ၽူႈယႂ်ႇၵူၼ်းလူင် ပႃႇတီႇ NLD ၼႂ်းမိူင်းတႆး ဢၼ်ထုၵ်ႇငဝ်ႈငုၼ်းပႃႇတီႇၸိူဝ်ႉၸၢတ်ႈ (NLD) ပူတ်းပႅတ်ႈၶဝ် 4 ၵေႃႉၼၼ်ႉ ၼႂ်းဝၼ်းတီႈ 20/11/2016 ၼႆႉ တေမီးၵၢၼ်ၸွပ်ႇထတ်းလိူင်ႈၶဝ်သေ တႅပ်းတတ်း ။

ဢူးတိၼ်ႇမွင်ႇတူဝ်း ႁူဝ်ပဝ်ႈ NLD ၸႄႈတွၼ်ႈတူၼ်ႈတီး

ၵဵဝ်ႇၵပ်းလွင်ႈၼႆႉ ၵေႃႉပဵၼ်ႁူဝ်ပဝ်ႈ NLD ၸႄႈတွၼ်ႈတူၼ်ႈတီး၊ ဢူးတိၼ်ႇမွင်ႇတူဝ်း လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈ ဝႃႈ- ၼႂ်းဝၼ်းတီႈ 20/11/2016 ၼႆႉ တေမီးၵၢၼ်တႅပ်းတတ်းပုတ်းၶၢတ်ႇ ႁႂ်ႈလိူင်ႈၼႆႉယဝ်ႉတူဝ်ႈ- ဝႃႈၼႆ ။


ၽူႈယႂ်ႇၵူၼ်းလူင်ၼႂ်းပႃႇတီႇ NLD မိူင်းတႆး ၸိူဝ်းထုၵ်ႇပူတ်းထွၼ်ၵႃႈပူၼ်ႉမႃးၼႆႉ တင်းမူတ်းမီး 4 ၵေႃႉ၊ မိူၼ်ၸိူင်ႉၼင်ႇႁူဝ်ပဝ်ႈ NLD မိူင်းတႆး တေႃႇၶိၼ်ႇမူဝ်းမူဝ်း၊ ႁူဝ်ပဝ်ႈ NLD လွႆလႅမ် တေႃႇမီးမီး တင်း တေႃႇယူႇမီႇၸေႃႇ၊ ႁူဝ်ပဝ်ႈၸႄႈတွၼ်ႈတူၼ်ႈတီး ဢူးတိၼ်ႇမွင်ႇတူဝ်း ၸိူဝ်းၼႆႉ ။


လွင်ႈတၢင်းၸိူဝ်းၶဝ်လႆႈထုၵ်ႇပူတ်းပႅတ်ႈၼႆႉ ယွၼ်ႉပိူဝ်ႈဝႃႈ- ၸိူဝ်းၶဝ်တႅမ်ႈလိၵ်ႈဝႃႈၶိတ်ႈဝႃႈပၢႆႇပႃႇတီႇ NLD ၼႂ်းသိုဝ်ႇ Social Media ၶွင်ၶဝ်။ မိူဝ်ႈတႄႇမၼ်း မီးၶၢဝ်ႇဢွၵ်ႇဝႆႉဝႃႈ ၽူႈၼမ်း NLD ၼႂ်းမိူင်းတႆးၼႆႉ တေပူတ်းပႅတ်ႈ 6 ၵေႃႉ။ ၵူၺ်းၵႃႈ ၽိူဝ်ႇထတ်းတူၺ်းႁူႉဝႃႈတႃႇ 2 ၵေႃႉၼႆႉ ၸဵမ်ပိုင်းၵေႃႈတႅမ်ႈလိၵ်ႈယွၼ်း ထွၼ်တူဝ်ဢွၵ်ႇဝႆႉလႄႈ လႆႈပူတ်းၵႂႃႇ 4 ၵေႃႉၵူၺ်း။ ၼွၵ်ႈၼိူဝ်သေၶဝ် 6 ၵေႃႉၼႆႉ ၵေႃႉပဵၼ်ဢူးဝိၼ်းထဵင်ႇ ၶွမ်ႊမတီႊၾၢႆႇလူလွမ်ပၵ်းပိူင် ပႃႇတီႇ NLD ၵေႃႈၸႂ်ႈ ၽူႈၼမ်းၼႂ်းၵေႃႈၸႂ်ႈၼၼ်ႉၵေႃႈ  လႆႈထုၵ်ႇငဝ်ႈငုၼ်းၸွပ်ႇထတ်းပႃး ။


ယွၼ်ႉပိူဝ်ႈဝႃႈ ဢူးဝိၼ်းထဵင်ႇၼႆႉ မၼ်းယၢမ်ႈလၢတ်ႈတီႈ ၸုမ်းၶၢဝ်ႇၼွၵ်ႈမိူင်းဝႃႈ- ယွၼ်ႉပိူဝ်ႈၶေႃႈၸီႉသင်ႇ တေႃႇဢွင်ႇသၢၼ်းၸုၵျီႇလႄႈ လႆႈပူတ်းၶဝ်ပႅတ်ႈ။ ၵူၺ်းၵႃႈ ပွၵ်ႈၵမ်းၼႆႉ ဢၼ်ႁွင်ႈၵၢၼ်ၶၢဝ်ႇၼွၵ်ႈမိူင်း တွင်ႈထၢမ်ၼၼ်ႉ မၼ်းဢမ်ႇတွပ်ႇလၢတ်ႈၸိူင်ႉၼၼ် ။


မိူၼ်ၸိူင်ႉၼင်ႇ တေႃႇၶိၼ်ႇမူဝ်းမူဝ်း ဢၼ်ပဵၼ်ၽူႈၼမ်းပႃႇတီႇ NLD ၼႂ်းမိူင်းတႆး၊ ဢၼ်ထုၵ်ႇပူတ်းပႅတ်ႈၼႆႉ မၼ်းၼၢင်းၼႆႉ ယွမ်းတုၵ်ႉယၢပ်ႇယၢၵ်ႈမႃး ၼႂ်းပၢၼ်လူင်ပွင်ၸိုင်ႈသိုၵ်း၊ ပဵၼ်ပႃးၽူႈတၢင်ၼႃႈ (ၽူႈတၢင်ဝႃႈၵႂၢမ်း) ၾၢႆႇသုၼ်ႇလႆႈၵူၼ်းသေ ၸွႆႈၶိုင်သၢင်ႈလွင်ႈၵူၼ်းဝၢၼ်ႈၵူၼ်းမိူင်း ၺႃးပူၼ်ႉပႅၼ် သုၼ်ႇလႆႈၵူၼ်း၊ ထုၵ်ႇႁုပ်ႈယိုတ်းတီႈလိၼ် ၸိူဝ်းၼႆႉ။ ၾၢႆႇၼိုင်ႈၵေႃႈ မိူဝ်ႈၵူၼ်းၸၢဝ်းၶိူဝ်းဢမႄႊရိၵၼ်ႊ ၵျွၼ်ႊ ၿီႊလဵၼ်ႊယဵတ်ႊထေႃႊ၊ မႃးလၵ်ႉၶဝ်ႈႁိူၼ်း ၼၢင်းဢွင်ႇသၢၼ်းၸုၵျီႇသေ မႃးႁူပ်ႉမၼ်းၼၢင်း၊ ၽွင်းမၼ်းၼၢင်းထုၵ်ႇၵုမ်းၶင်ၵိုၵ်းႁိူၼ်းၼၼ်ႉၵေႃႈ တေႃႇၶိၼ်ႇမူဝ်းမူဝ်းၼႆႉ ယၢမ်ႈၵႂႃႇပဵၼ်ၽူႈတၢင်ၼႃႈ ၶွင်ၼၢင်းဢွင်ႇသၢၼ်းၸုၵျီႇသေ လႆႈႁဵတ်းပၼ်ၽူႈၵေႃႉႁူႉႁၼ်ၸွမ်း- ၼႆယဝ်ႉ ။


ဢူးတိၼ်ႇမွင်ႇတူဝ်း ဢၼ်ပဵၼ်ႁူဝ်ပဝ်ႈ NLD ၸႄႈတွၼ်ႈတူၼ်ႈတီး ၵေႃႈတေႃႈၼင်ႇၼၼ်။ ယွၼ်ႉပိူဝ်ႈ ၸုၵ်းၾၢႆႇ NLD မႃးလႄႈ လႆႈထုၵ်ႇတူတ်ႈတၢမ်ႇၶွၵ်ႈ ဢၼ်လူင်ပွင်ၸိုင်ႈသိုၵ်းၶဝ် ဝၢင်းပၼ်လူးၵွၼ်ႇ။ မိူဝ်ႈလဵဝ်ၼႆႉၵေႃႈ လႆႈတၢင်းၵမ်ႉထႅမ်တီႈၵူၼ်းမိူင်းယူႇ၊ ၵွပ်ႈဝႃႈယၢမ်ႈၸွႆႈထႅမ်ပၼ်ၵူၼ်းမိူင်း ၸိူဝ်းထုၵ်ႇ ႁုပ်ႈယိုတ်းတီႈလိၼ်၊ လွင်ႈထုၵ်ႇပူၼ်ႉပႅၼ်သုၼ်ႇလႆႈၵူၼ်းၸိူဝ်းၼႆႉ လၢႆၸိူဝ်ႉလၢႆပိူင်- ၼႆယဝ်ႉ ။