ၸဝ်ႈၼႃႈတီႈပလိၵ်ႈ ၽူႈၵွၼ်းၸႄႈတွၼ်ႈၵဵင်းမႆႇ ၸီႉသင်ႇ ၵွင်တပ်ႉပလိၵ်ႈလူင်းၵူတ်ႇထတ်းတီႉ ၺွပ်း ၸုမ်းသမူရႆး ၸိူဝ်းႁွၼ်ႈထဝ်ႇႁဵတ်းႁၢႆႉ ၼႂ်းၵဵင်းမႆႇ ယၢမ်းၵၢင်ၶမ်ႈၵၢင်ၶိုၼ်းလႄႈ  ႁဵတ်းႁႂ်ႈ ပီႈၼွင်ႉ တႆးယၢၼ်မိူင်း ႁုပ်ႉတၢင်းယၢပ်ႇၽိုတ်ႇ ။

Photo by เชียงใหม่ นิวส์

ဝၼ်းတီႈ 07/11/2016 ယၢမ်းၵၢင်ၶိုၼ်း 09:00 မူင်း ၸဝ်ႈၼႃႈတီႈၾၢႆႇတပ်ႉပလိၵ်ႈ ၶွၼ်ႈၵၼ် တီႈၽၵ်းတူတႃႈၽႄး ၶူးမိူင်းၵဵင်းမႆႇ ၸႄႈတွၼ်ႈ ၵဵင်းမႆႇသေ ၸတ်းထႅဝ်လူင်းၵူတ်ႇ ထတ်း ၼႂ်းဝဵင်းၵဵင်းမႆႇ၊ ဝဵင်းႁၢင်ၻူင်း။ ၼင်ႇႁိုဝ် ၵၢၼ်ႁဵတ်းႁၢႆႉၽိတ်းၽႅၵ်ႇၵၼ် တေလူတ်းလူင်းလႄႈ တႃႇဝၢၼ်ႈမိူင်းၼိမ်သဝ်း ၵတ်းယဵၼ်ၵႂႃႇ ဝႃႈၼႆ ။


ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် ပၼ်ပိုၼ်ႉႁူႉႁႅင်းၵၢၼ်ယၢၼ်မိူင်း FM 99.00 MHz လၢတ်ႈဝႃႈ “ မိူဝ်ႈဝၼ်းတီႈ 7 ၼၼ်ႉ ယူႇတီႈၸဝ်ႈၼႃႈတီႈ ၽူႈၵွၼ်းၸႄႈတွၼ်ႈၵဵင်းမႆႇ ႁွင်ႉႁဝ်း ၵႂႃႇႁူပ်ႉထူပ်းသေ ဢုပ်ႇလၢတ်ႈ လွင်ႈပၼ်ႁႃ ၸုမ်းၵူၼ်းၼုမ်ႇတႆး ၸိူဝ်းႁွၼ်ႈထဝ်ႇႁဵတ်းႁၢႆႉ ၼႂ်းၵဵင်းမႆႇၸိူဝ်းၼၼ်ႉ တေႁဵတ်းႁိုဝ် ၵႄႈၶႆပၼ်ႁႃ။ ၵူၺ်းၵႃႈ တေႃႈလဵဝ်ၼႆႉ မႅၼ်ႈၽွင်း ၸဝ်ႈၼႃႈတီႈပလိၵ်ႈၶဝ် တေလမ်းၶႆႈငိူၼ်ႈၵူၼ်းၸိူဝ်းႁႃႁဵတ်းႁၢႆႉပိူၼ်ႈၼႂ်းၵဵင်းမႆႇ။ တေႃႈလဵဝ် ပိူၼ်ႈထၢင်ႇဝႃႈ ပဵၼ်ၸၢႆးၼႆႉ ၸၢႆးၼၼ်ႉ ၵူၺ်းၵႃႈ ပႆႇႁၼ် မႅၼ်ႈတူဝ် ၵူၼ်းႁဵတ်းမၼ်း၊ ၼင်ႇႁိုဝ် တေႁၼ်တူဝ်ၵူၼ်းႁဵတ်းႁၢႆႉၼၼ်ႉ ၸဝ်ႈၼႃႈတီႈၶဝ် တေလမ်းၸွမ်း သူင်ႇၽူႈၸွပ်ႇၶၢဝ်ႇၸွမ်း”ဝႃႈၼႆ ။


ၵူၺ်းၵႃႈ ၶႂ်ႈၾၢၵ်ႇတွၼ်ႈထိုင် ၸွမ်းထႅင်ႈဢၼ်ၼိုင်ႈတႄႉၵေႃႈ လွင်ႈပီႈၼွင်ႉႁႅင်းၵၢၼ်တႆးႁဝ်း ၸိူဝ်းယူႇၸွမ်းၶႅမ်ႉ(Camp) ၵေႃႇသၢင်ႈႁႃႉ၊ ၸိူဝ်းယူႇသဝ်းၸွမ်းၵၼ် ပဵၼ်မူႇပဵၼ်ၸုမ်းႁႃႉ ၸဵမ်ၸိူဝ်းၼႆႉ ႁႂ်ႈဢွၼ်ၵၼ်ဝႆႉသတိသေၵမ်း ယူႇတီႈၸဝ်ႈၼႃႈတီႈပလိၵ်ႈၶဝ်သေ သင်ၶဝ်ထၢင်ႇထိူမ်တီႈလႂ် တေၶဝ်ႈၵူတ်ႇထတ်း ၵႂၢတ်ႇလၢင်ႉ၊ ၸွမ်းသဵၼ်ႈတႃႈသၢႆတၢင်း လွင်ႈၶပ်းလူတ်ႉၶပ်းၵႃး ၸဵမ်ၸိူဝ်းၼႆႉ ႁႂ်ႈဢွၼ်ၵၼ်သႂ်ႇမၢၵ်ႇႁူဝ်ႁႄႉၽေး၊ ႁႂ်ႈပႃးဝတ်းဝႂ် တဵမ်ထူၼ်ႈ ၵူႈၵေႃႉ” ဝႃႈၼႆ ။


ယွၼ်ႉဝႃႈ ထႅင်ႈၾၢႆႇၼိုင်ႈၵေႃႈ သမ်ႉၸမ်လွႆးၵထူင်း(လိူၼ်သိပ်းသွင်မူၼ်း) ၼႆလႄႈ မၼ်းပဵၼ် ပုၼ်ႈၽွၼ်း ၸဝ်ႈၼႃႈတီႈၶဝ် တႃႇတေၵူတ်ႇထတ်းၸတ်းၵၢၼ်လွင်ႈႁူမ်ႇလူမ်ႈ ၽွင်းၵူၼ်းၼွၵ်ႈမိူင်း မႃးဢႅဝ်ႇၼမ် တႄႇဢဝ်လိူၼ် ၼူဝ်ႊဝႅမ်ႊၿိူဝ်ႊထိုင် လိူၼ်ၻီႊသႅမ်ႊၿိူဝ်ႊ ဝႃႈၼႆ။ ထႅင်ႈၾၢႆႇၼိုင်ႈၵေႃႈ မႅၼ်ႈၽွင်းၵူၼ်းမိူင်းထႆး မွင်ၸႂ်ၸွမ်းၸဝ်ႈၸွမ်ထႆးၼွၼ်းၽႄးၵႂႃႇၵေႃႈပိူင်ၼိုင်ႈ။ ၼင်ႇႁိုဝ် ဝၢၼ်ႈမိူင်းပေႃးတေၵတ်းယဵၼ် ၼိမ်သဝ်းၼၼ်ႉ ၸဝ်ႈၼႃႈတီႈ ပလိၵ်ႈၶဝ် တေၵႂၢတ်ႇလၢင်ႉ ႁၢဝ်ႈႁၢဝ်ႈႁႅင်းႁႅင်း ဝႃႈၼႆ ။


ပူၼ်ႉမႃး ဝၼ်းတီႈ 06/11/2016 ယၢမ်းၵၢင်ၶိုၼ်းၼၼ်ႉ ယူႇတီႈၸုမ်းၵူၼ်းၼုမ်ႇ ဢွၼ်ၵၼ်ၶီႇ လူတ်ႉၶိူင်ႈသေ ႁွၼ်ႈထဝ်ႇ ၸူၼ်ဢဝ် ငိုၼ်းတင်းၾူၼ်း(မိုဝ်းထိုဝ်) တီႈၵူၼ်း ၶၢႆလုၵ်ႈ ၸိၼ်ႉ (ၼိူဝ်ႉၵွၼ်ႈ)ၶူဝ်ႈ တီႈၼိူဝ်သဵၼ်ႈတၢင်း ႁၢင်ၻူင်း-သၼ်ပႃႇတွင်း ဝႃႈၼႆ ။