တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၼႆႉ ဝၢႆးၸတ်းႁဵတ်း ပၢင်ၵုမ်ၶွၼ်ႊၾရႅၼ်ႊ ၵဵဝ်ႇၵပ်းၾိင်ႈထုင်း ၵထိၼ် ထေရဝႃတ ၵူႈမိူင်းမိူင်း မိူဝ်ႈဝၼ်းတီႈ 5-6/11/2016 ယဝ်ႉ ထိုင်မႃးဝၼ်းတီႈ 7 လႆႈၸတ်းႁဵတ်းပၢင်ပွႆး သၢင်ႇၵၢၼ်း ၵထိၼ်ထႅင်ႈ။ လွင်ႈၼႆႉၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်တူၼ်ၶူးၸဝ်ႈမႁေႃႇ ဝႆႉၼင်ႇၼႆ ။ (တွၼ်ႈ 2 သိုပ်ႇမႃးတွၼ်ႈ 1)

ထၢမ်-ပွႆးၵထိၼ်လႄႈ ၶွၼ်ႊၾရႅၼ်ႊၼႆႉ ၵွပ်ႈသင်လႄႈႁဵတ်းၸွမ်းၵၼ်ၶႃႈ?။


တွပ်ႇ-ပၢင်ၵုမ်ၶွၼ်ႊၾရႅၼ်ႊၼႆႉ ယိူင်းဢၢၼ်းပိူဝ်ႈတႃႇ မႃးႁဵတ်းလွင်ႈသၢင်ႇၵၢၼ်း ၵထိၼ်။ ၵထိၼ်ၼႆႉ ပေႃးဝႃႈပဵၼ်ၸၢဝ်းပုတ်ႉထၽႃသႃ ဢွၼ်ၵၼ်ႁဵတ်းသၢင်ႈၵူႈဝၢၼ်ႈၵူႈမိူင်း။ လွင်ႈႁဵတ်းသၢင်ႈၼႆႉ မၼ်းယူႇတီႈၵႂၢမ်းသင်ႇသွၼ်ပုတ်ႉထၽြႃးပဵၼ်ၸဝ်ႈမႃး မိူၼ်ၵၼ်သေတႃႉၵေႃႈ ၵူၼ်းမိူင်းၼိုင်ႈလႄႈမိူင်းၼိုင်ႈ၊ ဝၢၼ်ႈၼိုင်ႈလႄႈဝၢၼ်ႈၼိုင်ႈၼႆႉ ဢိင်လူၺ်ႈၾိင်ႈငႄႈၾိင်ႈထုင်းသေ လွင်ႈလၢၵ်ႇလၢႆးပႅၵ်ႇပိူင်ႈၵၼ်ၵေႃႈတေမီး ။


ယွၼ်ႉမၼ်းမီးၸိူင်ႉၼႆလႄႈ လွင်ႈႁဵတ်းပၢင်ပွႆးလူႇတၢၼ်းသၢင်ႇၵၢၼ်းၵထိၼ်ၵေႃႈ လွင်ႈပႅၵ်ႇပိူင်ႈၵၼ်ၵေႃႈ မီးမႃး။ ၵွပ်ႈပိူဝ်ႈၼႆ ၼင်ႇႁိုဝ်သမ်ႉပေႃးတေလႆႈလဵပ်ႈႁဵၼ်း ၵႂၢင်ႈၵႂၢင်ႈၶႂၢင်ၶႂၢင်၊ မိူၼ်ၼင်ႇမိူင်းထႆးၼႆႉ ႁဵတ်းပၢင်ပွႆးၵထိၼ် မိူၼ်ၸိူင်ႉႁိုဝ်၊ ၸွင်ႇပႃးလွင်ႈမူၼ်ႈသိူဝ်းမိူၼ်ၼင်ႇမိူင်းႁဝ်းႁႃႉ၊ ၸွင်ႇလဵပ်ႈတူၼ်ႈ မိူၼ်ၼင်ႇမိူင်းႁဝ်းႁႃႉ၊ မိူင်းသီႇႁူဝ်ႇ၊ မိူင်းၵမ်ႊၿေႃႊၻီႊယိူဝ်ႊ၊ မိူင်းမလေႊသျိူဝ်ႊ ႁဵတ်းၸိူင်ႉႁိုဝ်။ တီႈမိူင်းၼီႊၿေႃႊလ်ၶဝ်၊ တီႈမိူင်းမၢၼ်ႈၸိူဝ်းၼႆႉ ႁဵတ်းၸိူင်ႉႁိုဝ် ၸိူဝ်းၼႆႉ ထုၵ်ႇလီလႆႈႁူႉၵၼ် ။


တႃႇတေႁူႉလွင်ႈၸိူဝ်းၼႆႉသမ်ႉ ပေႃးႁဵတ်းၶွၼ်ႊၾရႅၼ်ႊၵေႃႈ လႆႈႁူႉၵႂႃႇႁင်းၵူၺ်းမၼ်း။ ႁဝ်းဢမ်ႇတၢပ်ႈၵႂႃႇ ႁဵတ်းတီႈဝၢၼ်ႈၶဝ်မိူင်းၶဝ်၊ ႁဝ်းႁွင်ႉၶဝ်မႃးပၼ်တၢင်းႁူႉႁဝ်း ၵဵဝ်ႇၵပ်းလွင်ႈၵထိၼ်မိူင်းၶဝ်ၼႆ ပွင်ႇဝႃႈႁဵတ်းႁႂ်ႈ လွင်ႈၵထိၼ်ထေရဝႃတ ပုတ်ႉထၽႃသႃၼႆႉ ႁႂ်ႈမၼ်းၵႂၢင်ႈၶႂၢင်၊ ႁႂ်ႈမၼ်းသမ်ႉပေႃးႁူႉလွင်ႈတၢင်းမၼ်း တီႈလႂ်ပဵၼ်မီးၸိူင်ႉႁိုဝ်၊ လွင်ႈပႅၵ်ႇပိူင်ႈၵၼ်မီးၸိူင်ႉႁိုဝ်၊ လွင်ႈမိူၼ်ၵၼ်သမ်ႉပဵၼ်ၸိူင်ႉႁိုဝ်ၼႆ ၸင်ႇလႆႈႁဵတ်းပႃး ၶွၼ်ႊၾရႅၼ်ႊလွင်ႈၵထိၼ်ပႃး ဢၼ်ပဵၼ်ၾၢႆႇၵူႈမိူင်းမိူင်းၼႆႉယဝ်ႉ ။


ထၢမ်-ဢၼ်လႆႈႁဵတ်းၶွၼ်ႊၾရႅၼ်ႊၵထိၼ်ၼႆႉ ပဵၼ်ပွၵ်ႈဢွၼ်တၢင်းသုတ်းၶႃႈၼေႃႈ၊ ယွၼ်ႉပိူဝ်ႈသင်ၶႃႈ? ။


တွပ်ႇ-ၸႂ်ႉယဝ်ႉ၊ ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်း။ ဢမ်ႇပႆႇဝႃႈၼႂ်းမိူင်းမၢၼ်ႈ မိူင်းတႆးၵွၼ်ႇ တၢင်ႇဝၢၼ်ႈတၢင်ႇမိူင်း တီႈၼႂ်းလုမ်ႈၾႃႉၼႆႉၵေႃႈ ၶွၼ်ႊၾရႅၼ်ႊၵထိၼ်ၼႆႉ ပႆႇယၢမ်ႈမီးမႃးသေပွၵ်ႈ၊ ၼႆႉပဵၼ်ပွၵ်ႈဢွၼ်တၢင်းသုတ်း ။


ပဵၼ်ပွၵ်ႈဢွၼ်တၢင်းသုတ်း ဢၼ်ဝႃႈၼႆႉ ၵွပ်ႈပိူဝ်ႈဝႃႈၵဵဝ်ႇၵပ်းလွင်ႈၵထိၼ်ၼႆႉ မၼ်းမီးၸိုဝ်ႈသဵင်ယႂ်ႇႁႅင်းဝႆႉ။ ဢၼ်မီးၸိုဝ်ႈသဵင်ယႂ်ႇၼႆႉ မၼ်းပဵၼ်ၸိူင်ႉႁိုဝ်တႄႉတႄႉ၊ ဝၢၼ်ႈမိူင်းလႂ်ၶိုင်ၸိူင်ႉႁိုဝ်ၸိူဝ်းၼႆႉ ႁႂ်ႈမၼ်းပေႃးႁူႉ လွင်ႈၵၼ်။ ၵဵဝ်ႇလူၺ်ႈလွင်ႈၵထိၼ်သေ သမ်ႉပေႃးပဵၼ်လွင်ႈႁူမ်ႈမိုဝ်းၵၼ်ႁဵတ်းသၢင်ႈ ၼႃႈၵၢၼ်ပုတ်ႉထ သႃသၼႃ ဢၼ်ၶိုပ်ႈၼႃႈထႅင်ႈၵေႃႈလီ၊ ၵဵဝ်ႇလူၺ်ႈလွင်ႈၵထိၼ်သေ ယႃႇပေႁႂ်ႈမၼ်းယဝ်ႉ ၼႂ်းပၢင်ၵိၼ်ပၢင်လူႇ ပၢင်တၢၼ်းၵူၺ်း၊ တၢင်းႁူႉၵေႃႈႁႂ်ႈပေႃးမီးမႃးထႅင်ႈၼမ်ၼမ်လႄႈ ၸင်ႇလႆႈႁၢင်ႈႁႅၼ်း ၶွၼ်ႊၾရႅၼ်ႊပွၵ်ႈၵမ်း 1 ၼႆႉ ။


ထၢမ်-ၶွၼ်ႊၾရႅၼ်ႊၼႆႉ လႆႈတၢင်ႇလိၵ်ႈဢၢၼ်ႇလိၵ်ႈလၢႆၽႃသႃၶႃႈ? ။


တွပ်ႇ-ၶွၼ်ႊၾရႅၼ်ႊပွၵ်ႈၵမ်း 1 ၼႆႉ ဢၼ်တၢင်ႇလိၵ်ႈမီး 2 ၽႃသႃ၊ ၸႂ်ႉၽႃသႃပႃလိလႄႈ ဢိင်းၵလဵတ်ႈ။ ဢၼ်မႃးတၢင်ႇလိၵ်ႈၼႆႉ ၼွၵ်ႈမိူင်းမီး 7 တူၼ်၊ ၼႂ်းမိူင်းမီး 6 တူၼ်၊ တင်းမူတ်း 13 တူၼ် ။


ၵွပ်ႈသင်လႄႈႁဵတ်းပႃလိ၊ ၵမ်ႈၽွင်ႈၵေႃႈၶဝ်ႈၸႂ် ၵမ်ႈၽွင်ႈဢမ်ႇၶဝ်ႈၸႂ်ၵေႃႈမီး၊ ၽိူဝ်ႇတႃႉႁဵတ်းတၢင်ႇၽႃသႃ တေၶဝ်ႈၸႂ်ငၢႆႈ။ ၵူၺ်းၵႃႈ ၵႂၢမ်းပႃလိ ဢၼ်ႁဝ်းဢဝ်မႃးႁဵတ်းၼႆႉ ယွၼ်ႉပိူဝ်ႈဝႃႈမၼ်းပဵၼ်ၵႂၢမ်းငဝ်ႈ မၵထ ၵႂၢမ်းၽြႃးပဵၼ်ၸဝ်ႈ၊ ၵႂၢမ်းထမ်းတြႃးမႃးလႄႈ ႁဝ်းၶိုၼ်းမႃးယုၵ်ႉယွင်ႈ ႁႂ်ႈၵႂၢမ်းငဝ်ႈၽြႃးပဵၼ်ၸဝ်ႈ ဢၼ်ပဵၼ်ပႃလိၼႆႉၽႄႈတိူၼ်း၊ ႁႂ်ႈၵူၼ်းႁဝ်းႁူႉၼမ်၊ ယဝ်ႉၵေႃႈ မၼ်းပဵၼ်ၽႃသႃၵႂၢမ်းလၢတ်ႈၼိုင်ႈဢၼ်ၼၼ်ႉ ႁႂ်ႈႁူႉၵၼ်- ၼႆႉ လွင်ႈၼိုင်ႈ ။


ထႅင်ႈလွင်ႈၼိုင်ႈ ဢၼ်ႁဵတ်းမႃး၊ ဢၼ်ဝႃႈသမ်ႉဢဝ်ၵႂၢမ်းဢင်းၵိတ်ႉႁဵတ်းၼၼ်ႉ ယွၼ်ႉပိူဝ်ႈဝႃႈႁဝ်းၸႂ်ႉတိုဝ်း ၶေႃႈၵႂၢမ်းဝႃႈ ၵူႈမိူင်းမိူင်း International ၊ တႃႇတေပဵၼ် International ၼႆႉ ၽႃသႃမၼ်းသမ်ႉပဵၼ်ဢင်းၵိတ်ႉ ႁဝ်းၵေႃႈလႆႈၸႂ်ႉတိုဝ်းဢင်းၵိတ်ႉ။ ၼၼ်သေတႃႉၵေႃႈ ၼင်ႇႁိုဝ်ပီႈၼွင်ႉၸၢဝ်းၶိူဝ်း တီႈမိူင်းႁဝ်းၼႆႉၵေႃႈလီ၊ ၸိူဝ်းမႃးၶိုၼ်ႈႁွတ်ႈၶဝ်ႈႁူမ်ႈၸိူဝ်းၼႆႉၵေႃႈလီ၊ မၼ်းမီးမႃးလၢႆၽႃသႃ လၢႆဝၢၼ်ႈလၢႆမိူင်းလႄႈ ၼင်ႇႁိုဝ်ၶဝ် ပေႃးတေပွင်ႇၸႂ်ၶဝ်ႈၸႂ်ငၢႆႈၵေႃႈ ၸဝ်ႈၶဝ်မီးပႃးဢၼ်ပိၼ်ႇၽႃသႃၸွမ်း၊ လုၵ်ႉဢဝ်တီႈၾၢႆႇပႃလိ ၵႂႃႇၾၢႆႇဢင်းၵိတ်ႉ၊ တႆး၊ မၢၼ်ႈ၊ ထႆး ၸိူဝ်းၼႆႉ။ ယုမ်ႇယမ်ဝႃႈ တေမီးၽွၼ်းလီ ပိူဝ်ႈတႃႇၵူၼ်းတင်းၼမ်ယူႇ ။


ထၢမ်-ဢၼ်ပဵၼ် 7 တူၼ် 7 ပႃးၼွၵ်ႈမိူင်းၼႆႉ ပဵၼ်မိူင်းလႂ်ၽွင်ႈၶႃႈ? ။


တွပ်ႇ-ပဵၼ်မိူင်းသီရိလင်းၵႃ၊ မိူင်းၶႅမ်ႊၿေႃႊၻီႊယိူဝ်ႊ၊ မိူင်းၶျၢတ်ႉသ်၊ မိူင်းထႆး၊ မလေးသျိူဝ်ႊ၊ မိူင်းမၢၼ်ႈ သင်ၶတင်းမူတ်း 6 မိူင်း။ သင်ၶဢၼ်လႆႈၽိတ်ႈမွၵ်ႇဝႆႉ ပဵၼ်ၸၼ်ႉၸွမ်သင်ၶၵူႈတီႈ တီႈၼွၵ်ႈမိူင်းဢိၵ်ႇၼႂ်းမိူင်း တင်းသဵင်ႈမီး 219 ၊ ၸိူဝ်းၼႆႉပႆႇပႃးၽူႈမႃးလဵပ်ႈႁဵၼ်းတၢင်းၼွၵ်ႈ။ သင်ၶၸိူဝ်းမႃးၸွႆႈၵၢၼ်ငၢၼ်း တီႈၸမ်တီႈၵႆမီး 60 တူၼ်ပၢႆ ။


ထၢမ်-ၼႂ်းပၢင်ပွႆးၼႆႉ မီးလွင်ႈလၢၵ်ႇလၢႆးသင်ၽွင်ႈၶႃႈ? ။


တွပ်ႇ-ၼႂ်းပၢင်ပွႆးၼႆႉ ဢၼ်လၢၵ်ႇလၢႆးမၼ်းမီး မိူၼ်ၼင်ႇလွင်ႈၵထိၼ်ၼႆႉ ဢွၼ်ၵၼ်ႁဵတ်းမိူင်းၽႂ်မိူင်းမၼ်း၊ လွင်ႈၽႂ်လွင်ႈမၼ်း။ ၵူၺ်းၵႃႈ မိူင်းၽႂ်ႁဵတ်းၸိူင်ႉႁိုဝ်၊ ယွၼ်ႉသင်လႄႈႁဵတ်း၊ တီႈလႂ်ပဵၼ်ၸိူင်ႉႁိုဝ်ၼႆ ဢမ်ႇမီးလွင်ႈတွင်ႈထၢမ်ၵၼ်သေပွၵ်ႈ။ ၽိူဝ်ႇမႃးႁဵတ်းၶွၼ်ႊၾရႅၼ်ႊၸိူင်ႉၼႆ မၼ်းမီးပႃးလွင်ႈထၢမ်တွပ်ႇ ၵၼ်လႄႈ လွင်ႈဢၼ်ၶႂ်ႈႁူႉၵေႃႈ လႆႈထၢမ်တွပ်ႇၵၼ်သေႁူႉမႃး။ ၼႆႉပဵၼ်ဢၼ်လၢၵ်ႇလၢႆးမၼ်း ။


ထၢမ်-လွင်ႈလူႇတၢၼ်းသၢင်ႇၵၢၼ်းၵထိၼ်ၼႆႉ မိူင်းပိူၼ်ႈၸွင်ႇမီးၶႃႈ။ လူႇတၢၼ်းသၢင်ႇၵၢၼ်းၼႆႉ လူႇတၢၼ်းဝၼ်းလႂ်ၶႃႈ? ။


တွပ်ႇ- မီး၊ တၢင်ႇမိူင်းၵေႃႈမီး ပေႃးဝႃႈပဵၼ်ၸၢဝ်းၶိူဝ်းထေရဝႃတ ပုတ်ႉထၽႃသႃၼႆ မီးမူတ်း။ ၵူၺ်းၵႃႈ ဢၼ်ပဵၼ်ၸၢဝ်းၶိူဝ်းမႁႃၺႃၼ ပုတ်ႉထၽႃသႃၶဝ်တႄႉ ဢမ်ႇပေႃးႁၼ်ႁဵတ်း။ လူႇတၢၼ်းသၢင်ႇၵၢၼ်းၼႆႉ ၶၢဝ်းတၢင်းလူႇမၼ်း မီးၶၢဝ်းတၢင်း 1 လိူၼ်၊ တႄႇဢဝ်လိူၼ် 11 လွင်ႈၼိုင်ႈၶမ်ႈ တေႃႇထိုင်လိူၼ် 12 မူၼ်း။ ပေႃးဝႃႈပူၼ်ႉၵႂႃႇယဝ်ႉ လူႇတၢၼ်းတႄႉလႆႈယူႇ၊ ၵူၺ်းၵႃႈ တႃႇတေသိူဝ်ႇၵထိၼ်ၼႆႉ ဢမ်ႇလႆႈ၊ ၽြႃးပဵၼ်ၸဝ်ႈ ဢၼုၺၢတ်ႈပၼ် တႃႇၼိုင်ႈလိူၼ်ၵူၺ်း။ ၼႂ်းၶၢဝ်းတၢင်းၼိုင်ႈလိူၼ်ၼႆႉ ဝၼ်းလႂ်ၵေႃႈဢမ်ႇပဵၼ်သင် လူႇတၢၼ်းလႆႈယူႇ ။


ပေႃးဝႃႈလူႇတၢၼ်းၵႂႃႇယဝ်ႉ သၢင်ႇၵၢၼ်းၵထိၼ်ၼွၵ်ႈမၼ်းၼၼ်ႉ တေလႆႈဢဝ်လွင်ႈၶေႃႈၸီႉသင်ႇၽြႃး ပဵၼ်ၸဝ်ႈဝႃႈ တေလႆႈလိူၵ်ႈၸဝ်ႈဢၼ်သိူဝ်ႇမၼ်း၊ တေလႆႈပၼ်သၢင်ႇၵၢၼ်းဢၼ်သိူဝ်ႇ၊ တႃႇတေပၼ်ၼႆႉ ပၼ်လၢႆလၢႆဢမ်ႇလႆႈ၊ တေလႆႈႁႂ်ႈသင်ၶၶဝ်ၸဝ်ႈႁူႉၸွမ်း၊ ယဝ်ႉၵေႃႈသင်ၶၶဝ်ၸဝ်ႈၸိူဝ်းၼႆႉ ၸွင်ႇႁၢၼ်ႉၸႂ်ဢမ်ႇႁၢၼ်ႉၸႂ်၊ လွင်ႈသိူဝ်ႇၵထိၼ်ၼႆႉ ၸွင်ႇႁူမ်ၸူမ်းဢမ်ႇႁူမ်ၸူမ်း၊ ႁၢင်ႈႁႅၼ်းၸိူင်ႉၼႆသေ သိူဝ်ႇၵႂႃႇ၊ ႁႂ်ႈမၼ်းယဝ်ႉၼႂ်းဝၼ်းလူႇတၢၼ်းၼၼ်ႉ ၵမ်းလဵဝ် ။


ထၢမ်- ဝၼ်းလူႇတၢၼ်းသၢင်ႇၵၢၼ်းၵထိၼ်ၼၼ်ႉ ပဵၼ်ဝၼ်းလႂ်ၶႃႈ? ။


တွပ်ႇ-ဝၼ်းလူႇတၢၼ်းမၼ်းၼၼ်ႉ ၼႂ်းၶၢဝ်းတၢင်းၼိုင်ႈလိူၼ် ဝၼ်းလႂ်ၵေႃႈဢမ်ႇပဵၼ်သင်၊ ဢဝ်ၸဝ်ႈတႃႇၼ တီႈလႂ်တီႈၼၼ်ႉဝႃႈ၊ ဢဝ်ၽူႈဢွၼ်ႁူဝ်သင်ၶ ဝတ်ႉၵျွင်းလႂ်ဝတ်ႉၵျွင်းၼၼ်ႉဝႃႈ။ မိူၼ်ၸိူင်ႉၼင်ႇတီႈၸၼ်ႉၸွမ် ႁဝ်းၼႆႉ ဝၼ်းတီႈ 7 ၼႆႉ ပဵၼ်ဝၼ်းလူႇတၢၼ်းမၼ်း၊ ပွင်ႇဝႃႈဢၼ်တေသိူဝ်ႇၵထိၼ်ၵေႃႈ ပဵၼ်ဝၼ်းတီႈ 7 ၼႆႉယဝ်ႉ ။


ထၢမ်-ၵဵဝ်ႇၵပ်းလွင်ႈသၢင်ႇၵၢၼ်းၵထိၼ်ၼႆႉ ၵမ်းလိုၼ်းသုတ်း ၶႂ်ႈသင်ႇလၢတ်ႈၸိူင်ႉႁိုဝ်ထႅင်ႈၶႃႈ? ။


တွပ်ႇ-ၵဵဝ်ႇၵပ်းလွင်ႈသၢင်ႇၵၢၼ်းၵထိၼ်ၼႆႉ မိူၼ်ၼင်ႇၼင်ႇတီႈမိူင်းသီရိလင်းၵႃလႄႈ တီႈမိူင်းထႆးၶဝ်ၼႆႉ  သင်ၶၶဝ်ၶဝ်ႈသိမ်ႇၵေႃႈဝႃႈ ဢမ်ႇၶဝ်ႈသိမ်ႇၵေႃႈဝႃႈ ဢၼ်သိူဝ်ႇၵထိၼ်ၼႆႉ ႁဵတ်းၾၢႆႇၼႃႈတၵ်ႉၵႃႇသတ်ႉထႃး မိူဝ်ႈပၢင်လူႇတၢၼ်းၵမ်းလဵဝ်။ ၵူၺ်းၵႃႈ တီႈမိူင်းမၢၼ်ႈ တီႈမိူင်းတႆးပတ်းပိုၼ်ႉၼႆႉသမ်ႉ ဢမ်ႇၸႂ်ႈၸိူင်ႉၼၼ်၊ ဢၼ်လူႇတၢၼ်းသၢင်ႇၵၢၼ်းၵထိၼ်ၼႆႉ လူႇတၢၼ်းၶေႃၶေႃ၊ ဢၼ်ၸဝ်ႈသင်ၶရႁၼ်းၶဝ် ဢဝ်သၢင်ႇၵၢၼ်း ၵထိၼ်ၵႂႃႇၶဝ်ႈၼႂ်းသိမ်ႇသေ သိူဝ်ႇၼၼ်ႉသမ်ႉပဵၼ်ၶေႃၶေႃ၊ ဢၼ်ၼႆႉပဵၼ်ဢၼ်ပိူင်ႈၵၼ် ။


သင်ပဵၼ်လႆႈတႄႉ ႁဝ်းတေလႆႈပဵၼ်လွင်ႈပိုတ်ႇၽိူၺ်တေႃႇၵၼ် ႁႂ်ႈမၼ်းၶႅမ်ႉၶႅမ်ႉလႅပ်ႈလႅပ်ႈလႄႈ တၵ်ႉၵႃႇသတ်ႉထႃးဢၼ်လႆႈလူႇတၢၼ်း သၢင်ႇၵၢၼ်းၵထိၼ်ၼႆႉၵေႃႈ ႁဵတ်းႁိုဝ်လႆႈသိူဝ်ႇၵထိၼ်ၼႆ ႁႂ်ႈၶဝ်သမ်ႉပေႃးႁူႉၵႂႃႇၼၼ်ႉတႄႉ ၸဝ်ႈႁဝ်းၶႂ်ႈတိုၵ်းသူၼ်းဝႃႈ ပေႃးပဵၼ်လႆႈၸိုင် ယိူင်ႈမိူင်းသီရိလင်းၵႃလႄႈ မိူင်းထႆး။ သိူဝ်ႇသၢင်ႇၵၢၼ်းၵထိၼ် တီႈပၢၵ်ႇၼႃႈတၵ်ႉၵႃႇသတ်ႉထႃးၶဝ်ၼၼ်ႉၵမ်းလဵဝ် ယိင်ႈၶႅၼ်းတေၶႅမ်ႉ ။


ထႅင်ႈလွင်ႈၼိုင်ႈ ၶွၼ်ႊၾရႅၼ်ႊလွင်ႈၵထိၼ်ၼႆႉ ႁဵတ်းၵႂႃႇယဝ်ႉၼႆသေတႃႉၵေႃႈ ပေႃးဝႃႈမိူဝ်းၼႃႈထႃႇပၢႆမႃး ၵဵဝ်ႇလူၺ်ႈလွင်ႈၵၢၼ်လူႇၵၢၼ်တၢၼ်း ၸၢဝ်းၶိူဝ်းပုတ်ႉထၽႃသႃၸိူင်ႉၼႆၼႆႉ သင်ၸိူဝ်ႉဝႃႈမီးလွင်ႈၶႆႈမွၵ်ႇ လၢတ်ႈၼႄၵၼ် ၵႂၢင်ႈၵႂၢင်ႈၶႂၢင်ၶႂၢင်၊ ႁဵတ်းပၢင်ၵုမ် ပၢင်သႅမ်ႊမီႊၼိူဝ်ႊၵၼ်ၸိူင်ႉၼႆ ယိင်ႈၶႅၼ်းႁႃတီႈဝႃႈဢမ်ႇမီး- ၶႂ်ႈသင်ႇလၢတ်ႈမီးၸိူင်ႉၼႆ ။