ၸုမ်းၵပ်းသၢၼ်လွင်ႈၼၢင်းယိင်းတႆး (SWAN) ဢွၼ်ႁူဝ်ၸတ်းႁဵတ်းဝၼ်းၵိုတ်းယိုတ်း လွင်ႈႁဵတ်း ႁၢႆႉၸႃႉ ၼိူဝ်ၼၢင်းယိင်း ၼင်ႇႁိုဝ် ပီႈၼွင်ႉၵူၼ်းမိူင်း ပေႃးတေလႆႈႁပ်ႉႁူႉဝႃႈ မၼ်းတုမ်ႉ တိူဝ်ႉ ဝၢၼ်ႈမိူင်းလႄႈ ၵၢၼ်တူင်ႇဝူင်းၸိူင်ႉႁိုဝ် ၸဵမ်ၸိူဝ်းၼႆႉ ။

ဝၼ်းတီႈ 29/11/2016 ယၢမ်း ၵၢင်ၼႂ် 09:00-21:00 မူင်းၵၢင်ၶမ်ႈ ယူႇတီႈၸုမ်းၵပ်း သၢၼ်လွင်ႈ ၼၢင်းယိင်းတႆး Shan Women’s Action Network ဢွၼ်ႁူဝ်ၸတ်းႁဵတ်း ဝၼ်းၵိုတ်းယိုတ်း လွင်ႈႁဵတ်းႁၢႆႉၸႃႉ ၼိူဝ်ၼၢင်းယိင်း တီႈမိူင်းၶိူဝ်း ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ၼင်ႇႁိုဝ် ပီႈၼွင်ႉၵူၼ်းမိူင်း ပေႃးတေလႆႈႁပ်ႉႁူႉဝႃႈ လွင်ႈႁဵတ်းႁၢႆႉၸႃႉၼိူဝ်ၼၢင်းယိင်းၼႆႉ  မၼ်းတေတုမ်ႉတိူဝ်ႉ ၼႂ်းၼႃႈႁိူၼ်း၊ ၼႂ်းတူင်ႇဝူင်း၊ ၼႂ်းမိူင်းၸိူင်ႉႁိုဝ် ၸဵမ်ၸိူဝ်းၼႆႉ သပ်းလႅင်း လၢတ်ႈၼႄ ပီႈၼွင်ႉၸိူဝ်းမႃးၶဝ်ႈႁူမ်ႈ ဝႃႈၼႆ ။


ၼၢင်းၶမ်းယူင်ႇ ၽူႈၸွႆႈၶပ်းၶိုင်ပွင်ပဵၼ်ပၢင်ပွႆး လၢတ်ႈဝႃႈ “ ဢၼ်ႁဝ်း ၶႃႈလႆႈၸတ်းႁဵတ်း ဝၼ်းၵိုတ်း ယိုတ်း လွင်ႈႁဵတ်းႁၢႆႉၸႃႉ ၼၢင်းယိင်းၼႆႉ ႁဝ်းၶႃႈယိူင်းဢၢၼ်း ႁႂ်ႈၵူၼ်းမိူင်းႁဝ်းလႆႈႁပ်ႉႁူႉဝႃႈ  လွင်ႈႁဵတ်းႁၢႆႉၸႃႉၼႆႉ မၼ်းပဵၼ်ၸိူင်ႉႁိုဝ်မႃး၊ သင်မီးလွင်ႈႁဵတ်းႁၢႆႉၸႃႉမႃး မၼ်းတေ တုမ်ႉတိူဝ်ႉၼႂ်းၼႃႈႁိူၼ်း၊ ၼႂ်းတူင်ႇဝူင်း၊ ၼႂ်းမိူင်းႁဝ်းၸိူင်ႉႁိုဝ်။ ႁႂ်ႈၵူၼ်းမိူင်းႁဝ်းလႆႈႁပ်ႉႁူႉၸွမ်း” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ၼင်ႇႁိုဝ် ပီႈၼွင်ႉၵူၼ်းမိူင်းတႆး ၵူႈတီႈ တေလႆႈႁပ်ႉႁူႉၼၼ်ႉ ၸင်ႇလႆႈ ၸတ်း ႁဵတ်း ၼိုင်ႈပီလႂ် ၼိုင်ႈတီႈ။ ပူၼ်ႉမႃး 2 ပီ လႆႈၸတ်းႁဵတ်းတီႈၼမ်ႉလၼ်ႈ၊ ပီၵၢႆသမ်ႉ ၸတ်း ႁဵတ်း တီႈဝဵင်းသီႇပေႃႉ၊ ပီႈၼွင်ႉၼႂ်းပိုၼ်ႉတီႈမႃးၶဝ်ႈႁူမ်ႈ ၼမ်ၵူႈတီႈ။ သင်ဝႃႈ တေႁွင်ႉမႃးတီႈ လဵဝ်ၵၼ် မူတ်းသေႁဵတ်းသမ်ႉ ငိုၼ်းႁဝ်းၶႃႈၵေႃႈသမ်ႉဢမ်ႇမီး ယွၼ်ႉၼၼ်လႄႈ ၽႅၼ်ၵၢၼ်ဝႆႉဝႃႈ ၼိုင်ႈ ပီတေႁဵတ်းၵႂႃႇၼိုင်ႈတီႈ ဝႃႈၼႆ ။


တီႈပၢင်ၵႅဝ်ႈတီႈမိူင်းၶိူဝ်းၼၼ်ႉ မီးၽူႈယႂ်ႇၵူၼ်းလူင် ၶိုၼ်ႈမွၵ်ႇလၢတ်ႈၶေႃႈ ၵႂၢမ်း မိူၼ်ၼင်ႇ ၽူႈၵွၼ်း ၼႃႈလိၼ်မိူင်းၶိူဝ်း၊ ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ၊ ၽူႈတႅၼ်း သၽႃးၸႄႈမိူင်း ၶဵတ်ႇ လိူၵ်ႈတင်ႈမၢႆ 2 ၊ ၽူႈပွင်ၵၢၼ်ၼႂ်းၸုမ်းၵပ်းသၢၼ်လွင်ႈၼၢင်းယိင်းတႆး၊ ၼွၵ်ႈလိူဝ်ၼၼ်ႉ လူဢၢၼ်ႇ ၽိုၼ်လိၵ်ႈ ႁူဝ်ပဝ်ႈငဝ်ႈငုၼ်းပႃႇတီႇႁူဝ်သိူဝ် လွင်ႈၾၢၵ်ႇတွၼ်ႈပီမႂ်ႇတႆး ၸဵမ်ၸိူဝ်းၼႆႉ ။


ပၢင်ၵိုတ်းယိုတ်းလွင်ႈႁဵတ်းႁၢႆႉၸႃႉ ၼိူဝ်ၼၢင်းယိင်း ဢၼ်လႆႈၸတ်းႁဵတ်းတီႈ မိူင်းၶိူဝ်းသမ်ႉ ယၢမ်း တွၼ်ႈၵၢင်ၼႂ် ပိုတ်ႇပၢင်ပွႆး သပ်းလႅင်းလၢတ်ႈၼႄ ပိုၼ်းပဵၼ်မႃး လွင်ႈႁဵတ်း ႁၢႆႉၸႃႉၼိူဝ် ၼၢင်းယိင်း လႄႈ သပ်းလႅင်းၵပ်းသိုပ်ႇပၼ် ၸုမ်းၵပ်းသၢၼ်လွင်ႈၼၢင်းယိင်းတႆး တူင်ႉၼိုင်ႁဵတ်း သၢင်ႈသင် မႃး ၸဵမ်ၸိူဝ်းၼႆႉ။ ၼွၵ်ႈလိူဝ်ၼၼ်ႉ ယၢမ်းဝၢႆးဝၼ်းသမ်ႉ မီးၵၢၼ်ၸႃႇၵလဵင်ႉလူ ၶဝ်ႈ 1000 ႁေႃႇ ။


ထိုင်မႃးယၢမ်းၵၢင်ၶမ်ႈ ၼႂ်းဝၼ်းတီႈ 29 ၼၼ်ႉၵူၺ်း ပီႈၼွင်ႉၵူၼ်းမိူင်းၶိူဝ်း ႁူမ်ႈၵၼ် တႆႈတဵၼ်း တိူင်ႇၵၢဝ်ႇ ယွၼ်းသူး ႁႂ်ႈပၢင်တိုၵ်းၼႂ်းမိူင်းတႆးၸဵဝ်းၵိုတ်း။ ၼႂ်းမိူင်းႁူမ်ႈတုမ်မိူင်းမၢၼ်ႈ၊ ႁႂ်ႈၵိုတ်းယိုတ်း လွင်ႈႁဵတ်း ႁၢႆႉၸႃႉၼိူဝ်ၼၢင်းယိင်းလႄႈ လုၵ်ႈဢွၼ်ႇ၊ လိူဝ်သေၼၼ်ႉ ယွၼ်းသူး တိူင်ႇၵၢဝ်ႇ ပႃး ၸဝ်ႈၶူး မေႃတႆး ၸိူဝ်းဢၼ်လႆႈၼွၼ်းၽႄးၵႂႃႇလႄႈ ၸိူဝ်းဢၼ်ပဵၼ်ၽူႈႁၵ်ႉၸၢတ်ႈ ဢၼ်လႆႈ လူႇၼိူဝ်ႉလူႇလိူတ်ႈၵႂႃႇ တႃႇၸိူဝ်ႉၶိူဝ်းလႄႈ ဝၢၼ်းမိူင်း ၸဵမ်ၸိူဝ်းၼႆႉ၊ ၼွၵ်ႈလိူဝ် ၼၼ်ႉ ဢွၼ်ၵၼ် သိုပ်ႇ ႁပ်ႉတွၼ်ႈ ပီမႂ်ႇတႆး 2111 ၼီႈ ။


ပၢင်ၵိုတ်းယိုတ်းလွင်ႈႁဵတ်းႁၢႆႉၸႃႉၼိူဝ်ၼၢင်းယိင်းၼႆႉ မီးပီႈၼွင်ႉၵူၼ်းမိူင်းၶိူဝ်းမႃးၶဝ်ႈႁူမ်ႈ ၼပ်ႉႁူဝ် ႁဵင်၊ ဢၼ်မႃးၶဝ်ႈႁူမ်ႈသမ်ႉ ပီႈၼွင်ႉ ၼႂ်းဢိူင်ႇသီႇထွၵ်ႈ၊ ဢိူင်ႇမိူင်းၶိူဝ်းလႄႈ ဢိူင်ႇၼမ်ႉဝၼ်း ၸဵမ် ၸိူဝ်းၼႆႉ ။