ၸဝ်ႈတူၼ်ၶူး ဝတ်ႉတွၼ်းၸၼ်ႇ ၵဵင်းမႆႇ ဢွၼ်ႁူဝ်ၼမ်းၼႃႈ ဢိၵ်ႇ ၵွင်တိုၼ်းၵၢင်ၸွႆႈၸၢတ်ႈ ႁူမ်ႈၵၼ်ၼမ်းဢဝ် ၶူဝ်းၶွင်ၵိၼ်ၶွင်ၸႂ်ႉတင်းၼမ် ၶိုၼ်ႈၵႂႃႇၸွႆႈတီႈႁူင်းႁဵၼ်းၸိူဝ်ႉၸၢတ်ႈ ႁူင်းယႃ ၵူၼ်းထူပ်းၽေး ၼိူဝ်လွႆတႆးလႅင်း ငဝ်ႈၸိုင်ႈ RCSS/SSA ။

မိူဝ်ႈဝၼ်းတီႈ 24/01/2017 ၸဝ်ႈတူၼ်ၶူးဝတ်ႉတွၼ်းၸၼ်ႇ ဢိူင်ႇတႃႈသႃလႃး ၸႄႈတွၼ်ႈၵဵင်းမႆႇ မိူင်းထႆး၊ ဢိၵ်ႇ ၵွင်တိုၼ်းၵၢင်ၸွႆႈၸၢတ်ႈ လႆႈႁူမ်ႈၵၼ် လႆႈဢဝ်ၶူဝ်းၶွင်ၵိၼ်ၶွင်ၸႂ်ႉ တႃႇလူတ်ႉၵႃး 10 လမ်း ၶိုၼ်ႈမိူဝ်းၵႂႃႇ ၸွႆႈထႅမ်တီႈ ႁူင်းႁဵၼ်းၸိူဝ်ႉၸၢတ်ႈ လႄႈႁူင်းယႃ ၼိူဝ်လွႆတႆးလႅင်း၊ တီႈငဝ်ႈၸိုင်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ဢၼ်တေႃႇၼႃႈမိူင်းထႆး ၸႄႈဝဵင်းပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ်- ၼႆယဝ်ႉ ။


ၵွင်တိုၼ်းၵၢင်ၸွႆႈၸၢတ်ႈ ႁိုဝ် ၵွင်တိုၼ်းၸွႆႈၸၢတ်ႈၼႆႉ တင်ႈတႄႇဢဝ်ႁူဝ်ပီ 2016 မႃး ပေႃးထိုင်မႃးဝၼ်းတီႈ 2 ၵူႈလိူၼ် လႆႈၼမ်းဢဝ်ၶူဝ်းၶွင် ၶဝ်ႈၼမ်ႉတၢင်းၵိၼ် ၶိူင်ႈၸႂ်ႉၶူဝ်းသွႆၵူႈလွင်ႈလွင်ႈ ၸိူဝ်းႁႃႁပ်ႉတၢၼ်းလႆႈတီႈ ပီႈၼွင်ႉၽူႈႁၵ်ႉၸၢတ်ႈ ႁွမ်းတၢၼ်းပၼ်ၼၼ်ႉ လူႇတၢၼ်းယၢတ်ႇၼမ်ႉၶႂမ်ႈတဝ်ႈ တီႈသင်ၶၸဝ်ႈဝတ်ႉတွၼ်းၸၼ်ႇ (ၻွၼ်းၵျၼ်ႇ)။ ဝၢႆးၼၼ်ႉ ပေႃးထိုင်မႃးဝၼ်းတီႈ 7 ၵူႈလိူၼ် လႆႈၼမ်းဢဝ်လူတ်ႉၵႃးလၢႆလၢႆလမ်း ႁူမ်ႈၵၼ်တေႃႉသူင်ႇတၢင်ႇၵႂႃႇ ၸွႆႈထႅမ်ပီႈၼွင်ႉၸွမ်းလႅၼ်လိၼ် ။


ၵူၺ်းၵႃႈ မိူဝ်ႈလိူၼ်ပူၼ်ႉမႃးၼၼ်ႉ ၶိုၼ်ႈၵႂႃႇၸွႆႈမိူဝ်ႈဝၼ်းတီႈ 26/12/2016 ။ လိူၼ်ၼႆႉၵေႃႈ ပဵၼ်ၵႂႃႇၸွႆႈထႅမ်ဝၼ်းတီႈ 24/01/2017 ၼႆႉ၊ ပွၵ်ႈၼႆႉ ၸဝ်ႈတူၼ်ၶူးၸဝ်ႈၵွၼ်းဝတ်ႉတွၼ်းၸၼ်ႇ (ၻွၼ်းၵျၼ်ႇ) ၵေႃႈယေႃးတူဝ်ၶိုၼ်ႈၵႂႃႇၸွမ်း၊ ပွၵ်ႈၼႆႉပဵၼ်ပွၵ်ႈၵမ်းထူၼ်ႈ 13 ယဝ်ႉ။ ၼွၵ်ႈသေၸွႆႈထႅမ်ၶူဝ်းၶွင်ၸႂ်ႉ ၶူဝ်းၶွင်ၵိၼ်ယႅမ်ႉယဝ်ႉ ပွၵ်ႈၼႆႉယင်းလႆႈၸႃႇၵလဵင်ႉလူပႃးၶဝ်ႈသွင်တႃႇ- လႆႈႁူႉၼင်ႇၼႆ ။


ၵွင်တိုၼ်းၵၢင်ၸွႆႈၸၢတ်ႈၼႆႉ ပိုတ်ႇသဵၼ်ႈမၢႆယေးငိုၼ်းဝႆႉ ပိူဝ်ႈတႃႇ ၽူႈႁၵ်ႉၸိူဝ်ႉၸၢတ်ႈ ၸိူဝ်းယူႇတၢင်ႇဝၢၼ်ႈတၢင်ႇမိူင်း ၶႂ်ႈၸွႆႈထႅမ်မႃး။ ၵဵဝ်ႇၵပ်းပိူဝ်ႈတႃႇၸွႆႈထႅမ်ၼႆႉ ၾၢႆႇၼိုင်ႈတၢင်းၼိုင်ႈၵေႃႈ ၼႂ်းၸႄႈတွၼ်ႈၵဵင်းမႆႇလႄႈလမ်းပုၼ်းၼႆႉ တိတ်းတေႃႇလႆႈတီႈၽူႈမီးပုၼ်ႈၽွၼ်းလၢႆလၢႆၵေႃႉ မိူၼ်ၼင်ႇ- 1.ၸၢႆးၽူင်း မၢႆၾူၼ်း 084-376 8361 သၼ်ၽီသိူဝ်ႈ။ 2.ၸၢႆးဢွင်ႇ 083-577 0032 သၢႆသၼ်သၢႆး။ 3.ၸၢႆးၵေႃးဝီႉ 088-804 6992 သၢႆလမ်းပုၼ်း။ 4.ၸၢႆးလူႇ 086-116 4101 သၢႆမႄႈရိမ်း။ 5.ၸၢႆးတူၼ်ႈ 083-565 2065 သၢႆလွင်ႉဢေႃႈ ၸိူဝ်းၼႆႉ ။