တပ်ႉသိုၵ်းၸိုင်ႈတႆး RCSS/SSA ႁူမ်ႈၸတ်းႁဵတ်း ပၢင်ပွႆးဝၼ်းလုၵ်ႈဢွၼ်ႇ တီႈဢိူင်ႇမိူင်းယၢႆး ၵိင်ႇၸႄႈဝဵင်းမိူင်းၼွင် မီးလုၵ်ႈဢွၼ်ႇၶဝ်ႈႁူမ်ႈ 1000 ပၢႆ ။

ဝၼ်းတီႈ 28/01/2017 ယၢမ်းၵၢင်ၼႂ် 08:00- 11:00 မူင်းၵၢင်ဝၼ်း ပေႃႈမႄႈပီႈၼွင်ႉ ၵူၼ်းမိူင်း တင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႃႈတီႈ မၢႆ 6 တင်း မၢႆ 7 ႁူမ်ႈၵၼ် ၸတ်းႁဵတ်း ပၢင်ပွႆးဝၼ်းလုၵ်ႈဢွၼ်ႇ တီႈဝၢၼ်ႈပုင်ႇၵၢင်မိူင်း၊ ဢိူင်ႇမိူင်းယၢႆး၊ ၵိင်ႇၸႄႈ ဝဵင်းမိူင်းၼွင်၊ ၸႄႈဝဵင်းၵေးသီး၊ ၸႄႈတွၼ်ႈလွႆလႅမ်၊ ၸိုင်ႈတႆး ပွတ်းၸၢၼ်း။ ယိူင်းဢၢၼ်း ႁႂ်ႈပေႃႈမႄႈ ၽွမ်ႉၵၼ်၊ ႁႂ်ႈမေႃႁၵ်ႉလုၵ်ႈႁၵ်ႉလၢင်း ႁႂ်ႈလုၵ်ႈဢွၼ်ႇႁတ်းႁၢၼ်ၵတ်ႉၶႅၼ်ႇ ၸဵမ်ၸိူဝ်းၼႆႉ ဝႃႈၼႆ ။


ၸၢႆးတိပ်ႉသႅင် ၽူႈၸတ်းၵၢၼ် ၾၢႆႇၵၢၼ်သွၼ်ၵၢၼ်ႁဵၼ်း ပၢႆးပၺ်ၺႃ ၼႂ်းမိူင်း လၢတ်ႈဝႃႈ “ ယိူင်း ဢၢၼ်း ဢၼ်ႁဝ်းၶႃႈ ၸတ်းႁဵတ်းဝၼ်းလုၵ်ႈဢွၼ်ႇၼႆႉ မီးၶေႃႈယိူင်းဢၢၼ်းဝႆႉ 3 လွင်ႈ၊ ယိူင်းဢၢၼ်း တီႈၼိုင်ႈသမ်ႉ ယုၵ်ႉယွင်ႈပၼ်ႁႅင်းၼေႃႇတႅၼ်းၶိူဝ်းႁဝ်း၊ ၶေႃႈတီႈသွင်သမ်ႉ ယိူင်းဢၢၼ်း ႁႂ်ႈလုၵ်ႈ ဢွၼ်ႇႁဝ်း ႁူပ်ႉၵၼ်၊ ၽွမ်ႉႁူမ်ႈၵၼ်၊ မိုတ်ႈၵိုဝ်းၵၼ် လႄႈ ႁႂ်ႈလႆႈၶဝ်ႈ ဢွၵ်ႇႁႃၵၼ်၊ ၶေႃႈတီႈ သၢမ်သမ်ႉ ၼင်ႇႁိုဝ် လုၵ်ႈဢွၼ်ႇႁဝ်းၶႃႈ ပေႃးတေႁူႉၸၵ်း ထွတ်ႈမျၢတ်ႈ 4 ယိူင်ႈၵႂႃႇ” ဝႃႈၼႆ။


ထွတ်ႈမျၢတ်ႈ 4 ယိူင်ႈ ဢၼ်ဝႃႈၼၼ်ႉတႄႉ ပဵၼ် ၸိူဝ်ႉၸၢတ်ႈ၊ ဝၢၼ်ႈမိူင်း၊ ၽႃသႃ၊ သႃသၼႃ ၼႆယဝ်ႉ ။


ပၢင်ပွႆးသူင်သိူဝ်းဝၼ်းလုၵ်ႈဢွၼ်ႇၼႆႉ မီးပၢင်ႁႂ်ႈလုၵ်ႈဢွၼ်ႇၶႅင်ႇႁွင်ႉၵႂၢမ်း၊ ၶႅင်ႇႁဵတ်းၶဝ်ႈၽၵ်း၊ ၶႄႉၶႅင်ႇတၢင်းၵႃႈ လၢႆးၶႅၼ်ႉ၊ လၢႆးၶွၼ်ႉ ၸဵမ်ၸိူဝ်းၼႆႉ ဝႃႈၼႆ။


ပၢင်ပွႆးသူင်သိူဝ်းဝၼ်းလုၵ်ႈဢွၼ်ႇၼႆႉ ၶွင်ႇသီႇဢဝ်ၶိုၼ်းၸိုင်ႈတႆး ဢွၼ်ႁူဝ်ၸတ်းႁဵတ်းတီႈ လွႆတႆးလႅင်း၊ ပႃးၸဵမ်ပွတ်းမိူင်းၼၢႆး၊ လၢႆးၶႃႈ၊ ဢိၵ်ႇၼႂ်းၵိင်ႇၸႄႈဝဵင်းမိူင်းၼွင်ၼႆႉ ဝႃႈၼႆ ။