ပီႈၼွင်ႉတႆး ၶဝ်ႈႁဵတ်းၵၢၼ်ၼႂ်းမိူင်းထႆး ၵဵင်းမႆႇ၊ သွင်ၽူဝ်မေး မီးလွင်ႈၽိတ်းမေႃးပေႃႉထုပ်ႉၵၼ်ယဝ်ႉပႅတ်ႈၵၼ်။ ၾၢႆႇၵူၼ်းၸၢႆး ၶိုၼ်းမႃးယွၼ်းယူႇၸွမ်းၵေႃႈ ၼၢင်းယိင်းဢမ်ႇၽွမ်ႉ၊ ၵိူတ်ႇၵၢၼ်ၶႃႈႁႅမ်ၵၼ်လူႉသဵင်ႈတၢႆၵႂႃႇ 2 ၵေႃႉ၊ ၵေႃႉပဵၼ်ၽူဝ်ၵဝ်ႇ ၶႃႈႁႅမ်မေးၼၢင်းလႄႈ ပေႃႈၾၢႆႇမေး ။

လုင်းၼႃႇလိင်ႇ တင်းလုၵ်ႈယိင်းၼၢင်းယူင်ႇ

ၸၢႆးတေႃး တင်းလုၵ်ႈသိုပ်ႇမၼ်းသွင်ၵေႃႉပီႈၼွင်ႉ

ပူၼ်ႉမႃးမိူဝ်ႈၶမ်ႈဝၼ်းတီႈ 21/11/2016 ၶၢဝ်းယၢမ်းမွၵ်ႈ 18:00 မူင်းပၢႆ၊ ပီႈၼွင်ႉတႆးႁႅင်းၵၢၼ်ယၢၼ်မိူင်း ဢၼ်လုၵ်ႉမိူင်းတႆး ၶဝ်ႈမႃးႁဵတ်းၵၢၼ်ၼႂ်းမိူင်းထႆး မီးလွင်ႈၶႃႈၵၼ်တၢႆ တီႈဝၢၼ်ႈမူႇ 5 ဢိူင်ႇမိူင်ၵႅဝ်ႈ ၸႄႈဝဵင်းမႄႈရိမ်း မိူင်းၵဵင်းမႆႇ မိူင်းထႆး။ ၽူႈၵေႃႉပဵၼ်ၵူၼ်းၶႃႈႁႅမ် ၸိုဝ်ႈၸၢႆးတေႃး၊ ၽူႈၵေႃႉလႆႈလူႉသဵင်ႈတၢႆၵႂႃႇ ၸိုဝ်ႈၼၢင်းယူင်ႇ တင်းလုင်းၼႃႇလိင်ႇ ႁူမ်ႈ 2 ၵေႃႉ- ၼႆယဝ်ႉ ။


ၸၢႆးတေႃး ဢႃယု 44 ပီ၊ ၶဝ်ႈႁဵတ်းၵၢၼ်မိူင်းထႆး လႆႈမွၵ်ႈ 15-16 ပီ၊ ပဵၼ်ၵူၼ်းၶူဝ်လမ် (ၶူဝ်ၶမ်း) ပွၵ်ႉ 2 ၊ ၸိုဝ်ႈမႄႈႁွင်ႉဝႃႈ ပႃႈလူႇ။ ၼၢင်းယူင်ႇ ဢႃယု 34 ပီ၊ ပေႃႈလုင်းၼႃႇလိင်ႇ (ၵေႃႉတၢႆ)၊ ၸိုဝ်ႈမႄႈပႃႈၵျႃႇ၊ ၶဝ်ႈႁဵတ်းၵၢၼ်မိူင်းထႆး လႆႈမွၵ်ႈပီပၢႆ။ မီးလုၵ်ႈလၢင်းဝႆႉၵိုၵ်း ၽူဝ်ၵေႃႉဢွၼ်တၢင်း 2 ၵေႃႉ၊ ယိင်းၼိုင်ႈၸၢႆးၼိုင်ႈ၊ ယိင်း 8 ၶူပ်ႇ၊ ၸၢႆး 5 ၶူပ်ႇ။ လုင်းၼႃႇလိင်ႇ ဢႃယု 72 ပီ (ပေႃႈၼၢင်းယူင်ႇ ၵေႃႉလူႉတၢႆ)၊ ပဵၼ်ၵူၼ်းၶူဝ်လမ် ပွၵ်ႉ 4 -ၼႆယဝ်ႉ ။


မိူဝ်ႈလဵဝ် ၶၢပ်ႈတူဝ်တၢႆလုင်းၼႃႇလိင်လႄႈ ၼၢင်းယူင်ႇၼႆႉ ၾၢႆႇပီႈၼွင်ႉၸိူဝ်ႉၶိူဝ်း၊ ၸုမ်းတူင်ႉၼိုင်လွင်ႈ တူင်ႇဝူင်းၵူၼ်းၸိူဝ်းၼႆႉ ၸွႆႈထႅမ်ၵၼ်သေ ဢဝ်ဝႆႉတီႈဝတ်ႉဝင်းမုင်ႉ ဢိူင်ႇသၼ်ပူင်ႇ ၸႄႈဝဵင်းမႄႈရိမ်း ၸႄႈတွၼ်ႈၵဵင်းမႆႇ။ တေပူၼ်ႉၶၢပ်ႈတူဝ်-ႁွပ်ႇႁူဝ်ၶဝ်ႈႁဵဝ်ႈ ၼႂ်းဝၼ်းသုၵ်းတီႈ 25/11/2016 တီႈပႃႇႁဵဝ်ႈဝတ်ႉဝင်းမုင်ႉ ဢိူင်ႇသၼ်ပူင်ႇ ၸႄႈဝဵင်းမႄႈရိမ်း-ၼႆယဝ်ႉ ။


ၸၢႆးတေႃး ၽူႈလူင်းမိုဝ်းၶႃႈႁႅမ်ၵူၼ်း 2 ၵေႃႉၼႆႉ ပေႃးၶႃႈႁႅမ်ယဝ်ႉ ၶမ်ႈဝၼ်းတီႈ 21 ၼၼ်ႉၵေႃႈပၢႆပႅတ်ႈ။ ထိုင်မႃးဝၼ်းတီႈ 22 ၼၼ်ႉ ၵႂႃႇၶီႇလူတ်ႉလႅင် (လူတ်ႉသၢႆ) တီႈတႃႈလူတ်ႉၼွင်ႁၢၼ်သေ ၸဝ်ႈလူတ်ႉလႅင်သမ်ႉ ဢိင်ၼိူဝ်မီးၵူၼ်းၸႅင်ႈလၢတ်ႈသေ ႁပ်ႉႁူႉလွင်ႈၶႃႈႁႅမ်ၼႆႉဝႆႉလႄႈ ဢဝ်မၼ်းၸၢႆးၵႂႃႇသူင်ႇတီႈ ႁူင်းပလိၵ်ႈ ၸႄႈဝဵင်းသၼ်သၢႆး၊ ၸဝ်ႈၼႃႈတီႈပလိၵ်ႈထႆးသၼ်သၢႆးၶဝ်ၵေႃႈ တီႉၺွပ်းမၼ်းၸၢႆးယဝ်ႉ- လႆႈႁူႉၼင်ႇၼႆ ။


ပိူင်ပဵၼ်လွင်ႈလႆႈၵိူတ်ႇၶိုၼ်ႈ ၵၢၼ်ၶႃႈႁႅမ်ၵၼ်တၢႆပွၵ်ႈၼႆႉ ၸၢႆးဝႃႇယႃႇမ ၵေႃႉပဵၼ်လုၵ်ႈပီႈလုၵ်ႈၼွင်ႉ ၵၼ်တင်းၼၢင်းယူင်ႇ (ၵေႃႉလူႉသဵင်ႈၵႂႃႇ) လၢတ်ႈဝႃႈ- ၸၢႆးတေႃးတင်းၼၢင်းယူင်ႇၼႆႉ တိုၵ်ႉၸင်ႇႁႃဢဝ်ၵၼ် မိူဝ်ႈတေၶဝ်ႈဝႃႇၼၼ်ႉၵူၺ်း။ ဢိင်ၼိူဝ်သွင်ၶႃၵႆႉၽိတ်းမေႃးၵၼ်၊ ၵေႃႉပဵၼ်ၽူဝ်ၵႆႉထုပ်ႉမေးၼၢင်းလႄႈ ၼၢင်းယူင်ႇၼႆႉ ဢမ်ႇဢူတ်းယိူၼ်ႉလႆႈတႃႇယူႇၸွမ်းၵၼ်ၵႂႃႇထႅင်ႈသေ ယွၼ်းပႅတ်ႈ။ မိူဝ်ႈဝၼ်းတီႈ 21 ၵၢင်ၼႂ်ၼၼ်ႉ ႁဵတ်းလိၵ်ႈပႅတ်ႈၵၼ်ယဝ်ႉ၊ ၶမ်းၵႃႈၾၢၵ်ႇမိူဝ်ႈဢဝ်ၵၼ် 1 ဝၢတ်ႇၵေႃႈ ၾၢႆႇၼၢင်းယိင်း ပၼ်ၶိုၼ်းယဝ်ႉ၊ ငိုၼ်းၵႃႈၾၢၵ်ႇမိုၼ်ႇႁႃႈ (15,000) ဝၢတ်ႇၵေႃႈ ၾၢႆႇၼၢင်းယိင်း ပၼ်ၶိုၼ်းမိုၼ်ႇၸဵတ်း (17,000) လူးၵွၼ်ႇယဝ်ႉ ။


ၵူၺ်းၵႃႈ ၼႂ်းဝၼ်းၼၼ်ႉၵူၺ်းၼင်ႇၵဝ်ႇ ဝၢႆးဝၼ်းတၢမ်းၶမ်ႈ ၸၢႆးတေႃးၶိုၼ်းမိူဝ်းယွၼ်းယူႇၸွမ်း ၼၢင်းယူင်ႇၶိုၼ်း။ မိူဝ်ႈၼၼ်ႉ မႅၼ်ႈမိူဝ်ႈၽွင်းၼၢင်းယူင်ႇၵႂႃႇႁဵတ်းၵၢၼ်မႃးသေ ဢၢပ်ႇၼမ်ႉသၵ်ႉၶူဝ်း ယဝ်ႉဢွၵ်ႇမႃး။ ၼၢင်းယူင်ႇဝႃႈႁႃးပႅတ်ႈၵၼ်ယဝ်ႉ၊ ဢမ်ႇဢဝ်ၵၼ်ၶိုၼ်းလႆႈယဝ်ႉ။ ႁဵတ်းၵၢၼ်တီႈလဵဝ်ၵၼ် တီႈပေႃႈလဵင်ႉလဵဝ်ၵၼ်တႄႉလႆႈယူႇ။ ၵူၺ်းၵႃႈ ဢဝ်ၵၼ်ၶိုၼ်းဢမ်ႇလႆႈယဝ်ႉ။ မိူဝ်ႈၼၼ်ႉ ၸၢႆးတေႃးဢဝ်ၽႃႉ ၽၼ်းတီႈၵၢင်လင်ၼၢင်းယူင်ႇ၊ ၼၢင်းယူင်ႇႁွင်ႉသႅၼ်ႇသေလႅၼ်ႈပၢႆႈ၊ ပေႃႈၼၢင်းယူင်ႇ လုင်းၼႃႇလိင်ႇ သမ်ႉဢွၵ်ႇမႃးႁၢမ်ႈဝႃႈ ယႃႇပေႁဵတ်း၊ ၸၢႆးတေႃးၵေႃႈ ဢဝ်ၽႃႉၾၼ်းလုင်းၼႃႇလိင်ႇထႅင်ႈ 2 ၵမ်း ။


ပေႃးလုင်းၼႃႇလိင်ႇလူမ်ႉယဝ်ႉၵေႃႈ ၸၢႆးတေႃးလိုပ်ႈလမ်းၸွမ်း ၼၢင်းယူင်ႇၵႂႃႇထႅင်ႈ၊ ၵမ်းၼႆႉဢဝ်မၢၵ်ႇၵူင်ၵွၼ် ပိုတ်းဢဝ်။ ၼၢင်းယူင်ႇပၢႆႈၵႂႃႇၺႃးတၢင်းတိူၵ်ႈ၊ သမ်ႉမႆႈၸႂ်ပေႃႈမၼ်းလႄႈလုၵ်ႈလၢင်းမၼ်း၊ မၼ်းၸင်ႇဢွၵ်ႇ မႃးသေ လႆႈထုၵ်ႇၸၢႆးတေႃးဢဝ်ၶွၼ်ႉထုပ်ႉသႂ်ႇထႅင်ႈသေတၢႆၵႂႃႇ။ လုၵ်ႈလၢင်းၼၢင်းယူင်ႇၼၼ်ႉၵေႃႈ ပေႃးပီႈၼွင်ႉဢဝ်ၸၼ်ၶႅၼ်ဢဝ်လႅၼ်ႈပၢႆႈတႄႉ ၸၢႆးတေႃးၼႆႉ မၼ်းလၢတ်ႈဝႃႈ တေဢၢၼ်းၶႃႈႁႅမ်တၢႆပႅတ်ႈ တင်းမူတ်း- ၸၢႆးဝႃႇယႃႇမ လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။