ဢိင်ၼိူဝ်ပဵၼ် ပၢင်ၵုမ်ၶွၼ်ႊၾရႅၼ်ႊ ၵဵဝ်ႇၵပ်းၾိင်ႈထုင်းၵထိၼ် ထေရဝႃတ ၵူႈမိူင်းမိူင်း ဢၼ်ၸတ်းႁဵတ်း တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း မိူဝ်ႈဝၼ်းတီႈ 5-6/11/2016 ၼႆႉသေ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်တူၼ်ၶူးၸဝ်ႈမႁေႃႇ ဝႆႉၼင်ႇၼႆ ။

ထၢမ်-သၢင်ႇၵၢၼ်းၵထိၼ်ၼႆႉ ပိုၼ်းၵႅပ်ႈမၼ်းမီးၸိူင်ႉႁိုဝ်ၽွင်ႈၶႃႈ? ။


တွပ်ႇ- သၢင်ႇၵၢၼ်းၵထိၼ်ၼႆႉ ပိုၼ်းၵႅပ်ႈမၼ်း မီးၵႂႃႇၶၢဝ်းတၢင်းႁိုင်မွၵ်ႈ 2,603 ပီၸိူဝ်းၼႆႉ။ မိူဝ်ႈပၢၼ်ၽြႃးပဵၼ်ၸဝ်ႈၼၼ်ႉ မီးၸဝ်ႈရႁၼ်းၶဝ် 30 တူၼ်၊ ၶဝ်ၸဝ်ႈလုၵ်ႉမိူင်းသႃၵေၸသေ တႃႇတေမႃး ဝႆႈသႃၽြႃးပဵၼ်ၸဝ်ႈ တီႈမိူင်းသႃဝတ်ႉထိ။ ၵူၺ်းၵႃႈ မိူဝ်ႈၽွင်းၼၼ်ႉ မၼ်းဢမ်ႇမိူၼ်ၸိူင်ႉၼင်ႇမိူဝ်ႈလဵဝ်၊ ၵၢပ်ႈပၢၼ်လူတ်ႉၵႃးလူတ်ႉၶိူင်ႈ ဢမ်ႇမီး။ ယွၼ်ႉၼၼ် ၸဝ်ႈၶဝ်လႆႈပႆၶၢဝ်းတၢင်းမႃး၊ ၽွင်းပႆၶၢဝ်းတၢင်းမႃးၼၼ်ႉ ယွၼ်ႉပိူဝ်ႈဝႃႈလႆႈပႆမႃးၶၢဝ်းယၢဝ်းၼႃႇလႄႈ သမ်ႉမႃးၺႃးမိူဝ်ႈတႃႇတေဢဝ်ဝႃႇသႃ ။


သင်ၶၶဝ်ၸဝ်ႈၼႆႉ ပေႃးဝႃႈပဵၼ်ဝၼ်းလိူၼ် 8 မူၼ်းယဝ်ႉ၊ တႄႇဢဝ်လိူၼ် 8 လွင်ႈၼိုင်ႈၶမ်ႈၼၼ်ႉ တေလႆႈဢဝ်ဝႃႇသႃၵူႈတူၼ်ၵူႈပႃး။ ၸဝ်ႈဢၼ်ယူႇၼိူဝ်ၵၢင်ႁၢဝ်ၵေႃႈလီ၊ ယူႇၼိူဝ်လိၼ်ၵေႃႈလီ၊ ယူႇတီႈၼႂ်း လုမ်ႈၾႃႉမိူင်းလႂ်ဝၢၼ်ႈလႂ်ၵေႃႈလီ တေလႆႈဢဝ်ဝႃႇသႃ။  ဢဝ်ဝႃႇဢၼ်ဝႃႈၼၼ်ႉ ပွင်ႇဝႃႈယူႇၶၢဝ်းတၢင်း ၼႂ်းၶၢဝ်းႁိုဝ်ႉၶၢဝ်းၾူၼ် 3 လိူၼ်၊ ဢမ်ႇၵႂႃႇတၢင်းလႂ်သေႁဵတ်းၵၢၼ်သႃသၼႃ၊ ၼၼ်ႉႁွင်ႉဝႃႈဢဝ်ဝႃႇသႃ။ ႁဵတ်းၼႆသေလႆႈဢဝ်ဝႃႇသႃ ။


ၽိူဝ်ႇဢဝ်ဝႃႇသႃ ဢွၵ်ႇဝႃႇသႃယဝ်ႉ ၶဝ်ၸဝ်ႈသိုပ်ႇလုၵ်ႉဢဝ်တီႈ ဢၼ်ဢဝ်ဝႃႇသႃၼၼ်ႉသေ သိုပ်ႇၶၢဝ်းတၢင်း မႃးၸူးၽြႃးပဵၼ်ၸဝ်ႈ။ မိူဝ်ႈမႃးၸွမ်းတၢင်းၼၼ်ႉ ပဵၼ်ဝၢႆးဢွၵ်ႇဝႃႇ လိူၼ် 11 လွင်ႈၵူၺ်းလႄႈၾူၼ်ၵေႃႈ ဢမ်ႇပႆႇဝၢႆး။ ယွၼ်ႉၾူၼ်ပႆႇဝၢႆးလႄႈၾူၼ်ၵေႃႈတူၵ်းၼမ်၊ ၶဝ်ၸဝ်ႈၵေႃႈလႆႈပႆၶၢဝ်းတၢင်း ပဵၼ်ဢုင်ပဵၼ်ၵူမ်ႇ ယမ်းတင်းၾူၼ်သေမႃး ။


ၵူၺ်းၵႃႈ ၽွင်းၼၼ်ႉ သၢင်ႇၵၢၼ်းၼႆႉ ၽြႃးပဵၼ်ၸဝ်ႈပႆႇလၢတ်ႈဝႃႈ ၼိုင်ႈတူၼ်ၼႆႉ ဢဝ် 1 ၸုမ်ႇၵေႃႈလႆႈ 2 ၸုမ်ႇၵေႃႈလႆႈ။ ပႆႇမီးဝႃႈၸိူင်ႉၼႆလႄႈ ၸဝ်ႈရႁၼ်းၶဝ်ၵေႃႈ ဢမ်ႇႁတ်းဢဝ်သၢင်ႇၵၢၼ်းဢၼ်လိူဝ်၊ တေႃႉတႄႉဝႃႈၼုင်ႈသၢင်ႇၵၢၼ်း ဢၼ်ၸပ်းတူဝ်ၸပ်းၶိင်းပိူင်လဵဝ်ၵူၺ်း ။


ႁဵတ်းၼႆသေ ၽိူဝ်ႇထိုင်မႃးတမ်ႈတီႈၽြႃးပဵၼ်ၸဝ်ႈယဝ်ႉ ၽြႃးပဵၼ်ၸဝ်ႈ ၸင်ႇတွင်ႈထၢမ်ၶဝ်ၸဝ်ႈ- “ၸဝ်ႈႁဝ်းၶဝ် ယူႇလီသုင်းဝၢၼ်ယူႇႁႃႉ၊ မီးတၢင်းယၢပ်ႇၽိုတ်ႇၸိူင်ႉႁိုဝ်”။ ၶဝ်ၸဝ်ႈတွပ်ႇဝႃႈ ဢေႃႈယူႇလီယူႇၶႃႈ၊ တၢင်းယၢပ်ႇၽိုတ်ႇတႄႉ ၸိူင်ႉၼင်ႇပုတ်ႉထမုၼ်သုင်ၶမ်းၽြႃးပဵၼ်ၸဝ်ႈႁဝ်း ႁၼ်ယူႇၼႆႉၶႃႈယဝ်ႉ၊ ၶႃႈပႄးၶဝ်ၼႆႉ ယွၼ်ႉပိူဝ်ႈဝႃႈၽြႃးပဵၼ်ၸဝ်ႈႁဝ်းဝႃႈ တေလႆႈမီးသၢင်ႇၵၢၼ်းၽိုၼ်လဵဝ်ၵူၺ်းၼႆလႄႈ ၶႃႈပႄးၶဝ်ၵေႃႈမီးၽိုၼ်လဵဝ်ၼႆႉသေ ၵူမ်ႇၵေႃႈလႆႈၼုင်ႈဢၼ်ၼႆႉ၊ ယမ်းၵေႃႈလႆႈၼုင်ႈဢၼ်ၼႆႉ၊ ႁိူဝ်ႇလႆၶႆးယွႆႉၵေႃႈ ယဝ်ႉဢၼ်ၼႆႉၵူၺ်းၶႃႈဢေႃႈ။ လၢတ်ႈၸိူင်ႉၼႆလႄႈ ပွင်ႇဝႃႈမီးတၢင်းယၢပ်ႇၽိုတ်ႇလွင်ႈၼုင်ႈဝႆ ။


ၽြႃးပဵၼ်ၸဝ်ႈၸင်ႇဝႃႈ ပေႃးၸိူင်ႉၼႆ ၼင်ႇႁိုဝ်သင်ၶရႁၼ်းၶဝ်ၸဝ်ႈပေႃးတေသၢၵ်ႈသႃႇ လူမ်ၸႂ်ၶႅမ်ႉလႅပ်ႈ လီငၢမ်းၼၼ်ႉ တႃႇၼုင်ႈတႃႇဝႆလႄႈသင်၊ တႃႇဢွၵ်ႇၶၢဝ်းတၢင်းၸိူဝ်းၼၼ်ႉလႄႈသင်၊ တႃႇယူသဝ်းႁဵတ်းသၢင်ႈ ၵၢၼ်သႃသၼႃ ငၢႆႈလူမ်ၸႂ်ၼၼ်ႉလႄႈသင်၊ ႁဝ်းၽြႃးပဵၼ်ၸဝ်ႈဢၼုၺၢတ်ႈပၼ် ႁႂ်ႈၸိူဝ်းပဵၼ်ၸဝ်ႈသင်ၶ ၶဝ်ၸဝ်ႈ၊ ရႁၼ်းၶဝ်ၸဝ်ႈဢွၼ်ၵၼ် သိူဝ်ႇၵထိၼ်ၼႃႈ။ တႄႇမႃးၸိူင်ႉၼၼ်သေ မီးလွင်ႈသိူဝ်ႇၵထိၼ်မႃး ။


ၵမ်းၼႆႉ လွင်ႈသိူဝ်ႇၵထိၼ်ႇဢၼ်ဝႃႈၼႆႉ ႁဵတ်းႁိုဝ်သိူဝ်ႇ၊ ဢဝ်သၢင်ႇၵၢၼ်းသိူဝ်ႇႁႃႉ၊ ဢမ်ႇၼၼ်ၵေႃႈ တၵ်ႉၵႃႇၶဝ်ဢဝ်သၢင်ႇၵၢၼ်းသေ မိူဝ်းလူႇတၢၼ်းတီႈဝတ်ႉၵျွင်းၼၼ်ႉ ပွင်ႇဝႃႈသိူဝ်ႇၵထိၼ်ယဝ်ႉႁႃႉ ၼႆၵေႃႈမီးၵႂၢမ်းထၢမ်။ ႁဝ်းတေလႆႈပွင်ႇၸႂ်ဝႃႈ လွင်ႈသိူဝ်ႇၵထိၼ်ၼႆႉ မၼ်းပွင်ႇဝႃႈဢဝ်ၽွၼ်းလီၵထိၼ်ၼႆႉ ႁႂ်ႈမၼ်းသိူဝ်ႇၵႂၢင်ႈၵႂၢင်ႈလႆႈ ။


ၽွၼ်းလီၵထိၼ်ၼႆႉ ႁႂ်ႈမၼ်းသိူဝ်ႇပၼ်သင်ၶၶဝ်ၸဝ်ႈ ဢၼ်ပဵၼ်သတ်ႉထႃးမၼ်းယဝ်ႉဢမ်ႇၵႃး ပေႃးဝႃႈၸဝ်ႈဢၼ်ႁပ်ႉလႆႈၽွၼ်းလီၵထိၼ်ၼႆ တႃႇၶၢဝ်းတၢင်း 5 လိူၼ်ၼႆႉ ပေႃးဝႃႈဢွၵ်ႇၶၢဝ်းတၢင်းၼႆ ဢၼ်ပဵၼ်သၢင်ႇၵၢၼ်း ဢုၵူၵ်ႈ ၼၼ်ႉ ဢမ်ႇပႃးၵႂႃႇၵေႃႈလႆႈ။ ဢမ်ႇၼၼ်ၵေႃႈ ပေႃးဝႃႈဢမ်ႇသၢင်ႇထုၵ်ႇ ပိူၼ်ႈပၢင်းၵၢပ်ႈသွမ်း ဢမ်ႇမႅၼ်ႈလွၵ်းလၢႆးမၼ်းၼႆၵေႃႈ သုင်းလႆႈယူႇ၊ မၢင်ပွၵ်ႈပေႃးဢမ်ႇလႆႈႁပ်ႉ ၽွၼ်းလီၵထိၼ် ဢမ်ႇမီးလွင်ႈသိူဝ်ႇၵထိၼ်ၼႆႉ မၼ်းမီးတၢင်းၽိတ်း တႃႇၸဝ်ႈသင်ၶရႁၼ်းၶဝ် ၸဵမ်ၸိူဝ်းၼႆႉၵႂႃႇ၊ မီးလွင်ႈပိုၼ်းမၼ်းၸိူင်ႉၼႆ ။


ၽွၼ်းလီမၼ်းတႄႉ မၼ်းပွင်ႇဝႃႈဢၼ်သိူဝ်ႇၵထိၼ်ၼႆႉ ၽြႃးပဵၼ်ၸဝ်ႈပိင်းၺၢတ်ႈဝႆႉ တႃႇၸဝ်ႈရႁၼ်းၶဝ် တေလႆႈၵျၢင်ႉတိုဝ်းၵမ် သိၵ်ႈၶႃႇပုၵ်ႈ 227 ။ ၵူၺ်းၵႃႈ ပေႃးဝႃႈလႆႈၽွၼ်းလီၵထိၼ်၊ လႆႈသိူဝ်ႇၵထိၼ်ၼႆႉ တႃႇ 5 ဢၼ်ၼႆႉ ဢမ်ႇတၢပ်ႈတိုဝ်းၵမ်ၵေႃႈလႆႈ။ ပွင်ႇဝႃႈၽြႃးပဵၼ်ၸဝ်ႈ ပၼ်ၻီႇမူဝ်ႊၶရေႊၸီႊၸဝ်ႈသင်ၶရႁၼ်းၶဝ် 5 ဢၼ်ယဝ်ႉ ။


(ၶႅၼ်းတေႃႈပႂ်ႉသိုပ်ႇဢၢၼ်ႇ လွင်ႈပၢင်ၵုမ်ၶွၼ်ႊၾရႅၼ်ႊ ၵဵဝ်ႇၵပ်းၾိင်ႈထုင်းၵထိၼ် ထေရဝႃတ ၵူႈမိူင်းမိူင်း တွၼ်ႈၼႃႈ 2)