ၵူၼ်းဝၢၼ်ႈဢုပ်ႇၵၼ်ၼိူဝ်ႁိူၼ်းသဵင်လင်သေ သိုၵ်းမၢၼ်ႈမၢပ်ႇၽၢမ်း ၸီႉၼႄးဝႃႈ ၸိူဝ်းၶဝ်ပွင်ႇၶၢဝ်ႇပၼ် သိုၵ်းထိူၼ်ႇ မႃးႁၢင်ႈၵၢင်မၢၵ်ႇတႅၵ်ႇတေႃႇၶဝ်ၼႆသေ ပေႃႉထုပ်ႉၵူၼ်းဝၢၼ်ႈ လိူတ်ႈတႅၵ်ႇယၢင်ဢွၵ်ႇ ၶဵဝ်ႈႁူင်ႈ ဝိၼ်ႁူသိၵ်ႇ ၼင်ႁူဝ်ပွင်ႇ ။

ၵူၼ်းမိူင်းသၢမ်ၵေႃႉၸိူဝ်းထုၵ်ႇ သိုၵ်းမၢၼ်ႈပေႃႉထုပ်ႉႁႅမ်

မိူဝ်ႈဝၼ်းတီႈ 13/11/2016 ယၢမ်း 8 မူင်း၊ သိုၵ်းမၢၼ်ႈပႃႈတႂ်ႈ တပ်ႉၸုမ်းလူင် (တပ်ႉမ) 33 ၊ တပ်ႉၵွင် ၶလယ 119 ႁႅင်းၵူၼ်း 50 ၵေႃႉပၢႆ၊ ၼေႇဝိၼ်းထုၼ်းဢွၼ်ႁူဝ် မႃးၼွၼ်းတီႈဝၢၼ်ႈၵုင်းပဝ်း၊ ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ။ သိုၵ်းမၢၼ်ႈတပ်ႉၼႆႉ ပေႃႉထုပ်ႉႁႅမ်ၵူၼ်းဝၢၼ်ႈ 3 ၵေႃႉ- လုင်းလႃႉဝုၼ်း၊ ၸၢႆးဢၢႆႈၺုၼ်ႉ လႄႈၸၢႆးဢၢႆႈထုၼ်း- ၼႆယဝ်ႉ ။


လွင်ႈတၢင်းဢၼ်သိုၵ်းမၢၼ်ႈပေႃႉထုပ်ႉ ၸိူဝ်းၶဝ်ၼႆႉ ၸိူဝ်းၶဝ်ဢုပ်ႇၵၼ်ၼႂ်းႁိူၼ်း၊ ယွၼ်ႉလုင်းလႃႉဝုၼ်း ႁူၼူၵ်ႇလႄႈ ၶဝ်ဢုပ်ႇၵၼ်သဵင်လင်။ သိုၵ်းမၢၼ်ႈသမ်ႉပႂ်ႉယၢမ်းၾၢႆႇလင်ႁိူၼ်းၶဝ်သေ ငိၼ်းမႅၼ်ႈ၊ သိုၵ်းမၢၼ်ႈၶဝ်ထၢင်ႇၽိတ်းသေ မၢပ်ႇၽၢမ်းၸီႉၼႄးၶဝ်ဝႃႈ ၶဝ်သၢမ်ၵေႃႉပွင်ႇၶၢဝ်ႇပၼ်သိုၵ်းထိူၼ်ႇ ႁႂ်ႈမႃးႁၢင်ႈမၢၵ်ႇတႅၵ်ႇသႂ်ႇၶဝ်ၼႆသေ ပေႃႉထုပ်ႉႁႅမ်-ဝႃႈၼႆ ။


ၵူၼ်းမိူင်း 3 ၵေႃႉ ၸိူဝ်းၺႃးပေႃႉထုပ်ႉၼႆႉ လုင်းလႃႉဝုၼ်း ဢႃယု 64 ပီ၊ ၵူၼ်းၸႃႇတိၼမ်ႉတူႈ ပေႃႈပဵၼ်မၢၼ်ႈ မႄႈပဵၼ်တႆး၊ မႃးယူႇတီႈဝၢၼ်ႈၵုင်းပဝ်းသေ ႁဵတ်းၵၢၼ်။ ၺႃးပေႃႉထုပ်ႉတီႈသူပ်းလႄႈၶဵဝ်ႈႁူင်ႈၼိုင်ႈသိၵ်ႈ၊  ၶဵဝ်ႈထႅင်ႈသိၵ်ႈၼိုင်ႈၵေႃႈၶွၼ်းဝႆႉ ။


ၸၢႆးၺုၼ်ႉ ဢႃယု 25 ပီ၊ ပဵၼ်ၸၢဝ်းၶိူဝ်းတႆး၊ ၸိုဝ်ႈပေႃႈလုင်းၸိင်ႇပၢၼ်း၊ ၸိုဝ်ႈမႄႈပႃႈမျႃႉၸိင်ႇ ၸႃႇတိဝဵင်း လႃႈသဵဝ်ႈ ပွၵ်ႉပူႇတႃႇ၊ ယၢမ်းလဵဝ် ယူႇတီႈဝၢၼ်ႈၵုင်းပဝ်း။ ၺႃးသိုၵ်းမၢၼ်ႈဢဝ်တိၼ်ပိတ်ႉၵွၵ်းႁူဝ်လႄႈၵွင်ႇၵေႃႈ၊ ဢဝ်ဝိၼ်ႇႁူသိၵ်ႇဝႆႉ ။


ၸၢႆးဢၢႆႈထုၼ်း ဢႃယု 16 ပီ၊ ပဵၼ်ၸၢဝ်းၶိူဝ်းလွႆ၊ ၸိုဝ်ႈပေႃႈႁွင်ႉလုင်းသီႇရိ၊ ၸိုဝ်ႈမႄႈႁွင်ႉပႃႈၵိုတ်း၊ ၺႃးသိုၵ်းမၢၼ်ႈႁႅမ်တီႈၵွၵ်းႁူဝ်သေ ဢဝ်ၼင်ႁူဝ်ပွင်ႇယဝ်ႉလိူတ်ႈလႆ ။


ဝၢႆးၼၼ်ႉ သိုၵ်းမၢၼ်ႈသိုပ်ႇမတ်ႉဝႆႉထႅင်ႈမွၵ်ႈ 30 မိၼိတ်ႉ၊ ထဝ်ႈဝၢၼ်ႈထဝ်ႈၼႃးၶဝ် လႆႈလၢတ်ႈႁပ်ႉႁွင်းဢဝ် ၸင်ႇပွႆႇပၼ်ၶိုၼ်း- ၼႆယဝ်ႉ ။


ဝၢၼ်ႈၵုင်းပဝ်း ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ယူႇၼႂ်းၸႄႈဝဵင်းမၢႆ 17 ၶွင် ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ။