ၸွမ်သိုၵ်း ယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/ SSA  လၢတ်ႈတီႈသိုဝ်ႇၶၢဝ်ႇထႆး ဝႃႈ-  မိူင်းႁူမ်ႈတုမ်မၢၼ်ႈ တေလႅၵ်ႈလၢႆႈဢမ်ႇလႅၵ်ႈလၢႆႈ ၼႆၼၼ်ႉ တၵ်း လႆႈပႂ်ႉတူၺ်း ၼၢင်းဢွင်ႇသၢၼ်းသုၵျီႇ ႁဵတ်းၵၢၼ်ထႅင်ႈ မွၵ်ႈ 2 ပီ လူးၵွၼ်ႇ - ဝႃႈၼႆ ။

ၸွမ်သိုၵ်း ယွတ်ႈသိုၵ်း လၢတ်ႈတီႈသိုဝ်ႇၶၢဝ်ႇထႆး "မတီႇၶျူၼ်ႊ"  မိူဝ်ႈဝၼ်းတီႈ 25/01/2017 ၼၼ်ႉ ဝႃႈ-“လူင်ပွင်ၸိုင်ႈမႂ်ႇ ဢၼ်ပႃႇတီႇၼူၵ်ႉယုင်း NLD တေႃႇဢွင်ႇသၢၼ်းသုၵျီႇ ဢွၼ်ႁူဝ်ၼႆႉ - တၢင်းၾၢႆႇႁဝ်းၶႃႈၵေႃႈ ပၼ်တၢင်းႁူမ်ႈမိုဝ်းယူႇ လူၺ်ႈၵၢၼ်လူင်းလၢႆးမိုဝ်းၵိုတ်းတိုၵ်း။ ၵူၺ်းၵႃႈလူင်း လၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼၼ်ႉယဝ်ႉသေတႃႉ တွၼ်ႈတႃႇၸၢဝ်းၶိူဝ်း ဢမ်ႇ လႆႈတိုဝ်ႉတၢင်း ၶဝ်ႈပႃးလႆႈ ၼႂ်းၵၢၼ်ပူၵ်းပွင်ဝၢၼ်ႈမိူင်း။ လိူဝ်သေဝႃႈ ပႂ်ႉတႃႇဢုပ်ႇဢူဝ်း ၵၢၼ်မိူင်း ၵႃႈၼၼ်ႉၵူၺ်း” - ဝႃႈၼႆ ။


ယိူင်းဢၢၼ်းသုင်သုတ်းတႄႉ ၶႂ်ႈလႆႈလွင်ႈထၢင်ႇႁၢင်ႈၸတ်းသၢင်ႈ ၽွင်းငမ်းဝၢၼ်ႈမိူင်းၸဝ်ႈၵဝ်ႇ ၊ ဢၼ်မီးလွင်ႈၽဵင်ႇပဵင်းပဵၼ်ထမ်းၼၼ်ႉယဝ်ႉ ။


“မိူင်းတႆးႁဝ်းၶႃႈၼႆႉ မီးတဵမ်ထူၼ်ႈၵူႈယၢင်ႇ၊ ဢၼ်ဢမ်ႇမီးတႄႉ မီးဢၼ်ၼိုင်ႈ - ၼၼ်ႉတႄႉ ပဵၼ် ဢႃႇၼႃႇတႃႇ ပူၵ်းပွင်ဝၢၼ်ႈမိူင်းတူဝ်ၵဝ်ႇယဝ်ႉ ။ ၵွပ်ႈၼၼ်လႄႈႁဝ်းတၵ်းလႆႈယွၼ်းၶိုၼ်း လွင်ႈထၢင်ႇႁၢင်ႈ ၶိုင်သၢင်ႈဝၢၼ်ႈမိူင်းႁဝ်းၼၼ်ႉယဝ်ႉ” - ဝႃႈၼႆ ။


ၸူဝ်ႈလူင်ပွင်ၸိုင်ႈမႂ်ႇ ႁပ်ႉပုၼ်ႈၽွၼ်းမႃး ၼႂ်းၶၢဝ်းတၢင်း 10 လိူၼ် ၼႆႉ ပၢႆးမၢၵ်ႈမီးၵေႃႈဢမ်ႇလီမႃး၊ ၵၢၼ်သင်ၵေႃႈယဝ်ႉ ၵူၼ်းမိူင်းလႆႈ ၸႂ်ယႂ်ႇတူဝ်ၵဝ်ႇသဵင်ႈသဵင်ႈ -  ၵၢၼ်ၽုၵ်ႇ၊ ၵၢၼ်သွမ်ႈ ႁႆႈၼႃး - ၸဵမ်ၸိူဝ်းၼႆႉ လူင်ပွင်ၸိုင်ႈဢမ်ႇပႆႇၸွႆႈပူၵ်းပွင် ပၼ်သင်လႆႈ - ။


ၼႂ်းမိူင်းတႆးမီးမေႃႇသႅင် ၊ မေႃႇငိုၼ်း၊ မေႃႇၸိုၼ်း၊ ပႃႇမႆႉ၊ ထၢၼ်ႇႁိၼ်၊ ပႃးၸဵမ် ၶူဝ်းၶွင် သၽႃဝ သိင်ႇဝႅတ်ႉလွမ်ႉ ၵုမ်ႈထူၼ်ႈၵူႈယၢင်ႇ။ မေႃႇႁႄႈ မႆႉသၵ်းမႆႉတိုင်း ၶူဝ်းၶွင်ဢၼ်မီးၵႃႈၶၼ် လူင်ပွင် ၸိုင်ႈယိပ်းၵုမ်းသဵင်ႈသဵင်ႈ  တိုၼ်းဢမ်ႇပၼ်ၽႂ် ၸုမ်းလႂ်ၶဝ်ႈၵႅဝ်လႃးလႃး။  ၸၢဝ်းၶိူဝ်းၼႂ်းပိုၼ်ႉတီႈ ၵေႃႈ ဢမ်ႇမီးသုၼ်ႇလႆႈ ၸႂ်ႉတိုဝ်းၶူဝ်းတိုၼ်းဢၼ်ဢွၵ်ႇၼႂ်းပိုၼ်ႉ တီႈၸဝ်ႈၵဝ်ႇ - ဝႃႈၼႆ ။


ၸွမ်သိုၵ်း ယွတ်ႈသိုၵ်းသိုပ်ႇလၢတ်ႈထႅင်ႈ ဝႃႈ- “ ဝူင်ႈဝၢင်ႈၼႆႉ လႆႈႁၼ် တေႃႇဢွင်ႇသၢၼ်းသုၵျီႇ ဢဝ်လွင်ႈလိၵ်ႈၵိၼ်ၵႅၼ်ႇ ပၢင်လူင် မႃးတူၵ်ႇလၢတ်ႈ ႁဵတ်းႁႂ်ႈၸုမ်းၸၢဝ်းၶိူဝ်းမီးႁႅင်းၸႂ်၊ မီးတၢင်းမုင်ႈ မွင်းမႃး တႃႇတေမီးသုၼ်ႇလႆႈၽွင်းငမ်းဝၼ်ႈမိူင်းၽႂ်မၼ်း။ လုမ်ႈၾႃႉ ၵေႃႈႁၼ်ထိုင်ဝႃႈ လူင်ပွင် ၸိုင်ႈမၢၼ်ႈၼႆႉ ယၢင်ႈၸူးမိူင်းတီႊမွၵ်ႊၶရေႊၸီႇယဝ်ႉ” - ၸဵမ်ၸိူဝ်းၼႆႉ ။


တႃႇႁူမ်ႈမိုဝ်းပၢႆးမၢၵ်ႈမီး တၢင်း လုၵ်ႈၸုမ်း ၸိုင်ႈမိူင်းဢႃႊသျႅၼ်ႊ 10 မိူင်း ၼၼ်ႉၵေႃႈ မိူင်းမၢၼ်ႈ ယင်းပႆႇ ၶိုင်ႈသၢင်ႈလႆႈသေၶၵ်ႉတွၼ်ႈ ၊ ဝၢၼ်ႈမိူင်းတေပဵၼ်ၸိူင်ႉႁိုဝ် ငဝ်းလၢႆးတေပဵၼ်ႁိုဝ် မႃးထႅင် ဢၼ်ဝႃႈၼၼ်ႉ ၼႆ ၽႂ်ၵေႃႈတိုၵ်ႉပၵ်းတႃ ပႂ်ႉတူၺ်းယူႇၼႆ - ၶၢဝ်ႇထႆး မတီႇၶျူၼ်ႊ ႁၢႆးငၢၼ်းဝႆႉၼင်ႇၼႆ ။


ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၼႆႉ လူင်းလၢႆးမိုဝ်းလိၵ်ႈႁူမ်ႈ မၢႆၵိုတ်းတိုၵ်းတူဝ်မိူင်း NCA ဝႆႉ မိူဝ်ႈပီ 2015  ။ ၵူၺ်းၵႃႈ တေႃႇထိုင် ႁူဝ်ပီ 2017 ၼႆႉ ယင်းတိုၵ်ႉၺႃး သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်းယူႇ လၢႆမိုဝ်ႉလၢႆပွၵ်ႈ ။