ၼုမ်ႇၸၢႆးတႆး ဢႃယု 23 ပီ ၸႃတိမိူင်းလႃး-မႃးႁဵတ်းၵၢၼ်တီႈမႄႈသၢႆၼၼ်ႉ ၽႅၼ်ၶေႃး ၶႃႈတူဝ် ၸဝ်ႈၵဝ်ႇတၢႆ ။

ဝၼ်းတီႈ 02/11/2016 ယၢမ်း ၵၢင်ၼႂ် မွၵ်ႈ 07:00 မူင်း ၸၢႆးပၼ် ဢႃယု 23 ပီ ၽႅၼ်ၶေႃးတၢႆ။ တီႈသၢင်ႈတိုၵ်းႁိူၼ်းမႂ်ႇ ၼိူဝ်သဵၼ်ႈတၢင်း 6 ပွၵ်ႉ 9 ၼႂ်းဢိူင်ႇၽၢင်းၶမ်း ၸႄႈဝဵင်းမႄႈသၢႆ ၸႄႈတွၼ်ႈ ၵဵင်းႁၢႆး ၸိုင်ႈထႆး ။


ပႃႈသႅင် ၵေႃႉပဵၼ်မႄႈမၼ်းၸၢႆး လၢတ်ႈဝႃႈ “ မိူဝ်ႈပႆႇတၢႆၼၼ်ႉတႄႉ ဢမ်ႇလႆႈႁၼ်မီးလွင်ႈသင် ၽိူဝ်ႇတၢႆယဝ်ႉတႄႉ လႆႈႁၼ်တၢင်းလင်၊ ၵွင်ႇၵေႃႈမၼ်းၸၢႆး မီးႁွႆးပေႃႉထုပ်ႉဝႆႉတင်းၼမ်လၢႆ၊ ပေႃးတၢႆၽႅၼ်ၶေႃးယူဝ်းယူဝ်းတႄႉ တေဢမ်ႇလႅပ်ႈပဵၼ် တေလႅပ်ႈမီးၵၢၼ်ၽိတ်းမေႃးၵၼ် သေပိူင်ပိူင်ၼၼ်ႉယဝ်ႉ” ဝႃႈၼႆ ။


ၸၢႆးပၼ်ၼႆႉ ပဵၼ်လုၵ်ႈၸၢႆးလုင်းဢုၼ်ႇပႃႈသႅင် မီးပီႈၼွင်ႉႁူမ်ႈတွင်ႉၵၼ် 4 ၵေႃႉ မၼ်းၸၢႆးပဵၼ်ၵေႃႉ တီႈသွင်၊ ၸႃတိ တီႈၵိူတ်ႇ ပဵၼ်ဝဵင်းမိူင်းလႃး ၸိုင်ႈတႆး ပွတ်းဢွၵ်ႇၶူင်း၊ ၵၢၼ်ႁႃၵိၼ်လဵင်ႉ တွင်ႉသမ်ႉ ႁဵတ်းၵိၼ်ၵေႃႇသၢင်ႈ ၼႂ်းၸႄႈဝဵင်းမႄႈသၢႆ ဝႃႈၼႆ ။


ၵဵဝ်ႇၵပ်းလူၺ်ႈလွင်ႈၵၢၼ်တၢႆ ၸၢႆးပၼ်ၼႆႉသေ ယူႇတီႈပီႈၼွင်ႉၸိူဝ်ႉၶိူဝ်းမၼ်းၸၢႆး ဢွၼ်ၵၼ် လုမ်းလႃးၶၢပ်ႈတူဝ် ၸွမ်းၼင်ႇၾိင်ႈႁိတ်ႈႁွႆးမီး။ လိူင်ႈၵၢၼ်တၢႆၼႆႉ ယူႇတီႈၸဝ်ႈၼႃႈတီႈ ပလိၵ်ႈ ၸႄႈဝဵင်း မႄႈသၢႆ တေၵူတ်ႇထတ်းလွင်ႈတၢင်းၵႂႃႇ ၸွမ်းၼင်ႇ ပၵ်းပိူင်မိူင်းထႆးမီး ဝႃႈၼႆ ။