ၵိူတ်ႇၽေး ၾႆးမႆႈၵၢတ်ႇလူင်ဝဵင်းၼမ်ႉလၼ်ႈ ၸိုင်ႈတႆးပွတ်းႁွင်ႇ၊ ၶူဝ်းၶွင်ၼႂ်းၵၢတ်ႇလူႉသုမ်းမူတ်း။ ၸဝ်ႈၶၢႆၶူဝ်းၶွင်ၼႂ်းၵၢတ်ႇ လူႉသုမ်းသၢမ်ပၢၵ်ႇသႅၼ် ၶိုၼ်ႈၼိူဝ် ၵမ်ႈၼမ်။ ႁၢၼ်ႉတေႃႇမိူဝ်ႈလဵဝ် ဢမ်ႇႁူႉတႅၵ်ႇလႅင်းဝႃႈ ယွၼ်ႉသင်လႄႈၾႆးမႆႈ ။

မိူဝ်ႈဝၼ်းတီႈ 06/11/2016 ၶၢဝ်းယၢမ်းမွၵ်ႈ 6 မူင်းပၢႆၵၢင်ၶမ်ႈ၊ ၵိူတ်ႇပိူင်ပဵၼ်ၾႆးမႆႈၵၢတ်ႇလူင် ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ တေႃႇထိုင်ၵၢင်ၶမ်ႈမွၵ်ႈ 7 မူင်းပၢႆၵေႃႈ ဢမ်ႇၶႄၾႆးလႆႈ၊ ႁဵတ်းႁႂ်ႈၾႆးမႆႈၵၢတ်ႇၵႂႃႇပႅတ်ႈတင်းမူတ်း၊ ၵူၺ်းၵႃႈ ၵူၼ်းတႄႉဢမ်ႇဝၢတ်ႇၸဵပ်းသေၵေႃႉ- ၸၢႆးၼွင်ႉ ၵူၼ်းမိူင်းၼမ်ႉလၼ်ႈ လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ၵဵဝ်ႇၵပ်းလွင်ႈၾႆးမႆႈၵၢတ်ႇၼႆႉ ၵူၼ်းၼမ်ႉလၼ်ႈ ၵေႃႉၼိုင်ႈလၢတ်ႈၼႄဝႃႈ- လွင်ႈတၢင်းၾႆးမႆႈၵၢတ်ႇၼႆႉ တေႃႇထိုင်မိူဝ်ႈလဵဝ် ပႆႇလႆႈႁူႉတႅတ်ႈတေႃး၊ မိူဝ်ႈလဵဝ် ၸဝ်ႈၼႃႈတီႈၶဝ်တိုၵ်ႉလူင်းၵူတ်ႇထတ်းယူႇ။ ၵူၺ်းၵႃႈ ၵူၼ်းမိူင်းၼမ်ႉလၼ်ႈ ထၢင်ႇထိူမ်ဝႆႉမီး 2 ပိူင်- 1.ႁၼ်ၾႆးတႄႇမႆႈလုၵ်ႉမႃးတီႈ ႁၢၼ်ႉၶၢႆၶဝ်ႈသွႆးၵၢင်ၵၢတ်ႇ၊ လၢမ်းၵၼ်ဝႃႈ ၶဝ်သႂ်ႇၾႆးထၢၼ်ႇဝႆႉ လပ်းၾႆးဢမ်ႇမွတ်ႇသဵင်ႈလႄႈ ၾႆးလၢမ်းမႆႈ။ 2.ပိူၼ်ႈလၵ်ႉၸုတ်ႇ- ၼႆယဝ်ႉ ။


ၵဵဝ်ႇၵပ်းလွင်ႈ မီးၵူၼ်းလၵ်ႉၸုတ်ႇၼႆႉ ၵူၼ်းမိူင်းၼမ်ႉလၼ်ႈၶဝ်ဝႃႈ- ႁိမ်းႁွမ်းလႄႈၼႂ်းၵၢတ်ႇၼမ်ႉလၼ်ႈ ၸိူဝ်းၼႆႉ မၼ်းမီးၵူၼ်းယွၼ်းၼမ်လိူဝ်ႁႅင်း။ ၵူၼ်းယွၼ်းၸိူဝ်းၼႆႉ ႁႃယွၼ်းသေၸဝ်ႈၶၢႆၶူဝ်းၶွင်ၼႂ်းၵၢတ်ႇ ၶဝ်သမ်ႉ ႁိုတ်းႁၢတ်ႇသႂ်ႇၶဝ်၊ ၶဝ်ၸဵပ်းၸႂ်လႄႈ လၵ်ႉၸုတ်ႇၵေႃႈပဵၼ်လႆႈ။ ၵူၺ်းၵႃႈ ၵမ်ႈၽွင်ႈသမ်ႉဝႃႈ ၾႆးမႆႈပွၵ်ႈၼႆႉ မၼ်းမႆႈဝႆးတႄႉတႄႉ၊ မိူၼ်ၼင်ႇမီးၵူၼ်းဝၢင်းၽႅၼ်သေၸုတ်ႇ၊ ပေႃးမႆႈၵေႃႈ 4-5-6 ႁၢၼ်ႉၼႆႉ မႆႈၵႂႃႇၸွမ်းၵၼ်ဝႆးဝႆးၵမ်းလဵဝ်။ ၸဝ်ႈၶွင်ႁၢၼ်ႉၼႂ်းၵၢတ်ႇၼႆႉ ၼိုင်ႈႁၢၼ်ႉလႂ်လူႉသုမ်းၵႃႈၶၼ်ငိုၼ်း 300 သႅၼ်ၶိုၼ်ႈၼိူဝ်ၵမ်ႈၼမ်- ဝႃႈၼႆ ။


ၵဵဝ်ႇၵပ်းလွင်ႈၵၢတ်ႇ ဝဵင်းၼမ်ႉလၼ်ႈၼႆႉ ၵူၼ်းၼမ်ႉလၼ်ႈၵေႃႉၼိုင်ႈ လၢတ်ႈၼႄဝႃႈ- ၵၢတ်ႇၼမ်ႉလၼ်ႈၼႆႉ ပေႃးထိုင်ၶၢဝ်း 6 မူင်းၵၢင်ၶမ်ႈ ပိူၼ်ႈပိၵ်ႉဢိုတ်းၵၢတ်ႇယဝ်ႉ၊ ဢမ်ႇပၼ်ၵူၼ်းၶဝ်ႈယဝ်ႉ။ ၾႆးၾႃႉၵေႃႈ ယင်းပႆႇပၼ်ၶဝ်ႈ။ ၵွပ်ႈၼၼ် ၾႆးမႆႈပွၵ်ႈၼႆႉ တိုၼ်းဢမ်ႇၸႂ်ႈၾႆးၾႃႉသျွတ်ႉ ။


ၵၢတ်ႇလူင်ဝဵင်းၼမ်ႉလၼ်ႈၼႆႉ ႁွင်ႉဝႃႈပွၵ်ႉၵၢတ်ႇ၊ မီးႁိမ်းၼမ်ႉလိၼ်းၶၢင်။ ၾၢႆႇတူၵ်းၵၢတ်ႇ မီးဝၢၼ်ႈလူင်၊ ၾၢႆႇဢွၵ်ႇၵၢတ်ႇ မီးၼမ်ႉလိၼ်းၶၢင်၊ ၾၢႆႇႁွင်ႇ မီးပွၵ်ႉႁွင်ႇ၊ ၾၢႆႇၸၢၼ်း မီးပွၵ်ႉၸၢၼ်း- ၼႆယဝ်ႉ။