ၵိူတ်ႇၽေးၾႆးမႆႈၼိူဝ်ႁိူၼ်းတိူၵ်ႈလူင် တီႈပွၵ်ႉတႃႈလေႃႉ ဝဵင်းတႃႈၶီႈလဵၵ်း၊ ပေႃႈထဝ်ႈၸၢဝ်းၶိူဝ်းၶႄႇၵေႃႉၼိုင်ႈ လႆႈလူႉသဵင်ႈၵႂႃႇယွၼ်ႉၽေးၾႆး ။

ဝၼ်းတီႈ (30/01/2017) ၶၢဝ်းယၢမ်းမွၵ်ႈ 8 မူင်းပၢႆ၊ ၵိူတ်ႇၾႆးမႆႈ တီႈပွၵ်ႉၵၢတ်ႇတႃႈလေႃႉ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ၊ မီးၵူၼ်းထဝ်ႈၸၢႆး ၸၢဝ်းၶိူဝ်းၶႄႇ ဢႃယု 70 ၵေႃႉၼိုင်ႈလႆႈလူႉသဵင်ႈၵႂႃႇ- ၼႆယဝ်ႉ ။


ၵူၼ်းၼႂ်းပိုၼ်ႉတီႈ တႃႈၶီႈလဵၵ်း ၵေႃႉၼိုင်ႈလၢတ်ႈဝႃႈ လႆႈငိၼ်းဝႃႈၶဝ်တႆႈတဵၼ်း သႅၼ်းလႅမ်ႈယႂ်ႇတီႈတၢင်းၼိူဝ်ႁိူၼ်း၊ ၶဝ်ပဵၼ်ၸၢဝ်းၶိူဝ်းၶႄႇ၊ တေတႆႈတဵၼ်းယွၼ်းသူး ၸွမ်းၼင်ႇၾိင်ႈထုင်းၶႄႇၶဝ်ႁိုဝ်။ ႁိူၼ်းတိူၵ်ႈဢၼ်ၾႆးမႆႈၼႆႉ မီး 4-5 ၸၼ်ႉ၊ တီႈၸၼ်ႉဢၼ်ၾႆးမႆႈၼႆႉ ပဵၼ်ၸၼ်ႉသုင်သုတ်း၊ ၶဝ်ဝႆႉၶူဝ်းၶွင်တႃႇၶၢႆ မိူၼ်ၼင်ႇၽႃႈႁူမ်ႇၽႃႈၵွပ်း ၽႃႈႁူမ်ႇၶူဝ်းၼွၼ်းၸိူဝ်းၼႆႉ- ဝႃႈၼႆ ။


ၵဵဝ်ႇၵပ်းလွင်ႈၾႆးမႆႈပွၵ်ႈၼႆႉ ၾၢႆႇၵႅတ်ႇၶႄၾႆးၶဝ်ၵေႃႈမႃးၸွႆႈယူႇ၊ တၢင်းၾၢႆႇမိူင်းမၢၼ်ႈ (မိူင်းတႆး)ၼႆႉ မီးလူတ်ႉၵႃးၶႄၾႆး 4 လမ်း၊ တၢင်းမိူင်းထႆးၵေႃႈမႃးၸွႆႈ- ၵူၼ်းၼႂ်းပိုၼ်ႉတီႈ သိုပ်ႇလၢတ်ႈထႅင်ႈၼင်ႇၼႆ ။