လူင်ပွင်ၸိုင်ႈမိူင်းထႆး ပိုၼ်ၽၢဝ်ႇပူတ်းဝၢင်း ပၼ်ပိုတ်ႇၶိုၼ်းပၢင်ပွႆးၸွမ်းၾိင်ႈထုင်း လႄႈပၢင်ပွႆးမူၼ်ႈသိူဝ်း တင်းမူတ်း 9 ပိူင်။ ဢၼုၺၢတ်ႈ ပၼ်ပိုတ်ႇတင်ႈတႄႇဝၼ်းတီႈ 14/11/2016 ၵႂႃႇၼႃႈ။ ဝၼ်းတီႈ 12 လိူၼ်ၼႆႉၵေႃႈ တႄႇတၢင်ႇတုင်းၸၢတ်ႈယွတ်ႈသဝ်ၵႂႃႇ ။

ၵဵဝ်ႇၵပ်းလွင်ႈၼႆႉ ၸုမ်းပွင်ၵၢၼ်လူင်ၸွမ်ၽွင်းလူင် လူင်ပွင်ၸိုင်ႈမိူင်းထႆး လႆႈဢုပ်ႇဢူဝ်းၵိူဝ်းၵုမ်ၵၼ်သေ ပိုၼ်ၽၢဝ်ႇမိူဝ်ႈဝၼ်းတီႈ 01/11/2016 ။ ၵၢၼ်တူင်ႉၼိုင် 9 ပိူင် ၸိူဝ်းဢၼ်ပၼ်ပိုတ်ႇၼၼ်ႉ မီးၼင်ႇၼႆ ။


1.ပၢင်ပွႆးၾိင်ႈထုင်း (ၸွမ်းၾိင်ႈထုင်းၶၢဝ်းယၢမ်း) ၸၼ်ႉၸိုင်ႈမိူင်း မိူၼ်ၼင်ႇ ပွႆးလွႆးၵရႃႇထူင်း၊ ၶရိတ်ႊသမၢတ်ႊ၊ ပီမႂ်ႇ ။

2.ပၢင်ပွႆးၾိင်ႈထုင်း ၸၼ်ႉၸႄႈတွၼ်ႈ မိူၼ်ၼင်ႇပၢင်ပွႆးၶႂႆႇၶႃပႄလႅင် (ပွႆးၶၢဝ်းၵတ်း)၊ ပၢင်ပွႆးၽီတႃၶူၼ် ။

3.ပၢင်ပွႆးၵမ်ႉၸွႆႈပၢႆးမၢၵ်ႈမီးၸၼ်ႉၸႄႈတွၼ်ႈ ၸႄႈဝဵင်း တူင်ႇတၢင်ႇပိုၼ်ႉတီႈ မိူၼ်ၼင်ႇပၢင်ပွႆးသဵၼ်ႈတၢင်းၵူၼ်းပႆ၊ ၾိင်ႈထုင်းပၢင်ပွႆးဝူဝ်းတေႃးၵၼ် ။

4.ပၢင်ပွႆးမူၼ်ႈသိူဝ်း ၸွမ်းၾိင်ႈထုင်းၵူၼ်းၼႂ်းပိုၼ်ႉတီႈ မိူၼ်ၼင်ႇၸၢတ်ႈသႅင်း၊ ၵွင်မွင်းဝႅင်းပၢၼ်ၵဝ်ႇ၊ ၾၢႆႇတွႆႇတိုင်ႈပၢၼ်မႂ်ႇ၊ ၵၢၼ်ၶႄႉၶႅင်ႇတၢင်းႁၢင်ႈလီၶိုၵ်ႉၶႅမ်ႉ လၢႆလၢႆလွင်ႈ ။

5.ပၢင်မူၼ်ႈသိူဝ်းလၢႆလၢႆပိူင် မိူၼ်ၼင်ႇၼၢႆႊၶလပ်ႊ (Night club) ၊ ၽပ်ႊ (pub) ၊ ၿႃႊ (bar) ၸိူဝ်းၼႆႉ ။

6.ပၢင်မူၼ်ႈသိူဝ်း ဢၼ်ၸတ်းႁဵတ်းၼႂ်းႁူင်းႁႅမ်း မိူၼ်ၼင်ႇ ပၢင်ဢုပ်ႇဢူဝ်းလႅၵ်ႈလၢႆႈ၊ လွင်ႈလဵင်ႉလူမူၼ်ႈသိူဝ်း ။

7.ပၢင်ပွႆးႁွင်ႉၽဵင်းၵႂၢမ်း (Concert) ။

8.ပၢင်ပွႆးၸွမ်းၾိင်ႈထုင်းႁိတ်ႈႁွႆး မိူၼ်ၼင်ႇပၢင်ပွႆးလူႇတၢၼ်းသၢင်ႇၵၢၼ်းၵထိၼ်၊ တူၼ်ႈငိုၼ်း ၼႂ်းဝၼ်းလိူၼ်သိပ်းသွင်မူၼ်း။ ပၢင်ပွႆးၵူပ်ႉၵူႈပဵၼ်ႁိူၼ်း၊ ပၢင်ပွႆးၼုင်ႈသၢင်ႇၼုင်ႈၸၢင်း ။

9.ပၢင်ပွႆးၶႄႉၶႅင်ႇလွင်ႈၵၢၼ်လဵၼ်ႈႁႅင်းၵူႈပိူင်ပိူင် ။


ၵၢၼ်တူင်ႉၼိုင် ပၢင်ပွႆး 9 ပိူင်ၸိူဝ်းၼႆႉ တႄႇဝၼ်းတီႈ 14/11/2016 ၼႆႉၵႂႃႇၸတ်းလႆႈယဝ်ႉ။ ၽူႈၸတ်းပၢင်ပွႆးၶဝ် တေလႆႈတူၺ်းလွင်ႈသၢင်ႇထုၵ်ႇၵိုင်ႇလႅပ်ႈသေ ၸတ်းၵႂႃႇႁႂ်ႈထုၵ်ႇမႅၼ်ႈၸွမ်းမၢႆမီႈ ပၵ်းပိူင်။ ၾၢႆႇၼိုင်ႈတၢင်းၼိုင်ႈၵေႃႈ ၼင်ႇႁိုဝ်ပၢင်ပွႆး သမ်ႉပေႃးတေၸတ်းၵႂႃႇ မီးလွင်ႈသၢင်ႇထုၵ်ႇၵိုင်ႇလႅပ်ႈၼၼ်ႉ ႁႂ်ႈၽူႈၵွၼ်းၸႄႈတွၼ်ႈၸိူဝ်းၼႆႉ ၸွႆႈပဵၼ်တီႈၵိူဝ်းၵုမ်ၵႂႃႇ ႁႂ်ႈပေႃးသၢင်ႇထုၵ်ႇၸွမ်းၾိင်ႈငႄႈၾိင်ႈထုင်း ပိုၼ်ႉတီႈလႂ်ပိုၼ်ႉတီႈၼၼ်ႉ ။


လၢႆးၵၢၼ် (ႁၢႆးၵၢၼ်) တၢင်းႁူင်းပွႆႇသဵင်၊ ႁူင်းပွႆႇႁၢင်ႈသဵင်ၸိူဝ်းၼၼ်ႉ ၸတ်းၵႂႃႇမိူၼ်ၵဝ်ႇပၵတိလႆႈ၊ ႁႂ်ႈၽူႈႁပ်ႉပုၼ်ႈၽွၼ်းၶဝ်ၶိုင်ပွင်ၵႂႃႇသေ ၵိုင်ႇလီဢဝ်ပိုၼ်ႉႁူႉၵူႈလွင်ႈလွင်ႈၸိူဝ်းၼႆႉ ၸွမ်ႇၸိမ်ၸွမ်း ပိူဝ်ႈတႃႇႁႂ်ႈပဵၼ်ၵၢၼ်ပူၵ်းပွင်ဝၢၼ်ႈမိူင်း ႁႂ်ႈၶိုၼ်ႈယႂ်ႇမႂ်ႇသုင်ၵႂႃႇမိူဝ်းၼႃႈ ။


လွင်ႈဢၼ်ႁႂ်ႈၶႃႈႁၢပ်ႇၵၢၼ်ၶုၼ်ၶဝ်၊ ၽူႈႁဵတ်းၵၢၼ်မၢၵ်ႈမီး ၸိူဝ်းၵဵဝ်ႇၶွင်ႈဝၢၼ်ႈမိူင်း/ လူင်ပွင်ၸိုင်ႈ၊ ၸဝ်ႈၼႃႈတီႈဝၢၼ်ႈမိူင်းၶဝ် ၼပ်ႉယမ်ၼႄလွင်ႈမွင်ၸႂ် တႃႇၶၢဝ်းယၢမ်း 1 ပီၼၼ်ႉၵေႃႈ ႁႂ်ႈႁဵတ်းသၢင်ႈၵႂႃႇမိူၼ်ၵဝ်ႇ၊ ၵူၺ်းၵႃႈ ၸိူဝ်းပဵၼ်ၵူၼ်းဝၢၼ်ႈၵူၼ်းမိူင်း လႄႈၵူၼ်းတွင်ႈတဵဝ်းဢႅဝ်ႇမိူင်းၶဝ်ၼၼ်ႉ ႁႂ်ႈတူၺ်းၶၢဝ်းယၢမ်းမိူဝ်ႈသၢင်ႇထုၵ်ႇ ၵိုင်ႇမီးၵိုင်ႇပဵၼ်သေႁဵတ်းၵႂႃႇ ။


ၸွမ်းၼင်ႇလုမ်းၽွင်းလူင် လူင်ပွင်ၸိုင်ႈမိူင်းထႆး ပိုၼ်ၽၢဝ်ႇၵႂႃႇလွင်ႈလူတ်းတုင်းၸၢတ်ႈလူင်းၶိုင်ႈသဝ် ၶၢဝ်းတၢင်း 30 ဝၼ်း တင်ႈတႄႇဝၼ်းတီႈ 14/10/2016 ၼၼ်ႉ တေၶွပ်ႈတဵမ်ၼႂ်းဝၼ်းတီႈ 12/11/2016 ၼႆႉယဝ်ႉ၊ ၵွပ်ႈၼၼ် ၼႂ်းဝၼ်းႁဵတ်းၵၢၼ် ၶႃႈႁၢပ်ႇၵၢၼ်ၶုၼ် တင်ႈတႄႇဝၼ်းတီႈ 14/11/2016 ၼၼ်ႉ တၢင်ႇတုင်းယွတ်ႈသဝ်လႆႈၶိုၼ်းမိူၼ်ၵဝ်ႇယဝ်ႉ ။


လွင်ႈၸိူဝ်းၼႆႉ သုၼ်ႇတူဝ်ၸွမ်ၽွင်းလူင်ၵေႃႈ လၢတ်ႈဝႃႈ- ၼႃႈၵၢၼ်ၵူႈၸိူဝ်ႉၵူႈလွင်ႈ ဢၼ်ႁဵတ်းသၢင်ႈ ယူႇၼၼ်ႉ တုၵ်းယွၼ်းႁႂ်ႈၵူႈပႃႈၵူႈၾၢႆႇ ၶိုင်ပွင်ႁဵတ်းသၢင်ႈၵႂႃႇႁႂ်ႈပေႃးထုၵ်ႇမႅၼ်ႈၸွမ်းမၢႆမီႈ လႄႈႁႂ်ႈသၢင်ႇထုၵ်ႇ ၵိုင်ႇလႅပ်ႈ- ၼႆယူႇ ။


ၵဵဝ်ႇၵပ်းလွင်ႈၼႆႉ ဝၢႆးသေၸဝ်ႈမုၼ်ယႂ်ႇၶုၼ်ႁေႃၶမ်း မိူင်းထႆး ၽူးမိၽူလ်း ဢၻုလ်းၻဵတ်ႇ  (တူၼ်တီႈ 9) ၼွၼ်းၽႄးၵႂႃႇ မိူဝ်ႈဝၼ်းတီႈ 13/10/2016 ယဝ်ႉ ယူႇတီႈလူင်ပွင်ၸိုင်ႈထႆး လႄႈ ပေႃႈမႄႈပီႈၼွင်ႉ ၵူၼ်းမိူင်းၸိုင်ႈထႆးတင်းသဵင်ႈ ယိၼ်းမွင်ၸႂ်ၸွမ်းလူင်လၢင်သေ  ၸွမ်ၽွင်းလူင်မိူင်းထႆး ပိုၼ်ၽၢဝ်ႇ လူတ်းတုင်းၸၢတ်ႈၶိုင်ႈသဝ် 30 ဝၼ်း၊ ႁႂ်ႈၶႃႈႁၢပ်ႇၵၢၼ်ၶုၼ် ၼပ်ႉယမ်ၼႄလွင်ႈမွင်ၸႂ်ၶၢဝ်းတၢင်း 1 ပီ။ လိူဝ်သေၼၼ်ႉ ဢွၵ်ႇၶေႃႈႁၢမ်ႈ ဢၼ်ႁၼ်ဝႃႈၵိုင်ႇလီႁၢမ်ႈလၢႆပိူင် ဢၼ်ပိုၼ်ၽၢဝ်ႇ ဢၼုၺၢတ်ႈပၼ် ပိုတ်ႇၶိုၼ်းၼႆႉ ။