ၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် SNLD ၸႄႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း တၢင်ႇလၢတ်ႈ ၼႂ်းပၢင်ၵုမ်သၽႃးၵူၼ်းမိူင်း ၶႂ်ႈလႆႈလွင်ႈၵမ်ႉထႅမ် ၾၢႆႇပၢႆးပၺ်ၺႃ တႃႇ ႁူင်းႁဵၼ်း  17 လင် ၼႂ်းၸႄႈဝဵင်းၵုၼ်ႁဵင် ဝႃႈၼႆ ။

ဝၼ်းတီႈ 21/11/2016 ပၢင်ၵုမ်သၽႃးၵူၼ်းမိူင်း ပွၵ်ႈၵမ်း 2 ၵမ်းထူၼ်ႈ 3 တီႈၼေႇပျီႇတေႃႇ ၼၢင်းၸၼ်ၶမ်း(ၶ) ၼၢင်းၶိၼ်ႇသေႃး ၽူႈတႅၼ်းသၽႃးၵူၼ်းမိူင်း ၸႄႈဝဵင်းၵုၼ်ႁဵင် တုၵ်းယွၼ်း ၶႂ်ႈလႆႈလွင်ႈၵမ်ႉၸွႆႈတႃႇပူၵ်းပွင်မူၼ်ႉမႄးႁူင်းႁဵၼ်း ၸၼ်ႉဢွၼ် 17 လင် ဝႃႈၼႆ ။


ၼၢင်းၸၼ်ၶမ်း(ၶ) ၼၢင်းၶိၼ်ႇသေႃး ၽူႈတႅၼ်းသၽႃးၵူၼ်းမိူင်းၵုၼ်ႁဵင် လၢတ်ႈဝႃႈ “ႁူင်းႁဵၼ်းၼႆႉ ဢွၵ်ႇၸိုဝ်ႈႁူင်းႁဵၼ်းလူင်ပွင်ၸိုင်ႈယူႇသေတႃႉ ဢမ်ႇမႃးႁဵတ်းသင်ပၼ်တီႈႁူင်းႁဵၼ်း၊ တႄႇဢဝ်မိူဝ်ႈပီ 2000-2016 မႃး ယူႇတီႈပေႃႈမႄႈၵူၼ်းမိူင်းသေ လႆႈဢဝ်ငိုၼ်းၸဝ်ႈၵဝ်ႇ မႃးသၢင်ႈႁင်းၵွႆး၊  ၵွပ်ႈၼႆလႄႈ လုၵ်ႈဢွၼ်ႇႁဝ်း လႆႈႁဵၼ်းသွၼ်ဢဝ်မႃးပီယၢဝ်းၶၢဝ်းႁိုင်  မီးလွင်ႈယၢပ်ႇၽိုတ်ႇ။ ႁူင်းႁဵၼ်းၼႆႉ မၢင်လင်ၵေႃႈ လႆႈဢဝ် ၽႃႈၵင်ႈ၊ မၢင်လၢင်ၵေႃႈ လႆႈဢဝ်ၽႃလၢႆးလူင်ၵင်ႈ၊ ၵွပ်ႈၼၼ်မႆႈၸႂ်တႃႇ ႁူမ်ႇလူမ်ႈလုၵ်ႈဢွၼ်ႇ ႁဝ်းၶႃႈ ၸင်ႇလူင်းပိုၼ်ႈတီႈ ၵဵပ်းသဵၼ်ႈ သၢႆမၢႆမႃး တင်းမူတ်း။ ႁူင်းႁဵၼ်းၸၼ်ႉဢွၼ် ဢၼ်လႆႈလူႉလႅဝ်ဝႆႉ မီး 17 လင် ဝႃႈၼႆ ။


ၼၢင်းၶိၼ်ႇသေႃး လႆႈတၢင်ႇပႃးလွင်ႈ လုၵ်ႈႁဵၼ်းလိၵ်ႈလၢႆး ႁူပ်ႉတၢင်းယၢပ်ႇၽိုတ်ႇ လွင်ႈၵႂႃႇမႃး လွင်ႈႁဵၼ်းလိၵ်ႈလၢႆး ၸိူဝ်းၼႆႉ ဝႃႈၼႆ ။


တွၵ်ႊတိူဝ်ႊ မဵဝ်းတဵင်းၵျီး ၽွင်းလူင်ၾၢႆႇပၢႆးပၺ်ၺႃ တွပ်ႇလၢတ်ႈၼႂ်းသၽႃးဝႃႈ “  ႁဝ်းၶႃႈတေထတ်းသၢင်တူၺ်းသေလႄႈ ဢဝ်ၶေႃႈမၵ်းမၼ်ႈတီႈလူင်ပွင်ၸိုင်ႈ မိူင်းတႆးသေ တေၶတ်းၸႂ်ႁဵတ်းသၢင်ႈပၼ်ၵႂႃႇယူႇ။ ၼႂ်းၼၼ် ႁဝ်းၶႃႈဢဵၼ်းဢၢၼ်းတမ်းငိုၼ်း ၵွင်ငိုၼ်း 840 သႅၼ်ပျႃး တႃႇၸႂ်ႉၸၢႆႇ ပႅတ်ႇပၢၵ်ႇသီႇသႅၼ်ပျႃး တွၼ်ႈတႃႇၸၼ်ႉဢွၼ်(မူလ) ၼႂ်းၸႄႈဝဵင်းၵုၼ်ႁဵင်၊ တေၶတ်းၸႂ် ႁဵတ်းသၢင်ႈပၼ်ၼႂ်းပီ 2017-2018 ၵႂႃႇ၊ ၵူၺ်းၵႃႈ တႃႇတေလူင်းမိုဝ်း ႁဵတ်းသၢင်ႈၼၼ်ႉ  တေလႆႈပႂ်ႉၾၢႆႇပၢႆးပၺ်ၺႃမိူင်းတႆး မၵ်းမၼ်ႈပၼ် ” ဝႃႈၼႆ ။


ႁူင်းႁဵၼ်းၸၼ်ႉဢွၼ်(မူလ) ဢၼ်လႆႈလူႉၵွႆဝႆႉ တင်းမူတ်းမီး 17 လင် ပဵၼ် ႁူင်းႁဵၼ်းၸၼ်ႉဢွၼ် ဝၢၼ်ႈလူင်ယၼ်း၊ ဝၢၼ်ႈပၢတ်ႇ၊ ဝၢၼ်ႈၼမ်ႉဝႅင်း၊ ဝၢၼ်ႈၼႃးၵႅင်း၊ ဝၢၼ်ႈႁွင်ႈလိုၵ်ႉ၊ ဝၢၼ်ႈၼွင်ၶမ်း၊ ဝၢၼ်ႈၵုတ်ႉပူင်ႇ၊ ဝၢၼ်ႈၾၢႆႇ၊ ဝၢၼ်ႈႁိုၼ်း၊ ဝၢၼ်ႈဢိင်၊ ဝၢၼ်ႈၼႃးၵၢင်၊ ဝၢၼ်ႈဝဵင်းၽုၺ်း၊ ဝၢၼ်ႈၼမ်ႉမေႃႇတွင်း၊  ၼႃးဝၢၼ်ႈပၢင်မူင်ႈ၊ ဝၢၼ်ႈၼႃးၶွၵ်း၊ ဝၢၼ်ႈသၢႆးၶၢဝ်လႄႈ ၸၼ်ႉဢွၼ် 524 ၸဵမ်ၸိူဝ်းၼႆႉ၊ ၼႂ်းၸႄႈဝဵင်းၵုၼ်ႁဵင်ၼႆႉ ႁူင်းႁဵၼ်းၸၼ်ႉဢွၼ် (မူလ) တင်းမူတ်း မီး 48 လင်၊ လုၵ်ႈႁဵၼ်းတင်းမူတ်း မီး 3106 ၵေႃႉ ဝႃႈၼႆ ။