ၵူၼ်းၼုမ်ႇတႆး ၼႂ်းၵဵင်းမႆႇ ၸတ်းပၢင်ၶေႉၶႅင်ႇပိတ်ႉမၢၵ်ႇၼင် ပိူဝ်ႈတႃႇမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၾႅပ်ႊၿိဝ်ႊရီႊ 7 ဝၼ်း၊ ယိူင်းဢၢၼ်းႁႃငိုၼ်းၵွင်ၵၢင် ၸွႆႈထႅမ်ၶိူင်ႈလဵၼ်ႈဢဵၼ်ႁႅင်းလုၵ်ႈႁဵၼ်းတႆး ၼိူဝ်လွႆတႆးလႅင်း။

ၸုမ်းၵူၼ်းၼုမ်ႇတႆး ၵဵင်းမႆႇ C

ၸုမ်းသၢႆၽၼ်းမႂ်ႇ

ၸုမ်းမွၵ်ႇၸၢမ်

ပူၼ်ႉမႃးမိူဝ်ႈဝၼ်းတီႈ 29/01/2017 တင်ႈတႄႇယၢမ်း 9 မူင်းၵၢင်ၼႂ် တေႃႇထိုင် 6 မူင်း တၢမ်းၶမ်ႈ၊ ယူႇတီႈၸုမ်းၵူၼ်းၼုမ်ႇပိတ်ႉမၢၵ်ႇၼင် ၼႂ်းၵဵင်းမႆႇ လၢႆမူႇလၢႆၸုမ်းႁူမ်ႈၵၼ် ၸတ်းႁဵတ်းပၢင်ၶေႉၶႅင်ႇပိတ်ႉမၢၵ်ႇၼင် တီႈဝၢင်းပိတ်ႉမၢၵ်ႇၼင် လင်ႁူင်းႁဵၼ်းၿူဝ်းရိ ဝဵင်းၵဵင်းမႆႇ ၸိုင်ႈထႆး။ ယိူင်းဢၢၼ်းပိူဝ်ႈတႃႇ ပဵၼ်တီႈမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 70 ပီတဵမ်လႄႈ ႁႃငိုၼ်းၵွင်ၵၢင်သိုဝ်ႉၶူဝ်းၶွင်ၶိူင်ႈမႆႉၶိူင်ႈမိုဝ်း လဵၼ်ႈဢဵၼ်ႁႅင်း၊ ပိူဝ်ႈတႃႇ ၵႂႃႇၸွႆႈထႅမ်လုၵ်ႈႁဵၼ်း တီႈႁူင်းႁဵၼ်းၸိူဝ်ႉၸၢတ်ႈ လွႆတႆးလႅင်း- ၼႆယဝ်ႉ။


ၸၢႆးႁၢၼ် ၽူႈဢွၼ်ႁူဝ်ၾၢႆႇၸတ်းပၢင်ၶေႉၶႅင်ႇ လၢတ်ႈဝႃႈ- ၸွမ်းၼင်ႇယိူင်းဢၢၼ်းမီးဝႆႉသေ  ႁဝ်းၶႃႈလႆႈႁွင်ႉၸူဝ်းဢဝ်ၵူၼ်းၼုမ်ႇတႆး ပိတ်ႉမၢၵ်ႇၼင် ၼႂ်းၵဵင်းမႆႇမႃးႁူမ်ႈႁွမ်းၵၼ်၊ ၵဵပ်းငိုၼ်းၵၼ်ၼိုင်ႈၸုမ်းလႂ် 1,000 ဝၢတ်ႇသေ မႃးၸတ်းပၢင်ၶေႉၶႅင်ႇ ပိတ်ႉမၢၵ်ႇၼင်ၵၼ်။ ယိူင်းဢၢၼ်းႁဝ်းၶႃႈမီးဝႃႈ 1.တွၼ်ႈတႃႇႁႃငိုၼ်း ၵွင်ၵၢင် သိုဝ်ႉၶူဝ်းၶွင်လဵၼ်ႈဢဵၼ်ႁႅင်း ပၼ်လုၵ်ႈႁဵၼ်း တီႈႁူင်းႁဵၼ်းၸိူဝ်ႉၸၢတ်ႈ လွႆတႆးလႅင်း။ 2.တွၼ်ႈတႃႇသိုဝ်ႉထူၺ်ႈရၢင်းဝလ်းသေ မိူဝ်းၸတ်းပၢင်ပိတ်ႉမၢၵ်ႇၼင် ပၼ်လုၵ်ႈႁဵၼ်းတီႈႁူင်းႁဵၼ်းလွႆတႆးလႅင်း။ 3.ပိူဝ်ႈတႃႇပဵၼ်တီႈမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 70 ပီ။ ၼင်ႇႁိုဝ်ၵူၼ်းၼုမ်ႇႁဝ်းၶႃႈ ပေႃးတေဢမ်ႇလူင်လိုမ်းၵၼ်ၵေႃႈပိူင်ၼိုင်ႈ၊ ႁဝ်းၶႃႈလႆႈၸတ်းႁဵတ်းမႃးၵူႈပီပီသေ ပွၵ်ႈၵမ်းၼႆႉပဵၼ်ပွၵ်ႈၵမ်းတီႈ 4 ယဝ်ႉ။ 4.ပိူဝ်ႈတႃႇလုၵ်ႈဢွၼ်ႇ/ၵူၼ်းၼုမ်ႇတႆး ႁၢင်ႇယၢၼ်ယႃႈမဝ်းၵမ်သေ ၸႂ်ႉၶၢဝ်းယၢမ်းဢၼ်တူဝ်ႈတၼ်းၼၼ်ႉ ပဵၼ်ၽွၼ်းလီတႃႇတူဝ်ၵဝ်ႇလႄႈ ႁႂ်ႈလႆႈမႃးႁူပ်ႉထူပ်းမိုတ်ႈၵိုဝ်းၵၼ်- ဝႃႈၼႆ။


ပၢင်ၶေႉၶႅင်ႇပိတ်ႉမၢၵ်ႇၼင်ပွၵ်ႈၼႆႉ ပဵၼ်ပွၵ်ႈၵမ်း 4 ၊ တင်းမူတ်းမီး 16 ၸုမ်း၊ 1.ၸုမ်းမွၵ်ႇၵွၼ်တႆး။ 2.ၶုၼ်ႁၢၼ်၊ 3.ထုင်ႉပူင်း၊ 4.ၵၢတ်ႇလူင် JR 5.သႁၢႆ၊ 6.သၢႆၽၼ်းမႂ်ႇ၊ 7.ပၢင်လူင် FC ၊ 8.မွၵ်ႇၸၢမ်၊ 9.ၵူၼ်းၼုမ်ႇတႆး၊ 10.ၵူၼ်းၼုမ်ႇတႆး B ၊ 11.ၵူၼ်းၼုမ်ႇတႆး C ၊ 12.သၼ်လွႆသုင်၊ 13.သလႃႉဝိၼ်း၊ 14.ၼွင်ပူဝ်းၶမ်း၊ 15.ၶူဝ်ၶမ်း၊ 16.ၼုမ်ႇႁႅင်းၵၢၼ် ၸိူဝ်းၼႆႉ။ ၸုမ်းဢၼ်ပေႉတီႈၼိုင်ႈ လႆႈႁပ်ႉသူး/ရၢင်းဝလ်း 2,500 ဝၢတ်ႇ၊ တီႈသွင် 1,500 ဝၢတ်ႇ၊ တီႈသၢမ် 500 ဝၢတ်ႇ။


ပၢင်ၶေႉၶႅင်ႇပိတ်ႉမၢၵ်ႇၼင်ပွၵ်ႈၼႆႉ ၸုမ်းၵူၼ်းၼုမ်ႇတႆး ၵဵင်းမႆႇ C လႆႈတီႈၼိုင်ႈ။ ၸုမ်းသၢႆၽၼ်းမႂ်ႇ လႆႈတီႈသွင်၊ ၸုမ်းမွၵ်ႇၸၢမ် လႆႈတီႈသၢမ်။ ထူၺ်ႈရၢင်းဝလ်းသမ်ႉ ယူႇတီႈၸုမ်းၵူၼ်းၼုမ်ႇတႆး ၵဵင်းမႆႇ (Tai Youth CM) ၸတ်းယိုၼ်ႈမွပ်ႈပၼ်။ ဢၼ်လႆႈမႃးငိုၼ်းၵွင်ၵွင်သေ သိုဝ်ႉၶူဝ်းၶွင်ၶိူင်ႈမႆႉၶိူင်ႈမိုဝ်း ၵၢၼ်လဵၼ်ႈဢဵၼ်ႁႅင်းဝႆႉၼၼ်ႉ တေဢဝ်ၵႂႃႇမိူဝ်းမွပ်ႈယိုၼ်ႈပၼ် တီႈႁူင်းႁဵၼ်းလွႆတႆးလႅင်း ပေႃးဝၼ်းတီႈ 5-6/02/2017 တေထိုင်ၼႆႉ- ၼႆယဝ်ႉ။


ႁူင်းႁဵၼ်းၸိူဝ်ႉၸၢတ်ႈလွႆတႆးလႅင်းၼႆႉ ပၵ်းယူႇတီႈလွႆတႆးလႅင်း  ငဝ်ႈၸိုင်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႂ်းဝၼ်းတီႈ 5-6/01/2017 ။ တေႃႇၼႃႈမိူင်းထႆး ၸႄႈဝဵင်းပၢင်မၢၵ်ႇၽႃႈ ၸႄႈတွၼ်ႈမႄႈႁွင်ႈသွၼ်။


ပၢင်ၶေႉၶႅင်ႇပိတ်ႉမၢၵ်ႇၼင်ၵူၼ်းၼုမ်ႇတႆး ၼႂ်းၵဵင်းမႆႇၼႆႉ ၼွၵ်ႈသေမီးၶႅင်ႇၵၼ်ပိူဝ်ႈတႃႇမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆးယဝ်ႉ ဝၼ်းပီမႂ်ႇတႆးၸိူဝ်းၼႆႉၵေႃႈမီး။ ပွၵ်ႈၼႆႉၸတ်းႁဵတ်းမႃးထိုင်ထူၼ်ႈ ပွၵ်ႈၵမ်း 4 ။