ႁူဝ်ပဝ်ႈပႃႇတီႇသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်ၵုမ် ပႃႇတီႇၵၢၼ်မိူင်းၸၢဝ်းၶိူဝ်း ၼႂ်းၸိုင်ႈတႆး ပွၵ်ႈၵမ်းတီႈ 2 တီႈဝဵင်းလူင်တူၼ်ႈတီး။ လႆႈၸႂ်ၵၼ်ၶွတ်ႇၽွတ်ႈ ပႃႇတီႇႁူမ်ႈတုမ်ၵၢၼ်မိူင်းၸၢဝ်းၶိူဝ်း ၼႂ်းၸိုင်ႈတႆး (LSSEP) ။

မိူဝ်ႈဝၼ်းတီႈ 3-4/11/2016 ၼႆႉ ယူႇတီႈတီႇမူဝ်ႇၶရႅတ်ႉတိၵ်ႉပႃႇတီႇ ၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ (SNDP) ဢၼ်ႁူဝ်ပဝ်ႈလုင်းၸၢႆးဢၢႆႈပဝ်း ဢွၼ်ႁူဝ်ၼမ်းၼႃႈသေ ၸတ်းႁဵတ်းပၢင်ၵုမ်ပႃႇတီႇၵၢၼ်မိူင်း ၸၢဝ်းၶိူဝ်းၼႂ်းၸိုင်ႈတႆး ပွၵ်ႈၵမ်း 2 တီႈႁူင်းႁႅမ်း ၼူဝ်ႊဝႅမ်ႊၿိူဝ်ႊ ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ။


ပၢင်ၵုမ်ပွၵ်ႈၵမ်း 2 ၼႆႉ ၸွမ်းၼင်ႇဢၼ်လႆႈႁွင်ႉမွၵ်ႇထိုင်ဝႆႉၼၼ်ႉ တင်းမူတ်းမီးပႃႇတီႇၼႂ်းမိူင်းတႆး 18 ပႃႇတီႇ၊ ၵူၺ်းၵႃႈ ဢၼ်မႃးၶဝ်ႈႁူမ်ႈမီး 10 ပႃႇတီႇ။ မိူဝ်ႈပၢင်ၵုမ်ပွၵ်ႈၵမ်း 1 ၼၼ်ႉ ပႃႇတီႇၼႂ်းမိူင်းတႆး 18 ပႃႇတီႇၼႆႉ မႃးၶဝ်ႈႁူမ်ႈ 13 ပႃႇတီႇ။ ဢၼ်ဢမ်ႇမႃးၶဝ်ႈႁူမ်ႈလုမ်းလုမ်း (ပၢင်ၵုမ်ပွၵ်ႈၵမ်း 1 လႄႈ 2)ၼႆႉ မီး 5 ပႃႇတီႇ-ၼႆယဝ်ႉ ။


ယူႇတီႈႁဝ်းၶႃႈသေ မုင်ႈမွင်းဝႃႈ 5 ပႃႇတီႇၸိူဝ်းၼၼ်ႉၵေႃႈ တေၶဝ်ႈမႃးယူႇ၊ မႃးမိူဝ်ႈလႂ်ၵေႃႈလႆႈ၊ ႁဝ်းၶႃႈယိၼ်းလီႁပ်ႉတွၼ်ႈယူႇ- ႁူဝ်ႈပဝ်ႈပႃႇတီႇသိူဝ်ၽိူၵ်ႇ လုင်းၸၢႆးဢၢႆႈပဝ်း လၢတ်ႈ ။


ယိူင်းဢၢၼ်း ဢၼ်ၶွတ်ႇၽွတ်ႈ ပႃႇတီႇႁူမ်ႈတုမ်ၵၢၼ်မိူင်း ၸၢဝ်းၶိူဝ်းၸိုင်ႈတႆးၼႆႉ ပေႃးႁဵတ်းပၢင်ၵုမ်ၵၢၼ်မိူင်း ၵၼ်မႃးၵေႃႈလီ၊ ပေႃးႁဵတ်းပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် ၵမ်းတီႈ 2 ၵေႃႈလီ၊ မၼ်းတေၸၢင်ႈ ၵေႃႇသၢင်ႈလႆႈ လွင်ႈၽွမ်ႉႁူမ်ႈ။ ယိူင်းဢၢၼ်းၸိူင်ႉၼႆသေ ၶွတ်ႇၽွတ်ႈမႃး- ၸၢႆးဢၢႆႈပဝ်း လၢတ်ႈ ။


ပေႃးၶွတ်ႇၽွတ်ႈၸုမ်းၼႆႉယဝ်ႉၵႂႃႇယဝ်ႉ ပေႃးဝႃႈလိူၼ်ၼႆႉသဵင်ႈၼႆႉ တေႁဵတ်းပၢင်ဢုပ်ႇဢူဝ်းၸၼ်ႉ ၵၢၼ်မိူင်းၵၼ်၊ ဢုပ်ႇဢူဝ်းၵိူဝ်းၵုမ်ၵၼ်။ ပေႃးပၢင်ၵုမ်ၵၢၼ်မိူင်းယဝ်ႉယဝ်ႉၵေႃႈ ႁဝ်းၶႃႈတေလႆႈ ၽွမ်ႉသဵင်ပဵင်းပၢၵ်ႇၵၼ်။ ပေႃးဝႃႈ ပဵၼ်ပၢင်ၵုမ်ၵၢၼ်မိူင်းၵၼ်မႃးယဝ်ႉ၊ ပေႃးဝႃႈလိူၼ်ၾႅပ်ႊၿိဝ်ႊရီႊ (2017)မႃး ႁဵတ်းသၢင်ႈပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းတီႈ 2 တီႈၼေႇပျီႇတေႃႇမႃးၸိုင် တႃႇတေပဵၼ်ပၢၵ်ႇလဵဝ် သဵင်လဵဝ်ၵၼ်ၼႆႉ မၼ်းလမ်ႇလွင်ႈတႃႇမိူင်းတႆးႁဝ်း၊ ၵွပ်ႈၼၼ်လႄႈ ႁဝ်းၶႃႈထုၵ်ႇလႆႈ ဢုပ်ႇၵုမ်ၵၼ်ဢွၼ်တၢင်း ။


ၸုမ်းတူင်ႇဝူင်းၵူၼ်း၊ ပႃႇတီႇၵၢၼ်မိူင်း ပႃးၸဵမ်ၽူႈတႅၼ်းသိုၵ်း ၼႂ်းသၽႃးၸိူဝ်းၼႆႉ တၵ်းတေလႆႈၶဝ်ႈပႃး မႃးၸွမ်း။ ၵွပ်ႈၼၼ် မၼ်းပဵၼ်ၶၢဝ်းလမ်ႇလွင်ႈ တႃႇၸိုင်ႈတႆး။ ၵွပ်ႈဝႃႈၼႂ်းၸိုင်ႈတႆးၼႆႉ ပႃႇတီႇၸၢဝ်းၶိူဝ်း ၵေႃႈၼမ်၊ ဢၼ်ႁဝ်းၶႃႈၶွတ်ႇၽွတ်ႈ ပႃႇတီႇႁူမ်ႈတုမ်ၵၢၼ်မိူင်းၸၢဝ်းၶိူဝ်းၸိုင်ႈတႆးၼႆႉၵေႃႈ ယိူင်းဢၢၼ်းဢၼ်ၼႆႉယဝ်ႉ။ ပေႃးဝႃႈႁဝ်းပဵၼ် မိူင်းႁူမ်ႈတုမ်ၾႅတ်ႊၻရႄႊ ၻီႇမူဝ်ႇၶရေႇၸီႇမႃးၼႆၸိုင် ႁဝ်းၶႃႈတၵ်းတေလႆႈပဵၼ်ပၢၵ်ႇလဵဝ်သဵင်လဵဝ်ၵၼ်သေ မူၼ်ႉမႄးပိူင်ငဝ်ႈပိုင်းမိူင်း (လၵ်းမိူင်း)ၵႂႃႇ- လုင်းၸၢႆးဢၢႆႈပဝ်း လၢတ်ႈ ။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈပႃႇတီႇၽွမ်ႉသဵင်ပဵင်းပၢၵ်ႇ ၻီႇမူဝ်ႇၶရေႇၸီႇ ၵူဝ်းၵၢင်ႉ၊ ဢူးထုၼ်းၼၢႆႇ ၵေႃႈလၢတ်ႈဝႃႈ- ယူႇတီႈႁဝ်းၶႃႈသေ လႆႈႁူႉယိူင်းဢၢၼ်း ဢၼ်ၶွတ်ႇၽွတ်ႈ ပႃႇတီႇႁူမ်ႈတုမ်ၵၢၼ်မိူင်းၸၢဝ်းၶိူဝ်း ၼႂ်းၸိုင်ႈတႆးၼႆႉယဝ်ႉလႄႈ ယုမ်ႇယမ်ဝႃႈ ႁဝ်းၶႃႈၵေႃႈမီးပုၼ်ႈၽွၼ်း။ ပႃႇတီႇႁဝ်းၶႃႈၵေႃႈ ပဵၼ်ပႃႇတီႇ ဢၼ်ၼိုင်ႈ ဢၼ်ယူႇၼႂ်းမိူင်းတႆး၊ ပဵၼ်ၸၢဝ်းၶိူဝ်းၼႂ်းၸိုင်ႈတႆးဢၼ်ၼိုင်ႈ၊ ပဵၼ်သၢႆၸိူဝ်ႉၶိူဝ်းတႆးဢၼ်ၼိုင်ႈ။ ၵွပ်ႈၼၼ် ပိူဝ်ႈတႃႇၵေႃႇသၢင်ႈလွင်ႈၽွမ်ႉႁူမ်ႈၼႆႉ ႁဝ်းၶႃႈၵေႃႈမီးပုၼ်ႈၽွၼ်း- ဝႃႈၼႆ
။

ၵွပ်ႈၼၼ် ၵဵဝ်ႇၵပ်းၵၢၼ်ဝၢၼ်ႈၵၢၼ်မိူင်းၵေႃႈလီ၊ ၵၢၼ်ၸႄႈမိူင်းၸိုင်ႈတႆးၵေႃႈလီ၊ ပေႃးဝႃႈႁဝ်းၶႃႈႁဵတ်း ႁင်းၵူၺ်းၶေႃၶေႃတႄႉ မၼ်းတေဢမ်ႇပဵၼ်ၵၢၼ် (ဢွင်ႇ)လႆႈ၊ ႁဝ်းၶႃႈတိုၼ်းတေလႆႈၽွမ်ႉသဵင်ပဵင်းပၢၵ်ႇၵၼ် သေႁဵတ်း ၸင်ႇတေပဵၼ်ၵၢၼ်-ဝႃႈၼႆ ။


ပၢင်ၵုမ်ပွၵ်ႈၵမ်းတီႈ 1 ပိူဝ်ႈတႃႇတေၶွတ်ႇၽွတ်ႈ ပႃႇတီႇႁူမ်ႈတုမ်ၵၢၼ်မိူင်းၸၢဝ်းၶိူဝ်း ၼႂ်းၸိုင်ႈတႆး ၸတ်းႁဵတ်း မိူဝ်ႈဝၼ်းတီႈ 29/05/2016 တီႈႁူင်းႁႅမ်းဢေႃႊၶျိတ်ႊ။ မိူဝ်ႈၼၼ်ႉ ၼႂ်း 18 ပႃႇတီႇမႃးၶဝ်ႈႁူမ်ႈ 13 ပႃႇတီႇ။ ထိုင်ပၢင်ၵုမ်ၵမ်းတီႈ 2 ၼႆႉ မႃးၶဝ်ႈႁူမ်ႈ 10 ပႃႇတီႇ၊ ၸတ်းႁဵတ်းတီႈႁူင်းႁႅမ်း ၼူဝ်ႊဝႅမ်ႊၿိူဝ်ႊ ဝဵင်းတူၼ်ႈတီး ဝၼ်းတီႈ 3-4/11/2016 ။