ၸဝ်ႈၼႃႈတီႈပလိၵ်ႈ၊ ၾၢႆႇၵူတ်ႇထတ်းၵူၼ်း၊ ၾၢႆႇသိုၵ်း၊ ၾၢႆႇၽွင်းငမ်း ႁူမ်ႈၵၼ်လူင်း ပိုၼ်ႉတီႈ ထဵတ်ႈထွင်ဝတ်းဝႂ် ပီႈၼွင်ႉႁႅင်းၵၢၼ်ယၢၼ်မိူင်း ၼႂ်းၸႄႈတွၼ်ႈၵဵင်းမႆႇ ၸိုင်ႈထႆး ။

မိူဝ်ႈဝၼ်းတီႈ 08-10/11/2016 ၶၢဝ်းယၢမ်းၵၢင်ၼႂ် 05:00 မူင်း ၼၼ်ႉ ၸဝ်ႈၼႃႈ တီႈၾၢႆႇၵူတ်ႇ ထတ်းၵူၼ်း၊ ပလိၵ်ႈ၊ ၾၢႆႇသိုၵ်း၊ ၾၢႆႇၽွင်းငမ်း လူင်းၵူတ်ႇထတ်း တီႈယူႇသဝ်း ၸူဝ်ႈၶၢဝ်းႁႅင်းၵၢၼ်ယၢၼ်မိူင်း(Camp) 2 တီႈ ( 1) တီႈမူႇဝၢၼ်ႈႁူဝ်သိူဝ် ၻွၼ်းၾႆး ဢိူင်ႇဝၢၼ်ႈဝႅၼ် ၊ (2) ဝၢၼ်ႈသႅၼ်သရၢၼ်း ဢိူင်ႇၼွင်ၶႂၢႆး ၸႄႈဝဵင်းႁၢင်ၻူင်း ၸႄႈတွၼ်ႈၵဵင်းမႆႇ ၸိုင်ႈထႆး။ ၸဝ်ႈၼႃႈတီႈႁွင်ႉဢဝ် ပီႈၼွင်ႉႁႅင်းၵၢၼ် မႃးၵူတ်ႇထတ်း ထၢမ်လွင်ႈဝတ်းဝႂ် ပေႃးပဵၼ်ၵူၼ်းၸၢႆးၼုမ်ႇ ၸႂ်ႉထွတ်ႇသိူဝ်ႈ တူၺ်းလဵၼ်းလၢႆးဢၼ်သမ်း/ သၵ်းဝႆႉ ၸွင်ႇလႅပ်ႈပဵၼ်ၵူၼ်းႁၢႆႉဢမ်ႇပဵၼ်၊ ၵူတ်ႇ ထတ်းတွင်ႈထၢမ်ပိုၼ်းၵႅပ်ႈဝႆႉယဝ်ႉ- ဝႃႈၼႆ ။


ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် ပၼ်ပိုၼ်ႉႁူႉႁႅင်းၵၢၼ်ယၢၼ်မိူင်း FM 99.00 MHz လၢတ်ႈဝႃႈ  -“ ပီႈၼွင်ႉႁႅင်းၵၢၼ်တႆးႁဝ်း ၸိူဝ်းယူႇၸွမ်းၶႅမ်ႉ(Camp) ၵေႃႇသၢင်ႈႁႃႉ၊ ၸိူဝ်းယူႇသဝ်း ၸွမ်းၵၼ်ပဵၼ်မူႇပဵၼ်ၸုမ်းႁႃႉ ၸဵမ်ၸိူဝ်းၼႆႉ ႁႂ်ႈဢွၼ်ၵၼ်ဝႆႉသတိသေၵမ်း ယူႇတီႈၸဝ်ႈၼႃႈ တီႈပလိၵ်ႈၶဝ်သေ ၶဝ်ထၢင်ႇထိူမ်တီႈလႂ် တေလူင်းၶဝ်ႈၵူတ်ႇထတ်း ၵႂၢတ်ႇလၢင်ႉ၊ ၸွမ်းသဵၼ်ႈတႃႈ သၢႆတၢင်းၵေႃႈ ႁႂ်ႈဢွၼ်ၵၼ်သႂ်ႇမၢၵ်ႇႁူဝ်ႁႄႉၽေး၊ ႁႂ်ႈပႃးဝတ်းဝႂ် တဵမ်ထူၼ်ႈ သေၸင်ႇၵႂႃႇတႃႈပႆတၢင်း ” ဝႃႈၼႆ ။


ၸဝ်ႈၼႃႈတီႈပလိၵ်ႈပွတ်းတွၼ်ႈ မၢႆ 5 လၢတ်ႈဝႃႈ - “ႁဝ်းၶႃႈတေပၵ်းတႃႈပႂ်ႉတူၺ်း ဢမ်ႇထၢတ်ႇ ၵဵဝ်ႇ လူၺ်ႈလွင်ႈၼႆႉ ၼင်ႇႁိုဝ်တေဢမ်ႇႁၢႆႉႁႅင်းမႃးလိူဝ်ၼႆႉလႄႈ ၼင်ႇႁိုဝ်တေဢမ်ႇပဵၼ်လွင်ႈပႅင်းၸင်း ၵၼ်ၼႂ်းၸိူဝ်ႉၸၢတ်ႈ တေလူင်းၵူတ်ႇထတ်းၸွမ်းပိုၼ်ႉတီႈ ဢၼ်ပီႈၼွင်ႉႁႅင်းၵၢၼ်ယူႇသဝ်း၊ တေလူင်း ၵူတ်ႇထတ်းၸွမ်းတႃႈၸွမ်းတၢင်း၊ တင်ႈလၢၼ်ႇ ၽွင်းၵၢင်ၶိုၼ်း 11:00-03:00 ပိူဝ်ႈတေၸွမ်းႁႃ တူဝ်ၵူၼ်းႁၢႆႉမႃးပၼ်တူတ်ႈတၢမ်ႇ” - ဝႃႈၼႆ ။


ၸွမ်းၼင်ႇဢၼ် မီးၶၢဝ်ႇဢွၵ်ႇမႃးဝႃႈ မီးၸုမ်းၵူၼ်းၼုမ်ႇဢၼ်သႂ်ႇၸိုဝ်ႈဝႃႈ ၵႅင်ႊသႃႊမူႊရႆႊ K Black  ဢၼ်ဝႃႈပဵၼ်ၵူၼ်းၼုမ်ႇတႆးၼၼ်ႉ ဢွၵ်ႇႁဵတ်းလွင်ႈဢမ်ႇၼိမ်သဝ်းၼႂ်းပိုၼ်ႉ တီႈလႄႈ  ႁဵတ်းႁႂ်ႈၸဝ်ႈၼႃႈတီႈပလိၵ်ႈထႆး ၵႂႃႇၵူတ်ႇထတ်းၼႂ်းပိုၼ်ႉတီႈ ဢၼ်ပီႈၼွင်ႉႁႅင်း ၵၢၼ်ယၢၼ်မိူင်းယူႇ ပိူင်လူင်မၼ်းပဵၼ်တီႈဢၼ်တႆးယူႇသဝ်းၼမ် ၼႆယဝ်ႉ ။