ယူႇတီႈၸွမ်ၽွင်းလူင် တိူင်းတႃႈၵုင်ႈ ၼႂ်းလူင်ပွင်ၸိုင်ႈ NLD ၵေႃႉၼိုင်ႈ၊ သႂ်ႇယၢမ်းမူင်း (မူင်းမိုဝ်း) ဢၼ်ၵႃႈၶၼ်မီးၵိုင်ႇမွၵ်ႈ ၼိုင်ႈသႅၼ်ၻေႃႊလိူဝ်ႊ၊ ဢၼ်ပဵၼ်ယၢမ်းမူင်း ၽူႈႁဵတ်းၵၢၼ်ပၢႆးမၢၵ်ႈမီးၵေႃႉၼိုင်ႈ ယိုၼ်ႈတွၼ်ႈပၼ်ၼၼ်ႉသေ မီးၵၢၼ်တႅမ်ႈဢွၵ်ႇပွင်ႈၵႂၢမ်း ၼႂ်းသိုဝ်ႇၶၢဝ်ႇ Elevene လႄႈ ႁဵတ်းႁႂ်ႈ ၼႂ်းဝူင်ႈၵၢင်ပႃႇတီႇ NLD လႄႈ Eleven မီးပၼ်ႁႃၵၼ်မႃး ။

ၼႂ်းသိုဝ်ႇၶၢဝ်ႇ Eleven တႅမ်ႈဢွၵ်ႇၵႂႃႇၼႂ်းၽိုၼ်ၶၢဝ်ႇၶဝ် ဢၼ်ဢွၵ်ႇၸွမ်းဝူင်ႈ တီႈတွၼ်ႈပွင်ႈၵႂၢမ်းဝႃႈ- ၸွမ်ၽွင်းလူင်ၼၼ်ႉ လႆႈၵိၼ်ငိုၼ်းလိူၼ် မွၵ်ႈလိူၼ်သွင်ႁဵင်ႁႃႈပၢၵ်ႇၻေႃႊလိူဝ်ႊ ($2,500)ၵူၺ်း၊ သမ်ႉမႃးတိုဝ်းဝႆႉၼႃႇရီႇဢၼ်ၵႃႈၶၼ်ယႂ်ႇ မီးၵႃႈၶၼ်သုင်ထိုင်ၼိုင်ႈသႅၼ်ၻေႃႊလိူဝ်ႊ။ ၼွၵ်ႈသေၼၼ်ႉ တႅမ်ႈဝႆႉလွင်ႈတၢင်းၸိူဝ်းၼႆႉလၢႆၸိူဝ်ႉလၢႆပိူင်၊ လွင်ႈၼႆႉႁဵတ်းႁႂ်ႈ ၾၢႆႇပႃႇတီႇ NLD ဢမ်ႇႁၢၼ်ႉၸႂ်သေ လုၵ်ႉတွပ်ႇထဵင်ၵၼ်မႃး၊ ႁဵတ်းႁႂ်ႈပဵၼ်ပၼ်ႁႃၵၼ်မႃး ။


ၵဵဝ်ႇၵပ်းလွင်ႈၼႆႉ ယူႇတီႈငဝ်ႈငုၼ်းပႃႇတီႇၸိူဝ်ႉၸၢတ်ႈ NLD သေတႅမ်ႈလိၵ်ႈထိုင်ႁွင်ႈၵၢၼ်သိုဝ်ႇၶၢဝ်ႇ Eleven မိူဝ်ႈဝၼ်းတီႈ 7 လိူၼ်ၼူဝ်ႊဝႅမ်ႊၿိူဝ်ႊ။ ၵူၺ်းၵႃႈယူႇတီႈၸုမ်းသိုဝ်ႇၶၢဝ်ႇ Eleven ဢမ်ႇတွပ်ႇသင်မႃးလႄႈ တေဢဝ်ၸွမ်းပၵ်းပိူင်တိုဝ်းၵမ်ၵၢၼ်ၶၢဝ်ႇသေ ၸႅင်ႈၵႂၢမ်းၵၼ်ၵႂႃႇ ။


ၼႂ်းပွင်ႈၵႂၢမ်းၼၼ်ႉ ယင်းတႅမ်ႈပႃးဝႆႉဝႃႈ- ယၢမ်းမူင်း ဢၼ်ၸွမ်ၽွင်းလူင်ၵေႃႉၼႆႉတိုဝ်းဝႆႉၼႆႉ မၼ်းပဵၼ်ၽူႈ ႁဵတ်းၵၢၼ်ပၢႆးမၢၵ်ႈမီး ၵေႃႉဢၼ်ယၢမ်ႈတူၵ်းၶွၵ်ႈသေ ပူၼ်ႉလွတ်ႈဢွၵ်ႇမႃးၶိုၼ်း ပႆႇပေႃးႁိုင်ၼၼ်ႉ မႃးတွၼ်ႈပၼ်- ဝႃႈၼႆ ။


ၵဵဝ်ႇၵပ်းလွင်ႈပၼ်ႁႃၼႆႉသေ ဢူးဝိၼ်းထဵင်ႇ ၽူႈၼမ်းၼႂ်းပႃႇတီႇ NLD ၵေႃႈ လၢတ်ႈဝႃႈ သိုဝ်ႇၶၢဝ်ႇမီႊၻီႊယိူဝ်ႊ Eleven ၼႆႉ ဢမ်ႇၸွမ်းပၵ်းပိူင်ၶၢဝ်ႇ၊ တႅမ်ႈလွင်ႈၶႃႉၸိုဝ်ႈၶၢႆသဵင်ၵၼ် လၢတ်ႈတီႈၶၢဝ်ႇ BBC ၼင်ႇၼႆ ။


ၵွပ်ႈၼၼ် ယူႇတီႈၸွမ်ၽွင်းလူင်တိူင်းတႃႈၵုင်ႈသေ ဝၼ်းတီႈ 09/11/2016 (မိူဝ်ႈၼႆႉ) တေႁဵတ်းပၢင်သပ်း ၸႅင်ႈၶၢဝ်ႇ ၵဵဝ်ႇၵပ်းလွင်ႈၸုမ်းသိုဝ်ႇ Eleven တႅမ်ႈလွင်ႈ NLD ၼၼ်ႉ။ ဢူးဝိၼ်းထဵင်ႇ ယင်းလၢတ်ႈဝႃႈ- တေၸႅင်ႈၵႂၢမ်းၸွႆးတြႃးၶဝ်ၵႂႃႇ- ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၽူႈၵုမ်းထတ်းထွင်လိၵ်ႈၸုမ်းသိုဝ်ႇ Eleven ဢူးဝူၺ်ႇၽျူဝ်း ၵေႃႈလၢတ်ႈမိူဝ်ႈဝၼ်းတီႈ 08/11/2016 ဝႃႈ-  ယူႇတီႈၸုမ်းသိုဝ်ႇၶၢဝ်ႇ Eleven သေ တေႁဵတ်းၵႂႃႇၸွမ်းပၵ်းပိူင်ၵၢၼ်သိုဝ်ႇ (Media) ဢၼ်မီးဝႆႉၵူၺ်း- ဝႃႈၼႆ ။


ဢူးဝူၺ်ႇၽျူဝ်း လၢတ်ႈဝႃႈ- မိူၼ်ၼင်ႇဢူးဝိၼ်းထဵင်ႇ တွပ်ႇလၢတ်ႈၵႂႃႇတီႈ BBC ၼၼ်ႉဝႃႈ- ႁဝ်းၶႃႈတူၵ်ႇ လၢတ်ႈၸိုဝ်ႈ ဢူးၽျူဝ်းမိၼ်းတဵင်း ၸွမ်ၽွင်းလူင်တိူင်းတႃႈၵုင်ႈၵမ်းလဵဝ်ၼႆၼၼ်ႉ ႁဝ်းၶႃႈဢမ်ႇလႆႈလၢတ်ႈ ပႃးၸိုဝ်ႈသေၶေႃႈ။ ၵွပ်ႈၼၼ်လႄႈ ၸီႉၼႄးႁဝ်းၶႃႈဝႃႈ ႁဝ်းၶႃႈၶႃႉၸိုဝ်ႈၶၢႆသဵင်ၼႆသေ တေၸႅင်ႈၵႂၢမ်းတီႈ ႁဝ်းၶႃႈ။ ယူႇတီႈႁဝ်းၶႃႈတႄႉတေႁဵတ်းၵႂႃႇၸွမ်း ပိူင်တိုဝ်းၵမ်သိုဝ်ႇၶၢဝ်ႇၵူၺ်း၊ ႁဝ်းၶႃႈဢမ်ႇလႆႈၶႃႈၸိုဝ်ႈၶၢႆသဵင်၊ ပႃႇတီႇဢၼ်လႂ် ပဵၼ်ၽႂ်ၼႆၵေႃႈ ဢမ်ႇလႆႈသႂ်ႇၸိုဝ်ႈဝႆႉ ။


ၼႂ်းၵႂၢမ်းၼမ်းၽူႈထတ်းလိၵ်ႈၶွင် Eleven ၼၼ်ႉၵေႃႈ ဢမ်ႇတူၵ်ႇၸိုဝ်ႈပႃးဝႃႈ ဢူးၽျူဝ်းမိၼ်းတဵင်း ၵမ်းသိုဝ်ႈ။ မိူၼ်ၼင်ႇၵႃႈၶၼ်ယၢမ်းမူင်း ဢၼ်ၵိုင်ႇငိုၼ်းၻေႃႇလိူဝ်ႊၼိုင်ႈသႅၼ် ၼႆၼၼ်ႉၵေႃႈ ဢမ်ႇလႆႈလၢတ်ႈပႃး။ ၵွပ်ႈၼၼ်လႄႈ လွင်ႈ Daily Eleven တႅမ်ႈပွင်ႈၵႂၢမ်းၸိူင်ႉၼႆၼႆႉ ၽူႈႁဵတ်းၵၢၼ် ပၢႆးမၢၵ်ႈမီး ဢူးမွင်ႇဝဵၵ်ႉၵေႃႈ ႁဵတ်းပၢင်သပ်းၸႅင်ႈၶၢဝ်ႇ (09/11/2016) မိူဝ်ႈၼႆႉ တင်ႈတႄႇ 9-10 မူင်းၼင်ႇၵဝ်ႇ။ ၸွမ်ၽွင်းလူင်တိူင်းတႃႈၵုင်ႈၵေႃႈ ႁဵတ်းပၢင်သပ်းၸႅင်ႈၶၢဝ်ႇ ယၢမ်းဝၢႆးဝၼ်း 4 မူင်းၼႆႉ- ၼႆယဝ်ႉ ။


လွင်ႈၼႆႉ တေၸၢင်ႈမီးလွင်ႈၸႅင်ႈၵႂၢမ်း/ၸွႆးတြႃးၵၼ်ယူႇ၊ ၵွပ်ႈဝႃႈ ယူႇတီႈ Eleven သေ ၵႂႃႇတွင်ႈထၢမ် ၸွမ်ၽွင်းလူင်တိူင်းတႃႈၵုင်ႈ ဢူးၽျူဝ်းမိၼ်းတဵင်းၼၼ်ႉ မၼ်းၸၢႆးတွပ်ႇဝႆႉတႅတ်ႈတေႃးဝႃႈ မၼ်းဢမ်ႇမီး။ ယွၼ်ႉပိူဝ်ႈဢမ်ႇမီးလႄႈ ဢၼ် Eleven ၶဝ်တႅမ်ႈၵႂႃႇၼၼ်ႉ တေၸႅင်ႈၵႂၢမ်းၸွႆးတြႃးၶဝ်ၵႂႃႇ- ဢူးဝိၼ်းထဵင်ႇ လၢတ်ႈတီႈ BBC ။

ထႅင်ႈလွင်ႈၼိုင်ႈၵေႃႈ သိုဝ်ႇမၢၼ်ႈလၢႆသိုဝ်ႇၵေႃႈယၢမ်ႈတႅမ်ႈ လွင်ႈပႃႇတီႇ NLD ဝႆႉ။ လၢတ်ႈဝႃႈပႃႇတီႇ NLD ၼႆႉ ႁၢပ်ႇၵၢၼ်ၼႃႈတီႈပုၼ်ႈၽွၼ်း လူင်ပွင်ၸိုင်ႈမႃးပီၼိုင်ႈယဝ်ႉသေတႃႉၵေႃႈ ဢၼ်ႁဵတ်းသၢင်ႈပူၵ်းပွင်ပၼ် ၵူၼ်းဝၢၼ်ႈၵူၼ်းမိူင်း ပႆႇမီးသင်တႄႉတႄႉ။ မိူၼ်ၼင်ႇ တပ်ႉသိုၵ်းမၢၼ်ႈႁၢင်ႈႁႅၼ်းသိုၵ်း ႁဵတ်းပၢင်တိုၵ်း သိုၵ်းသိူဝ်တေႃႇၸၢဝ်းၶိူဝ်းၵေႃႈ ဢၼ်ႁႄႉႁၢမ်ႈႁဵတ်းႁႂ်ႈၵိုတ်းပၢင်တိုၵ်းၵေႃႈပႆႇမီး။ လွင်ႈပူၼ်ႉပႅၼ်လူလၢႆၼိူဝ် သုၼ်ႇလႆႈၵူၼ်း ၸိူဝ်းၼႆႉၵေႃႈ ယင်းတိုၵ်ႉမီးယူႇၵူႈမိုဝ်ႉၵူႈဝၼ်း- ၸုမ်းသိုဝ်ႇၶၢဝ်ႇလၢႆလၢႆၸုမ်း တႅမ်ႈဝႆႉၼင်ႇၼႆ ။


ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်းၼႂ်းပီတေမႃး (2017)ၼႆႉၵေႃႈ တီႈၼင်ႈဢၼ်ပဝ်ႇဝႆႉလၢႆတီႈ ၸိူဝ်းၼၼ်ႉ ယူႇတီႈ NLD ၼႂ်းမိူင်းတႆး တေၶဝ်ႈၶႅင်ႇၵူႈတီႈ၊ တႃႇတေပေႉၵေႃႈ ၶဝ်မီးတၢင်းမုင်ႈမွင်းဝႆႉယူႇၼႆ- ပႃႇတီႇ NLD ၶဝ်ပိုတ်ႇလၢတ်ႈတီႈၸုမ်းၶၢဝ်ႇၶဝ် ၼင်ႇၼႆ ။