ပၢင်ႁၢင်ႈႁႅၼ်းငူပ်ႉငီႉ တႃႇပဵၼ်ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၵူၼ်းၶိူဝ်းတႆး တီႈဝဵင်းတူၼ်ႈတီး၊ ဢၼ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢွၼ်ႁူဝ်ၼမ်းၼႃႈ ၸုမ်းတူင်ႇဝူင်းၼႂ်းမိူင်းတႆး လၢႆမူႇလၢႆၸုမ်းၸတ်းႁဵတ်းၼၼ်ႉ ယဝ်ႉတူဝ်ႈၵႂႃႇမိူဝ်ႈၼႆႉ၊ သိုပ်ႇလူင်းႁူပ်ႉထူပ်းၵူၼ်းမိူင်း တင်ႈတႄႇမိူဝ်ႈၼႆႉၵႂႃႇ ။

ၽူႈၼမ်းၼႂ်းၵူႈလွင်ႈလွင်ႈ ပႃႇတီႇႁူဝ်သိူဝ် (SNLD) ၸၢႆးၼုတ်း လၢတ်ႈဝႃႈ-မိူဝ်ႈၼႆႉ ပဵၼ်ဝၼ်းပိၵ်ႉဢိုတ်းပၢင်။ ၵူၺ်းၵႃႈ ၼႃႈၵၢၼ်ပိူဝ်ႈတႃႇလူင်းႁူပ်ႉထူပ်းၵူၼ်းမိူင်းၼႆႉ တႄႇမိူဝ်ႈၼႆႉၵႂႃႇယဝ်ႉ။ ယိူင်းဢၢၼ်းပိူင်လူင်တႄႉ ပဵၼ်ပိူဝ်ႈတႃႇၶႂ်ႈႁူႉၵၢင်ၸႂ်ပေႃႈမႄႈၵူၼ်းမိူင်းႁဝ်း ၶႂ်ႈလႆႈၶႂ်ႈပဵၼ်သင်၊ တေဢဝ်မႃးႁုပ်ႈႁူမ်ႈဝႆႉသေ ၸင်ႇယွၼ်းထၢမ်ၵၢင်ၸႂ်တၢင်ႇၸၢဝ်းၶိူဝ်းၵႂႃႇ ။


ၵူႈမူႇၵူႈၸုမ်းၼႆႉ ႁဝ်းဝၢင်းပႅတ်ႈၸုမ်းၽႂ်ၸုမ်းမၼ်းသေ ဢမ်ႇမီးၸုမ်းၽႂ်ၸုမ်းမၼ်းယဝ်ႉ၊ ႁဝ်းမႃးႁူပ်ႉၵၼ်သေ ႁဝ်းမႃးႁဵတ်းၵၢၼ်ႁူမ်ႈၵၼ်။ ပေႃႈမႄႈၵူၼ်းမိူင်းႁဝ်းၵေႃႈ ယႃႇပေပေႃးမႆႈၸႂ်၊ ပေႃးဝႃႈမူႇၸုမ်းႁဝ်းလူင်းမႃးႁူပ်ႉထူပ်း ပေႃႈမႄႈၵူၼ်းမိူင်းႁဝ်းၼႆၵေႃႈ ၶႂ်ႈလၢတ်ႈသင်ၵေႃႈလၢတ်ႈပၼ်၊ ၶႂ်ႈႁူႉသင်ၵေႃႈႁႂ်ႈတွင်ႈထၢမ်လႆႈယူႇ- ၸၢႆးၼုတ်း သိုပ်ႇလၢတ်ႈၵႂႃႇၼင်ႇၼႆ ။


ပၢင်ႁၢင်ႈႁႅၼ်းငူပ်ႉငီႉ တႃႇပဵၼ်ဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ ၵူၼ်းၶိူဝ်းတႆး တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ  တႄႇၸတ်းႁဵတ်းဝၼ်းႁႅၵ်ႈ မိူဝ်ႈဝၼ်းတီႈ 23-27/01/2017 ၶၢဝ်းတၢင်း 5 ဝၼ်း။ ပဵၼ်ပၢင်ဢုပ်ႇဢူဝ်းၾိုၵ်းၽွၼ်ႉ လပ်ႉၼမ်ႉၵတ်ႉ ႁၢင်ႈႁႅၼ်းတႃႇပၢင်ၵုမ်လူင်ၵၢၼ်မိူင်း ၸိူဝ်ႉၸၢတ်ႈတႆး။ ပၢင်ဢုပ်ႇၵုမ်ၼႆႉ ၸတ်းႁဵတ်းလၢႆႁူဝ်ၶေႃႈသေ ၸႅၵ်ႇႁဵတ်းဝႆႉလၢႆတီႈ၊ မိူၼ်ၼင်ႇႁူဝ်ၶေႃႈၾၢႆႇၵၢၼ်မိူင်း၊ ၾၢႆႇပၢႆးမၢၵ်ႈမီး၊ ၾၢႆႇပၢႆးပိူင်ၵူၼ်း၊ ၾၢႆႇႁူမ်ႇလူမ်ႈဝၢၼ်ႈမိူင်း၊ ၾၢႆႇတီႈလိၼ်လႄႈ ၶူဝ်းႁႄႈၶူဝ်းတိုၼ်း ၸဵမ်ၸိူဝ်းၼႆႉတင်းမူတ်းမီး 6 ႁူဝ်ၶေႃႈ-ၼႆယဝ်ႉ ။


ပၢင်ဢုပ်ႇၵုမ်ပွၵ်ႈၼႆႉ မီးၽႅၼ်ၵၢၼ်ၸႅၵ်ႇပဵၼ် 15 ၸုမ်းသေ လူင်းပိုၼ်ႉတီႈႁူပ်ႉထူပ်းပေႃႈမႄႈၵူၼ်းမိူင်း ၼႂ်းမိူင်းတႆးၵူၺ်းဢမ်ႇၵႃး ၼွၵ်ႈမိူင်းတႆးၵေႃႈ တေၵႂႃႇႁူပ်ႉထူပ်းပီႈၼွင်ႉတႆး ၼႂ်းပိုၼ်ႉတီႈတွၼ်ႈလိၼ် ဢၼ်မီးပီႈၼွင်ႉတႆးယူႇသဝ်းၼမ် လၢႆလၢႆတီႈ။ ၶေႃႈလႆႈၸႂ် ဢၼ်လႆႈမႃးတီႈၵူၼ်းမိူင်းၼၼ်ႉ တေတႅမ်ႈမၢႆမႃးသေ တေဢဝ်ၶဝ်ႈဢုပ်ႇဢူဝ်း ၼႂ်းပၢင်ၵုမ်ၵၢၼ်မိူင်း ၸိူဝ်ႉၸၢတ်ႈတႆး၊ ဢၼ်လႆႈမႃးၽွၼ်းပၢင်ႈ ၶေႃႈလႆႈၸႂ်ၵဵဝ်ႇၵပ်းၵၢၼ်မိူင်းၼၼ်ႉ တေၼမ်းဢဝ်ၵႂႃႇဢုပ်ႇဢူဝ်းၼႂ်းပၢင်ၵုမ်လူင်ၵၢၼ်မိူင်း ဢမ်ႇၼၼ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းတီႈ 2 ဢၼ်ၼၢင်းဢွင်ႇသၢၼ်းၸုၵျီႇ တေဢွၼ်ႁူဝ်ၸတ်းႁဵတ်း ၼႂ်းလိူၼ်ၼႃႈ ။