းတၢင်းမွၵ်ႈႁိမ်းၽၢၵ်ႇလိူၼ်မႃးၼႆႉ မီးပၼ်ႁႃလွင်ႈဝူင်ႈၵၢင် တၢင်းဝတ်ႉၽရႃႉထမ်းမၵၢႆး လႄႈၸဝ်ႈၼႃႈတီႈၸွပ်ႇထတ်းၶိုၵ်ႉတွၼ်း (DSI) ႁၢဝ်ႈႁႅင်းမႃး။ တၢင်းၵၢၼ်ထႆးလႆႈၸႂ်ႉမၢႆမီႈမတ်ႉတႃ 44 သေ ၵုမ်းၵမ်ပိုၼ်ႉတီႈၶဝ်ႈၵူတ်ႇထတ်း ၼႂ်းဝတ်ႉၽရႃႉထမ်းမၵၢႆးမႃး၊ ဝၢႆးသေၸဝ်ႈၵွၼ်းဝတ်ႉ တူၼ်ၶူးလူင်ထမ်းမၶျယူဝ်ႊ ဢမ်ႇယွမ်းၵႂႃႇၶဝ်ႈမွပ်ႈတူဝ် ၸီႉၸႅင်ႈၼႄလွင်ႈတၢင်း ၶူဝ်းၶွင်ငိုၼ်းၶမ်းၶဝ်ႈဝတ်ႉဝႃး ၸွမ်းၼင်ႇထုၵ်ႇၵၢဝ်ႇႁႃဝႃႈ ဢမ်ႇထုၵ်ႇမႅၼ်ႈၸွမ်းမၢႆမီႈ။ ၸဝ်ႈၼႃႈတီႈတၢင်းၵၢၼ်ထႆး လႆႈဢဝ်ဝႂ်လုမ်းတြႃးသေ လူင်းပိုၼ်ႉတီႈသွၵ်ႈႁႃ ပိူဝ်ႈတႃႇတီႉၺွပ်းၵုမ်းတူဝ် ၸဝ်ႈတူၼ်ၶူးလူင်ထမ်းမၶျယူဝ်း။


လွင်ႈၼႆႉ ႁဵတ်းႁႂ်ႈသင်ၶၸဝ်ႈၼႂ်းဝတ်ႉၽရႃႉထမ်းမၵၢႆး၊ လုၵ်ႈၼွင်ႉၵဝ်ႇဝတ်ႉၽရႃႉထမ်းမၵၢႆး၊ ၵူၼ်းႁဵတ်းၵၢၼ်မိူင်း ၵမ်ႈၽွင်ႈ၊ ၵူၼ်းဝၢၼ်ႈၵူၼ်းမိူင်းတင်းၼမ် ဢမ်ႇႁၼ်လီၸွမ်း၊ တုၵ်းယွၼ်းႁႂ်ႈပူတ်းပႅတ်ႈ မၢႆမီႈမတ်ႉတႃ 44 ။


ၵဵဝ်ႇၵပ်းလွင်ႈၼႆႉ ၸွမ်းၼင်ႇသိုဝ်ႇၶၢဝ်ႇထႆး ဢွၵ်ႇၵႂႃႇၼၼ်ႉ ၸွမ်ၽွင်းလူင်ပရႃႇယုတ်ႉ ၵျၼ်ႊဢူဝ်ႊၶျႃး ဢၼ်ပဵၼ်ပႃးႁူဝ်ၼႃႈၾၢႆႇပႂ်ႉပႃးလွင်ႈငမ်းယဵၼ်ၸိူဝ်ႉၸၢတ်ႈ (ၶေႃးသေႃၶျေႃး) ၸႅင်ႈလၢတ်ႈလွင်ႈလႆႈၸႂ်ႉမၢႆမီႈ မတ်ႉတႃ 44 ၵုမ်းၵမ်ပိုၼ်ႉတီႈ ဝတ်ႉၽရႃႉထမ်းမၵၢႆးဝႃႈ- "ၵႃႈပူၼ်ႉမႃးမၢႆမီႈပၵတိၸႂ်ႉဢမ်ႇလႆႈ၊ လူင်ပွင်ၸိုင်ႈၸင်ႇလႆႈတႅပ်းတတ်းၸႂ်ႉမတ်ႉတႃ 44 ။ တီႈတႄႉမၼ်း ၾၢႆႇပႂ်ႉမႃးလွင်ႈငမ်းယဵၼ်ၸိူဝ်ႉၸၢတ်ႈ ႁၼ်ထိုင်ဝႃႈလွင်ႈၼႆႉ မၼ်းပဵၼ်ပၼ်ႁႃႁူမ်ႈၵၼ်ၵူၼ်းတင်းမိူင်း ဢၼ်ၸႂ်ႉမၢႆမီႈဢီႈသင်ၵေႃႈ ဢဝ်မႃးၸႂ်ႉႁဵတ်းတီႈၵူၼ်းဢမ်ႇလီဢမ်ႇလႆႈယဝ်ႉ။ ဝၼ်းမိူဝ်းၼႃႈၼႆႉ သင်ဝႃႈဢမ်ႇမီးမၢႆမီႈမတ်ႉတႃ 44 ၊ ဢမ်ႇမီးၸုမ်းပႂ်ႉပႃးလွင်ႈငမ်းယဵၼ်ၸိူဝ်ႉၸၢတ်ႈယဝ်ႉ တေယူႇၵၼ်ၵႂႃႇလႆႈၸိူင်ႉႁိုဝ်၊ တေယွမ်းပၼ်ပိူင်ပဵၼ် လွင်ႈၸႂ်ႉမၢႆမီႈမူႇၸုမ်းပဵၼ်ယႂ်ႇလိူဝ်သေ မၢႆမီႈဝၢၼ်ႈမိူင်းလႄႈႁွင်ႈၵၢၼ်လူင်ၾၢႆႇၽဵင်ႇပဵင်းပဵၼ်ထမ်းၸိူင်ႉၼႆၼႆႉ ၵိူတ်ႇၶိုၼ်ႈၵႂႃႇမိူဝ်းၼႃႈတိၵ်းတိၵ်းႁႃႉ။ လွင်ႈၼႆႉ ႁႂ်ႈၵူႈၵေႃႉၸွႆႈၵၼ်ထတ်းသၢင်ဝႃႈ လွင်ႈလႂ်ၽိတ်း လွင်ႈလႂ်ထုၵ်ႇ၊ ၼင်ႇႁိုဝ်တေပဵၼ်လွင်ႈၸွႆႈၵၼ်ႁဵတ်းႁႂ်ႈဝၢၼ်ႈမိူင်း မီးလွင်ႈႁူမ်ႇလူမ်ႈလွတ်ႈၽေး"- ၼႆယဝ်ႉ။


ၾၢႆႇၼိုင်ႈတၢင်းၼိုင်ႈ ၼႂ်းသိုဝ်ႇထႆးၵေႃႈလၢတ်ႈထႅင်ႈဝႃႈ- ၸွမ်သိုၵ်း သၼ်ရသိူၼ် လၢတ်ႈဝႃႈ- လူင်ပွင်ၸိုင်ႈထႆး ၶႂ်ႈတုၵ်းယွၼ်းမုၵ်ႉၸုမ်း/ ၸၢဝ်းပုတ်ႉထၵူႈၸိုင်ႈမိူင်း ႁႂ်ႈထတ်းသၢင်ႁူႉၸွမ်းလွင်ႈပဵၼ်တႄႉမီးတႄႉ ၵဵဝ်ႇၵပ်းလွင်ႈၼႆႉ ပိူဝ်ႈတႃႇယႃႇႁႂ်ႈတူၵ်းပဵၼ်ၶိူင်ႈမိုဝ်းတၢင်းၵၢၼ်မိူင်းၶွင် လွင်ႈႁၢႆႉမိူၵ်ႈ။ ၶႂ်ႈတုၵ်းယွၼ်းထိုင် ၸုမ်းသိုဝ်ႇဝႃႈ ႁႂ်ႈႁၢႆးငၢၼ်းၶၢဝ်ႇပၼ် လွင်ႈဢၼ်ပဵၼ်တႄႉမီးတႄႉ ႁႂ်ႈၵူၼ်းတင်းလုမ်ႈၾႃႉလႆႈႁူႉၸွမ်း- ၼႆယူႇ။