ၵူၼ်းမိူင်း ဝၢၼ်ႈၵွင်းမူး 3 ၵေႃႉ ပၢႆႈၽေးသိုၵ်း-တိူဝ်ႉၺႃးၸၢၵ်ႇမၢၵ်ႇ မၢတ်ႇၸဵပ်းႁၢဝ်ႈႁႅင်း ယူတ်းယႃ တူဝ်ဝႆႉတီႈ ဝဵင်းၼမ်ႉတူႈ ဝႃႈၼႆ ။

ဝၼ်းတီႈ 01/12/2016 ယၢမ်းၵၢင်ၼႂ် 08:00 မူင်း တီႈဝၢၼ်ႈၵွင်းမူး ဢိူင်ႇၼမ်ႉႁႆး ၸႄႈဝဵင်း မၢၼ်ႈတူင်ႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ပၢႆႈပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈသိုၵ်း တဢၢင်း။  တေဢၢၼ်းဢွၵ်ႇပၢႆႈမိူဝ်းတၢင်း ဝဵင်းၼမ်ႉတူႈ ၺႃးမၢၵ်ႇလူင်တူၵ်းသႂ်ႇ  ႁိမ်းၸိူဝ်းၶဝ်လႄႈ လႆႈမၢတ်ႇၸဵပ်းၵႂႃႇတင်းသၢမ်ၵေႃႉ ဝႃႈၼႆ ။


ၼႂ်းၼၼ်ႉ ပႃႈပဝ်း ဢႃယု 53 ပီ တိူဝ်ႉၺႃး ၸၢၵ်ႇမၢၵ်ႇ တီႈၵႅမ်ႈလႄႈ ၶူးၼင် လႆႈသူင်ႇမႃး ယူတ်းယႃတူဝ် တီႈႁူင်းယႃၵူၼ်းမိူင်း ၸႄႈဝဵင်းၼမ်ႉတူႈ၊ ၵိုတ်းထႅင်ႈသွင်ၵေႃႉသမ်ႉ တိူဝ်ႉတီႈႁူဝ်မႃႇ လႄႈ တီႈၶႅၼ် တိုၵ်ႉယူႇတီႈဝၢၼ်ႈၵွင်းမူးယူႇ ပႆႇႁတ်းမႃးႁူင်းယႃ ဝႃႈၼႆ ။


မၢၵ်ႇလူင်ဢၼ်တူၵ်းသႂ်ႇႁိမ်း ၵူၼ်းဝၢၼ်ႈၵွင်းမူး 3 ၵေႃႉၼႆႉ ပဵၼ်မၢၵ်ႇၸုမ်းလႂ်၊ တပ်ႉလႂ် ပွႆႇမႃး ပႆႇႁူႉ၊ ယွၼ်ႉဝႃႈ တၢင်းပွတ်းတွၼ်ႈၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈတင်းတပ်ႉသိုၵ်းတဢၢင်း တိုၵ်ႉပဵၼ်ပၢင် တိုၵ်းၵၼ် ဝႃႈၼႆ ။


မိူဝ်ႈဝၼ်းတီႈ 30/11/2016 ယၢမ်းၵၢင်ၼႂ် ၵူၼ်းမိူင်း ၸႄႈဝဵင်းမၢၼ်ႈတူင်ႈ ပၢႆႈၽေးသိုၵ်း မႃးတၢင်းၼမ်ႉတူႈထႅင်ႈ 170 ၵေႃႉ၊ ယွၼ်ႉသိုၵ်းမၢၼ်ႈတင်းသိုၵ်းတဢၢင်း ပိုတ်ႇၼႃႈ သိုၵ်းတေႃႇ ၵၼ် ဢမ်ႇထၢတ်ႇ ။


လိူဝ်သေၼၼ်ႉ မိူဝ်ႈဝၼ်းတီႈ 20/11/2016 ၼႂ်းၸိုင်ႈတႆး ပွတ်းႁွင်ႇ တီႈ 105 လၵ်းၼၼ်ႉ ယူႇတီႈတပ်ႉ သိုၵ်းဢူၺ်းလီ ပွတ်းႁွင်ႇ ဢၼ်ႁူမ်ႈပႃးသိုၵ်းၶၢင် KIA သိုၵ်းရၶႅင်ႇ AA သိုၵ်းၵူဝ်းၵၢင်ႉ MNDAA လႄႈသိုၵ်း တဢၢင်း TNLA လႆႈပဵၼ်ပၢင်တိုၵ်းၵၼ်တင်း တပ်ႉသိုၵ်းမၢၼ်ႈ။  ၼႂ်းဝၼ်းလဵဝ်ၼၼ်ႉ လႆႈပဵၼ်ပၢင် တိုၵ်းၵၼ် လၢႆလၢႆတီႈ ၼႂ်းၸႄႈဝဵင်းမူႇၸႄႈ။ သဵၼ်ႈတၢင်းလႄႈၶူဝ်ၵေႃႈၺႃး ယႃႉၵွႆၾႆးၽဝ်။ ၸုမ်းယိပ်းၵွင်ႈႁႄႉၵႃး ၵူၼ်းမိူင်းၵိုတ်း ၵၢင်တၢင်းသေ ၵဵပ်းငိုၼ်း၊ ၵဵပ်းၶွၼ်ႇ ၼႂ်းၵႄႈပၢင်တိုၵ်းလႄႈ ၸဝ်ႈလူတ်ႉၸဝ်ႈၵႃး ဢၼ်ၺႃး ယိုဝ်းတၢႆၵေႃႈမီး ဝႃႈၼႆ ။