ႁူဝ်ပဝ်ႈၸုမ်းမုၼ်းလႅင်း (မွန်းလှိုင်းဖွံဖြိုးရေးပရဟိတအသင်း) တိုၵ်းသူၼ်း ၵူၼ်းၼုမ်ႇတႆးၶဝ်ႈႁဵတ်း ၵၢၼ်ၼႂ်းလူင်ပွင်ၸိုင်ႈသေပူၵ်းပွင်ၼႂ်းဢိူင်ႇဝၢၼ်ႈတူဝ်ၵဝ်ႇ ။

ဝၼ်းတီႈ 28-29/01/2017 ၸုမ်းမုၼ်းလႅင်း တင်းၸုမ်းလုမ်းလႃးပူၵ်းပွင်လုၵ်ႈဢွၼ်ႇ Save The Children Internation ႁူမ်ႈၵၼ် ၸတ်းႁဵတ်းပၢင်သွၼ်ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ၊ မီးၽူႈ ယႂ်ႇၵူၼ်းလူင်၊ ၶူး၊လုၵ်ႈႁဵၼ်း ဢိၵ်ႇၽူႈ သူၼ်ၸႂ်ၶဝ်ႈႁူမ်ႈမွၵ်ႈ 50ၵေႃႉ ပၢင်သွၼ် ၸတ်းႁဵတ်းတီႈ ပွၵ်ႉဝဵင်းသႃႇ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။


ႁူဝ်ပဝ်ႈၸုမ်းမုၼ်းလႅင်း ၸၢႆးသၢမ်မူၼ်ႇ လၢတ်ႈဝႃႈ - “ လုၵ်ႈဢွၼ်ႇဢၼ်လႆႈႁပ်ႉၶူးမႃးၼၼ်ႉ မီးတင်း ၼမ် ၵူၺ်းၵႃႈၵူၼ်းၼုမ်ႇတႆးၵမ်ႈၼမ် ယဝ်ႉႁူင်းႁဵၼ်းမႃးယဝ်ႉသေတႃႉ  ယင်းတိုၵ်ႉမႃးႁဵတ်းၵၢၼ်ႁႆႈ၊ သူၼ်၊ၼႃး ၊ၶၢႆၶူဝ်းၵုၼ်ႇဢၼ်ပေႃႈမႄႈႁဵတ်းဝႆႉၼၼ်ႉယူႇ၊ ပေႃးပဵၼ်လႆႈႁဝ်းလူဝ်ႇလႆႈၶဝ်ႈႁဵတ်းၵၢၼ် ၼႂ်းလူင်ပွင်ၸိုင်ႈ ႁႂ်ႈပဵၼ်တီႈပိုင်ႈဢိင်ပေႃႈမႄႈၵူၼ်းမိူင်း ႁႂ်ႈမၼ်းပေႃးၵိုင်ႇတၢင်းလႆႈၸႂ်ႉၶၢဝ်းယၢမ်း သဵင်ႈငိုၼ်းသေႁဵၼ်းမႃးၼၼ်ႉ” - ဝႃႈၼႆ ။


ပၢင်ၾိုၵ်းၽွၼ်ႉၼႆႉၽူႈပူင်သွၼ်ပဵၼ် ၸဝ်ႈၼႃႈတီႈ Save The Children Internation 1 ၵေႃႉ ၵူၼ်းၼႂ်း ၸုမ်းမုၼ်းလႅင်း4 ၵေႃႉႁူမ်ႈပဵၼ်5ၵေႃႉ။ ပူင်သွၼ်ပၼ်ၾၢႆႇပၢႆးဢွၼ်ႁူဝ်၊ ၾၢႆႇပၢႆးပူၵ်းပွင် ၼႂ်းဢိူင်ႇပိုၼ်ႉတီႈ - ၸဵမ်ၸိူဝ်းၼႆႉ။


ၽူႈၼမ်းၼႃႈ ၸၢႆးလိူၼ်မျႅတ်ႈ လၢတ်ႈဝႃႈ- “ႁဝ်းၶႃႈပဵၼ်ၽူႈဢွၼ်ႁူဝ်သေဢမ်ႇဝႃႈ၊ ႁဵတ်းၵၢၼ် သင်သေဢမ်ႇဝႃႈ ပေႃးႁဝ်းမီးလွင်ႈ ၸိုၼ်ႈသႂ်တေႃႇၵၼ်ၸင်ႇ ၼႃႈၵၢၼ် ႁဝ်းတေ ၶိုၼ်ႈယႂ်ႇလႆႈ” ဝႃႈၼႆ။


ဝၼ်းတီႈ29/11/2016 ၼၼ်ႉၵေႃႈ ၸၢႆးသိၼ်ႇမိၼ်းဢေး ပဵၼ်တူဝ်တႅၼ်း ငဝ်ႈငုၼ်း တီႇမူဝ်ႇၶရေႇ ၸီႇၸိူဝ်ႉၶိူဝ်းတႆး ႁိုဝ်ပႃႇတီႇႁူဝ်သိူဝ် SNLD သေ ၸတ်းပၢင်ႁူပ်ႉထူပ်း ၵူၼ်းမိူင်းတီႈ ပွၵ်ႉၼွင်ၸၢင်ႉ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ပၼ်တၢင်းၶႆႈၸႂ် လႄႈတိုၵ်းသူၼ်း ႁႂ်ႈၵူၼ်းမိူင်းႁူႉပုၼ်ႈသုၼ်ႇလႆႈသုၼ်ႇပဵၼ် ၊ လွင်ႈယူႇႁူမ်ႈတူင်ႇဝူင်းလဵဝ်ၵၼ် ၸိူဝ်းၼႆႉ မီးၵူၼ်း ၼုမ်ႇၼႂ်းၸုမ်း TYO၊ ၸုမ်းၵူၼ်းၼုမ်ႇၸၢဝ်းၶိူဝ်း၊ ၵေႃလိၵ်ႈလၢႆး လီႇသူး၊ တဢၢင်း၊ ၶၢင်ၸိူဝ်း ၼႆႉၶဝ်ႈႁူမ်ႈ။