ၸုမ်းသင်ၶၸဝ်ႈ ထုင်ႉဝၢၼ်ႈႁၢတ်ႇတင်းသဵင်ႈ ဢၼ်မီးၸဝ်ႈၵွၼ်းဝတ်ႉပရႁိတ မၢၵ်ႇၵႅင်းမူၼ်း ဢွၼ်ႁူဝ်ၼမ်ၼႃႈ တၵ်ႉၵႃ ၸိူဝ်းယူႇသဝ်းၵိၼ်သၢင်ႈၼႂ်းထုင်ႉဝၢၼ်ႈႁၢတ်ႇ ၵူၼ်ႈဝၢၼ်ႈဝၢၼ်ႈတင်းသဵင်ႈ ၶုၵ်းထူပ်းၶွပ်ႇထိုင်ၸဝ်ႈတႃႇၼလူင် လုင်းၶွင်း မွင်ႇၼု လုင်းၽႃႉသၢင်ႇမွင်ႇ ဢွၼ်တႄႇတင်ႈဝတ်ႉမႃး မိူဝ်ႈပီၶရိသ်ႉ 1916 ၼၼ်ႉ ႁူမ်ႈလူၺ်ႈတူၼ်ၸဝ်ႈၶူးလူင် ၺႃၼသမ်ၽႃရ (မႁႃၼႃယၵတူၼ်ထူၼ်ႈ 4 ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆး) ဝတ်ႉပိတၵၢတ်ႈ ဝဵင်းပၢင်လူင်၊ ၸဝ်ႈတူၼ်ၶူးဝိရိယၵၶဝ်ၸဝ်ႈ ဢၼ်လႆႈပိုတ်ႇသၢင်ႈပၼ်ႁူင်းႁဵၼ်းလဵင်ႉလူလုၵ်ႈတိၼ်ႇၽပရႁိတမၢၵ်ႇၵႅင်းမူၼ်း မိူဝ်ႈပီ 1961 ၼၼ်ႉသေ ၶဝ်ႈၸဝ်ႈၸိူဝ်းလပ်ႉလွႆငိုၼ်းလွႆၶမ်းႁပ်ႉမိူင်းၾႃႉယႃႇမိူင်းလုမ်ႈၵႂႃႇၼၼ်ႉ ၵေႃႇတင်ႈႁဵတ်းဝႆႉပၼ်ဝတ်ႉ မၢၵ်ႇၵႅင်းမူၼ်းမႃးၶၢဝ်းတၢင်းၼပ်ႉ 100 ပီ ။

ၼင်ႇႁိုဝ်တေပဵၼ်တီႈမၢႆတွင်းၶၢဝ်းတၢင်း 100 ပီၼၼ်ႉ ၶိုၼ်းမႄးၵေႃႇသၢင်ႈဝတ်ႉၽၸဝ်ႈ(ၵျွင်းၽြႃး)ပဵၼ်ၸဝ်ႈမႁႃမုၼိ ယဝ်ႉတူဝ်ႈလီငၢမ်းသေ တေယၢတ်ႇၼမ်ႉၶႂမ်ႈဝူၺ်လူတၢၼ်းၼႂ်းဝၼ်းတီႈ 27-30/11/2016 ။


ၼႂ်းၶၢဝ်းတၢင်း 4 ဝၼ်းၼႆႉတေမီးပႃးၵၢၼ်လူင်းပၢင်သွၼ်ႁူင်းႁဵၼ်းထမ်းမ ထုင်ႉဝၢၼ်ႈႁၢတ်ႇလႄႈပွႆးတၢင်ႇထီးၽရႃႉထၢတ်ႈ တင်းပွႆးပီမႂ်ႇတႆး ။


ၶပ်ႉမၢႆၵၢၼ်

ဝၼ်းတီႈ 27/11/2016 ၵၢင်ၼႂ်ယၢမ်း 9.00 မူင်း ပၢင်ၻေးသၼႃးထမ်း (တြႃး) ငဝ်းႁၢင်ႈသဵင် ၸဝ်ႈၶူးလူင်ၻွၵ်ႉတိူဝ်ႊ ၶမ်းမၢႆ ထမ်းမသႃမိ ၸဝ်ႈၵွၼ်းဝတ်ႉဢွၵ်ႉသ်ၽိူတ်ႉ ၸိုင်ႈမိူင်းဢင်းၵိတ်း ။

ဝၼ်းတီႈ 28/11/2016 ပၢင်ၻေးသၼႃးထမ်း(တြႃး)ၸဝ်ႈၶူးၼၼ်တိယ ဝတ်ႉမူၺ်ႇတေႃႇပၢင်လူင် ။

ဝၼ်းတီႈ 29/11/2016 ပၢင်ၻေးသၼႃးထမ်း(တြႃး)ၸဝ်ႈၶူးမႁႃသႅင်ၾႃႉ ၸဝ်ႈဢၼ်ပိုၼ်ၽႄႈသႃသၼႃၼွၵ်ႈမိူင်း ၊

ဝၼ်းတီႈ 30/11/2016 လူႇတၢၼ်းယၢတ်ႇၼမ်ႉ ႁူမ်ႈတင်းပၢင်ယွင်ႈၵုၼ်းမုၼ်ၸဝ်ႈၶူးမႁႃသႅင်ၾႃႉၸဝ်ႈဢၼ်ယၢမ်ႈၵႂႃႇၸွႆႈ ၼႃႈၵၢၼ်သႃသၼႃၸွမ်းတူၼ်ၸဝ်ႈၶူးလူင်ၻွၵ်ႉတိူဝ်ႊၶမ်းမၢႆထမ်းမသႃမိ တီႈမိူင်းဢင်းၵိတ်း။ ၵၢင်ၶမ်ႈတေမီးပၢင်လဝ်ႇမူၼ်ႈတူၼ်ႈၸႂ်တၢင်းၵႃႈဝႅၼ်လုၵ်ႈႁဵၼ်းႁူင်းႁဵၼ်းထမ်းမ ထုင်ႉဝၢၼ်ႈႁၢတ်ႇ၊ ႁူင်းႁဵၼ်းထမ်းမဝဵင်းလၢင်းၶိူဝ်း၊ ဝဵင်းမွၵ်ႇမႆႇ၊ ဝဵင်းမိူင်းပၼ်ႇ ။


ဝတ်ႉပရႁိတမၢၵ်ႇၵႅင်းမူၼ်းၼႆႉ တင်ႈပၵ်းယူႇတီႈဝၢၼ်ႈမၢၵ်ႇၵႅင်းမူၼ်း ဢိူင်ႇဝၢၼ်ႈႁၢတ်ႇ ၸႄႈဝဵင်းလၢင်းၶိူဝ်း ယၢၼ်ဝဵင်း လၢင်းၶိူဝ်းမွၵ်ႈ 13 လၵ်း ယူႇၼိူဝ်သဵၼ်ႈတၢင်းလူင်ၵႂႃႇဝဵင်းမွၵ်ႇမႆႇ ဝၢၼ်ႈႁၢတ်ႇ၊ ယၢမ်းလဵဝ်မီးၸဝ်ႈၸၢင်း ၼႂ်းဝတ်ႉ 5 တူၼ် ၸဝ်ႈသၢင်ႇ 68 တူၼ်၊ ၵပ်ႉပီႇ 18 ၵေႃႉ၊ လုၵ်ႈႁဵၼ်းၸိူဝ်းမႃးၶိုၼ်ႈႁဵၼ်း 139 ၵေႃႉ ။