သိုၵ်းမၢၼ်ႈယိုဝ်းၵွင်ႈလွၵ်ႇငိုတ်ႈၵူၼ်းမိူင်း ဝဵင်းမိူင်းပၼ်ႇ တီႈၸွမ်းတၢင်း မိူဝ်ႈၽွင်းမိူဝ်ႈၵူၼ်းမိူင်း တိုၵ်ႉၵႂႃႇႁဵတ်းၵၢၼ်သူၼ်ၼႃး ။

ဝၼ်းတီႈ 22/11/2016 ပႃႈၼူၼ်း ၵူၼ်းဝၢၼ်ႈၵုင်းၵၢတ်ႇ  ဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၵႂႃႇႁဵတ်းသူၼ် သေၺႃးသိုၵ်းမၢၼ်ႈဢၼ်ပႂ်ႉၸွမ်းလၢၼ်ႇၼၼ်ႉႁွင်ႉၵူတ်ႇထတ်းထဵတ်ႈထၢမ် ဝၢႆးၼၼ်ႉသမ်ႉယိုဝ်းၵွင်ႈလွၵ်ႇငိုတ်ႈမၼ်းၼၢင်းသေႁဵတ်းႁႂ်ႈႁူဝ်ၸႂ်ၵီႈၵႂႃႇ ။


ၵဵဝ်ႇၵပ်းလွင်ႈၼႆႉၸၢႆးသိူဝ်တႆး ၵူၼ်းၼုမ်ႇမိူင်းပၼ်ႇဢၼ်ႁူႉၸွမ်းလွင်ႈတၢင်းဢၼ်ၼႆႉ လၢတ်ႈဝႃႈ - “ၽွင်းပႃႈၼူၼ်း တေၵႂႃႇပုမ်ႇၶဝ်ႈၼၼ်ႉ သမ်ႉဢဝ် တွၵ်ႇသႂ်ႇထုင်ၵႂႃႇၸွမ်းလႄႈ သိုၵ်းမၢၼ်ႈသမ်ႉ ထၢင်ႇဝႃႈပဵၼ်ၵွင်ႈ လႄႈလႅၼ်ႈမႃးၸူးပႃႈၼူၼ်းသေ ဢဝ်ၵွင်ႈငႃ ယဝ်ႉၵေႃႈ သွၵ်ႈၼႂ်းထုင် ပႃႈၼူၼ်း၊ ၵူၺ်းၵႃႈပႃႈၼူၼ်းသမ်ႉဢမ်ႇပၼ်သွၵ်ႈလႄႈ ၸင်ႇၺွပ်းတူဝ်ပႃႈၼူၼ်း သေ သွၵ်ႈၼႂ်းထူင် သေႁၼ်ၺႃးၸၢၵ်ႈလၢတ်ႈ ဢၼ်ပိူၼ်ႈလၢတ်ႈ ၼႂ်းသူၼ်ၼႂ်းၼႃး။ ဝၢႆးၼၼ်ႉၵေႃႈ ယိုဝ်းၵွင်ႈ လွၵ်ႇငိုတ်ႈ ႁဵတ်းႁႂ်ႈပႃႈၼူၼ်းပဵၼ်တၢင်းပဵၼ်ႁူဝ်ၸႂ်ၵီႈၵႂႃႇ - ဝႃႈၼႆ” ။


ၵူၺ်းၵႃႈ ၽွင်းၶၢဝ်းယၢမ်းၵၢင်ၶမ်ႈမွၵ်ႈ 4 မူင်း ၶမ်ႈၼၼ်ႉၼႆၽူႈၵွၼ်းတပ်ႉ ၼႂ်းပိုၼ်ႉတီႈၼၼ်ႉၶိုၼ်းဢွၼ်ဢဝ်ၸုမ်းၸိူဝ်းသေ မိူဝ်းၵၼ်ႇတေႃႇပႃႈၼူၼ်းယူႇဝႃႈၼႆ ။


“ ယွၼ်ႉမိူင်း တႆးပွတ်းႁွင်ႇ မီးလွင်ႈဢမ်ႇၼိမ်သဝ်းလႄႈ သိုၵ်းမၢၼ်ႈၶဝ်တေမႆႈၸႂ်ၼႃႇသေ ၸင်ႇႁွင်ႉၵူတ်ႇထတ်း ၵူၼ်းၵႂႃႇမႃး ယွၼ်ႉဢမ်ႇပွင်ႇၵႂၢမ်းၵၼ်ၵေႃႈပိူင်ၼိုင်ႈ  ၊ ဢၼ်ၶႂ်ႈၾၢၵ်ႇတွၼ်ႈ ထိုင်ပီႈၼွင်ႉၵူၼ်းမိူင်း တႆးတႄႉၵေႃႈ ႁႂ်ႈၾၢင်ႉယူႇၾၢင်ႉၵိၼ်ၵၼ် မိူဝ်ႈလဵဝ်မိူင်းတႆးပွတ်းႁွင်ႇသုၵ်ႉ မိူင်းႁဝ်းၵေႃႈတေ ဢမ်ႇသုၵ်ႉဢမ်ႇၸႂ်ႈ-“ ၸၢႆးဢွင်ႇထုၼ်း ၽူႈၶဝ်ႈၶွမ်ႊမတီႇ ပႃႇတီႇႁူဝ်သိူဝ် SNLD ဝဵင်းမိူင်းပၼ်ႇ လၢတ်ႈ ။


“ ပဵၵ်ႉသမ်ႉဝႃႈ လူင်းလၢႆးမိုဝ်း NCA ယဝ်ႉသေတႃႉ ၊ ဢမ်ႇႁူႉလႆႈဝႃႈမိူင်းႁဝ်း တေဢမ်ႇသုၵ်ႉ ၊ ပေႃးပဵၼ်လႆႈ ႁႂ်ႈထွမ်ႇၶၢဝ်ႇထွမ်ႇငၢဝ်း လႄႈလဵပ်ႈႁဵၼ်းယူႇတႃႇသေႇ” ၼႆယဝ်ႉ ။


မိူဝ်ႈဝၼ်းတီႈ 15/10/2015 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်းႁူမ်ႈပႃး ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လူင်းလၢႆးမိုဝ်းလိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) တင်း လူင်ပွင်ၸိုင်ႈမၢၼ်ႈ ။