ဝၼ်းတီႈ 06/11/2016  ၸဝ်ႈတူၼ်ၶူးလူင် ၵျွင်းပဵင်းလူင်လႄႈ ၾၢႆႇဢုပ်ႉပိူင်ႇၼႂ်းပိုၼ်ႉတီႈ ဢွၼ်ႁူဝ် ၵူၼ်းဝၢၼ်ႈၵူၼ်းမိူင်း ၸတ်းႁဵတ်းပၢင်ထွမ်ႇထမ်း  ၽိတ်ႈပၢင်းဢဝ်ၸဝ်ႈၶူးသီရိထမ်မ (သင်ၶတႆး) ပွၼ်ႈထမ်းတြႃး ၸတ်းႁဵတ်းတီႈ ဝတ်ႉပဵင်းလူင် ၸႄႈဝဵင်း ဝဵင်းႁႅင် ၸႄႈတွၼ်ႈၵဵင်းမႆႇ ၸိုင်ႈထႆး။ မီးပီႈၼွင်ႉထႆး၊ တႆး၊ ပဢူဝ်း၊ လီးသေႃး၊ ၶႄႇ ၶဝ်ႈႁူမ်ႈထွမ်ႇငိၼ်း 400 ပၢႆ ။

ၸဝ်ႈၶူးသီရိထမ်မ လၢတ်ႈတီႈၼႂ်းပၢင်တြႃး တီႈပဵင်းလူင်ဝႃႈ - တႃႇတေပဵၼ်ၽူႈၼမ်းလီၼၼ်ႉ ၽူႈၼမ်းၵူႈၸဝ်ႈတၵ်းလႆႈမီး တြႃး6ၶေႃႈ ။


ပိူင်တြႃး 6 ၶေႃႈၼၼ်ႉတႄႉပဵၼ် 1.ယိူၼ်ႉ - ယိူၼ်ႉတေႃႇလွင်ႈယၢပ်ႇၽိုတ်ႇ၊ လွင်ႈတုၵ်ႉၶ၊ ယွမ်းႁပ်ႉၶေႃႈထတ်းသၢင်။ 2. တိုၼ်ႇ - တေလႆႈတူင်ႉတိုၼ်ႇ ၊ တေလႆႈဢွၼ်ႁူဝ်ႁဵတ်းသၢင်ႈယူႇတႃႇသေႇ၊ ပဵၼ်တူဝ်ယၢင်ႇလီ တႃႇၵူၼ်းတင်းၼမ်၊ 3. လုၵ်ႉၶတ်းၸႂ် - တေလႆႈမီးတၢင်းၶတ်းၸႂ်ယူႇ တႃႇသေႇ၊ တေဢမ်ႇလႆႈၼႄ ဢၼ်ၸဝ်ႈၵဝ်ႇၶၢၼ်ႉႁိုဝ် ၸဝ်ႈၵဝ်ႇဢမ်ႇ ပဵၼ်လႆႈ၊ 4. ၽႄပၼ် တေလႆႈ မီးၸႂ်ၵႂၢင်ႈတေႃႇၵူၼ်းတင်းၼမ် ၽႄပၼ်တၢင်းႁူႉတၢင်းႁၼ်၊ 5. ဢေးလူ - မီးၸႂ်ႁၵ်ႉႁွမ် ၸူမ်းပႅင်း ၼိူဝ်ၵူၼ်းတင်းၼမ်၊ ဢမ်ႇထိုဝ်တူဝ်၊ ဢမ်ႇဝႆႉမႃႇၼ ၊ ယူႇၸွမ်းၵၼ်ၼင်ႇဢူၺ်းၵေႃႉ၊ၼင်ႇပီႈၼွင်ႉလႆႈ ၊ 6. ဝူၼ်ႉႁၼ်  မေႃဝူၼ်ႉႁၼ်ၵႆ၊ ဝူၼ်ႉႁၼ်ၼႃႈၵၢၼ်တူဝ်ၸဝ်ႈၵဝ်ႇ ၸွင်ႇၶိုပ်ႈၼႃႈ၊ ၸွင်ႇထွႆလင် ဝူၼ်ႉထတ်းသၢင်ၶိုၼ်း ယူႇတႃႇသေႇ၊ ပေႃးမီး 6 ၶေႃႈၼႆႉၼႆၸိုင် ၵူၼ်းတင်းၼမ်ၵေႃႈတေႁၵ်ႉပႅင်း ဝၢၼ်ႈမိူင်း ၼႂ်းဢိူင်ႇပိုၼ်ႉတီႈၵေႃႈ တိုၼ်း ၶိုၼ်ႈယႂ်ႇဢမ်ႇႁၢင်ႉ ။


ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း လၢတ်ႈဝႃႈ - ၸဝ်ႈမုၼ်ယႂ်ႇၶုၼ်ႁေႃၶမ်း ၽူးမိၽူလ်း ဢၻုလ်းယၻဵတ်ႇ၊ ဢၼ်ပဵၼ်ၸိၵ်းၸွမ်တၢင်ႇၼိူဝ်ႁူဝ်ၵူၼ်းမိူင်းၸိုင်ႈထႆးၼႆႉ ယွၼ်ႉၸဝ်ႈ တိုဝ်းၵမ်ၼင်ႇပိူင်တြႃး 6ၶေႃႈၼႆႉတဵမ် ထူၼ်ႈ လီငၢမ်းလႄႈ ၵူၼ်းမိူင်းထႆးပတ်းပိုၼ်ႉလႄႈ ၵူၼ်းၼႂ်းလုမ်ႈ ၾႃႉၸင်ႇယုၵ်ႉယွင်ႈ ဢဝ်ၵုင်ႇမုၼ် ႁၵ်ႉပႅင်းမၼ်းၸဝ်ႈတႄႉ တႄႉယွၼ်ႉၼၼ်လႄႈ ဢမ်ႇဝႃႈတေပဵၼ်ၽူႈၼမ်း ၼႃႈႁိူၼ်း၊ ၽူႈၼမ်းဝၢၼ်ႈမိူင်းလႄႈသင် ပေႃးမီး ထမ်း 6 ၶေႃႈၼႆႉၸိုင် ၵူၼ်းတင်းၼမ်ၵေႃႈ တေႁၵ်ႉႁူမ်ၸူမ်းပႅင်း ဝၢၼ်ႈမိူင်းၵေႃႈ တိုၼ်းတေၶိုၼ်ႈယႂ်ႇယူႇ ဢမ်ႇႁၢင်ႉယဝ်ႉ ။


ဝၼ်းတီႈ 20/10/2016 ၼၼ်ႉၵေႃႈ ၶၢဝ်းယၢမ်းၵၢင်ၶမ်ႈ သင်ၶၸဝ်ႈလႄႈ ၽူႈၵွၼ်းၸႄႈဝဵင်း ဝဵင်းႁႅင် ႁူမ်ႈၵၼ် တင်းၵူၼ်း မိူင်းၼႂ်းပိုၼ်ႉတီႈ ၸတ်းႁဵတ်းပၢင်တၢင်းလီ ယိူင်းၸူးၸဝ်ႈႁေႃၶမ်းထႆး သႂ်ႇၸိုဝ်ႈ ပၢင်ြတႃးဝႃႈ “ ထမ်းတႃႇၶုၼ် ႁေႃၶမ်း 10 ပိူင်” ။ ပၢင်တၢင်းလီ ယိူင်းၸူးထိုင် ဝိၺၼ်ႇၶႂၼ်ငဝ်း ၸဝ်ႈမုၼ်ယႂ်ႇၶုၼ်ႁေႃၶမ်း မိူင်းထႆး သင်ၶ ၸဝ်ႈ ၽူႈယႂ်ႇၵူၼ်းလူင် ၵူၼ်းၼႂ်းပိုၼ်ႉတီႈ ၶဝ်ႈႁူမ်ႈ တင်းမူတ်းမွၵ်ႈ 1,000 ၵေႃႉ ။ လိူဝ်ၼၼ်ႉ တီႈဝတ်ႉ ပႃႇပဝ်ႈ ၊ ဝတ်ႉၵူႇတဝ်ႈ၊ ၸုမ်းတႆးၼႂ်း ၵဵင်းမႆႇ ၸိူဝ်းၼႆႉၵေႃႈ ဢွၼ်ဢဝ်ပီႈၼွင်ႉတႆး ၸိူဝ်းသဝ်းၼႂ်း ၵဵင်းမႆႇ ၼႄလွင်ႈသဝ်ႈမွင်ၸႂ်၊ တႆႈတဵၼ်း သူင်ႇပွၼ်းထိုင် ၸဝ်ႈမုၼ်ယႂ်ႇ ၶုၼ်ႁေႃၶမ်းထႆး ႁႂ်ႈႁွတ်ႈသူႇ သုၵတိတီႈ ၵတ်းယဵၼ် ။


ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်းၼႆႉ ပဵၼ်ၸဝ်ႈၽူႈလႆႈႁပ်ႉသူးရၢင်းဝလ်း ၸဝ်ႈသုၸၼ်ႇတီႇ Sao Thusandi Leadership Award မိူဝ်ႈပီ 2012 ၊ ပဵၼ်ၽူႈၵေႃႇတင်ႈႁွင်ႈၼႄပိုၼ်း တီႈဝတ်ႉၾႃႉဝဵင်းဢိၼ်း လိူဝ်ၼၼ်ႉၼင်ႇႁိုဝ် ၵူၼ်းမိူင်းၼႂ်းၸိုင်ႈတႆး ပေႃးတေၵႆယၢၼ်ယႃႈမဝ်းၵမ်လႄႈ ႁူႉၽွၼ်းၸႃႉယႃႈမဝ်းၵမ်ၼၼ်ႉ ၸဝ်ႈယေႃးတူဝ်လူင်းပိုၼ်ႉတီႈ ပၼ်တၢင်းႁူႉၵူၼ်းမိူင်းလွင်ႈၽွၼ်းၸႃႉယႃႈမဝ်းၵမ် လၢႆၸႄႈ ဝဵင်းၼႂ်းၸိုင်ႈတႆး ။